mi(sual).com

2 : 47 pm (Wed)

“Hello…”

“Aw, hello…”

“Kawlhawk”

“Eih… eng nge ni ta?”

“Zirtawp tlaiah 3D Cinema a huho-a en kan rawt a, vawiin hian ticket booking a ngai a, i duh ve dawn em?”

“Ngawi lawks aw… (second 2 vel ka inngaihtuah a…) Aw, ka duh ang, ticket 2 aw…”

“In nu nen em ni?”

“Ni lo e… kan nu a dam loh vang zawk a nia…”

A nui uar uar a, “Aw le… Aw le…” tih phahin, ka thiannu chuan phone a hmet tawp nghal a.

4 : 15 pm (Fri)

A ni alo thleng ta! Dar 5 tan tur a nih avangin theatre chung, restaurant-ah eng eng emaw inhnawh puar phahin kan ri luai luai a. Rin aiin kan group kha kan lo thahnem hrep a, kei aia hmelchhia hlir tlangval chawrche chhe te te 4 leh pawmlai nei 4 (mipa tih loh chu hmeichhia (nula?) vek an lo ni a, 20 rual zet kan ni. Mipa zingah rau rau chuan ka lang (sir) deuh vah bik ni hian ka inhria a. Tin, Mi(sual) leh facebook a mi vek kan ni hlawm bawk nen boruak a nuam dawn e… tiin, a taka J-Lo mawngbawr hmu ang maiin ka khi suuung reng ringawt a!

5 : 00 pm

A chhung kan lut phat a, thutna kan han inrem nak nak a. Kan tlangval 4 te lah eng nge maw an hriat ni, a hnung ber tlar kil thim laiah an han thu tharh a. (kan nulate khan an melh hope vak lo tih an lo inhre hman a ni mahna…) Chutihlaiin, kei erawh ka bula thut chak si, chuh ngam chiah si lo, thutna inkian der (inchuh ru) nulaho an ri nak nak a. “khal” ngaisang ta reng reng chuan, an zinga khal tha deuh 2 – “Malawmi ka vei lamah… Sangtei ka ding lamah…” tiin thu ka vaw thla ta ngawt a. Hemi zana Malawmi leh Sangtei lawmzia tak kha aw…!!! Thutna kan inrem fel ta – 3D tarmit, a chung lama eng sen de zeuh zeuh thei chi chu an rawn sem a, kan 3D tan ta!…

A film tan tirha a changtute hming inziak te chu beng bulah a rawn thlawk liam fua fua a! I hi le, a pui dawn e! Mahse, Mizo tawnga lehlin a ni lo… A film hming ka hre lo a, a changtunu hming ka hre lo a, (Sap nula hmeltha leh pian nalh tak a ni tih erawh ka hria) a changtupa chu, ih… ih… The Mummy-a a changtupa kha! Mizo-a lehlin ni bawk si lo, sub title awm bawk si lo chu kei zawng ka bo ta map mai. Ka sap tawng thiam zawng zawng ka lo theihnghilh ta vek hi chu aw… ka tuar zel dawn a nih hi. Chutah, action lam awm bawk si lo nen a ngaihna hre lo takin, ka vaipa thil bo thlir vel mai mai a. Minute 15 vel hnuah – Yes! Aw le, sap film nge nge… sapho nge nge… nupa khumlaizawl nun a lang leh ngei dawn e.

Music a sexy tan… suangtuahna a hur tan… ngaihtuahna a khawlo tan… aw le, a fuh dawn e… tawkfangah, a itawm tawk chauha inphelh a changtunu a rawn dawrh siah mai chu(h)! Kareeei… a lu chin chiah cinema chhungah a awm a, a bak zawng pawn lamah a rawn dawrh chhuak a, thut hmun atanga lo chul sak thuak thuak theih awm vela hnaiah hian… Ka lu hi a rawn kap-ka-lak ni berin ka hria. Mahni chauh chuan en ila, changtupa emaw intih mai a awl dawn mange! Chutah, hnung lama thu kan tlangvalte’n “hei mah mah 3D, 4D-ah phei chuan a rim pawh kan hre vek ang!” an la rawn ti. (Mahse, vanglaia khaw khat pa lerh tia sawi hat hat kai phak hian hmeichhe kap bawr hi a hnima hnim mai lovin, a liah a liak dap dap khawpin tawnhriat ka lo nei tawh thin a. Hriak thami leh phuh rimtui tel lo chuan, zupui kap nam ai mahin a rim a tui lo thei tih te ka lo hre vek tawh a, a rim nen lama hriat theihna 4D chu ka en chak tehchiam lo.)

Film chu a kal zel a, a tawp a hnai tan ta! Tlang sang tak tak leh kham chhengchhe pui puiah a changtute an lawn… lung lian pui pui an rap chim… chaldarah min rawn deng dawn ta emaw tih turin, chu’ng lung lian pui puite chu beng bulah an rawn tla fua fua a. Kan thutna nghawr nghing dur dur khawpin chung lam leh hnuai lamah te, sir tawn tawnah thawm tihbaiawm pui pui ri hum hum a, a nghawr dur dur a. A changtute an hlau, a entute kan rak, kan thle, kan phu… mahse, englai pawha thluak fim pu thin ta chu – ding lam deuha lungtum alo tlak apiangin ka vei lama Malawmi awm bawrah ka va bei thlawp a… vei lama alo tlak apiangin ka ding lama Sangtei awm bawrah ka va bei leh thlawp a… ka che hit lehpek asin aw…! Hemi tuma ka khawsazia hian “pa” hun a awm, “intih pa loh” hun a awm tih a zirtir…

A nghawng

A nghawng hi a buaithlak lai ber chu a ni. Khawvel hi ka hmu 3D vek a, haw lama hmelhriat ka hmuh te hlam 5 dan vel atanga chibai tumin ban ka hawi leh zuau thin. Hlam 10 vela hlaa motor lo tlan te chuan mi rawn su mai dawn emaw tiin ka petek leh zeuh thin. Chu mai a ni lo, kan thenawm Pu Khuma kawt ka thleng dek dek a, a piah kan kawngkhara ka tunu lo ding chu pawm mai ka’n tum ta pek a. A bula ding, a pi pawh chukz tumin hmui ka tizum puuut puuut hman a. Laipuitlang Kross khawih tumin ban ka phar zuau zuau thul… Zan alo thleng – khumlaizawkah kan nu ka’n hmu 3D tak tak mai phei chu(h)!… pui tak a ni, pui tak. Hlam 2 dan vel atang ka bawk vak phei a, hlam 1 vel atang pawsi ka la tan a ni ber e!… (phur thut leh chhunzawm atan)
“D” zawng zawng zinga “3D” zet zawng!

In awi loh chuan… kha u —

Similar Posts:

• Hmanlai Mizo In!
• Bawng til rek ang u…
• VIP!?
• LUCY
• Kan mize thenkhat leh kan nihna

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, June 5th, 2012 at 7:51 pm and is filed under HAHAHA, Tech trek trek. You can follow any responses to this entry through the RSS 2.0 feed. You can leave a response, or trackback from your own site.