mi(sual).com

Aw ka di, “Nang ang hi he khawvelah hian an awm lo,” ka tih thin hi chu val dangte chuan an hrethiamin an pawm ve mahna; mahse, “Ami van hnuai hringmi leng zawng zingah nang ang an piang leh ngai tawh lovang,” ka tih erawh hi zawng val dangte chuan min pawmpui kherin ka ringlo. Mahse, hei aia ka thinlunga thu chiang zawk awmchhun chu ‘Isua hi ka Pathian a ni,’ tih chauh hi a ni. Ka tan chuan midang zawng aiin I danglam bik ani tih hi min lo pawmsak ang che.

I mawi zia ka sep fova ka hrilh fo thin che hian I mit ka ti fingin ka ti harhchhuak palh anga, kei aia tha leh manto zawk val dang min chhai san leh daih palh ang tih hi ka hlau bawk si. I thatna leh I mawina thuruk, nangmah pawhin ila hriat ngai hauhloh te hi avai mai hian I hmaah phawrh chhuah vek chak thin mah ila, a chang chuan ka hlauthawng thin a ni. ‘I mawilo, I duhawmlo’ tia midangin an sawi an sawi chang che pawh hian ka lawm mah zawk thin. I mawina hi keimah chauh hian hmu thiam ila, ka mawina beitham te te hi nangmah chauh in hmu thiam la ka duh thin.

Kan inhmangaihna thuk zawng leh san zawng, a sei zawng leh a chak zawng ah te hian buai lo la, midangte inhmangaih dan ah leh an nun hman dan ah buai lo la, keimah ah hian rawn in tulut tawp la kan in hmangaihna thuk zia te, a san zia te, a sei zia te, a chak zia te chu ka lo hrilhfiah thin dawn che nia. Ka mit a mi en apiangin ka nihna ka hloh ziah thin tih I hriat avangin min bum thin suh la, ka lak atanga I bo apianga ka buai thin zia I hriat avang pawh hian min tih thaihna hmanrua ah min hmansak lo hram ang che. Nang neih hi engkim neihna a ni a, nang hlauh hi engkim channa a ni tih hi min pawm sak la, engmah nei lova ka nun pumpui ka hman loh na turin ka chungah zah ngai thin ang che.

I aw hrelova muhil thei ngailo, I thinrim apianga mangang thin hi khawi hmunah pawh kal la, eng mi pawh tawng mahla min lo ngaihtuah ve reng thin dawn nia. Sum leh pai te hi ‘I tan’ a nih chiah hian a hlu zual bik thin a, cheng tamlo te pawh hi I tana hman tur a nih chuan a hlu thin.

A tawp berah chuan, I thinlung kha hmun 4 a then turin ka duh che a, chung zinga hmun khat chu min pe turin ka duh che a ni. A lian ber ‘Pathian tan,’ a lian ber dawttu ‘I chhungte tan,’ tin, pakhat ‘I zirna atan,’ tin, pakhat leh chu englai pawh a hmangaih leh ngai em em thin tu che ‘Keima’ tan ilo khek dawn nia.

Similar Posts:

• Ṭawngṭaina (Pathianni pualin)
• Lehkhathawn
• MIN DER LE.
• The cylinder
• Ka Pa hnena Lehkhathawn

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Sunday, December 18th, 2011 at 11:30 am and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.