mi(sual).com

HUN KAL MEK : THANGTHARTE HUNLAI(1970-2011/2020)

Kum 1972-ah Mizoram chu Union Territory-ah hlan kai a lo ni a, ram inrelbawl dan pawhin hma a sâwn phah hle a. Mipui thuhlaril pawhin zalen leh zâu zawkin hma a sâwn ve nghal a. Thuhlaril lama harh tharna boruak muanawm leh tha tak alo piang ta zut zut a ni.

Hun kal mek-thangtharte hun kan thlir turah hian mimal tlemte chauh, an kutchhuak chhui tlak leh belhchiandawl zual tak tak chauhte lo thlir ila.

Chutah pawh chuan hla phuahtu, lemchan ziaktu leh thutluang ziaktu titein then hrang tawhlo mai ila. A chhan chu kan mimal chhuizau turte hian a tlangpuiin heng zingah hian kutchhuak thu leh hla an lo neih deuh vek vang a ni.

A) MIZO THUHLARIL HUN KAL MEKA A MI PAWIMAWH TE:

KHAWLKUNGI(1927- ): Khawlkungi hi Mizo hmeichhe zingah chuan Lemchan thawnthu ziak kawnga inhmang nasa ber leh inhmang lar ber a ni awm e. Kum 1927, September ni 14 khan Aizawl-a Mission Vengthlangah a lo piang a. A pa chu H.Chhuma niin a nu chu Kaii a ni. Lemchan thawnthu leh thawnthu phuah a thiam hle a, thawnthu tam tak a letling bawk.

Thawnthu chi hrang hrang a remkhawm leh a lem chan tur hrim hrim a ziak hi 20 chuang a nei a. Sap thawnthu leh Mizo thawnthu behchhana siam, lemchan thawnthu a nei nual bawk. A kutchhuak lemchan thawnthu lar deuhte chu- ZAWLPALA THLAN TLANGAH, PANGPAR BAWM, A VA PAWI EM, MONU SUAL, tHANGTHAR NUN, PHUBA, RAMMAWI KALKAWNG tih te hi a ni.

Thawnthu(Novel) ZAWLPALA THLAN TLANG tih a ziah chu a lar hle bawk. Thuhlaril lama a thawh hlawk em avang hian kum 1987 khan India ram chawimawina ropui tak Padma Shri in Literature a dawng hial a ni.

JAMES DOKHUMA(1932-2008): Zofate zingah thu ziak mi leh Mizo tawng thiamte kalkhawmnaa a tlar hmasa lam kawhhmuh ngei tur James Dokhuma hi kum 1932, June ni 15 khan Hrangchina leh Kapkungite inkarah Sialsuk khuaah a lo piang a. Kum 2008 khan a boral ta a ni. Thuziak leh phuah a thiam vangin India ram chawimawina sang Padma Shri in Literature(1985) leh Bhasa Saman(1997) a dawn bakah International University California,USA chuan Doctorate Degree(1997) a pe bawk.

Thutluang ziaktu leh hla phuah thiam a ni a. Lehkhabu thahnem tham tak a ziak tawh a, thuziak peng hrang hrang hi khawih loh a hleih pawh a nei lo hial awm e. A thawnthu phuah zinga lar deuhte chu-THLA HLEINGA ZAN, RINAWMNA, KHAWHAR IN, SILAIMU NGAIHAWM, TUMPANGCHAL NGE SAITHANGPUII tih te hi a ni a. Thutluang ziak tam tak a nei bawk a. ZORAM TUALtO KOHHRAN CHANCHIN, HMANLAI MIZO KALPHUNG, tAWNG UN HRILHFIAHNA te hi a tha in a lar hle bawk.

Chhamhla phuah a thiamin a chhamhla bu hial a ti chhuak a, a chhamhla zingah hian-A tak chu khawiah nge, Siamtu Khuarel, Au ral ral, Oh Delhi, Pi pu Sulhnu, Thu reng kan nei si lo tih te hi a lar hle bawk. Thufun(Essay) tam tak a ziak a. Lemchan thawnthu- TUMNA CHU A HLAWHTLING tHIN, HMASAWNNA, HAUSAK AIIN HRISELNA A HLU ZAWK, FINNA HMAHRUAI tih te a ziak bawk.

C.LALKHAWLIANA(1937- ): C.Lalkhawliana hi kum 1937, July ni 24 khan Reiek khuaah a lo piang a, a pa chu Selluaia a ni a, a nu chu Darluti a ni. Kum 1966-a Mizoram a buai hma khan MNF dintute zingah a tel a. Ram inrelbawlna lam hi a tuipui hle a ni. Tunah hian kum 1970 atanga a tihchhuah Highlander(Sap tawng chanchinbu) chu a la enkawl char char a ni.

Hla phuah thiam tak a ni a, a saka sak chi leh chhamhla eng’emaw zat a phuah a. A chhamhla pakhat Ralthatchhunga(Taitesena) phei chu a sei tha khawp mai. A saka sak tur chi a phuah zingah-Kumsul liam hnu, Siamtu remruat, Lalpa fakin zai ru, Sensiari tih te hi a larpui hle a. A hla te hi Pathian hla, hla lenglawng, lengzem hla leh hnamvoh hla(Patriotic song) te a ni hlawm. A kutchhuakte hi ngun taka kan thlir chuan amah hi Songwriter-cum-poet tih tur huanga awm a ni.

C.CHHUANVAWRA(1941- ): C.Chhuanvawra hi kum 1941, October ni 14 khan a lo piang a. A pa chu Hrangthiauva, Mizo hnam chanchin ziaktu hi a ni. C.Chhuanvawra hian Chhamhla leh thluk nei hla 60 chuang a phuah tawh a. Chung zinga 59 chu lehkhabu pakhat ZO KUNG tih bu ah khung khawmin kum 2005 khan a chhuah a ni.

A chhamhla zingah chuan- Mingo tian r’u, Zun, Chapchar Kut, Mizo hnahthlak inpumkhatna tih te hi a larpui hle. Thu leh hla lamah hian a tui hle a. Ram pum huapa thu leh hla inziahsiakah tum nga lai lawmman pakhatna a dawng tawh a, lawmman dang pawh a dawng hnem hle. Mizo chanchin hlui chhui kawngah a thawk ngawrh hle a, Mizo hnam chanchin pawh a hre hle a ni.

Amah hi Mizo tawng duhtui leh thiam tak a ni a. Mizo tawng zir zauna lam lehkhabu pawh a tichhuak a. Thuziak(Article) 100 chuang fe vantlang chhiar theih turin a tichhuak tawh bawk. Thupui pawimawh bik chaiin Zirbingna thuziak(Seminar Paper) 20 chuang a ziak bawk a. Khawtlang thil chi hrang hrangah a inhmangin chanvo pawimawh tak tak a chelh mek a ni.

B.LALTHANGLIANA(1945- ): B.Lalthangliana hi Khawbung khua Ringchina leh Thanglianpuii te fapa, kum 1945, June ni 16-a piang a ni a. Thiamna lamah M.A. niin Madalay University -ah kum 10 lai Zirtirtu hna a thawk a. Kum 1986-ah Mizoramah a rawn chhuk thla ta a ni. Kum 1970 chho atangin thu hi a ziak tan a.

A lehkhabu hmasa ber, Kawl tawnga ziak HISTORY OF MIZORAM IN BURMA chu kum 1975 khan a chhuah a. Chumi atanga kum 10 vel chhung chu a thuziak hmangin Mizoram hi a rawn ralsai thin a ni. Kum 1986-a amah ngei alo chhuk thlak hma pawh hian Mizo chanchin leh a tobul chhui chungchangah chuan tlang rin a kai hman tawh hle.

B.Lalthangliana hian thuziak lamah hnuhma a ngah hle a. Hnam chanchin chhui mi(Historian) a nih rualin Mi chanchin ziaktu(Biographer) nih a kawp thiam bawk. Thil chhui mi a nih zia chu KA LUNGKHAM(1989) te, MIZO LITERATURE(1993) leh ziak mi dang- Kaphleia, C.thuamluaia, Thanpuii Pa, Zikpuii Pa leh midangte kutchhuak a khawn khawm leh a remkhawm danah hian a chiang a. Mizo thuhlaril tobul leh hmasawn dan a ti chhuak tawh a. Mizo hnam chanchin leh nunphung lam te, lal chanchin leh thil hlui chhui a bang chuang lo bawk.

Hnam chanchin chhui mi a nihna bakah chuan mi thuziak thlifimtu(Critic) a ni tel bawk a. A hnathawh chhoh dan han en hian mi ropui leh chhuanawm tak a ni tih a langchiang hle a ni. Chutiangin, PATEA LEH DAMHAUHA HNUHMA(1986) atanga THANPUII PA KUTCHHUAK(1994), a thuziak chi hrang hrang a dahkhawmna CHAWNPUI(2004) bu thlengin thil chhuina chi thuziak leh lehkhabu a ngah tawh hle a.

Thawnthu, Lemchan leh hla a phuah thawm kan hre lo na a, midang ziakmite kutchhuak hai chhuah, fawmkhawm leh chik zawka thlir sak kawngah chuan a ni aia thawk nasa leh thawh hlawk zawk hi an tam kher awm lo ve. Mizo chanchin chhuina bu chhah fe fe a ziak bawk a. A zarah mi tam takin chiang zawkin kan hnam chanchin kan hriat theih phah a ni.

LALENGMAWIA RALTE(1947- ): Lalengmawia Ralte hi Lalliana Ralte leh Lalve-i te fapa niin kum 1947, October ni 14 khan a lo piang a. Kum 1969-1970 vel atanga lehkha ziak tanin thu chi hrang hrang a ziak a. Lemchan thawnthu te ziakin, hla te a phuah a. Thufun(Essay) tam tham tak a ziak bawk. Thawnthu phuah hi a inhmanna ber a ni a. Kum 1980 khan a thawnthu chhuah hmasak ber I TAN A TAWK tih chu mipui chhiar theihin theh darh a ni a.

Kum 1986-a chhut nawn ngai khawpin mite’n an hlut a ni. Chumi hnu ah BEIDAWN MAI LOVAH(1981), A SAWT TAWH LO(1981) ENGVANGIN NGE(1982) tih te chuan a rawn dawt chho zut tawh a. Kum 1980 atanga kum 1990 inkarah khan kum tin lehkhabu pahnih khat tal chu a chhuah ziah a ni. Thawnthu a phuah leh buatsaih 40 vel zinga 18 chu lehkhabua chhuah a ni tawh a. A thawnthu phuahte hi ‘nun siamthatna lam hawi’ deuh vek a ni hlawm.

Thawnthu phuahtu Lalengmawia Ralte thil hmuh chhuah zinga pawimawh tak pakhat chu mahni hnam thil ngaihsan lohna hi niin a lang. Mizo nula leh tlangvalte hian Mizo thil ai chuan Sap leh hnam dang thil ngaihsan an chingin a hria a. Chuvangin, a thawnthu phuahah pawh Mizo hming phuah lovin Sap hming a phuah fer fur a.

A thawnthu bu hming atan pawh Sap tawng tha zawkin a ring thin a, HONEY MOON(1985), ETERNAL BLISS(1985), NEVER LEAVE ME ALONE(1987) te a hmang hial a ni. Lemchan thawnthu NAUSEN VANG(1988) te, KHAWIAH NGE(1988) te a ziak bawk a. A lemchan leh thawnthu phuah leh thuziak dangte hian Mizo thuhlaril hi a tihausa hle a ni.

LALSANGZUALI SAILO(1949-2007): Vanchhuma Sailo leh Sapthangi Chawngthu te fanu Lalsangzuali Sailo hi kum 1949, May ni 15 khan Thingsai khuaah a lo piang a. Mizo hmeichhe zinga thu leh hla lama thawh hlawk ber pawl a ni. Hla phuah a thiamin a phuah hnem hle a, a saka sak chi 360 chuang leh chhamhla eng’emaw zat a phuah a ni.

Amah hi zai thiam lar tak a ni a, AIR Aizawlah hian hla 500 chuang a khung tawh a, Kaset(Music Cassette) 12 chuang a siam bawk. Lengzem hla a sak lai phei chuan Mizoram, dung leh vangah hian a lar em em a, hre lo fa hi an awm lo hial ang tih tur a ni.

Lehkha ziak lama tui tak a ni bawk a, lehkhabu pawh 25 lai a ziak a ni. A lehkhabu ziah tawh zinga lar deuh te chu- KULVA, SAKHMING CHUL LO, TLAWM VE LO ROPUILIANI leh a hla phuah bu hnihte hi a ni. Thu leh hla lama a kutchhuak hlu takte avangin kum 1997 khan India ram chawimawina sang Padma Shri in Literature a dawng a. Mizo Academy of Letters pek Book of the Year-1999 te, Pu Buanga Award leh chawimawina dang dang a dawng tawh bawk.

SIAMKIMA KHAWLHRING (1938-1992): Siamkima Khawlhring hi Mizo thuhlaril than chhohna atan hian a pawimawhin a thawh hlawk hle a, English literature(Sap thuhlaril) a tuipui em em laiin, Mizo thuhlaril lamah a rawn in let a. Mizoramin kum 1972-a Union Territory kan hmuh hnu lawk atangin MZP chanchinbu a rawn enkawl ta a. Chu chuan thuhlaril hmangin mihring zalenna upbeh chu rawn parchhuah tir ta bawk a. Amah avangin mi tam takin thuziak lamah tan an la chho va.

Siamkima hmalakna avangin thuhlarilin nasa takin hma a sawn chho kan ti lo thei lo a ni. Siamkima hian Mizo thuhlaril-a a rawn sin luh ber chu Thuziak thlitfimna (Criticism) hi a ni a.Heti ang lam hi Siamkima hian a rawn thawk chho nasa hle a, ziaktu tam takin an hlawkpuiin an than phah nasa em em a ni. Thufun(Essay) ziak kawngah hian midang a chawk phur hle bawk a, kutchhuak eng’emaw zat a nei ve a.

Kum 1986-a a chhuah ZALENNA RAM tih bu-ah Thufun(Essay) tha tak tak leh thutluang tha tak tak a dahkhawm a. Rihdil leh Mizoram, Hun hi leh Bethlehem dai tih a ziak te hi ngaihnawm tak a ni. Kum 1978-ah lehkhabu KA ZINNA RAM a chhuah a, hei hian lehkhabu tam tak a hring chhuak ti ila, kan sawi sual tam awm lo ve. Thlitfimna lama sulsutu a nih avangin Father of Mizo Literary Criticism tih tlakah mi tam tak chuan an ngai hial a ni.

LIANSAILOVA(1949- ): Liansailova hi kum 1949, October ni 21 ah a lo piang a. Pu Vana leh Vanthuami te fapa a ni. Lemchan thawnthu ziak thiam a ni a, lemchan huaihawt vel pawh a taimain a thiam hle. Lemchan thawnthu eng’emaw zat a ziak tawh a.

Chung zinga palite chu lehkhabu pakhatah a siam a. Chu lehkhabu LAWM A KIM tih chu kum 1989 khan a chhuah a, chuta lemchan thawnthu te chu- LAWM A KIM, DUAIA DUAI BIK LO, KRISMAS DRAMA, TLAI NGAI LO PATHIAN tih te a ni. A lemchan ziah dang- BEIDAWNG MAI LOVIN tih leh ZOVI TE CHHUNG tihte hi a larpui hle a. Lemchan tawi eng’emaw zat a ziah tawh bakah, thawnthu awmsa atanga a phuahrem(dramatised) a nei nual bawk.

R.L.THANMAWIA(1954- ): Hla lam zirbinga thiamna bik nei R.L.Thanmawia hi kum 1954, June ni 20 khan Darlak khuaah a lo piang a. A pa chu Vanlalliana niin a nu chu Vanlalliani a ni. Lekkha zir taima a ni a, kum 1989 khan Mizo hla chung changah Ph.D a zo a, a Thesis chu Development of Mizo Poetry a ni. Kum 1983-2004 thleng Pachhunga University College-ah Mizo Lecturer hna a thawh hnuin, kum 2004 atang khan Reader hna Mizoram University-a Mizo Department-ah a zawm leh ta a ni.

Mizo Academy of Letters-ah Ziaktu hna(Secretary) hun rei tak a chelh a. Thu leh Hla chanchinbu enkawltu(Editor)-ah kum 12 chhung a tang bawk. Lehkhabu 10 chuang fe a ziak tawh a, a la ziah belh mek bawk a ni. thiante nena thawk hova tih chhuah a ngah tawh tawh viau a. Zirna leh rawngbawlna thilah a thuziak chhiarin hmun hrang hrangah a kalchhuak thin. Zirbingna thuziak(Seminar Paper) hi 30 chuang a ziak tawh nghe nghe.

Thu leh hlaa tui mi tak a ni a, hla lamah hian a tui zual a. HLA THU HRILHFIAHNA bu hial a chhuah a. Thufun(Essays) 100 chuang fe a ziak tawh a, chung zinga 30 vel chu chhung khawmin CHUAILO tih bu ati chhuak a. Hla phuahtu pianphunga rualbanlote chanchin leh an hla tarlanna lehkhabu ZINKAWNG RAPTHLAK ZAWHTUTE a chhuah tawh bawk a.

Chhamhla hi 30 chuang a phuah tawh a, chung zinga 20 vel chu SENMEI tih bu-ah a ti chhuak tawh nghe nghe. A chhamhla phuah zingah hian- Damlai Pialral, Zingtian, Enna ropui, Zawla leh Tualvungi, Huan, Boruak lawngleng tih te hi a lar hle.

C.LAIZAWNA(1959- ): C.Laizawna hi Tualpui khuaah Kum 1959 khan a lo piang a. A pa chu Manvela niin a nu chu Lalduhi a ni. Kum 1982 vel atangin thu a ziak tan a. A lehkhabu chhut chhuah hmasak ber chu Lemchan thawnthu KAN TIAM TAWH SI(1982) hi a ni. He lemchan thawnthu hi lungdi hmangaihna(Romantic love) chung chang a ni a, boruak hlimawma tawp chi(Comedy) a ni nghe nghe.

Lehkhabu chi hrang hrang- NUPA HLIM NAN, FA ENKAWL DAN, NUN HRUAITU, ENGKIM HLAWKNA tih te a ziak zel a. Chanchinbu leh lehkhabu danga a thuziakte nen chuan Mizo tawnga thutluang a ziah tawhte hi a thahnem tham hle.

Thawnthu phuah lamah C.Laizawna hian kutchhuak a ngah hle a. Phuahchawp thawnthu tawi ziak lamah phei chuan kutchhuak ngah ber a ni hial awm e. Nula leh tlangval inhmangaihna lam hawi thawnthu 20 chuang fe a ziak tawh a. Kum 1985 atang khan a chhuah tan a, a tan kum hian bu 5 ngawt-THURUK, HMANGAIH ZIRI, LEI THEIH LOH RUALI, HMAITHINGHAWN, I TA KA NI SI tih te a chhuah a ni.

Thawnthu pangngai(Novel) lamah hian a chhuanawm zual a, thawnthu tha tak tak- HMANGAIHZUALI(1990), ZIZYPHUS(1990), KA PHAL LO(1991), K.S. MIN TI MAW(1992(, KA THLANG ZAWK(1993) te a ziak a. Heng zinga a ziak pakhat HMANGAIHZUALI tih phei chu Mizo Academy of Letters chuan kum 1990 chhunga Mizo tawng lehkhabu chhuak zinga tha ber, Book of the Year-1990 atan a thlang nghe nghe.

Chu mai bakah, kum 1998 khan ANITA tih thawnthu ngaihnawm tak mai a ziak leh a. Chu pawh chu Lehkhabu tha ber(Book of the Year-1998) atan Mizo Academy of Letters chuan a thlang leh a ni.

LALTLUANGLIANA KHIANGTE(1961- ): Zofate thuhlaril vanlaizawla arsi eng ber pakhat Laltluangliana Khiangte hi kum 1961, June ni 28 khan Saitual khuaah a lo piang a. A pa chu Tlanghmingthanga a ni a, a nu chu Darngeni a ni. A pu Rev.Liangkhaia chu Zofate zinga Mizo Academy Award dawng hmasa ber a ni a, L.Biakliana(Rev.Liangkhaia fapa) chu Mizo thawnthu(Novel) ziak hmasa bertu a ni bawk.

Thlahtute’n an zir bawk a, ani pawhin kawng dang zawh bik lovin thuziak rawngbawlna, Pathian leh ram tan a thawk a ni. Thiamna lamah chuan M.A., Ph.D.,D.Litt., a ni a. Tunah hian Mizoram University-ah Professor a ni.

Lehkha chhiar leh ziak peih tak niin kum 1977 atang khan thu a ziak tan a. Sap tawng leh Mizo tawngin lehkhabu 30 chuang fe a buatsaih tawh a. Lemchan lam buaipui zualin Lemchan thawnthu 30 chuang a ziak zinga 17 zet chu chhuah a ni tawh a ni. A thuziak chi hrang hrang 700 chuang chu chanchinbu leh lehkhabu danga chhuah a ni a. Thupui zirho chi(Seminar Paper) hi 150 chuang zet a ziak tawh bawk. Chung zinga 50 chuang chu Sap tawnga ziak a ni a, tam tak chhuah tawh a ni.

Chhamhla hi 100 chuang fe a phuah tawh a, a hla te hi ROCHUAM(2006) tih lehkhabu ah 66 khung a ni a, THLIFIM(2001) leh lehkhabu dang 50 chuangah phochhuah a ni bawk. Sap tawnga chhamhla a phuah ho te pawh MIZO SONGS & FOLKTALES(2002) leh WORLD LITERATURE(2005) bu bakah lehkhabu dang leh Magazine dang dangah a lang ve zauh zauh tawh bawk.

Thuhlaril lama a kutchhuat hlu tak takte avang hian India ram chawimawina sang Padma Shri in Literature&Education chu kum 2006 khan hlan a ni a. Hei bakah hian Rastriya Lok Bhasha Samman(2003), Bharat Adivasi Samman(2005) leh Book of the Year-1997 bakah chawimawina dang dang a dawng teuh tawh a ni.

V.THANGZAMA (1931- ): V.Thangzama hi kum 1931 khan a lo piang a. Amah hi Hla lama tui tak a ni a, hla chham chi leh sak chi hi 40 vel lai chu a phuah tawh a. A hla phuah zingah- Van aw mawi ri chu ngai r’u, Tho la ding ta che, Hmanah Pi pu zaleng rual te hi mi sak duh chi, sak nuam tak a ni hlawm. Hla dang pawh tha tak tak a phuah bawk. A hla thenkhat te hi chu Sap tawng a lehlin a ni tawh a ni.

LALZUAHLIANA(1962- ): F.Darchhunga leh Laibati te fatlum ber Lalzuahliana hi kum 1962 khan a lo piang a, Faiheng hnam a ni. Vantlangin amah hi hla phuah thiam(Songwriter) ang chuan an hmelhriat hauh lo ang a, mahse, chhamhla phuah kawngah erawh chuan a duailo hle. A chhamhla bu hmasa ber LUNGMAWL SELIN tih chu kum 1989 khan a chhuah a. Kum 1997 khan chhamhla leh thawnthu tawi chuanna SARUAK HLIMTHLA a ziak chu a chhuah leh bawk.

Lalzuahliana hla te hi vawi khat chhiara hriatthiam mai har tak a ni hlawm a. Mi thenkhat tan chuan chhiar nawn fo pawha chiang zo chuang lo turte pawh a awm mai thei. Amaherawh chu, Mizo chhamhla tihausatute zingah chuan a tel ve ngei mai a. A kutchhuak ngaihlu ho te erawh chuan an sawizau thiam hle. Thuhlarila tuimite tan chuan amah leh a hlate hi enliam ngawt theih a ni lo. A chhamhla phuah thenkhatte chu- Chawimawina, Kan chenna, Beiseina thar se, Chawngchilh Di, Zirlai, Nula,tih te hi a ni.

ZIAKMI LEH HLA PHUAHTU DANGTE:
An chanchin kan tarlan loh midang tam tak, ziakmi leh hla phuahtu an awm a, chung zingah chuan L.Keivom te, R.K.Lalhluna te, Lalzuia Colney te, R.Lalrawna te, C.Lianmawia te, H.Lallungmuana te, C.Lalsiamthanga te, Lalsiama te, Lalchungnunga te, Daichuailova Renthlei te, Vanneihtluanga te, Darchhawna te, P.L.Liandinga te, Zirsangzela te, H.Lalrinfela te, C.Lalnunchanga te hi thangtharte hunah hian an lar hle a ni.

TLANGKAWMNA: Mizo thuhlaril hmasawn dan leh a thanchhohna kawnga mi pawimawh kan tarlan a tanga kan hriat theih thil pawimawh tak takte chu lo hengte hi a ni:

1) Kum 1870 vel atangin ziakin Mizo thuhlaril hi a lo intan a. Hemi hma pawh hian thuhlaril tam tak chu Zofate’n kan nei tawh ngei mai. Mahse, ziaka vawnthat chu kum 1870 bawr chho atang chauhvin kan nei a. Kan hnam nunphung thlak danglam dawrhtu, ziaka thuhlaril lo siama lo phuahchhuaktute hi an la hlu chho zel dawn a ni.

2) Mizo thuhlaril hunpui inthen chhoh dan chi li- Sap ho hunlai(1870-1894), Zosap hun lai(1894-1920), Hranghluite hun lai(1920-1970) leh thangtharte hun lai(1970-2011t2020) inkara Mizo thuhlaril tihmasawntu kan tarlan bakah hian kutchhuak nei tha dang pawh an la awm ngeiin a rinawm a. Chungte chu chipchiar zawka tarlan sen an nih loh avangin a pawimawh zual tak meuh meuh kan sawizau ta mai a ni.

3) Kan sawizauna huangah hian Thutluang(Prose), Hla(SongtPoem) leh Lemchan(Drama) lam hi kan sawi vung hle a. Heng thlur thumte kalpuittesep hrang hrang- Fakselna(Criticism), Thufun(Essay), Thuziak tawi(Article), Lehlin lehkhabu(Translate), Ramfan thuziak(Travelogue), Mimal chanchin ziahna leh Midang chanchin ziahnate hi kan hrut tel zauh zauh chauh a. A chhan chu heng thlur thumte hian a hailan that tho vang a ni.

4) Rualbanlo zingah thuhlarila hnuhma hrawl tak tak, hnam ro tling nei an awm nual a. Chung mite chuan an rualbanlohna chu thuhlaril tihhausak nan an hmang hlauh thung thin. 1

5) Thuhlaril huangah hian khawvel huap pawha kan thlirin hmeichhiate hi an tam lo khawp mai a. Mizo zingah erawh chuan kan hmeichhiate hi an duai lo hle a. Thuhlaril tihhmasawnna kawnga an kutchhuakte hian ram leh hnam nasa takin a tidanglam a ni.

6) Thuhlaril hmasawnnain a chim chin a san chak zia hian Zofate hi hnam namailo tak, puakchhuah tur thu leh hla nei tha tak kan nih zia a tilang chiang hle a. Kan tawngkauchheh hausak zia leh hla thu kan neih that zia te, ziakfung hmanga thuhlaril ke kan pentirna kawngah kan nep bik loh zia te a tarlang chiang hle a. Kan ram hmasawnna hi kan thuhlaril thanchhoh chak dan mila kal a ni atih theih hial awm e.

7) Tunlai dinhmun kan thlir chuan thuhlaril hmasawnna kawngah Zofate hi kan harhchhuak chak hle niin a lang a. Thuziak tha tak tak a piang zung zung a, hla thar tha tak tak a lo chhuak zel a. Chanchinbu leh lehkhabu tha tak tak a pung tual tual a. Ziakmi leh phuahtu mi thar an tam zel a. Thuziak leh phuah hlutna kan hre chho tan zel niin a lang bawk.

LEHKHABU RAWNTE:

1.Khiangte,Dr.Laltluangliana : Thuhlaril (Literary Trends & History of Mizo Literature), College Text Book (Mizo) Editorial Board Publications, Aizawl, 2nd ed., 1997.
2.Khiangte,Dr. Laltluangliana : Mizo lehkhabu zempui (A Compedium of Mizo Bibliography), Published by Mizo Department University, Aizawl, 2005.
3.Khiangte,Dr. Laltluangliana : Mizo Hla Leh Chhamhlate, L.T.L. Publications, Aizawl, 1st edtion., 2009.
4.Khiangte,Dr. Laltluangliana : Lehkhabu Ramtiam, L.T.L. Publications, Aizawl : 1993.
5.Khiangte, Dr. Laltluangliana : Biakliana Robawm, L.T.L. Publications, Aizawl, 2nd edition., 2007.
6.Khiangte,Dr. Laltluangliana : Mizo Hlahril Thlan Chhuahte, L.T.L.Publications, Aizawl : 2006.
7.Khiangte,Dr. Laltluangliana : Capt. L.Z.Sailo(Padma Bhusan Awardee), L.T.L.Publications, Aizawl, 2007.
8.Lalthangliana, B.(Editor.) : Mizo Hla Leh A Phuahtute, Hrangbana College, Aizawl, 1st editon., 1999.
9.Lalthangliana, B.: Mizo Literature (Mizo Thu leh Hla), M.C.Lalrinthanga, Aizawl, 2nd editon, 2004.
10.BA zirlai thu, thawnthu tawi leh Hlate : Ainawn, College text book (MIZO) Editorial Board (CTBEB) Publication, Aizawl, 2nd edition, 2008.
11.Mizo Academy of Letters : Zo Kalsiam, Aizawl,1997
12.Liangkhaia, Rev : Mizo Chanchin, LTL Publication, 5th edition, 2002.
13.Dr.Thanmawia, R.L.: Zinkawng Rapthlak Zawhtute, Aizawl, 2004.
14. Vanlawma,R.: Awithangpa, Aizawl, 1989.
15.Pazawna,V. : Hla Chhui Zauna, Kolasib, 2002

Similar Posts:

• Mizo thuhlaril hmasawn dan – Part 4
• Mizo Thuhlaril Hmasawn Dan Part-I
• Mizo thuhlaril hmasawn dan – Part 2
• Siamkima Khawlhring
• Mizo thuhlaril hmasawn dan – Part 3

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, September 27th, 2011 at 7:30 pm and is filed under Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.