mi(sual).com

Huivalenthiam: April 22, 2012 Sunday tlailam dar 2:30 khan Pu Thangvela Zodi, kum 57 chuan Kalaymyo Damdawi Inpuiah a dam beiseia a inenkawl mek lai chuan, a natna thisen thlum leh zun thlum hnathawh chu a dampui theih tak loh avangin a hmangaih em em a nupui—Pi Ramfangthuii leh a tu leh fate chu he khawvel atangin fam khawpui a lawisan ta a ni.
Awle, Zoram khawvela Music group lar tak lo ni tawh thin leh Zofate Music khawvela a hming dai ngai tawh lo tur ZODI group khaipa Pu Thangvela chanchin tlangpui chu a hnuaia tarlan ang khuan a ni.

Pu Thangvela Zodi hi hring chan atanga ngaihtuah mai chuan a la naupang em em a, he ti mai a—fam khawpui min lawisan ta thut hi ZOIN hian pawi a ti tak zetin , a sun tak meuh a ni.

A CHANCHIN:

Pu Thangvela hi Pu Hungliana (fam), Khawlhring leh Pi Saihmingthangi (Pi Sami) Hauhnar te lakah 1955 November ni 18 khan Maulmein-ah a piang a. A lai-ha hming tak chu; a pa Pu Hungliana lungden Discus leh Javelin sport lama a hmingthanna chawiin Hmingthangvela tia sak a ni. Mahse Thangvela (ukdoef;0if;) tih a ni ta a ni. Unau 7 an ni a:

Hming: Nupui / Pasal Awmna

1. Thangvela (Amah) .Ramfangthuii (Mami)
2. Thangkhuma………….Vanhlupui (fam) ……….Aizawl
3.Lalhmingthanga(Zodi Drummer Ektea):Sayama Suipari ..Tahan ‘B’
4. Zohmingthangi ……….U Maung Mya ………….Tahan ‘A’
5. Khawlthanga (fam)
6. Thangzuali ……………. Upa Lallunghnema ……Yangon
7. Biakthangliani ……….. Lalzasanga ………………Aizawl

Kum 1975-ah Ramfangthuii (Mami) nen an innei a, an fate chu:

Hming: Nupui / Pasal Awmna

1. Zonunhlimi ……………… Rev. Lalthlanhlua …..Tahan ‘D’
2. Zonunsangi ……………… Vanlalnghaka ………..Tahan ‘A’
3. Zonunthanga (Valtea) … Vanlaltluangi …………Inpui
4. Zonuntluangi …………………………………………..Inpui

Tu 5 hmel a hmu.
Thangvela hian a thiante nen Zodi Rimawi Pawl an din a, a hun lai chuan Zoram khawvel a deng chhuak vek a ni. Tahan khaw chhung kawng metal road zut chungchangah Committee President niin hma a la nasa hle a, thuneitute a biak thiamna leh mipuite tanrualna atangin Tahan hian veng dang aiin kawng zut kan neih tam phah a ni. Chapchar Kut leh hnam chungchanga a tangkaizia pawh hi chhuan tlak tak a ni.

A natna:

28.8.2011 khan Doctor-ten Right Sided Hemiparesis an tih natnain a na a, 30.8.2011-ah Kalaymyo damdawi inah a lut a, 5.9.2011 khan damdawi in atangin a chhuak leh a, thisen thlum leh zun thlum te pawh a lo vei reng tawh a lo ni a. Mahse, Doctor-te thu zawm zelin nasa takin ei-in a insum a. 9.9.2011-ah Yagon Hospital lianah in-check up-in ni 10 vel a châm a, 17.9.2011-ah a lo hawng leh a, pangngai takin a awm leh a ni. 18.4.2012 khan a na leh a, 19.4.2012-ah Kalaymyo damdawi inah kan riak lut a, a harh ta lo reng reng a. 22.4.2012 tlai dar 2:30-ah min peih lohsan ta a ni.

[ Source: zoin.info April 22, 2012 ]

[ Amah ka ui ve em avangin inthlahrung takin ka rawn copy paste ta mai. Mi pawi ka sawi a nih chuan ngaihdam ka dil nghal bawk e. – CFL ]

# ZODI (Rimawi Pawl) hre lo chu kan awm lo turah ngai ila. Kan hriatna chawkharh turin an hla tam tak zinga thenkhat chauh ilo tarlang teh ang:

1. Zodi rimawi pawl
2. Ka phur zo lo
3. Mengmawite
4. Enga’n kan intawn
5. Ka liam tang’e
6. Damlai pialral
7. Chhawrthlapui
8. Ka dem lo che
9. Nang zuna uai
10. Min awm rawh
11. Mami ka ngai em che
12. Tleitiri
13. I rau i thla talin
14. A thar thin
15. I rel ang aw
16. Lo kir rawh
17. I lengdun ang
18. Duhaisam
19. Lenghermawite
20. Hlimlai Ni

ZODI CHANCHIN TAWI:

A ngaihthlakna bungrua kan la tlakchham em em lai, khawthlang rimawiin min bual tawh hnu si; Mizo thalaite rimawia an tuihal em em lai, kum 1970 chhovah khan Zorimawi khawvel nghawr nghing dawt khawpin khawchhak lam atangin lungpui a lo lum a, chu lungpui chu Zodi a ni. A hming Zodi a nih ang ngeiin Mizo thalai rualin an ‘di’ atan an thlang vek a, an ngaihzawn rawn a tih theih hial ang.

Golden Nghapih

Tuna T-Melody pian hma daih hian Tahan-ah vêk Mizo zaithiam leh rimawi tum thiam rual an lo inpawlkhawm tawh a, hming an invuah hran lo. Mahse mi thenkhatin ‘Shwe Ngapih’ an tihsak a, chu chu “Golden Nghapih” tihna a ni. Hetih lai vel hian Zoram khawvela lar chhuak ta T. Zorampela chu Mandalay-a lehkha a zir lai a ni a. Mandalay-a a lehkha zir zo Tahana a let leh chuan tih tak taka zaiho a rawt a, kum 1975 khan Zodi hi an din ta a ni.

Zodi original line-up chu: T.Zorampela (Lead Guitarist); Lalthankima (Second Lead Guitarist); Thangvela (Rhythm guitarist); Ramthanmawia (Bassist); Lalhmingthanga (Drummer) leh Vocalists- Lalhlunmawii, Lalenkawli, Thangluaia, Thanghlira, Lalhlima te an ni. Ramthanmawia (Papuia) hi Zarkawt Aizawla Akai dawr neitu thin, MNF ticket-a Lungpho biala ding ve ta kha a ni. Zodi album hmasa ber Damlai Pialral bak kha chu a tel chhunzawm ta lo. Original line up te hi Damlai Pialral album-a part neiho chauh kha an ni a. Anni lo pawh hi member eng emaw zat an la awm. Sap hla leh Burmese hla an sa-ho thin a, Zorampela chuan, “Khangho kha chu Mizo ni tho mah se, sipai fate an ni a, an Mizo tawng lam dan a dik lo deuh a, Mizo hla an sa ve ta lo. An zingah khan aw tha deuh deuh an awm,” tiin a sawi.

Sulsutu album

Kum 1977-ah khan album hmasa ber Damlai Pialral an tichhuak a. Mizo rimawi album hmasa ber dawttu nia hriat a ni. Hemi hma hian kum 1976-ah Tahan Band tho, VULMAWI chuan an album hmasa ber ‘Raldawna leh Tumchhingi” an lo tichhuak tawh a, a band din kum azawng chuan Zodi a hmasa zawk a, Vulmawi hi kum 1976-a din a ni.
Damlai Pialral album an buatsaih lai hian Zodi hian sum leh paia hlawkna an beisei lova, an khaipa Zorampela chuan, “Hlawk chu sawi loh, chawi belh pawh kan inhuam hial a ni,” a ti. Hloh inring sa chungin khawchhak lam unauten Zofate chu kum 30 chuang kal ta khan rimawi khawvelah bung thar min kaipui ta.

Technology tlan khalhin

Tunlai khawvel atanga ngaihtuah chuan nuihzatthlakte pawh a chang hial ta ve ang. Mahse Mizopain ‘Khawlthluakneiin kum 2000 hnu lam a hmu thei ta lo’ tih takngial pawh a la manthiam hma daiha Zoram khawvel nun tur chu han ngaihtuah teh. Chutih lai chuan tape recorder nei an la tlem em em a, radio nei pawh an la induh larh! Mizoramah pawh thingtlang khaw tam zawkah chuan khaw khatin tape pakhat an intawm theih chuan a ngah pawl an ni ang. Chu’ng hun laia album copy tam tak hralh chu, Sihphira Iskut zawrh tum ang vel a ni ang! Mahse chuti chung chuan Damalai Pialral album copy khat kha mi eng zatin nge ngaithla ang a, eng zatin nge copy chhawng ang?

Tunlai technology kan la ban phak hma khan Zodi chuan album tha tak an lo sual chhuak tawh a, tun hnua han ngaihthlak erawh chuan a recording technology that tawk lohzia hi a hriat a, a music composition leh a melody erawh a hliah khuh zo lo.
Zorampela chuan, “Mandalay-a kan record a ni a, Four track recording a ni. Vocal leh backing vocal ten mike pakhat an intawmte a ngai a. Over dubbing theih a ni lo a, tunlai nen khaikhin chuan lei leh van ang a ni,” a ti. A dik a ni! Chu mai chu a la ni lo, studio hman man an neih daih loh avangin hun tlem thei ang ber hman a ngai a. Damlai Pialral album hi ni khat leh chawhma chhungin an record zo vek a ni. Beng tikham deuh lai pawh han siamthat leh theih chi a ni lova, an vawikhat record kha an ring nghal zel a… Backing vocal leh second lead pawh hi over dubbing (thun nawn) awm miah lovah chuan a tha thlawt! Zorampela paw’n a khap sual lo hle mai. Tunlai angina technology chu tha phei se… Khati chung pawh khan Tahan thlipui chuan Mizoram a nuai hneh em em tho va, a nghin hian a nghing lui lui a ni ber. Zorampela, Lalenkawli, Lalhlunmawii tih vel chu thalaite hming lam zin pawl a lo ni ta a. Zodi zunah nula leh tlangval an uai kur nguai nguai mai a ni.

Di ngaih puan min ban

Zofate tan album pathum ( Damlai Pialral, Phengpheleng leh Rosepar, Chingal Saum/Chun Leh Zua ) min hnutchhiah hnuah hun eng emaw chen chu an la zaiho zel a, Aizawlah ngei pawh concert ngaihhlut hlawh em em (sold out concert kan ti ang chu) an rawn nei leh a. Mahse Zodi member-te chuan vanglai chen reng thei ta bik lovin, nupui pasalte an nei ta fer fur a. Mahni seh seh mualah, tiin Zorimawi khawvela an sulhnute chu nakin, vanglai pelh huna lungleng khawhara la thlirlet leh mai tawh turin an tin darhsan ta thliah thliah a….Chuailopari chu chuai ve thei tawh ngai dawn lo mahse, a satu leh remtu mihringte erawh, thlalak hlui leh cassette hluiah bak an kim ngai ta lo. Duhaisam satu Thanghlira pawh hi kum 57 mi vel niin February 2010 khan Zokhawtharah a lo boral tawh bawk a ni.

[ Source: ZOLife, April 2011. ]

Zodi hian rimawi khawvela bung thar min kaipui miau a, an hunlai hre ve hman lote tan pawh ‘Zo’ tawh phawt chuan an la ‘di’ chhunzawm zel dawn a ni.

Similar Posts:

• Vulmawi lamlian
• Zorimawi 1900 – 1975 ……Chhunzawmna
• Award hlan tawh ah tu thlengin ‘My Father’s Songs’ in la dawng ve lo
• JAZZ UP AIZAWL CONCERT
• Aw, Zoram! ka ngai em a che

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, April 27th, 2012 at 6:30 pm and is filed under Copy Paste, Information, Luangliam, Mizo Society & Culture, Music and lyrics, Obituary. You can follow any responses to this entry through the RSS 2.0 feed. You can leave a response, or trackback from your own site.