mi(sual).com

Khawnge, ka thianpa mualliam tur thu min hrilh hi inthlahrung ru tak chungin ka’n pawnto pui ve teh reng ang  :-

Zanriah eikham hlima Current awmlo chuan khua a tithim hle a, chutihlaitak chuan kan kawmchhak kawngpuia Maruti Van han inhûn rik dawt hnua kawngkhâr hnunglam nawrtawlh ri a rehfel rual chuan “Ka lo thleng e” tih ri avang chuan kenpui tur a awm takin tiin kawngpui lamah ka chho nghal a. Motor hnunglamah chuan hmeichhe dang pakhat, kekawrtlawn hâ hi a lo thu ve bawk a, khua a thim êm avâng chuan a hmêl pawh a hmuhchian theih loh. Chutia kan nghah ber a lo thlena bungrua te kan han hlânthlâk fel hnu chuan a hnunga a thutpui chu hmalamah a insawn phei nghal a. Thil eng engemaw ka inkhai bawr teuh lai chuan, “A nih leh kan kal leh nghal mai ang, mangtha phawt ule” tih ri ka’n hria chu ka ding chawt a, ka thil khai lai pawh ka thlauh thelh mai!.

Khatiang taka aw ngaihnobei, ka thinlung hneha ka ngaihtuahna tibuai thei aw no leh mawi kha ka piana hnu lama ka vawikhat hriatna a ni!. A aw atang ringawt chuan he leia chêng ve a nih pawh a rinhlelhawm rum rum mai, a aw-ah chuan Serafîm aw rim a nam chêk a, chhandamna te pawh pai tel rum rum hiala mawi a ni! Chutiang taka aw ngaihnobei leh mi hneh thei aw nei tan he khawvêl hi chênna tlâk a ni ve emaw ni le tih mai palh awl a ni! Ka hriatloh hlân chuan an lo tlan liam hman reng tawh a, engang hmêl nge a put a, eng ang sakruang nge a neih ka hre lo. Ka hriat zawng chu ‘ka ngaihtuahna zawng zawng tibuai thei ngaihnobei leh ka thinlung tidanglam vektu aw no leh duhawm a nei’ tih chauh a ni ta. Ka hmuh ve phâk Lei leh Vâna thilsiam zawng zawng zinga rimawi berah chuan ka chhâl ngam lo nâ a, mahse a aw ri ka hriatchhuah apiang hian ka tan khuavêl erawh a pâr vul leh chiai thin!

A chanchin ka hre zeuh zeuh a, amah tak erawh ka hre chuang lêm hlei lova. Hetiang hi nimahse, a tan saruang bawm Thotlê pawh ka tluk phalo anga, Ui-êk-pu pawh ka tluk pha hek lovang tih erawh zawlnei hrilhhriat kher ka ngai hran lo. Ka tân beisei chi a ni lova, a lakah beiseina falak takngial pawh phût ngam chi ka ni bawk hek lo. Leilung lah hian ka rilru hre hauh lovin engkim mai hi a herliampui zel mai tak si a leh!

Kum a liam a, thiantha leh min hmangaihtu ten famro lungmual min liam san a, khawharin khawvel ka hmang chho ve mêk bawk a. Ni e, he hringnun hi, Eden huan atang tawh khan ei leh in tlâkchham hlau reng rengin chhuan engemawzat ten Chatuan ram an lo pan tawh a, kan hmabâk chu thihna a ni tih hrechang lo lekin dam thlahlel reng renga ei leh bâr kan zawnna khawvêlah Chatuana dam tur emaw inti si hian fam kan chang leh tho thin zawng a nih hi maw. Mihring te hi he Lei thenna khawvelah hian in ‘D’ bâng lova lên thlahlelin kan lo piang a, duhthusâm khawvêl, duh ang kim silohna khawvêlah hian lungawina zawng reng rengin kan damlai hun kan hmang zo va, khingbai taka duan he Leiah hian duhtawk hmuh tumin chatuan ram kan pan leh tho si thin a nih hi maw!

Khuareia amah ka’n hriat chian meuh chuan pasal fanau a lo nei tawh a, chuvang chuan tunge a nih a; khawilam chhûlchhuak nge a nih sawi a rem ta lo. A aw ngaihnobei leh no nalh tak chawih tawkin a sakruang chu a no nalh a, ka teh ber chu khâmrâng kâra pangpâr mawi tak lo pârvul chêk hi ka teh ber mai!. Thian anga min kâwm ve duh hi lawm viau tur ka nih laiin ka rilru duhâmna chuan thian aia sâng deuh a phût  tlat a, ka dinhmun hian a phû mawlh silo, ka thinlung, i rethei thlawn mai a ni e. Ani phei chuan hetiang hi hriat pawh a hre kherin ka ring lo. Ka chantawk ni ta ber chu – rilrua a hming lama, mitthlâa a hmêl hmuh a, mumanga a sakruang buan ang han pawm vel hi a ni ta mai a, chuchuan ka nunkhua a tinuam ve deuh thinin ka hria. A laka ka rilru puthmang hi ka tan sawichhuah a rem lova, hetia upbo thak mai erawh hi chu pamhmai ka ti lawi si, ama’n a hre chuang dawn lo bawk a, ka’n ziak chhuak ve hrim hrim mai  a nih hi. Hetia ka thu vei ruk ka han inhrithla ve hrim hrim pawh hi ka dam phah huaiin ka inhria. 

A tawp khar nan JF-a thu – “I want you to be ever with me, not only in spirit or in dreams, but on the same pillow in warm flesh. I want live you to be with me like that. But now, on the whole, your image in my mind’s eyes is a fitting balm to my worries and cares” tih hian kan kharsak a nge.

Similar Posts:

• Thinlung nuihza
• Mite chuan…
• Tû tih nge?
• Hmangaihtu ngawi chawi
• Mi beidawng

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, May 25th, 2012 at 11:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.