mi(sual).com

Post ka thehlut khat leh ta riau mai. Tun tum pawh rilrua vei lo neih ve neuh neuh te hi ka rawn thlasik mau puah pui leh phawng phawng teh ang.:-

Tun tum Mizo Idol 2011 hian bul i’n tan phawt teh ang.

1. Saiha tlangval Lalthuthaa khan “ Buannel Ram dai” tih kha a rawn sa al al mai a. Host Zonuni khan a hla hming put chhan Buannel awmna a’n zawt zui nghal kha a nia. Ka rilru te te chuan engtin tak chhang ang maw ka lo tih riau riau laiin nui sang chungin “ Ka hre lo” tiin a rawn chhang ta a. Ka lo thaw ve huai ringawt nia mawle! Zonuni vek chuan Judge te hnenah Buannel awmna a zawhna chu a’n pass nghal zat mai bawk a. Judge zinga mi Pu Zautea ( ka hre sual maithei, Pu Robina lo zawk kha) khan confi tak hmel pu khan “ Buannel chu Mizoram-ah a awm” a rawn tisam et mai bawk a! Contestant te hmel leh ka hmuh theih sikul naupang ho hmel ka’n en vel khan he judge chhannaah hian an lungawi hmel hliah hliah hian ka hria.

Ti hian ka ngaihtuah ta nghal zak a. A va pawi tehlul em ve aw! He Mizo Idol show-ah hian zirlai naupang tak tak, hriatna lama than la mek te pawh an kal ve zel chu a ni tak si a, heng ho hmaa Buannel Ramdai, Chawngtinleri tuallenna thin hi Mizoram chhunga awm anga han hrilh tak mai chu. Naupan rilru chak laia thil hriat lah hi a nghet duh nasa mai si a. Nakin lawka ram hruaitu, historian etc. la ni mai tur thangthar zel ho hian an rawn len hunah thu dik lo zawk hi an rawn pawm nghet ang tih hi ka lo hlau ve tlat mai. Tin, thil reng reng hi kan hriatchian loh chuan hrechiang lo ngam ila, thudik finfiah tawh erawh pawm nghet tlat thung ila a that ka ring thin. Buannel ramdai, Chawngtinleri tuallenna tia mizo lunglai kuai tak mai hi Myanmar ram, Mizoram atanga hla lo tak Lȇntlang pangah khian a awm a. Hringlang Tlang atang pawhin a lang paw vau mai. Rih Dil atang khian ke-a pan maitheih a ni. Mizoram-ah zawng a awm lul lo ve.

2. Tun tum Idol contestant te’n kan hranghlui zaithiam tak tak te hla an rawn sa chhuak hlawm a, a lawmawm hle a ka hriat laiin ngaihmawh tur erawh a awm leh ta tho mai ka ti. Chhiahtlang tlangval Biakmuana khan C.F.L. Hmingthanga hla hit, chuai thei lo, “ In tawng leh ngei ang ” tih kha a rawn sa a. Mipui lawm pawh a hlawh hle mai. Hei erawh ka helh khawp mai: A chang hmasa ber tlar tawp lam, ‘ Duhluat vangin lẩm ang ka lo lȇt leh ngei ang ’ tih leh a chang hnuhnung bera tlar tawp ber, ‘ Kan tiamthu di zawng kha i vawngdun zel ang aw ’ tih kha a rawn hriatpawlh ta pek a. Tin, a chang hnihnaa mipa part, “ Ka hmangaih che duhlai di enchimloh” tih kha a rawn chham pawp ringawt pek a. Hei hi a phuahtu hian chham tura a phuah a ni lo tih hi lo hria se ka duh ngawt mai. Thangthar lo awmzel tur te’n a chhama chham tur emaw an ti nghet mai ang tih hi ka hlau ngawt mai.

Tin, Zomuanpuii pawh hian C.F.L. Hmingthanga hla vȇk “ L.D. Hmeltha” ah pawh ‘ Kan rǔnah nuthai chan min tiam a ’ tih turah ‘ Kan rǔnah nuthai chang min tiam a ’ a rawn ti tlat pek a!!! Tin, ‘ Ngaihnobei chuang hmangaih par ka thliahpui si lo ’ tih turah ‘ Ngaihnobei chuan hmangaih par ka thliahpui si lo ’ a rawn ti leh tlat bawk a. Mak thei ngei mai. Heng kan lengzem hla tha ho hi chu I modify fo lo teh ang u. Cassette-a kan siam dawn a nih phei chuan a phuahtute an la dam a nih chuan anmahni ngei be rawn hmasa ila; an boral tawh a nih pawhin an hla hrechiangtu tu ber emaw biakrawn hmasak hi I ching thar teh ang u. Idol Thuthaa’n Lalremruata hla hit, ‘ Pi zǔn ’ a sak pawh a sa dik lo bawk a, amah Lalremruata ngei pawhin judge Pi Rebecca-i kaltlanga a rawn correct sak kha mawle. “ A hla thu dika a sa duh a nih chuan ka in lamah pawh mi rawn pan mai rawh se” tiin. Kan zaithiam te kan hlut rual hian kan hla phuah thiamte pawh hi chawimawi leh hlut a hun tawh lawmni?

3. Idol contest final hma deuh lawk khan contestant pakhat te chhungkua chuan Biak In tualah an fa tana vote ve tura ngenna zuk sem a mawle! Ka vote lo chiang hlawm khawp mai. Mahni lo maha Mizo te value system tichhetu pakhat ni vea lo hriat naka laia. Sikul naupang te te pawh hian tunah chuan lehkhathiam tak nih ai chuan zaithiam lar nih zuk chak fur hlawm a mawle! Kan idol, zaithiam te hian kan state tan engtiang chiaha nasain nge tha an thawh ve thin le? Anmahni lo hmuah nana zirna sikul lo khar phei kha chu khin buai theih thil a ni. Zo chhul chhuak ngei kan IAS, IRS, IRTS, IFS, ID & AS, etc. te hming pawh sawi chhuak thei lo thalai an tam tawh teh asin. Hengho hi kan Idol zawk dawn lawmni? Idol chu lo thlang zel rawh se. Amaherawhchu zirlai naupang te sawm emaw, va telpui emaw phei hi chu chin tawh loh atan a that zawk a rinawm. Kan la thlang zel dawn a nih pawhin kum 5 danah te hian thlang ta chauh ila. Tin, Mizo takin thlang bawk teh se.

( Ngaihtuah peih te tan)

Similar Posts:

• Rinliana – Redemption Song
• Mizo Idol leh bawk
• Mizo Idol nih tu nge duh?
• Youth Idol Thu Nawi (Certificate Maksak)
• Ken Lee!

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Saturday, November 19th, 2011 at 10:00 pm and is filed under Luangliam, Music and lyrics, Opinion. You can follow any responses to this entry through the RSS 2.0 feed. You can leave a response, or trackback from your own site.