mi(sual).com

Nula pakhat piangthar chuan China rama kal turin kohna a dawng tlat mai a;mahse a nu chuan a phal tlat lo mai. Nula chu a tum ruh si, a nu lahin a phal lo nasa bawk si. Nu leh fanu inkarah indona a chhuak ta a, a nu chuan, “Ka phal lo a ni. Mi enkawltu tur i ni a, i kal lui dawn a nih pawhin ka ruang i kalsan ang,” a ti a.

A nu thupek leh Pathian kohna indona karah nula chuan duh a thlan a ngai ta a ni. Pathian kohna chhân chu a thlang a, a inbuatsaih zui ta a. A nu nen chuan an thu a inhmutawh lo. Chutiang hun chu kraws-in mihring a ṭhen hun a ni. Kraws kawng zawh tura khawvel kalsan a harsat hian nu leh pa te, u leh nau te nena inthurual theih loh hun a ni.Nakinah chuan a nu chu a damlo ta a, athi ta nghe nghe a.

A thih dawn ṭepah a rilru a lam let hman a. “Ka lo tidik lo ani.Ka fanu hian a lo tidik zawk a ni,” tiin a sawi an ti. Nula chu a nu dam loh vang a la awm pawh a ni lo va, a la inbuatsaih rih vang a ni a. A zirnate a zawh hnu chuan daltu awm lovin a kal ta a. A nu ruang chu a kalsan ta a ni.

Nula hian a nu a tuithlar duh a ni lo va, Isua a hmangaih zawk a ni.“Tupawh ka hnena lo kal chuan a pa te, a nu te, anupui te, a fa te, a unau te, a farnu te, ama nun nen lam a huat loh chuan ka zirtir a ni thei lo vang ,” Lal Isuan a ti. Kan Lalpa ruala misual pahnih an khenbeh (Lk. 23:32,33) te kha engati nge a vei lam ve ve-ah emaw, a ding lam ve ve-ah emaw an khenbeh loh? Engatinge Isua kha a laiah an khenbeh? A khengbettute khan chhan mumal neia ti an ni kher lo vang a; mahse anni’n an thiltih awmzia an hre lo na a, Pathian remruat ni ngeiin a lang.

Kraws chuan mihring a ṭhen darh a ni. Misual, sualna thuhmun, hremna leh thihna thuhmun tuar tur an ni a; mahse mihring ṭhendarhtu -kraws chu – a lo kartla ta a. Inkawp tlatṭhinte karah chhandamtu a lo awm a.Vawiinah hian pakhat zawk chu vanah malsawmna tinreng dawngin a awm a, aṭhianpa erawh chu na tinreng tuarin hremhmunah a awm. An tâwp dan a thuhmun ta lo.

Chatuanin an inhmu leh tawh lo vang pakhat ropuinaah a lut a, pakhatin anchhia a dawng ta. Lal Isua pawmtu leh hnartute chu ṭhian pawh an inṭhen ang a, laina an inṭhen ang. Kraws kawng chu inṭhenna kawng a ni.Nula piangthar dang ve thung chuan India rama kal turin kohna a hmu a. A nu chu piangthar lo a ni a. Ani chuan a fanu chu hmun danga kal lovin amah enkawlturin a duh a. Nula ṭhiante pawh chuan anu enkawl chu ṭha an tihsak a,“Chhungkuaah kan ṭan phawt tur a ni ,” anti a hlawm a, a nu chu Lal Isua hnena hruai tum hmasa turin an hrilh a ni.

Mahse a kohna hmuh chu hnar chi niin a hre silo. A nu te, a laina dang leh a ṭhian ngaih êm êm te chu thihsan a thlang ta. Minunrawng nih a hlawh dawn. Enkawl ngai ngawih ngawih mahni hringtu nu kalsan chu a nunchhiatthlak a ni. Mahse Lal Isua zuiin India ram a pan ta a.

A Lalpa ruala ‘bawhchhetute zinga chhiar tel ’nih chu a thlang ta. A tan khawvel chu khenbehin a awm ta a, ani pawh khawveltan khenbehin a awm ta a nih chu. Nu leh fanu inkarah chuan kraws chu a dinga. Kraws lehlamah a nu chu‘bawhchhiatna leh thihna’ hmunah chuan a kalsan ta. Kraws chuan nufa atiṭhen a. A nu mit hmuhah Krista chu khenbeha lantirin a awm ta a ni. “Kei lei a ta khai kana ka awm chuan mi zawng zawng ka lamah ka hip ang ,” Lal Isuan a ti.

A fanu chu a ngaihtuah apiangin Krista leh a kraws chu hmuh tel loh ruala ni ta lo va. Isua lama hip a nih dan chua hrehawm chi a ni. Nula pawh khan anu chu a theihnghilh thei lo. Nimahselaa nu chu thihsan zeta Krista tana nun athlang ta a ni. Kum tam fe hnuah chuan châwlh lain a hawng a, a nu pawh Krista hnenah a hruai ve ta nghe nghe a. A chawlh chhungin a nu chu thlamuangtakin, nunna thar neiin a thi ta a ni.

Lal Isua pawhin Pa hnena min hruai theihnan kraws thihna a tuar a, kan hmangaihberte Lalpa hnena kan hruai theih nanpawh tuar a ngai ve a ni. Lal Isuan i hlawhnate hi chan ila tih hi kraws kawng zawh dan a ni.Kraws thu hi engtin nge kan ngaihthlak ṭhin le? Kan chhungkaw tan Pathian malsawmna kan duh.

Kan fate pawh piangthar ngei se kan ti. Amaherawhchu eng ang chiahin nge awm se kan duh? Kraws kawng hi zawh ve se kan duh takzet em? Lal Isuan a lokal chhan a sawi chu “Khawvela rem lentir tura lo kal emaw mi ti elo? Hnai love, ka hrilh a che u, do lentir tura lo kal ka ni; tun hnuah chuan chhung khatah mi panga an indo ang, pathumin pahnih,pahnihin pathum …” (Lk. 12:51ff) tih anih kha.

Kan fate hi piangthar sela, Lal Isua zuiin kraws kawng zawh ve tak tak se kan ti em? Mahni in lum kalsana an zar kan zo phak lohva awm tura kan phal pawh a ngai mai thei. Kraws chuan mihring inlainatna leh inngainatna te hi khandaiha sah angin a sat chhum a, lei dana inthlahlel em em te pawh pakhatin kraws a vuan a, pakhatin a kalsan a, duhzawng athu hmun ta lo. Laina an inṭhen a,ṭhianṭha te, pa leh fa te, nu leh fate pawh an inṭhen a ṭul ṭhin a ni.

Kraws kawngah chuan hling chhun thi ser ser chauh kan tuar dawn lo.Thisen a luang a, chhah takin a luanga ni.Thisen chhuak tam chu thihna ani. He laiah tak hian kan fate rawngbawl tura kan phalna chu akeh sawm duh. Tisaa fate kan duatna hian kraws hmelmaah te min siam ṭhin.Kan chhungkaw nawmsakna tur chin zela fate kan pek hian Krista zuia penchhuak tur kan dâl thei a ni.

Kraws thiltihtheihnain kan fate a han zar taa, an han inpek tak tak dawn chuan “Kraws ata kha lo chhuk rawh, in tidam la, keini pawh min tidam rawh ” tiin nu leh paten kan tichhe duh hle a ni. Lal Isua tih dan zuiin, “Setan, ka hnungah kal rawh, ka tantlukna i ni e; Pathian thilte ngaihtuah lovin mihring thilte i ngaihtuah zawk a nih hi ,” tia chhanna dawng ta hlawm ila khandaiha sah angin na kan ti mai ang.

John Knox-a fanu, Jane-i chu JohnWelsh-a nen an innei a. A pasal chu protestant thurin a phatsan loh chuana lu tan tura rorelsak a ni. Tân in hotute chuan Jane-i chu an bia a, “I pasal hian a thurin hi phatsan sela chhuah theih a ni chauh ang ,” an ti a. Jane-i chuan apasalin Isua a phatsana a hnena a nunreng theih chu a thlang lo.

Krista avangin thi sela, Krista hnenah chuan nung sela a duh zawk a, “Pute u,a lu chu ka lo chang ang e ,” a ti zawk zu nia! Kraws aia rapthlak zawk a awm lo.Kraws aia helna nasa zawk a awm heklo. Kraws chu kan nuna kan thihna tur a ni lo va, kan thiha kan nunna tur a ni.

Kraws-ah chuan Kraws-ah chuan,
Ka ropui awm rawh se;
Ka thlarau lui piah lama Lawm taka chawlh thlengin .

He kraws hian keini misual ho hi khawvel nen hian min ti hrang ve tawh em? Nge he khawvel, lei anchhedawng hi kan la thlahlelh ve ngawih ngawih khanglang zawk? A ni ka ngaihtuah ṭhin, ṭumkhat ka pa in a sawi ka rilru hneh deuh tu chu, a nau, ka pate-a missionary a kal chhuak ve chu an zu tlawh a lawm le..

Chutia unau kum tam in hmu tawh lo chu an lo inngai-in an lo inthlahlelh em em mai hi a ni awm a, ka pate-a chuan a rawngbawlna hmun a kohhran hote hmaah chuan a unaute inhmelhriat tir pah chuan hun rei tak unau in hmu tawh lo an nih thu te a sawi chuan; mi hneh em em mai a, ni e ka pate-a pawh hi chu Kraws chuan, a chhungte, unaute nen chuan a ti hrang ve ngei a lawm…

Chhungte, nun pum a Pathian rawngbawltu neih ringawt pawh hian kan thla hi a muang ve em em a, a taka nunpui tu, chenchilhtu phei chu han ni ve ngat ila chuan aw….Mahse, ṭhian duh tak te u, khawihmunah pawh hian awmin, eng hna pawh thawk mah ila, Kraws hian he khawvel nena min tih hran tawh chuan kan nun ah mi ten Lal Isua nun ze mawi an hmu thei dawn a lo ni..I nitin hna thawhpui, i chenpui, i ṭhiante, i rawngbawlpui te khan nun tak neiin an hmu che em? Ṭawngka mai ni lo a taka nunpui tu kan nih hi a va pawimawh tawh tak em?

Mi(sual) i kawng tur kha chhut chiang rawh….

Similar Posts:

• THAWHLEHNAA TIHNUN KA LO NI TA
• Kraws Thu
• Tih nun kan ni (Easter pual)
• Krista Kraws Thiltihtheihna !
• GENESIS 6:1-6:2

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, November 6th, 2011 at 6:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.