April 2012, Mizoram Diary

May 6th, 2012 2:30 pm by chhana

1st. Sunday: He khawvela a len laia chawimawina hun a dawn awmchhun Jerusalem-a Isua Krista ropui taka a luh hriatrengna ni (Tumkau Ni) a ni a, zing karah kohhran hrang hrang naupangte leh zirtirtute’n tûmkau chawiin Isua chawimawi nan kawng an zawh.

2nd. Monday: Thangrimawia (65) Darlawn Vengpui, Lungverhkawn veng chuan a fapa mal neihchhun Lalchhanchhuaha (26) chu hreipuiin a bekah a chek a, Chhana hi Damdawiin panpui anih hnuin a boral. Darlawn khawtlang hruaitute hnen atanga thu dawn danin Lalchhanchhuaha hi rui reng mai a ni a, hemi ni pawh hian ruiin buaina a siam a, pindan te pawh a tichhia a, hreipuia a pa cheh a tum chu lo indangin a pa chuan a chek ta zawk a, damdawiinah thlenpui anih hnuin a thi ta a ni. Pu Thangrimawia hi police hnenah a inpe nghal a, hetianga a fapa mal neih chhun a thah takah chuan hreawm a ti a, a tap nasa bawk a, mahni kut inthlak mai duhin a awm a, ven a ngai hial niin khawtlang hruaitute chuan an sawi.

3rd. Tuesday: Hmeichhe chunga hleilenna leh pawngsual, thihna thleng thin chungchang ah Northern Range DIG Pu Zoramawia, Aizawl SP, Pu Lalbiakthanga Pachuau leh Pu.Joseph Lalchhuana SP CID Crime te chuan I&PR Conference Hall ah chanchinthar lakhawmtute kawm in India ram pumah Mizoram chu Pawngsual tam lawrlakna a nih thu an tarlang. DIG Northern Range Pu Zorammawia, chuan he hunah hian Kum 2008 -2012, kum 5 chhunga pawngsual leh thihna leh dan bawhchiatna hrang hrang te a tarlang a, Kum 2012 chauh thlir in ruang chhar thihchhan hriat mai loh kumin thla thum chhungin 13 an awm a, tualthahna a hmeichhe thi pakhat. Puitling china chhiar pawngsual tawk-11. Kum tlinglo kum 12 hnuailam pawngsual-13. Hurna lamhawia hmeichhe naupang kum tlinglo khawih chu kumin ah case register ala awmlo thung a. Hmeichhe zahawmna tibawrhbang zawnga sawisak leh khawih case pakhat. In bumna leh khuahkhirhna a vanga in zawrhtir tumna pakhat. IT Act, Internet, Mobile Phone leh Facebook leh thildang hmanga pawi sawina pakhat a awm tawh thute a tarlang. He hunah hian Mizorama Hmeichhe chunga hleilenna leh pawngusal a thleng thin chu engtianga ven theih nge ni ang tih te sawiho ani a, pawngsual tawk ten thubuai an thehluh ngam ngei theih nan khawtlang ah pawngsual tawk te kan la thin hrik dan te, Internet leh Mobile phone leh TV hman khawlohna avanga Pawngsual a thlen tam theihna bik te, nu leh pa ten fate hnena zirtirna pek leh khuahkhirh leh vantlang ah Awareness campaign zau zawka neih a that rin a nih dan te sawi rik ani bawk.

4th. Wednesday: Zankhat riaka Mizoram rawn tlawh turin Union Home Minister P.Chidambaram chuan Aizawl a thleng. Union Home Minister Pu Chidambaram hi Delhi atang lo thlawk in Lengpui lamah khua a that loh avangin Silchar lamah a rawn tum a, Silchar atang helecopter in Ṭhuampui a lo thleng a ni. A rawn thlen veleh Raj Bhawan pan nghal in, Chief Minister leh senior official te meeting a neih pui bak ah Civil Society Organisation leh NGO hruaitute leh chanchinbu mite a kawm bawk a ni.

5th. Thursday: Kolasib-a Paradise Restaurant-ah Zoom Kolasib buatsaihin Photographic Workshop neih a ni a, Kolasib District chhunga thlalak lama tui mi 30 rual an kalkhawm a ni. Workshop hi Pi Lallianpuii, DIPRO chuan a hawng a. Dr. Saihlira, DVO chuan ‘Basics of Photography’ chungchang sawiin zirtirna a pe a. Pu Stephen Laltlansanga Auhmun chuan ‘Ethics of Photography’ chungchangah zirtirna a pek bawk bakah Pu Marema Ralte, Remtluang Pictures chuan ‘Printing & Processing’ tih thupui hmangin zirtirna a pe bawk a ni. Pu Isaac Lalthanmama, President, Zoom Kolasib chuan Workshop hi a kaihruai a. Tlai lamah member zawng zawngte an Camera theuh kengin khawlaiah an feh chhuak bawk.

6th. Friday: Pathianin a fapa mal neihchhun kan tana a rawn tirh chhan ber a hlenchhuah na ni Good Friday a ni a; he hun hi Mizorama kohhranten urhsun takin an hmanga; Isua thih hriatrengna zanriah sacrament pawh kohhran tam berin an kil bawkin Lal Isua tawrhna lam thuchahte in fuih thar nana hman a ni bawk. Kohhran ṭhenkhat ruai nena hmang an awm bawk.

7th. Saturday: Red Ribbon football tournament, AIDS veite leh ruihhlo ngaite enkawlna tur thawhlawm khawn nana inkhel Village/Local Council huamchhunga mite inkhelh chu team 222 zinga a fim thei ang bera an in thlit hnuah a hmawr bawk a ni ta a; Chanmari leh Durtlang L/C team-te inkhelin Chanmari L/C team-te hian 2-1 a chakna changin a pumpuiah pakhatna an la.

8th. Sunday: Mizoram Baptist Kohhran Chanchin-a rahbi tam tak lo chhu Rev. Dr. HS Luaia (104) chuan khawvel chhuahsanin a rawng a lo bawl thin, a Lalpa hnenah a chawl ta. Pu Khanpuithanga tupa, Rev.Dr.H.S.Luaia hi 5.11.1908-ah Tawipui khuaah a piang a ft 5’, 3”-a sâng a ni a, Hrahsêl Saza hnam a ni. An unau hi mipa 6 leh hmeichhe 1 an vaiin 7 an ni. Thingsai nula Laldingi (Chhakchhuak) nên 14.4.1930-ah Darzo khuaah an innei a, Rev.Chuautera’n a vawntîr a. Vanduaithlâk takin a nupui chuan 1948-ah a thihsan a. Dt.14.2.1949-ah Sêrkâwn-a zirtirtu C.Lalêngi Chhangtê nên an innei leh ta a, Rev. Chautera bawkin a vawntîr a. An fate zawng zawng chu mipa 5 leh hmeichhe 6 an vaiin 11 an ni.

9th. Monday: MHIP Sub-Hqrs, Lunglei in rualbanlote sikul an enkawl, ONYX Special School building thar, Chanmari-a mi chu Social Welfare Minister, PC Lalthanliana’n a hawng. Building hi a dung ft. 32 leh a vâng ft. 28 a ni a, cheng nuai 16.5/- senga sak niin, Minister hian Rs 1000000/- a tum a ni.

10th. Tuesday: Aizawl khawpui laili laia kum 100 chuang lo in bengbel tawh Aizawl khawpui chhunga sipai te chu an hmun tur Zokhawsang lamah an insuan chhuak ṭan ta. A thawh khatnaah hian platoon khat an insuan phawt dawn a ni. Tuna Aizawl-a Assam Rifles awm mek te hi 26th Assam Rifles te an ni a, batallion dangin an rawn thlak hunah pawh Aizawl khawpui chhunga rawn awm tawh lovin Zokhawsang lamah an lut nghal zel tawh dawn a ni. Tuna insuan chhuak hmasa tur te hi AR Lammual chhehvel a awm te an ni a, Khatla ram lama Assam Rifles te erawh chu inpuahchahna tur tamtak a la awm avangin an la chhuak rih dawn lo a ni. Kum 1880-a British sorkarin sipai a rawn tirh luh khan Assam atangin Cachar Frontier Police te a rawn hruailut a; heng ho hi Aizawlah hian an in bengbel zui ta a, kum 1917-ah ‘Cachar Frontier Police’ tih hming chu ’1st. Assam Rifles’ tiin thlak a lo ni ta a ni.

11th. Wednesday: I&PR Secretary, K Lal Nghinglova chuan a office-ah MJA Gen.Hqrs.hruaitute thingpui a inpui a; Mizoram leh Mizo hnam siamṭhat na kawngah huaisen taka thudik ṭan a, an mawhphurhnate hlen turin a fuih.

12th. Thursday: Ruah leh thlipui thawk chuan Aizawl Civil Hospital Old buiding, Blood bank chung chu hneh takin a la a, inchung rangva leh steel structure pumpui chu Dawrpui venga Pu J Thankunga buiding thlawh khumin Pu Hauva buiding thlang, Sarawn veng atanga Chhinga veng panthlakna kawng peng thuam bula 2 wheeler workshop chungah zuk innghatin a chhunga awm mi paliin hliam an tuar.

13th. Friday: Boishu (Festival) vawi 2-na chu Bru Cultural Organisation (BCO) buatsaihin Damparengpui ah hman ani a, Pu John Rotluangliana Deputy Speaker-in a hmanpui. He hun hi Pu Biakthuama Molshoy President Bru Cultural Organisation (BCO) chuan kaihruaiin Pu Biakliana’n hunserh hmangin, Lalhmingthanga Gen.Secy BCO chuan an hmalak dan hrang hrang report a pe bawk. Boishu hi Cultural programme a hun hman niin, Solo, recitation leh folk Song a hun hman a nih bakah YMA Dinthar Branch te pawhin Cheraw lam an entir bawk. Mizoram chhunga khua 16 atang leh Naisingpara (Tripura) atangin tein mi 300 chuang he hun hmang tur hian an kal khawm ani.

14th. Saturday: Thingfal unit ṬKP chuan an Dimond Jubillee lawm nan Lawngtlai District Hospital-ah thisen unit 23 an pe a, a petute hi mipa 19 leh hmeichhia 4 an ni.

15th. Sunday: UPC (NEI) General Conference vawi 44-na tunkar Ningani (12th. Thursday) a Lammual sira neih chu a ṭiak ta. He inkhawmpuiah hian pastor hna kum 10 lo thawk tawh mi 19-te chu nemngheh an ni. He inkhawmpuiah hian Speaker Rev.Dr David K Bernard, UPC International General Superintendent-in Pathian thuchah a sawi ṭhin a ni. U P C ( N E I ) – a h hian member 94,189, rawngbawltu (pastor leh tirhkoh license nei) 908, tualchhung kohhran 701 leh pastor bial 125 an awm.

16th. Monday: Mizoram police, Aizawl District Special Branch chuan New Market-ah C.Hratthanga (48) s/o Thangchia, Chawlhhmun nia insawi hnen aṭangin .22 pistol an man. C Hratthanga hian licence nei lo a a zuar lai an man a, Rs. 40,000/- man a ni.

17th. Tuesday: JF Laldailova [L] in kum 1965-1977 inkara a thuziak lawrkhawmna ‘Thu Ngaihnawm’ tia vuah leh a fapa tlum ber, Peter Lalthangkima (JF Jr. tia hriat lâr) lehlin ‘Web of Deceit’ tih lehkhabute chu Assembly Speaker, R Romawia’n Aizawl Press Club-ah a tlangzarh.

18th. Wednesday: World Heritage Day a ni a, he ni pual hian INTACH, Mizoram Chapter member-te chuan Aizawla sikul hrang hrang tlawhin, sikul naupangte chu Mizo hnam rohlu thilte an sawipui.

19th. Thursday: MZP Sub-Hqrs, Tlabung hruaitute chuan ramri chungchangah Home Minister R Lalzirliana leh DGP, Lalrokhuma Pachuau te an hmu a; Tlabung chu Bangladesh nena inrina depa awm a nih avangin, Tlabung leh a chhehvela Mizo mipuite an him zawk nan leh ram venhimna lamah chak zawka hmalak a nih theih nan Tlabung bul ramri báwr velah IR/ MAP platoon hnih/khat tal dah belh turin an ngen a, Minister leh DGP-te chuan hma an lak zui tur thu an lo hrilh.

20th. Friday: Mizoram Board of School Education (MBSE) chuan High School Leaving Certificate (HSLC) Examination 2012 result a tichhuak a. A pumpuiah zirlai exam 15,206 zinga 10,989 pass in, pass percentage chu 72.27 a ni a; full mark 500-a mark 468 hmutu, C Laldintluangi d/o. C Lalnunkima, Mamit khua St.Paul’s HSS Aizawla zir chu pakhatna a ni. C.Lalnuntluangi hi July 14, 1995-a piang a ni a, ani hian subject zawng zawngah letter mark a hmu a, Science-ah phei chuan full mark (100%) a hmu a ni. C Lalnuntluangi hi MSLC-ah Mamit district –ah topper a lo ni tawh bawk.

21st. Saturday: Amway chuan an office-ah TNT-a awm fahrah naupangte tan Nanhe Chitrakaar programme hmangin, ‘Nungchate leh kan chhehvel’ tih thupui hmangin lemziaka intihsiakna an buatsaih a, TNT naupang 44 an tel. Naupangte hi hlawm hnih – kum 4-7 leh kum 8-12 inkarah ṭhen an ni. Amway hian ‘Nanhe Chitrakaar’ hi India ram hmun 64-ah an nei a ni.

22nd. Sunday: Mizoram chhung leh pâwna Mizoram Presbyterian Kohhran pastor bial hrang hrangte April 20, Zirtawpni zan aṭanga bial inkhawmpui hman chu hmun tamtakah Pathian hnathawh ropui tak nena an hman hnuin a ṭiak ta.

23rd. Monday: Mizo Academy of Letters (MAL) chuan I&PR Auditorium-ah Foundation Day vawi 48-na an hmang a; hetah hian Book of the Year 2011 atana an thlan, ‘Zodinpuii’ tih lehkhabu ziaktu, Lalchhantluanga [L] nu Pi Vanramchhuangi (Ruatfela nu) hnenah lawman leh tangka fai Rs. 5,000/- an hlan. Book of the Year 2011 thlannaah hian MAL hian Mizo irawm chhuak lehkhabu 183 zinga lehkhabu 148 te chu zir chiana endik a ni. ‘Zodinpuii’ tih lehkhabu ziaktu, Lalchhantluanga hi kum 2010 3rd July khan lirthei chesualah a boral tawh a, ‘Zodinpuii’ tih hi a thih hnua tihchhuah a ni.

24th. Tuesday: Young Women Christian Association te Ni, World YWCA Day a ni a, hemi denchhen hian YWCA, Aizawl chuan Synod Hospital Durtlang-a Grace Home-a awm mek HIV positive-te hnenah thilpek an hlan.

25th. Wednesday: Research Centre, Kulikawnah kângmei a chhuak a, mihring thi leh hliam an awm lo. Kângmei hi kawngpui ân hnuaia Operation Theatre bula inzaina hmanraw chhumna gas pût aṭanga chhuak a ni a, a kan nasat hmain ṭhelh mih a ni.

26th. Thursday: Mizorama Salvation Army-te chuan an din champha vawi 95-na Mizoram pumah an lawm. Corp tam tak chuan home hrang hrang leh veng hrang hranga mi harsate tlawhin ṭanpuina an pe a, ṭhenkhatin khawlai thenfai hnatlang an nei bawk. SA hi Lt.Col. Kawlkhuma’n Mizoramah April 26, 1917-a a din a ni a; a dintu Lt.Col. Kawlkhuma thlan, Kulikawn thlânmualah amah hriatrengna hun hmangin, pangpar dah a ni.

27th. Friday: Rampum huapa lirthei chi hrang hrang him zawkna tura tih High Security Registration Plate (HSRP) chu Mizoramah pawh hman tan a ni ve ta a. Mizoram Chief Minister Pu Lal Thanhawla Official Car-ah leh Transport Secretary Pu H. Darzika official car ah vuah hmasak a ni. He HSRP thar hi Motor thar atanga vuah tan zel a ni phawt anga, June thla laihawl atangin a tahtawlin Motor hluiah chuan vuah chhunzawm zel a ni ang. HSRP ah hian hologram, Laser Code leh IND (India lamtawi) a in chhu a. Hei bakah hian a number leh hawrawpah te hian India tih inziak a in phum ru theuh a ni. Motor number plate hma leh a hnungah Laser Code number inanglo bel a ni a, Motor darthlalangah hian a hma leh hnung a laser code number te, engine number, chasis number leh a motor registration number te bel vek a ni bawk. Heng information te hi Registration Certificate a information nen a inmil thlap tur a ni a, a engemaw ber inanglo a awm chuan thil diklo awlsam takin a hmuhchhuah theih dawn a ni.

28th. Saturday: World Veterinary Day a ni a, Mizoramah pawh Mizoram State Veterinary Council huaihawtin hman a ni a, district tinah leh College of Veterinary Science, Selesih-ah Free Veterinary Health Camp neih a ni. Kumina World Veterinary Day-ah hian thupui chu – ran leh mihring natna, damdawi hmanga tun hma lama enkawl dam theih, damdawi pangngaia tun hnua enkawl dam theih tâk loh, ‘Antimicrobial registance’ tih a ni.

29th. Sunday: Gabriel Lalmalsawmi (5) D/o. Lalremruata [L] chu an kawt tuikhuahah a tla hlum. Gabriel Lalmalsawmi chetsual lai hi hriat a ni lova. A pi te nen a an in khawm bang chu chhun thingpui te an in zawh hnuah, chawhnu inkhawm tura an kal leh tur chuan an hmu ta mai lova, an zawn hnu ah an kawt dil/tuikhuahah hian thi in an hmu ta a ni. A mah hi Centenary School Dawrpui Church a Kg Section ‘A’ a zirlai a ni.

30th. Monday: Tleirawl unau hmeichhia leh mipa, kum 16 leh kum 17 mi, mi bum thin te chu Vaivakawn Police ten an man. Hemite unau hian mi inah awmpui an mamawh leh mamawh loh zawtin awmpui an mamawh chuan hmeichhia zawk chu awmpui turin an biakfel pui a, an inbiak fel hnu hian an nu leh pa te damlohna avangin pawisa an mamawh thu sawiin advance-in awmpui hlawh tur chu an dil chhuak ta thin a ni. Mipa tleirawl zawk hian pawisa chu dawngin a nu leh pa te hnena pe tur angin a kal bo hmasa phawt a, a kal bo hnu lawkah a hmeichhia zawk pawh chu a tlanbo ve leh ta mai thin a ni. Hetiang hian hemi te unau hian Vaivakawn, Luangmual leh Venghlui Treasury Square lamah te pawh mi chhungkua bumin pawisa an lo laksak tawh thin a ni.