mi(sual).com

“..Tin, anni chuan heti hian min chhang a, ‘Lei leh van Pathian chhiahhlawh te kan ni a, kum kha leh chen a sak, Israel lal ropui tak pakhat lo sak zawh tawh in chu kan sa tha leh a ni’” Ezra 5:11

Khawvel mite leh ringtu tamtakte chuan thiltihtheihna, thuneihna, dinhmun, hmingmawina, leh nihna te hi ropuina tehnan an hmang thin. Lal Isua tehna erawh chu, dinhmun lam ni lovin, rawngbawlna, hnathawh/ thiltih lam zawk a ni. Pathian hma a kan ropui ve theihna chu, mi engzat in nge rawng min bawlsak tih lam ni lovin, mi engzatnge rawng kan bawlsak tih lam zawk a ni. Tute pawh chhiahhlawh kan ni thei, mahse, kan nungchang a pawimawh ber thin.

Mitam takin, training hlim te, harhna alo thlenhlim te hian, thlarau nun a khat ten tawn a inhriat lai te hian Pathian rawngbawltu han nih te kan chak in, missionarya chhuahte thlengin an chak tet tet thin  hial awm e.

 Mahse, Pathian min kaihhruai tumdan hi chu, mihring ngaihtuahna atang chuan a letling thawk a, a kal kawng chu tuar, chan, kalsan, a ni nawk mai. Krista zui theihlohna tura hnawk awmte chu chhawk hmiah hmiah a lo ngai ta. Rawngbawl tura kohte tan chuan, Krista chu a pawimawh ber tlat tawh si, chhiah hlawh chu apu aiin a ropui miau loh avangin, ka Lalber Isua Krista avangin engkim chan ngam alo ngai ta. mahse, chutiang hmuhpui ve thiamlo, khawvel tarmit atang chuan atthlak tak a ni thung.

Chung mai piahlamah chuan, Pathianin, kan chapona, ‘kan mihrinna’(tisa-na) chak tak hi nuai ral a, chhiahhlawh thinlung pu, a mah zawk keimahni a lo nun chhuah a duh a, chu mi min nuairal a tumna tak kha, mi chapo, tisa mi chuan na an ti em em mai a,  thlarau nun a chau te an ti ve a ni. Keimahni lam kan ral a, kan chauh der hnu – ah, Lapan, “Chakna ni lovin, theihna ni hek lovin, ka thlarau zawk in le…..”(Zak 4: 6) a tih angin, chau ve ngailo “Krista” chu keimahniah a lo nung ve ta thung a, chuvangin, Paulan, “..Krista chu keimahah nung zawk a ni…” (Ga 2:20), “Krista chakna nasa tak keimaha thawk thin chu hmangin……” (Kol 1:29) a lo tih thin chu. Thlarau diktak hruaia awm, Lal Isua kha, a phur hluai ngai lova…a chau em em chuang hlei lova, midangte tana, a nun a leihbuakna tur hmun Kross a pan hmiah hmiah mai a ni.

Tin, Rom 12:1ah: “Pathian khawngaihna avang hian inthawina nung leh thianghlim leh Pathian lawmtlak niturin in taksa chu inhlan ah ka ngen a che u, chu chu in rawngbawlna awm reng a ni” a ti mai a ni.

Pathian rawng kan bawl ve theihna chu, kan duhdan leh tum ve dan leh, ni a kan hriat dan te hi paih thla a, min hmangtu tur Pathianin, a duhduhdan a min hman atana, kan in hlan/in pumpek (sacrifice) phalna tak kha – thi a in hlanna – “inthawina nung leh thianghlim leh Pathian lawm tlak” chu ani. Inthawina ‘ran’ a nung in an hlan ngailo, (a nihloh chuan, in thawina mei a sa tan ta maw tihah, an tal phut a, an tal chhuak daih mai awm e. Ngaihdan, tum dan, leh rin dan pawh nei tawhlo khawp ‘thi zawr hnap’ an hlan thin angin, Pathian hman theih tura inpek hlawmtawp kha,  ‘inthawina nung leh Pathian tan a rimtui’ chu a lo ni.. Pathian tan thil ropui tihtum kher hi hmantlakloh kan nihna a ni fo. Thil ropui kher lo pawh ti turin in peih ila, Pathianin tih tur a kawh min kawhhmuh thei ang. Mihhring thlah te zingah Leader nih tum an tawt hle laiin, chhiahhlawh nih tum te tan chuan rawngbawlna field ruak ala tam hle.

Tuk khat chu, German ram khaw pakhat, kawtthler chep tak, in inhnaih te te kara khawsa, Pastor Henry a kawngka chu tu emaw hian an rawn kik ri dawt dawt a, kawngka ava hawng chu, hmeichhe pakhat hian, nau pianghlim hi lo pe in, “..kha i sual rah a nih hi” a ti a, amah lah chu a tlanbo zui leh nghal a. A thenawm khawveng , a in hnaih a awm ve te ho chuan, anlo hria rual rual in, chu thu thang chuan, chu khaw te reuh te chu a luahkhat nghal ta reng a. “E he ! mithianghlim ang a kan lo ngaih rawngbawltu Pastor chu leh….a va lo tenawm ve” tiin thenawm khawveng zawng zawng chuan, hmuhsitna thu tenawm tak tak chhak chhuak in, an diriam a. Mi hmuhsit leh engdawng a hlawh zui nghal a. A sualna engmah awm si lo, hmeichhe-in a ma sawn, lopiang chu, a enkawl thei dawn lo tih hria in, a enkawl puitling theitu atan a mitha ber ni a a hriat,  Henrya kutah a rawn pe a ni a. Henry a chuan thil tihsual engmah a nei lo. Mi in an rin na an hlauh vek ta bawk si, a thusawi awihsak tu pawh a nei ta lo. Lu kun-in, Pathian hnenah, “Lalpa, engkim hretu, he naute hi tunge a nih ka hrelo tih i hria e, ka sual na ni miah lova, ka chunga thil tleng hi hriat thiam ava harsa tak em, hmingchhiatna leh hmuhsitna chauh ka hlawh ta a nih hi…” tiin a tawngtai ta a. Chawp leh chilhin, a chhan na ‘aw’ a hre zui nghal a, “ Kei pawhin mite sualna phun nawi lovin kross ah ka phur a, nang pawh in i phurh ve a ngai a ni” tiin. Chutah Henry chu a harh ta huai a, chuta chin chu thiamthu pawh sawi ngai tawh lovin, a tih tura Pathianin a pek chu, lungawi taka hlen chhuah a tum ta zawk a. Kum tam fe hnu-ah, naute pawh a lo nula ve dawn ta hial tihah, Pathianin naute nu hnenah thusawiin, chu nu chu, chu kawtthlerah ngei chuan a rawn inpuang ta a, “..he ka fanu hi, ka sual rah a ni a, a lo pian khan, ka enkawl puitlin theih dawn loh avangin, a enkawl seilian theitu tur ni a ka rin, mitha bera ka ngaih Henry a kutah ka dah ta a ni..” tiin. Chutah, chu kawtthlera chengte chuan thudik an han hre ta chu, thenawmte leh kohhran ho te chuan, Henry chu, an ngaisang in, a hma a an lo rinna let tamtak in an ring ta zawk hial a ni. Rawngbawltu Pathian chhiahhlawh rinawm tak a ni tih an hre ta a ni.

Lal Isuan, a hmangaih em em Petera hnenah –“…..i upat hunah i kutte i phar ang a, midangin an hren sak ang chia, i duhlohna lamah an kai tawh ang che” (Jn 21 18) a tih kha. Petera mi rorum, mihrinna chu a ral ta, a duh emaw duhlo emaw – chhiah hlawh chu, a tirtu (a pu) Lal Isuan tirhna lam ah, a mamawhna hmun hmunah, tlanchhe tawh lovin ke a pen tawh dawn a ni. Pathian thuawih mai hi – kan rawngbawlna a ni, tichuan, Lalpan min hmang thei tawh ang.

Rawngbawltu chhiahlawh chuan, mahni in chawisan emaw-mite ngaihsak leh zahderna an thlalhlel lo. In ngaihtlawmna ‘ap-ron’ fengin, midangte rawng an bawlsak thin. Rawngbawlna leh promotion hi ngaih pawlh tur a ni lo.

 John Wesley chuan, “Thil tha I tih theih chin chin ti la, I tih sak theih zat zat hnenah ti la, I tih theih dan kawng kawng in ti la, I theihna hmun hmun ah, I theih chhung, I theih zat te hnenah,I theih chen chen ti rawh” a ti.

  “a hniak a in zuina turin entawn tur a hnutchhiah che u kha..” (I Pe2:21)

Lalpa chhiahhlawh ni turin, Lalpan malsawm theuh che u rawh se.

Similar Posts:

• THAWHLEHNAA TIHNUN KA LO NI TA
• Tih nun kan ni (Easter pual)
• I kawngzawh lai kha chhut ngun rawh..
• Eng ang rawngbawltu nge i nih ve le?
• Chemtatrawta baltin mawng a pawp

Recent Posts:

• YMA
• Hringnun thim lam
• Mithianghlim-te Inpâwlkhawm {Sunday Pual}
• C.P. Road
• Thalai ni si:

This entry was posted on Thursday, April 12th, 2012 at 12:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.