mi(sual).com

Isua Krista Thawhlehna hi Chanchintha kan tiha a Thupui laili(Central message) a ni a. Beiseina thu a keng tel tlat bawk a ni. Krista kha tholeh lo ta sela, Ringtute thawhlehna kan beisei hi awmze neilo ani ang. (I Korinth 15:14)

Krista thawhlehna pawimawhna:

1. Kan Thuhril innghahna ber a ni. (I Korinth 15:14)
2. Kan Rinna innghahna a ni. (I Korinth 15:14)
3. Sual ngaihdamna hi hetah hian a innghat tlat a ni. (I Korinth 15:17)
4. Kan Chhandamna hi a innghat tlat bawk. (I Korinth 15:17,18)
5. Kan beisei(hope) hi hetah hian a innghat tlat . (I Korinth 15:19)
6. Apostol-te thuhril ber kha a ni. (Tirhkohte Thiltih 4:33)
7. Hrilhlawknate pawh heta innghat hi an ni. (Luka 24:46)

Tholeh Krista Thusawi pawimawh thenkhat te:

1. Lungngaite Hnemna thu: “Hmeichhia, Engati nge I tah?” (Johana 20:15)
2. Thlarau lama Thuneihna thuchah: “Lei leh vana thuneihna zawng zawng ka hnenah pek ani tawh” (Matthaia 28:18)
3. Thupek Ropui: “Khawvel zawng zawngah kal ula, thilsiam zawng zawng hnenah chuan Chanchintha hi hril rawh u” (Marka 16:17)
4. Chhandamna thuchah: “Tupawh a ring apiang…Chhandamin an awm ang.(Marka 16:16)
5. Chhinchhiahna mak takin a zui tur thuchah: “Heng chhinchhiahnate hian ringtute chu a zui zel ang…” (Marka 16:17)
6. Thlarau Thianghlim Baptisma chan tur thuchah: “Thlarau Thianghlim baptisma in chang ang” (Tirhkohte Thiltioh 1:5)
7. Sual ngaihdamna thuchah: “Tu sual pawh in ngaihdam apiang ngaihdam a ni ang; tu sual pawh in ngaihdam loh apiang ngaihdam loh a ni ang,” (Johana 20:22,23)
8. Rinna thuchah: “Hmu lova ring apiang te chu an eng a thawl e” (Johana 20:29)
9. Hmangaihna thuchah: “Heng te ai hian nangin kei mi hmangaih zawk em?” (Johana 21:15, 20)
10. A beramte chawm leh enkawl tura ngenna thuchah: “Ka beramte chawm/enkawl rawh” (Johana 21:15,16 & 17)
11. Khawvel tawp thleng pawha a thuhretu kan nih tur thuchah: “Kawlkil thleng pawhin ka thuhretute in ni ang” (Tirhkohte thiltih 1:8)
12. Kan hnena awm zel a tiam thu: “Kei kumkhuain, khawvel tawp thleng pawhin, in hnenah ka awm zel ang,” (Matthaia 28:20)

Buhchium leh Phengphehlep mawi tak.

Buhchium pangang hi in hmu tawh ngai em? A hlau leh Rapawm ti chi tan chuan rapawm mut mut tak a ni. Ama tan tawmna in insiam chawpin chu in(Cocoon?) chhungah chuan hun engemawchen a han awm a. a tal ve mut mut thei a ni. Duhawmna leh mawina hi a nei lemlo khawp mai a, a bawm/in chhunga awm anih tlat avangin eng han ti thei tak tak pawh a ni lo. Amaherawhchu, chu pangang rapawm angreng taka tang chuan awihawmloh khawpa mawi leh pawisawilo Phengphehlep mawi em em a lo chhuak thin hi thil mak tak chu a ni e. Mihring hlui thihna leh Thawhlehna pawh hi hetiang Pangang atanga Phengphehlep mawi tak lopiang chhuak nen hian tehkhin a remchang khawp mai.

He anchhedawng taksa hi chu Isua Krista thawhlehna tello chuan Pangang rapawm leh a then tan phei chuan tenawm mai a ni a, a chatuan hmun pawh Chatuan Hremhmun a ni. Amaherawhchu, chu Sualpu taksa atanga Tholeh Isua nun tawmpuitu mithar lo piang ta erawh chu Phengphehlep mawi tak ang chu niin, Thihhnihna pawhin an chungah thu reng a nei pha tawh lova, Chatuan nun neitu a lo ni ta daih a ni. Setana chi awm kha Isua Krista rualin tihhluma awmin Thlanah Phum bo a lo ni a, Isua Krista rual vekin ropui taka kaihthawh lo niin, Pathian fapa nihna roluahtu dinhmunah dingin, Setanan a laksak theih tawh loh Chatuan nun neitu a lo nita a ni.

Kan thutawp nan chuan Thawhlehna hi Beiseina nung min neih tirtu anih thu hi I han sawi leh hram teh ang. Thawhlehna Ringlo tute leh Thlarau khawvel Ringlo tute tan chuan, an hmangaih takte an thihni chuan, chatuan chatuana inthen angah inngaiin an tan beisei tur a awm ve tawh lo a ni. Keini erawh chuan Krista Isua Thawhlehna zarah Hlim takin kan la inhmu le hang a, chatuan chatuanin kan la lengho le hang a, inthen kan hlau leh ngai tawh loving tih kan ring a, kan hria a ni.

Harsatna leh manganna vawrtawp alo thlen chang pawhin kan dinhmun engkim amah ngeiin lo tuar chhuak tawh; a hrehawm zia leh mihring tan tawrh a har zia min hriatthiam pui tu Pathian, Mihringte hmelma hlauhawmber leh hnuhnung ber Thihna hneha Tholeh Krista Isua avangin BEISEI kan nei a, Kan manganna min chhawk zangkhai thin ani.

Graham Staines leh a pafa te 2 Phillip leh Timothy te zan lum lutuk avang a pawnlera an Motora an mu lai, Hindu firfiak hovin an halkhung ka ngaihtuah chhuah chang apiang hian Ka fapa duhtak 3 te nen hian nita zawk ila tiin ka ngaihtuah fo thin. Keimah ringawt hi chu Thihchilh tura inpe thlap kani a, ka buai lo ve. Amaherawhchu, ka fapa naupang te te pawisawilo te hlau thlabar tur leh ka chhan thei silo tur ka han ngaihtuah a, ka hmuh lai ngei a, na tuar leh hlau thlabara an thi tur ka han suangtuah thin hian, ka tiril hi a khur thin a, ka zam deuh thin a ni.

Anmahni vuina Program-ah an farnu neihchhun Esther kha interview an han nei ta a. “Ka Pa duh tak leh ka nutate 2 ka han chan ta mai hi ana chu ka ti tak zet mai a, an telloa khawvel hmachhawn pawh hi a huphurhawm ka tih em em laiin,Tholeh Krista avangin ka hmalam hun thim tak anga lang hi ka hmachhawn ngam a ni” tiin a sawichhuak a,

“Because he lives I can face tomorrow;
Because he lives all fear is gone;
Because I know he holds the future,
And life is worth the living just because
He lives.

tih hla kha chham chhuakin Hnehna a puang thei ta zawk a ni.

Lal Isuan Mihringte hmelma tihbaiawm ber leh hnuhnung ber THIHNA min lo hneh sak hi a va han hlu teh lul em. Eng thil thalo pawh kan chungah lo thleng sela, min tanpui tura a NUN reng avang hian, kan hmalam hun hi a eng a, kan su ngam zel dawn a ni. Chatuan hlim tawp lohna hmun min buatsaih sak tih kan hre kiau si a.

Similar Posts:

• Thlarau Thianghlim (Pentecost Pual)
• Tih nun kan ni (Easter pual)
• Halleluiah! A Tho Leh Ta!
• Pentecost pualin
• Ringtute chunga Pathian beisei leh duhzawng{Sunday Pual}

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Sunday, April 8th, 2012 at 5:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.