mi(sual).com

Rintea chu rawlthar sual tak anga lang ani lemlo naa, a luhlul ru phian mai a. A thil chin than leh duhzawngah chuan a nu leh Pa thu pawh chu engah vak hian a ngai mang hauh lo mai a ni. An Sikul chu tlai dar 3 ah an bang thin na a, a thiante rualah a rawn haw ve mai ngai lova, khawi khawiah emaw hian a leng kual a, Rawlthar awmthaduhlo tak tak leh Sikul pawh kal mumal tawh manglote nen chuan thil chin thalo tak tak te an tiho thin a. A nu leh pa te a ti mangang takmeuh mai a, a zirlai a hlawhchham an hlauh bakah, Drugs te an ti ru thin tih an hre si a, chhanchhuah rual lohvin a ngawl a vei hman ang tih an hlau tak zet zet a ni.

Tukkhat chu, a Pa chuan an tukthuan eilai chuan, a fapa hnenah chuan heti hian ati ta a. “Rinte, Sikul ban huna ilo haw lo leh anih chuan, zanriahah tuisik leh chawthing bak engmah kan hlui lo vang che, i hria maw Mama? Ka ti tak tak ania” a ti ta a ni.

Rintea chu mi a a ni lova, a pa chu a hrechiang a, a ti tak hle a, a thusawi chu ati duh tak tak ang tih pawh a hrechiang hle mai. A hria tih entir nan a bu nghat duh chauh va.

Tlai ban alo hun chuan, a thian thalo te hnen lamah bawk chuan a kal leh ta nge nge a, thil thalo tak tak an tih hnuah, thim dawnah in chu a rawn thleng leh chauh a ni. A nu chuan ngui takin alo en a, tawngkam khat mahin alo be lo va, a pa pawh chuan a en run run ringawt a, engtin mah a lo be bik hek lo.

Tichuan le, zanriah kil chu alo hun ta a, an thutna bik zawna chawthleng a han hmuh chuan, Rintea chu a phu chiang kher mai; a pa chuan a thil sawi kha a ti mai mai lo a ni tih a hrechiang ta hle mai. A pa chawthleng ava en a, chaw tharlam tui hmel tak mai chu alo vum thur a, a khu rim pawh a tui cham cham hle, chaw lum bakah chawhmeh tui tinreng chu a inchhawp a. Chutiang bawkin a nu pawh chuan a inchhawp a ni. Ama thutna hmazawna chawthleng a han en chuan, uicho pawhin an ei duh mangloh tur chawthing tlemte chauh alo awm a, a bulah chuan noah hian tuisik chauh chu alo inchhawp bawk a. A pa chuan alo sawi tawh ang ngeiin a hrem ngei dawn ani tih a chiang ta hle mai a, vanduaithlak takin chumi tlai kher kher chuan a riltam lutuk chu a tamchhawl lo chauh hi ani si a, a mang a ang rilru ta hle mai a ni.

A Pa chuan ngawi rengin thil awm dan chu a han thlithlai hmasa te te a, a fapa chu a mang a angin, a lungngai hle ani tih a hria a. Chaw an han bar tan dawn chiah chuan, ngawi rengin a fapa thleng leh no chu ama hmaah a pawthnai a, ama hmaa a chanpual chawtuihnai tak mai chu a fapa a hmangaih em em hmaah chuan a nawr phei ta a.

Rintea chuan, a pa thiltih awmzia chu a hrechiang kher mai; A pa chuan a fapa hnena hremna alo tiam chu a sut theilo a, a tihlawhtling ngei tur a ni. Chutihlaiin, a fapa chu a hmangaih takmeuh si a, chutia chawthing an ui pawhin a ei duhloh tur a ei laia, chaw leh chawhmeh tuihnai tak lo ei bik chu a theilo a, a fapa a hremna chu amah ngeiin tuar alo thlang ta zawk a ni.

Pathian awm ringlo (Atheists) hote hian Pathian thil tihvel dan leh thil ruahman dan mak leh ropui lutuk hi an hrethiam thei/phak thin lova, keini ve mai min hmangaih avanga amah leh amah intitlawm a, Krawsa alo thih dan hi an hrethiam thin lo va, an tan chuan, ‘Atna’ mai a ni.

Kan thatna duh avangin Pa Pathian chuan kan tih leh tih loh tur a siam a, a thu awih lova thil kan tih luih chuan min hrem ngei ngei dawn(kan thi ngei dawn) a ni, tih a sawi chiang hle a ni. Nimahsela, Setana thlemna chu awih zawkin Pathian thu chu ringzo lovin, Setana thu chu dik zawka ngaiin kan lo bawhchhe ta a. Pathian chuan a thutiam a sut ve thiang tawh lo; min hrem ngei tur ani a, kan thi ngei tur a ni.

Amaherawhchu, Pathian chuan ami hmangaihna chu faktlakin a lantir a, Hmelma kan nihlai leh ‘thi’ kan nih lai khan, amah ngeiin kan tuar ai chu tuar ta zawkin kan chhandamna alo buatsaih ta a ni.
Thiltha kan tih avang leh kan kan phu reng vanga Chhandamna ropui hi changthei kanni lo; Pathian hmangaihna leh khawngaihna puakkeh avanga a thlawn liau liau a chang thei kan ni. Rintea hian, “Ka Pa hian min hmangaih em mai a, min hrem ai amahin a tuar zel thovang” tiin apa thu chu a awihloh chhunzawm zel kan ring em? A hnai lo mai; a rawlthar rilru sak tak chu lo nemin, amah hmangaih em em tu apa thu chu a zawm tawh zawk a ni.

Hetiang chiah hian, min hmangaih em avanga hremna kan tuar tur zawng zawng min lo tuarsak tu Kan Lal Isua thu hi zawm a, amah chauh chu Lal leh chhandamtua pawma a rawngbawl tur kan lo ni e.
Sunday hman nuam vek u le..

Similar Posts:

• I Duhlai Hlu Ber Kha…!
• Inngaihtuah fim thin rawh.
• Ringtute chunga Pathian beisei leh duhzawng{Sunday Pual}
• Pa Hmangaihna(Sunday Pual)
• “Ngawi la, awm hle hle rawh” (Sunday Pual)

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, July 8th, 2012 at 9:04 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.