mi(sual).com

Thuziak mi ka ni lo va, ka ngaihtuahna puangchhuak turin engmah ka ni lo tih pawh ka hria; mahse, mi pakhat chauh tal pawhin a hlawkpuina a lo neih ve takin tiin beiseina nen ka ziak ve tawp a ni. Ka ziah dik loh tam tak a awm chuan chhiar liam mai lova min hrilh turin ka ngên a che u.

He khawvel zinkawng zawh ve turin he khawvel leilung hrehawmnaa khat chu ka lo rap ve ta. Engmah ngaihtuahna pawh nei lovin ka zinkawng chu ka zawh chho ve det det a, harsatna pawh hre chang lovin ka hun leh ni te chu ka chhiar liam ve ṭhin chu a lo ni reng mai.

Thing delh loh lung delh loh na na na chu hun leh ni a liam ang bawkin kei pawh ka ṭhanglian chho ve zel a. Kum 4 ka nihin ka nu leh pa, u leh naute chu kalsanin khawpui lama zirna run bel turin ka kal a, chhungte bula awmna tur ka neih loh avangin kân sikul hostel-ah ka awm tawp a, chhungte ka neih ve loh avangin visiting day-ah te hian kantu ka nei ve ngai lo. Naupang të ka nih avangin rualawh a lo na bawk si, ka nu leh pa bulah ka vui hial ṭhin a, mahse, engmah min tihsak thei si lo. An rilru a hah ve ṭhin ngâwtin ka ring. Kei lah chuan naupan ât lai a ni bawk nen engmah ka hrethiam ve der si lo. Tun hnua ka ngaituah let hian ka va inchhir ṭhin tak em!

Kum khat hnu chuan ngaiah ka neih tawh avangin harsa pawh ka ti tawh lem lo va, mi awhna em em pawh ka nei tawh hek lo; ka chantawkah ka lungawi thiam tawh em em a ni. Kum a vei zel a, ka zirnate pawh ka hlawhtling chho ve bawk nen, ka hlim a, ka nu leh pa pawhin min chhuang bawk a, midang angin pawisa duhtawkin hmang ve thei lo mah ila, ka zirnaa ka hlawhtlinna chuan min tihlim a ni.

Lui tui luang angin hun leh ni pawh a ral zung zung a, ka zirnaah pawk ka sang chho ve zel bawk a. Harsatna tam tak karah chuan Primary chu ka zo ve ta; ka va han hlim em! Rahbi thar rap turin kum tharah chuan a hma ka luhna ngaiah bawk chuan admission chu ka ti leh a; sikukl luh hunah chuan ka pa chuan min dah lut a, naupan tët aṭanga ka nu leh pa bula awm lo ka nih avangin, ka pa’n a haw dawna ‘i lungleng em?’ mi tih pawhin ‘aih’ tiin ka chhang mai a. Ka pa a lungawi lo tih chu ka hmu a, mahse, dawtsawi chu Pathian-in a duh lo tih min hrilh ṭhin avangin ka rilru dik takin ka chhang ve mai a ni.

Kan sikul kha Middle thleng a awm avangin thil tihna engkimah a hmahruaitu-ah ka ṭang ve ṭhin a, hostel devotion-ah pawh ṭanna ṭawngṭaitu (opening prayer)-ah min hmang ṭhin a, a nuam thei khawp mai. Chutia Bible te ka chhiar thiam ve takah chuan kei pawh ka hlim a, ka nu leh pa pawh an hlim em em bawk a. Chawlh chhunga ka haw chang hian inchhungah pawh hostel-a ṭawngṭai min zirtir angin ka chhungte bulah ka ṭawngṭai ṭhin a, ka chhungte pawhin hrethiam lo chungin an ngaithla ve mai a; ka u leh naute pawhin min duat em em ṭhin. Khawilo kal velnaah pawh ka tih aiin an ti a, mahse, min thîk chang erawh an nei ve fo.

Kum a ral zel a, middle ka zawh meuh chuan sual lamah ka tlan lut ve ṭan a, ka nun pawh a sual chho ṭan ta. Ka nu leh pa leh unaute hlimna thlen ṭhintu kha tunah chuan misual ka ni ta reng mai. Mahse, ka inhrethiam lo, chuti chung pawh chuan ka zirna chu ka ngaithah ngai chuang lo va, hlawhchham pawh ka nei ngai hek lo; ka hlawhtling chho ve zel a, kum thum a liam meuh chun high school life chu ka zo ta der mai a. Ka sual erawh ka sim chuang lo va, a ngai të bawkin ka nun chu ka hmang chho zel a ni.

Keimaha sual awm chuan sual zel tura min tur ni awm takin, sual rawng ka bawl theihna hmun remchang lam, phai lama chhuk thla turin min tur a, kei chuan thlêmna a ni tih hrethiam lovin ka lo zawm a, nei lo chung chungin phai lamah chuan ka liam thla ve ta a ni. Phai ram chu a lo ropui ngei mai, mihring an tamin in pawh a tam em em a; kei thingtlang kilkhawrh a cheng tan chuan ennawm a va tling tak em! Ka nu leh pate hmuh ve atan ka awt em em a, a ropuizia chu an bulah ka sawi bang thei lo.

Phai ka thleng chu zu a lo tamin ka hmuh ngai loh tam tak ka hmu a, ka la in ngai miah loh zu pawh ka in phah ta nghe nghe a ni. Sual a ni ti hre mah ila, ka sim thei chuang lo va, sim aiin a danga pakai chhoh zel châkna ka nei ta zawk a. Engthil nge ka tih pawh inhre lovin ka hun chu ka hmang chho zel a, ka chhungte chuan ka chungah rinna tam tak an nghat tih reng ka hre tawh si lo. Ka chhungte tan mi hnawksak ka va ni tak em! Ka chhungte chu ka bum ṭhin a, dawt hlirin ka khat ta. Ka hmakhua ngaihtuahna chang lah ka hre tawh bawk si lo, harhfim laiin nghei ṭhin mah ila, ka hmaa a awm tawh hi chuan ka kalsan thei bawk si lo. Ka hmakhua thimzia chu hre mah ila engmah tih thei ka nei bawk si lo. Ka nun a chau va, ka thlarau a rum ṭhin; sualna erawh a hlim thung.

Ka nu leh pa chan tur ka dawn ngai lo va, engtin nge an awm/ka awm tih ka inhre ngai lo. Ka nu leh pa chuan keimah avangin ṭhenrual an kawm ngam lo va, mi bulah pawh an awm ngam tawh lo. Kum tawpa ka haw chhoh pawhin ka nu leh pa chuan min lo hmuak mah se a hma angin an hlim tawh lo tih ka hria a, an hmai zah tak chungin ka awm a, an hlim lohna chhan pawh ka hria, engmah tih theih ka nei si lo. Tawngṭaina pawh ka nei ngam tawh lo va, Bible pawh ka keu ngam tawh bawk hek lo. Ka thlarau chuan châk hle ṭhin mah se ka taksain min thunun tlat avangin ka thlarau châk leh duhzawng pawh engmah ka ti thei lo.

Ka nu leh pa hmai zahna chuan mahni intihlum (suicide) duhna rilru pawh ka put phah ta hial a. Ni khat chu ka nun hian ka chhungte tan engmah ṭangkaina a nei tawh lo tia inawhlumna tur ka buatsaih mek lai chuan Class-X (Ten) ka pass ṭuma KTP-in Holy Bible min pek chu ka rahchhan turah hian a lo awm a, ka la a, chhiar pawh tum hran lovin ka han keu a. Chutah chuan I Korinth 1:18 thu hi ka keu fuh hlauh mai a, ka chhiar chhuak a. Ka rilru min hneh em em a, ka thil tih lai chu kalsanin fianriala ṭawngṭai turin ka chhuak a, kei pawh ka hlim ngei mai. Chumi ni aṭang chuan nun pangngai takin ka nung chho leh ta a. Ka chhungte nena kan inkar boruak pawh tlem tlemin a ṭha chho ve ta zel a.

Krismas leh kumthar ka hman zawh chuan exam tura ka chhuk thlak ngei a ngai si, ka awmdan tur ka va hrethiam lo tak em! Ka chhungte phalna ngeiin ka chhuk thla a, mahse, a hmunah chuan sual ka kalsan leh thei tawh si lo. Engtin nge ka tih dawn tia ka inngaituah changin ka rilru a hah ṭhin a, ka awmdan tur lah ka hre si lo. Pathian puihna dil turin chakna ka nei lo va, ka ngam leh tawh bawk hek lo. Dil ila chuan min pui ang tih hre mah ila, ka tisa chuan a ngam ngang lo a ni. Vanneihthlak takin exam ka zo va, result nghah pahin tiin kan khuaah ka haw a, thingthlang chuan tih tur a awm lo avangin ka insum thei mai a. Result chhuah a lo hnai ta, ka zâmin ka ngaihtuah ngam lo va, mahse thil mak a thleng ta; ka hlawhtling (pass) reng mai chu ka awih thei lo, a tak erawh a ni si.

College chu keima duhthu ngeiin Mizoram-ah chuan ka zawm a, ka tana Pathian ruat a ni tih chu ka hrechiang tawh khawp mai. Min hriatchiantir leh zualtu chu kum khat pawh ka awm hman lo tiin kan khuaah krismas hmang turin ka haw a, vanneihthlak takin December ni 25-ah ngei chuan taksa chetna ka chang a, Isua zarah tunah chuan mi thar ka ni ve ta a ni!

Thufingte 29:1, II Timothea 4:5, Philipi 4:13, Sam 73:28 — He’ng Bible changte hi i lo chhiar chhuak dawn nia.

Thlarau lama mi thar nih hi a lo va nuam tak em!

Hun ṭha i neih lai hian i thinlung kawngkhar kiktu chu hawnsak rawh, khua i tlai hma hian. A beidawn hunah zawng i tan hun a awm tawh lovang. Min hmangaihtu chuan kan hmangaih let ve min phut a ni tih hi theihnghilh ngai suh ang che.

Similar Posts:

• Zo tawng hi a mawi mang e! (Thlûkna chungchang)
• Ka thiannu kha…!!
• Ka fate chu..
• HRING NUN
• Love Story – III

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, February 18th, 2012 at 6:00 pm and is filed under Advice, Luangliam, Religion. You can follow any responses to this entry through the RSS 2.0 feed. You can leave a response, or trackback from your own site.