mi(sual).com

The best Christmas present in the world.Part-3
– by Michael Morpurgo

Lehkha chu ka thlep tha leh a, uluk takin Lehkhaipah chuan ka khung tha leh ta a, zankhuain ka muhil thei ta reng reng lo mai a ni. Zinga ka han thawh chuan ‘Enge ka tih tur chu ka chiang kher mai’. Britport lamah ka inkhalh chhuak a, Ka thlen dawn hnaih chuan, mipa naupang pakhat ui kai hnenah chuan Copper Beeches awmna ka han zawt a, min hrilhna hmun ka va thlen chuan In number 12 na chu a kang bang chauh lo chu hmuh tur reng a lo awm tawh lo a. a thenawm amite hnenah chuan Pi Macpherson-I awmna an hriat leh hriat loh ka han zawt ta rawih mai a.

Chu thenawm putar chuan a lo hrechiang ang reng viau mai a. “Pitar ngainat awm tak ani asin maw le, a chang erawh kha chuan a rilru a kim chiah nange aw? Tih tur ang te hian a awm thin a; mahse ani ang tar tawh lutuk kum 101 mi tan chuan thil mak vak pawh ani lo, a awm hliah hliah zawk a ni. A In a kan lai pawh khan, a inchhungah a awm a, engvanga a in kha kang ta nge anih tih hrechiang tumah an awmlo na a, Sathau-khawnvar vang anih ngei a rin awm, a chhan chu, Electric chhit man a to a tih em avangin, Electric a hmang ngai meuh lo va, Sathau-khawnvar a hmang mai thin a ni. A hun takah Kangthelh pawl ami pakhatin a chhan chhuak hman hram a ni. Tunah chuan Veng lehlama Dorchester kawng a Burlington House-a Tar dahkhawmna (nursing home) ah a awm mek ani awm e” tiin min hrilh a.

Burlington House Nursing Home chu zawnchhuah a harsa lem lo a, ka va hmu thuai a. A luhchhohna kawngsir tluan chuan Lehkhamawi an lo zam a, Christmas Tree pawh eng phe neuh neuh chi hrang hrang mawi takin an lo chei ve a, Angel lem pawh awn deuh tlai hian an lo dah ve a. Khualchhawntu hnenah chuan Pi Macpherson hnen a Krismas Present hlan tura lokal ka nih thu ka han sawi chuan, ihe lovin min luh tir ve ta mai a. Chaweina hall ah chuan Tar rual ho chuan Lehkhaa siam lukhum khum chung hian krismas hla an lo sa a, anmahni enkawltunu chuan ka hmel alo hmuh chuan a lawm hmel kher mai. Ei tur (mince pie) te pawh min hlui nghal sawt sawt a. Pi Macpherson-I awmna pana min hruai lai te chuan, phur takin a titi mawlh mawlh a, “Pi Macpherson-I hi a danglam bik riau mai a, midang pawh hi a pawl ve peih meuh lo a ni. Vawiin phei hi chuan a buai zual deuh tlat mai a, chuvangin kan chawlh hahdam tir ta mai a ni. Chhungkhat tumah amah rawn kantu a nei ve ngailo a, chuvang chuan vawiinniah amah kantu a han nei tur hi chu a lawm ngawt ang” a ti siam siam a. Tichuan Pangpar(Hnahmawi) tak tak khawina hmunah chuan min hnuchhiah ta a ni.

Chu pindanah chuan Pitar pakhat upa tawh tak mai hi Thutthleng nawrlirhtheihah hian alo thu a, a malchungah chuan a kut a nghat thlap a. A sam tuak var nalh tak chu a tukhum lamah a vialkhawm a, bakkilhin a kilhbet thlap bawk a, Tukverh lam enin huan velte chu a lo thlir ni hian a lang a. “Hello” ka han tih chuan, angaihna hriat loh hmel tak hian mi rawn enchho ha a. “Connie, Krismas chibai le,” tipahin a Krismas present tur ka ken chu ka han phawrh a, “ hei hi ka chhar a, I ta tur ni ngeiin ka hria a, ka rawn keng a ni” tiin ka han chhunzawm leh a.

Chutia ka tawng mawlh mawlh lai chuan, ngun lutuk tak mai, tunge ka nih hriattum niawm tak hian min thlek ta veng veng mai a, a mit ala sawn chhin eih lo. Ka rangvabawm ken chu phawrh chhuakin ka hlan ta a. Chuveleh a hmel chu hlimin a lo engchhuak ta a, tunge ka nih min hrechhuak ta niawm tak hian angaihnahrelo hmel chu a bo ta vek a, a mihriat than em em leh a ngaih em em hmuta thut niawm tak hian a hmel chu a lo hlimin a lo phur hmel ta mai a ni. Dawhkan ka hmuhchhuah dan leh chumi chhung pawhdawh chhunga alo awm dan te, a hming inziak ka hmuh avanga ka zawnchhuah tak dan te chu ka han sawi ngial na a, a ngaithla lo tawp tih ka hrechiang kher mai. Engemawchen chu tawng lovin a han ngawi deuh vang vang a, lehkha chu duat takin a chul hliau hliau ringawt mai a ni.

Thawklehkhatah a kut chu rawn pharchhuakin ka kut chu a rawn vuan a, a hmer ta vawng vawng mai a, a mitah chuan mittui a tling kiau mai bawk a. “Duhtak, Krismas-ah I rawn haw ngei ang tih min tiam a, hei tunah min tiam ang ngeiin I rawn haw ta. Ka tan chuan nangmah ngei hi Khawvela Krismas thilpek hluber chu I ni e. ka bulah hian han thuhnai teh” a ti ta seuh seuh a.

A bula ka han thut chuan, dim leh duat takin ka biangah a han fawp a. “Jim, I lehkha hi nitin takmeuhin ka chhiar thin a sin. I lehkha ka han chhiar hian I aw hre tlukah ka inngai a, I aw hre thar zel tur hian ka chhiar nawn ka chhiar nawn mai thin a ni. I lehkha ka chhiar lai hi chuan ka bulah awmin min be thin ni hian ka hre thin a, tunah hei nangmah ngei ka bulah I awm ta si a, nangmah ngeiin mi han chhiar sak ta che. Duhtak Jim, mawh mi han chhiar sak teh, I aw ri hriat ka lo thlakhlelh ngawih ngawih han hriat leh hrim hrim pawh ka duh a ni, mawh min chhiarsak dawn lawm ni?. Marzipan(Cake) I ngainat zia ka hre chiang si a, Kum 70 chhung kumtin Krismas apiangin ka lo siam sak ziah thin che a, thingpui te kan lum ang a, kan eiin kan in dun dawn nia” a ti ta mial mial a. A Tawp ta.

Similar Posts:

• Santa Claus Address!
• Krismas
• “Christmas Shoes” – New Song
• The Best Christmas Present in the World – Part 2
• Pa Hmangaihna!

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Thursday, December 8th, 2011 at 9:00 am and is filed under Christmas, Luangliam. You can follow any responses to this entry through the RSS 2.0 feed. You can leave a response, or trackback from your own site.