From Social Worker’s Point of View
Thuhma: Kohhran Hmun pui lam ngaihdan ka hre lo a, Tualchhung kohhran te ngaihdan lah ka hre hek lo, ka hriat erawh Camping kan neih dan hi tihdang lam a hun tawh a ni. Kum tina khel lova kan neih fo ṭhin; Camping kan kalpui dan hi thlak ta ila, thil ṭha zawk a chhuak ang a, nun nghet kan neih phah thei ang. Salvation camping, bul ṭan ṭhatna leh insiam ṭhat nana hre lak lawk tawh, a thlakna tur hre si lo, a ngai rin duh lem lo ten ‘Revival camping’ emaw ‘Siamthar lehna camping’ ti a kan thlak te hian a nihna a thlak danglam phah lo a. Weekend bawra Crusade lah kan zawng chhak si lo a nih hi. Pathian ruahmanna kan hai palh emaw kan hman hmawh deuh anih chuan Ngaihdam dil pawh kan hnial tur a ni lo. Kan kal dan, nihphunga kan lo neih fo tawh camping te, a remchan hun leh kan phak tawka kan nei ṭhin te hi ka sawisel hauh law? A thlakna tur emaw a aia ṭha zawk/ hlawk zawk emaw a awm em? Engtinnge kan hlawk pui zawk ang tih I ngaihtuah tlang teh ang u.
Chhandamna a bo thei lo, Bible in a sawi: “Chhandamna a bo thei lo Bible in a sawi,” tih hial lehkhabu thupui a kan neih tawh lai hian Camping vawi 10 chuanga lut tawh, inhlan ziah ṭhin te hi an nunin, an danglam phah em tih I ngaihtuah chhin ngai em? Chhandamna chu a bo thei emaw bo thei lo emaw kohhran member te campinga lut an tam dan leh an luh zin dan en hian ngaihtuah nawn chu a ngai a ni. Kohhran upa mîn, camping ṭul ti lo tam tak ka hmu ta, chungho lah chu kan hmu thlarau mi lovin, harhna duhlo ang hiala chhuah te pawh an awm ṭhin.
Kohhran inbuatsaihna: Pathian Kohhran hote hian ruahmanna fel tak neiin Camping hunte thlir lawkin rei tak kan urlawk ṭhin a, Ṭawngṭai subjectah neiin kohhran leh mimal ṭawngṭaina ah te kan dil tlut tlut ṭhin. Thil ṭha tak a ni. Sum leh pai, tha leh zung sengin kan inbuatsaih a, Evangelistic Team rawih tur te leh Speaker, Counsellor ṭha tur te thlan fel anih hnuah camping kan buatsaih ṭhin a. Thil ṭha tak a ni, a la ṭha zel pawhin a rinawm. Thlarau boral tur chhanchhuah nan chuan engzata tam pawh kan seng ngam tur a ni. Camping laia kan tawng pawng nawr vak leh, a nawlpui ten kan Ṭawngṭai/Bethel dan te, Eirawngbawl, Security, Camp dawr nghak leh ṭuldanga kan buai dan ên hian camping hi kan insenso ngaihtuah hian a hlawk kan ti em? Hei aia ṭha zawk a awm thei ang em?
Camping engtianga neih tur nge? Riah luh tawpa Pathian thu mawngkham ṭhuma ngaithlak ngawt ngawt hi em ni kan duh dan? Engtin nge kan neih ang a, eng ang kalphungin nge kan neih ang tih hian ngaihtuah a hlawh lo a. Team emaw Speaker te kutah emaw kan dah tawp ṭhin hi a fel hlel deuh. Ni khat pawh la cham em lo, Mikhhual te hian engtin nge kan khawtlang zia an hriat ang a, mimal leh kohhran harsatna an hriat chian theih ang.
Campingah te hian Kan lo piangthar lo ṭhin em ni? Mizo te hi Chhandamna thu ah chuan kan chiang tawh a, Chhandamna khawp Pathian thu hre lo chu kan awm awm lo e. Khawngaihna avanga Chhandam kan ni tlat a, kan duhdan hi a pawimawh hmasa lo khawp mai. Nimahsela Chhandamna hi keimahni thu anih loh avang leh Thlarau hriatpuina a ngaih avangin kan zawn a, kan kar hi chu a ṭul a ni. Chhungte leh Kohhran hmai zah vang emaw Camping atana Campaign a nih ṭhin vanga riak lut an awm fo ṭhin. Chhungte nawr luih vang leh ṭhiante zara lut anih pawhin a ṭha tho e. Luh loh ai chuan. Mizo kristianna heti em a, a nghet lo leh belhchian a dawl lo fo ṭhin hi kan innawr luih ṭhin vang a ni thei ang em? Piangthar lo khan chinghne beram vun sin ang main kan lo Piangthar der ṭhin zawk em ni? Kristian za a za pawh kan tling tawh lo an tih hi, Camping record aṭangin en ila, Kristian za a za sawmnga kan ni mai lawng maw? Mahni duhthlanna ngeia Camping lut, Piantharna/Siamtharna/harhtharna changtu te nun chu a danglam bik ṭhin ang hian nun tak nei tura kan beih hi a ṭul tak zet a ni.
Camping hi engzat takin chhawr ang maw: Hlim a, so san but emaw phur hluaina thlarau te hi kan chhawrnaah kan chhiar dawn anih chuan a dik tho e. Kohhran zai a tui phah a, Thawhlawm a pung sawt ṭhin kan tih pawhin a ṭha e. Ral beih, Operation, Campaign, Home visit kan neih pawhin kohhran zia chu a danglam phah ṭhin. Phur thut leh so san thut hi a chuai huna ngaiawh leh hi a har khawp mai. A ṭhat ber chang pawh a awm bawk. Mimal leh roreltu te ngaihdan a hrang thei ang a, kan tehdan a zir pawhin a danglam thei bawk ang.
A tehfung: Hlim so sang but emaw zaikhawm tui danah emaw Sermon ṭha emaw Campers te inhlan tam danah hian a hlawhtlinna kan teh fo ṭhin. A dik a, tehfung ṭha ber erawh a ni em tih hi chhut chiang ila. Heng hlimna te hian engtia rei nge a daih a, Campers te nunah engchen nge thu a sawi a, mimal engzat nun nge inthlak thleng? Mi engzat nge kumtluana Kohhran tan ke pawimawh ni ta ang le? Biak in inkhawm zia hi engtia rei nge inthlak thleng le?
Kohhran hrang hrangin Evangelist Team kan nei vek a, an kohhran ṭheuh a an rawngbawl dan report pawh an pe kim vek ṭhin. Ziak leh ṭawngka a report ngai anih chuan report ṭha duh vek kan nih ṭhin avangin ṭhahnem ngaihna, mihring tak pawhin kan nei fo ṭhin a ni. Kohhran hrang hrang te pawh hian Camping hlawhtlinna chungchang kan inzawh hian mi engzat nge lut a, engzat nge in hlan zat tih hi kan zawhna hmasa anih avangin eng anga quality nge tih kan chhut zui peih lo khawp mai.
A nawlpui te pawh hian ziak loh ngaihdan kan neih chu Thuchah, Zaikhawm leh Lâm tam danah te hian kan teh ṭhin a. Tehna awm tak pawh a ni. Thawm zawi leh phur hlut lo Team chu rawih nawn an hlawh mawh hle a. An rawngbawlna hlung lo riau a hriatna kan nei bawk ṭhin. Campers tam leh Pathian hnena Inhlan an awm dan a zir a, camping hlawhtlinna kan teh fo hi a dik em? Mi ṭha sim chuan tur nei lo ai chuan misual pakhat sim pawh a hlu a ni kan ti thei reng anih chuan a ṭha e.
Rawngbawltu Team: Evangelist team emaw pastor, upa leh thusawi thiam te kan ruai a, a pui bawm turin mi tam tak pawh an tel bawk ṭhin a. Inkhaihhruaina dan mumal tak nei a, hmunpui leh pawl neia rawngbawl ṭhin Evangelist te leh Pastor, Upa etc., te Camping kalpui dan chu a danglam fo a. Evangelist te zia erawh a danglam hret ṭhin. Khawvel finna ah chuan hniam te an ni emaw ni lo emaw Pathian hman tak tak te an ni a, kalphung ṭheuh an neih angin campingah an duh dan angin an kalpui mai ṭhin. An thiam dan leh an tawnhriat mila kal an ni tlangpui. Khawtlang leh Chhungkua, mimal harsatna mila insiamrem thiam erawh a har deuh pawh a ni ang.
Campers te dinhmun: Kan sawi thuak tawh nain an duhthlanna thiang tak nena lut an ni nge? Mi hmaizah vang? Chhungte tirh luih emaw sawm chawpa lut te hian an hlawk pui ṭhin ang em le? An hlawk pui anih pawhin Thlarau hnathawh vang a ni ngei ang. Chhandamna thu kan hre tawh kan ti a, nimahsela harsatna leh chhan hrang hrang vanga Camping lut te chu tihdan ngai ang a, Sermon ngaihthlak mila Counselling nei ṭhin kan ni deuh vek ang. Chumi hnua sawmna siama buai rilru tak chunga inhlan te pawh an awm fo. Sawi ṭhaih leh vaukhanna tinreng nena Sawmna chhang, mualpho ai chuan inhlan/sawmna chhang ta mai an awm nawk tih ka mit ngeiin ka hmu ṭeuh mai. Piangthar dik, ṭha taka chhuak pawh an awm ṭeuh a, kan enkawl leh venpui loh vanga kir leh pawh an tam. Hriatna leh Rinna ngawt kha chuan thil tih-ah a hruai lut lo fo.
Camping hi Pathian nena inkara harsatna chinfel hun anih angin Sermon ṭha ah a innghat tawh lo a, Counselling ah a innghat tawh tiin sawi teh ang. A huho (group) Counselling pek a nih ṭhin ang hian Mimal harsatna leh a nun chungchang hi Group counselling ah chuan engtin nge an puanchhuah ngam ang. Sermon pa tê thlak a, inzilhna emaw ti tlat a awm theih a nia. Sawmna hlan duh lo luh lul fal khalh falna hun lah a ni hek lo. Miin kar tluana engthu pawh (thusawi thiam tak) a ngaihthlak char char chuan hmin chin leh phur chin a cho chhuak a, emotions a lo luang liam ṭhin. Chu emotions chu mikhual te haw hnu emaw Khawtlang leh kohhran hmaizah hun a reh rual rualin a nun pangngai ah a kir leh ṭhin a ni.
Camping thlak ang u: Camping thlakna tur thil ṭha dang a awm lo, Pathianin min la pe lo tih hi ka tawng fo mai. A dik thawkhat viau ang; kan tehfung leh kaldan/beisei dan azirin. Kohhran te hian kar khat emaw nawr thut a Piantharna chang thei emaw nun inthlak thleng nghal dawrh dawrh tura kan beisei chhung chuan camping hi a hlawhtling ngai lo ang. Camping anga bei thuta a hlawhtlin nghalna hmuh tur hi khawvelah hian a awm thei dawn lo. Thlarau bo man tur leh mite nun vawi leh khata siamṭha nghal dawrh tur chuan hmanrua kan nei ngai lo ang.
Camping thlak a hun tawh tih pawm vek ṭhin te hian Pathianin a thlakna tur min la pe lo tiin kan sawi liam puat ṭhin a. A nih leh thlakna zawng tur hian vawi engzat nge Committee Agenda awm tawh ang le!! Committee a ngaihtuahna seng an awm tawh em? Camping chungchang rel tluk zet hian a thlakna tur ngaihtuahin Committee ve fo ila, Pathian hian thil ṭha chu min pe ve lo ang maw?
Kohhran te pawh insenso leh teirei peih lo kan nih fo avang hian nun inlumlet thut lawm pa ek sen a lawm kan ni fo ṭhin. Kan beisei dan hi thlak a ngai a ni. Kar khat chauh ni lo, thlakhat emaw kum khat hial pawh beih (operation) nei ngam ila, kan hlawk zawk lo ang maw? Heti zawng hian kalpui ila a ṭha ang em?
1. Periodical Counselling: Counselling hi thurawn inpekna tur emaw Inhrilhhriatna emaw inzilhna emaw invauna hun atana hman chi a ni lo a, mi chi hnih inkawma, harsatna sukiang tura inpuihna hmun tur a ni. A chang chuan ngawih a ṭhat zawk chang te a awm ṭhin. Religious Counselling hi a lo danglam bik nge ka hre lo a, Counselling nih tur ang tak hian kan kal pui lo fo ṭhin. Kan hriat loh vang emaw a hun leh hmunin a zir loh vang emaw a ni thei bawk.
Counselling chu kar khat chhung chauh emaw a neih tlut tlut hi a ṭul kher lo a, mamawh dan mila neih zawk tur a ni. Counselling hi mi pakhat emaw a aia tam emaw inkawmna (Tow way process) niin, a counsellor aia Counselling tura lokal (Client Centred) anih avangin Counsellor te duhdan sawi a thiang lo a, thurawn pek pawh a ngai lo. Counsellee te harsatna zawk sukiang tura inkawmna a ni ti ila, a dik awm e. Ṭawngkam thiam vang emaw Pathian thu hriat leh thlarau mi em vanga Counsellor ṭha hi a nih theih ngawt loh ang bawkin, Counsellor ṭha ni tur chuan Counsellor chauh a pawimawh lo a, Counsellee hian dinhmun pawimawh zawk a chang a ni. Counsellor te (Value and attitudes) nihphung chu sawi lan ngai lovin kan hria ang a, Micro Skills hrang hrang ngun taka harsatna ngaihthlak dan, Zawhna zawh hun leh zawh dan, Ngawih hun, ṭawng lova chetzia a awm dan, Counsellee te awmdan ang chiah a inawm tir theih dan (accurate empathy) te hi Campingah chuan kan hmu hman ṭhin lo. Hun chep tak kar a nih vang pawh a ni ang.
Pathian thu leh mimal harsatna sukiang tur leh Chhandamna chungchanga harsatna hrang hrang inhrilhfiah hun a nih avang hian Mimal ten an harsatna an sawichhuak ngam tak tak em? Interruption a awm ṭhin em? Counsellor te hnenah mimal nun chhe lai ber leh harsatna pui ber puanzar kan ngam ṭhin em? Thuruk vawn ngai sawi chhuah nan camping hi a him ṭhin em? Group Counselling ah chuan a theih loh bawk.
2. Targeted Intervention: Camping buatsaih ṭhin te pawh hian Group ah inṭhenin a kum rual khat emaw mipa leh hmeichhia emaw harsatna, Sual dan a zira inṭhen ṭhin group kan nih ang hian Kohhran khata lawi, member te dinhmun chu a lang ruak ruak ṭhin. Zu avanga harsatna tawk, drug, Sex, Corruption, ei leh bar harsatna, Thatchhiatna leh inthlahdahna avanga harsatna tawk te chu a hriat ṭhin. Heng mite te hi awmze nei taka thawhpui hi an ngai ṭhin. Target neia Home Visit, Outreach, Follow up leh a ṭul anga member mal te kawm nel a, hruai ṭhat te hi sum leh pai heh lo, senso tlem taka hmalak dan ṭha tak a ni. Kan hriat angin kan Target a zira ral beihdan Strategy (ral rel) kan thiam chuan hlawk takin Chhandamna thu kan hril thei ang a, a sawt em em ang.
3. Problem Substitution Therapy: A hming hi kan sawi mai tak nang a, engpawh nise a ṭha tho a. Kan kohhran member te harsatna tawh dan azira a thlakna zawn pui dan ngaihtuah hi thil ṭuk tak a ni. Harsatna hi vawi leh khata kiam thut emaw sim thut theih loh te a awm avang hian he thil hi mi tlemte mamawh anih dawn avangin, a mamawhtu te tan chuan a ṭangkai ngei ang.
Hetiang dinhmun chiah ni lo, harsatna dang tawk pawh an awm theih avang leh mimal dinhmun inhriat sak vek a harsa a, amaherawhchu pan theih a kan inhawn a ngai a, bawhzui theih tura kan inrin erawh a hun tawh a ni. Kohhran tina Evangelical Cell te hian enge an thawh ber? Enge an hmalakna chhiar theih an neih, programme oriented (duan lawk Programme?) a an kal ṭhin hian mamawhna (harsatna)a sukiang lo fo.
Kohhran hmunpui lam ṭheuh hian Care and Counselling hi ngaipawimawh leh zual turin hma an la a, a ṭha hle. Hmunpui Office hian pastor bial ṭheuh-ah Bial hruaitute hnenah, an bial chhunga Pastor quarters hnaih emaw hmunrem changah Pastor Office, Counselling room, Therapy room rangva/silpaulin/mau dap hmanga sa turin ngenna han siam se chuan hma kan sawn phah ang. Hmunpui lam thupek chu zawm tur anih dawn avangin Bial tin hian kan siam ang a, Pastor te chuan Thawhlehni, ninga leh inrinni (bazaar ni or zan inkhawm awm loh zan) te hian Zing leh tlai emaw chhun lamah harsatna nei ten kan pan ṭhin ang a, pastor nupui emaw an fate mit mei veng lo lekin kan kawm thei ang le. Hmunpui lamah mi engzatin nge tlawh tih an report ṭhin ang a, chu chuan mi a ti ṭang dawn bawk si.
Tlipna: Camping hi a ṭha lo ka ti miah lova, a ṭhat lohna ṭhenkhat pawh tarlan a ni lo, Sawt zawka rawng kan bawl theihna tur ngaihtuah nan Point pathum te khi ngaihtuah ho ila, kan ngaihtuahna ti fimtu leh hmalak kan thiam theihna tura kan thlir thiam theih nan ka tarlang hmasa mai a ni. Research and Evaluate dawl tak tura hmalak hi a harsa a, hmuh lawk theih vek lo mahse thil ṭha ti tur chuan chhin ngam, zirchian ngam, hlawhchham hmasak ngam hi a ngai tak zet a ni.
Similar Posts:
- YMA Camping
- Camping leh crusade rau nge Thlarau thianghlim?
- Pasal neih vanga kohhran thlak…?
- Combined Post – 3 in 1
- Ringlo Atheist kan awm em?
December 27th, 2011 at 11:31 am
ngaihnawm dawn h1 1 han chh1ar teh ang
Report this comment
December 27th, 2011 at 12:14 pm
Chhiar chhung a rei lutuk a, a chung berah ka awm loh phah.
Report this comment
December 27th, 2011 at 12:24 pm
Comment dan tur a va vang ve.
Camping hi thluak sukna hmun ani em? Mi piangthar duh lo pui te kha kan ti piangthar lui thin em? tihte mai mai rilru in a ngaihtuah daih ta daih a. A thlakna tur reng reng ka hre lo. Most effecetive revival mechanism a ni awm e
Report this comment
December 27th, 2011 at 12:24 pm
lrp, fb inbox
Report this comment
December 27th, 2011 at 12:39 pm
Post tha a tling e. Kei hi Salvation Camping atanga piantharna chang ka ni a, keimah ang hi mi tam tak ka hre/hmu bawk. Chuvangin Salvation Camping tan tlat tu ka ni. Camping hian sawisel a hlawh tam ta a, mahse a thlakna tur tha rawtna mumal a awm ngai meuh lo. Post tupa/post tunu hian a rawn rawt tha phian. Home kan neih ho leh tuna rawtna ang ho hi Salvation Camping Compliment tu ah(substitute tu ni lovin) an that ka ring.
Report this comment
December 27th, 2011 at 12:43 pm
Kan Pastor hote hi Thlarau bo man leh chhanchhuah lamah hian han tui viauin Speaker hman rim tak tak han nihlawm sela chuan, Salvation Camping te hi kan sel kan sel lo tur.
Report this comment
December 27th, 2011 at 12:58 pm
Salvation camping bansan tur emaw, titlem tur emaw chuan Kristianna kan inzirtir dan hi tihdanglam hmasak a ngaiin ka hria. Ringtu ni turin tehkhawng tam tak kan siam a, inkhawm, hnatlang, zingtawngtai, chawngheia tawngtai, etc.,etc., kan tel tlem chuan miin min hmu da a, da-ah kan inngai thuai bawk a, camp bawk hi kan intuaitharna tura kan hmanraw hriat chhun ala ni rih. Camping/crusade-a piangthar kan ni fur hlawm a, hemi hmang veka intuaithar kan ni fur. Inkhawm ziah kher lo, Kohhrana a kul ataia tang kher lovin, a tawi zawngin – mahniin ringtu nghet a nih mai theih tih inzirtir hi kan mamawh tawh lo maw? Kistian criteria kan hman mek hian ringtu ni ve mang lovah min chhuah thuai zel a ni ber e. Post tha tak a ni e.
Report this comment
December 27th, 2011 at 2:08 pm
@6 PKFanai, Pastor te Speaker hmanrim deuh an nih hian problem pakhat a awm leh tho bawk si a. Pastor pakhat ka hriatchian deuh chu Camping leh Crusade Speaker atan hian a tha bawk a ni ang sawmtu a ngah thei khawp a. Mahse, a bial chhung mipuite hian an ngaithei lo khawp mai. Facebook group thenkhatah te chuan an sel zing viau a sin.
Report this comment
December 27th, 2011 at 2:34 pm
@8.awmawmpuia, hotuten posting siam thiam mai tur a lawm. e.g.Pro Pastor emaw Hmuitu emaw dah se la, emaw bial bik nei lo chiin Hqr.ah emaw dah se la. Chutiang Pastor chu alawm kan duh le. Lo sawisel tawh reng reng suh se.
Report this comment
December 27th, 2011 at 3:35 pm
Gospel/salvation camping ah hian vawi 11 vel camper angin ka lut tawhin ka hria. He post hi tha ka ti khawp mai. Post-tu, ngaihtuahna i seng hlein ka hria. Ni e, family counselling emaw, spiritual counselling emaw, HIV counselling emaw, eng counselling pawh nise, mumal takin basic counselling technique leh skills te hman thin nise chuan counselling hian awmzia a nei lehzual zawkin ka ring. Rawngbawltu Team lam te hi counselling chungchang training mumal tak pek thin nise kan hlawkpui lehzual ngei ang. Kohhranin salvation/revival camping a buatsaih thin hi ka la thlawp reng e.
Report this comment
December 27th, 2011 at 3:58 pm
Kan tuihnih leh lawk. Pathianin a hman avanga rawngbawl a chhuak nasa pastor te hi bial mipuiten an sawisel ka ring miah lo. Nupui hruai lo, “khawpui lam a Sunday school kaikim tum” an tih fiamthu ang chi ho hi annih ka ring kohhran mipuiten an sawisel thin hi chu.
Report this comment
December 27th, 2011 at 4:19 pm
Camping a tel chu nuam deuh asin. Hna thawh ngai si lo, midang siam sa kan ei hem hem mai a. Ni leng lenga inkhawm leh thil hrehawm ni lua hek lo. Nula leh tlangval in hmelhriatna atan a tha riau mai lehnghal. Mahse thlarau lam chhanchhuahna leh tun dinna atan chuan hnam dang Kristian te chuan an chelek lem lo.
Report this comment
December 27th, 2011 at 7:14 pm
A van han thui em2 ve le.. luhai rum2 in kan chhiar chuh, a tha in adik e, Camping te hi Zu nghei nan te kan lut tawh a, thlarau thianghlima chhun khah a kan awmna a tan te hian kan lut tawh thin silo, thu a hriat na chuan kan hre hneh ta hleihlui a nih hi.
Report this comment
December 27th, 2011 at 9:44 pm
A va han thui rem rem ve le!!
Report this comment
December 27th, 2011 at 9:45 pm
Thui ṭha khawp mai….vawi hnih ka chhiara ka la chhiar zoloa ka’n vawi 3 ange
Report this comment
December 27th, 2011 at 10:23 pm
Ni e.. I ziak thuiin a ngaihnawm khawp mai. Mizo Kristiante hi camping lut lova piangthar thei lo ang tluk hiala kan in
Report this comment
December 27th, 2011 at 10:53 pm
Gospel Camping-a vawikhat mah la lut ve lo hian i post hi ka thlawp tluanchhuak parh e. Good Post. :rolleyes:
Report this comment
December 27th, 2011 at 11:04 pm
thlak ai chuan her rem kan mamawhin ka hria.
Report this comment
December 27th, 2011 at 11:26 pm
Hairehai… sei ve…dik chiah, heihi alawm kan sawi fo:
1. Nu leh Pa ten an tihtur an tilo lutuk a, a pawi hnu ah camp atanga inhmuchhuak tur a an rilru put hmang hi a diklo lawk sa nghal.
2. Kohhran in sanctuary a nihna tur a hloh pawh a nilo, a ropui san a, thuneihna leh thildang a buaipui san a, he camp hi a lo piang ta a ni.
Sawi tur a tam, camping leh inkhunghran vel hi ngailo tur a kan duh tak tak chuan Kohhran hian full-scale reformation a mamawh…chu chu tunge ngam ang, tunge tan ang le….hairehai….
Report this comment
December 30th, 2011 at 1:53 am
Kum hnih chhung vel chu In thu hla ka chhiar ṭhin a,ka vawi khat postna (Ka ve ve em avangin) ah min support avangin ka lawm e
Report this comment
December 30th, 2011 at 1:57 am
Zofa Chhangte, rawn tizel rawh.. Mahni vei zawng chu sawi atha. I thil ziah pawh hi a tha lutuk. Thil siamthat duh vanga thluak in lo hmang nasa hi a lawmawm ka ti.. Thlirna dang atanga en hi a pawimawh fo ania.
Report this comment
January 3rd, 2012 at 12:41 am
In Comment ah hian LIKE dan te ka lo zawng vel :lol: ,,, ka inzir zel a, Thu ṭha tak tak te hi Comment lova chhiar hi a nuam ka ti…. Article ziak ṭha tak tak te hi a hlu a, chumi hnuaia thlirna danga comment ka hmuh hian ngaihtuahna min sen tir hle mai
Report this comment