mi(sual).com

Zu nen hian kan inhmelhriat hma angreng. Pawl kua ka nihin kan thenawmte zu ka hralhsak thin a, pawisa min pek mai tur an neih loh chang chuan a zu ang zawngin hlawh min pe ve mai thin a, ka rualpuiten meizial an zuk ruk laiin kei chu ka lo chatthla thin. Engtin tin emaw lehkha ka zir ve zel a, Pathian zarah rilru chak chi ka nih avangin zirlaiah chuan ka buai phah lem lo. Pawl 12 ka pass chuan Aizawl-ah college ka kal a, chutih lai chuan zu tel lovin ka awm hleithei tawh lo a, a ngawl ka vei a ni der tawh.

Kum 4 ka nihin ka nu tak a boral tawh a, pianpui unau dang ka nei lo. Ka pa nupui hnuhnung zawk hian fa 2 a nei leh tawh a, kan chhang erawh a khat deuh a. Ka pain kan khaw develop na tur a eiruk nasat avangin ka lehkha zir chhung zawngin sum lamah harsatna kan tawk em em lo a, college kal lai atangin a senchi ngat lo chu ka in tha duh tawh meuh lo.

Ka han graduate a, ka pa thiante zarah sawrkar hna pawh ka hmu ve mai a. Nupui ka nei ve leh tawp a, fapa kum 14 a upa ka nei a. Ka zu in hi kan nu nen kan inhauh tamna ber niin, a tlan ve zeuh zeuh tawh a, kan inko haw ve leh mai zel. Ka fapa hi luhlul zet mai a ni bawk a, min zah lem lo. Zahtlak pawh ka ni lo aniang e. Hei hi ka dinhmun tlangpui a ni.

(more…)

April Ni 2, 2012 zing lam dar9 leh chanve a ri tep tawh a, phone a rawn ri a, ka pickup chuan patling aw thum lampang hian “tunge ka biak, Jason-a In a ni em?” a rawn ti a, keichuan “Hugh ka nia, engnge ni ta?” tiin ka lo chhang a, ani chuan “thil pawimawh deuh hrilh tur ka nei a, amah a awm hnaih chuan han ko lawk mai teh Bawiha” a ti a. Ka pu chu ka ko a, an inbe nghal mawlh mawlh a, sofa ah chuan thu in ka pu te inbiak zawh hun chu ka nghak reng a.

An inbiak zawh hnu chuan, ka pu chuan “Bawiha, kan mi zawnte chu Taiwan ah tunah an awm mek tih tun a min rawn betu khan a rawn sawi a. Amah kha agent kan tirh zing a rawn haw ve duh ta lo, Agent Clyde Walker kha a ni a. Nimin khan Agent Clyde chu tun a a chenna hmun Heping atangin misual 3 te awmna hmun Danshuei, New Taipei ah a thiante chhungkua tlawh turin a kal a.

Tukin zing khan misual 3 te zing a a naupang ber William chu Agent Clyde chuan sa lei tur a a thianpa nen an chhuah laiin Danshui High School bul ah a thian 3-te nen a hmu a, Thomas leh Richard erawh an awm ve lo thung.. Agent Clyde hi kan misualte zawng turin China ah kan tir a, mahse Agent te kan kohkir tum khan lo haw ve duh lovin a awm zui ta reng a; China, Japan, Phillipines, Vietnam, Korea, Thailand, Cambodia leh Laos ah te kan misual 3-te hi zawngin a zin kual reng a, a thawkrim hle a ni.

(more…)

THUHMA: Tawi te in a story lo pian dan leh ka ngaih pawimawh te kan zep ve khanglang teh ang. He story hi a tak a thleng (True Story) a ni lova, phuahchawp (fiction) mai a ni. Chuvangin Hming leh Nihna te hi phuahchawp vek a ni a, Khaw Hming te erawh a tak a awm a ni a, amaherawhchu ka duhdan angin ka hmang chawp ve mai a ni, thutak khuk a khuk pui chi a ni lo. He ka thuziak ah hian mi rilru hliam palh theihna thil thailan ka nei anih chuan in mi ngaihdamna ka ngen nghal e. . . Tukin zing dar1 ah mut tum a laikhum thlehnem ka belh laiin he thu hi ka ngaihtuahna ah a rawn lang ve a.

Engpawh nise tiin thuziak mite angin thiam ve lo mah ila a thawnthu kalhmang leh ruangam tur te chu ka suangtuahna khawvel in a tin-zawn thiam dan ang tawkin ka’n duang ve khanglang a, a chanve vel ka thlen chuan mutsan mai ka tum a, mahse mutmawh-hnarmawh ah ka hmang ta tlat mai, dar5:40 vel thleng ka thiam ang tawk a ka suangtuahna hmang a ka cheibawl hnu chuan a tawp chu engngemaw ti ti in ka thleng ve ta hram a.

Ka tuihal in fridge kawngkhar ban pah a tukverh lam ka hawichhuak chu khua a lo var der tawh.. He sentence ka ziah mek lai hian dar6:30 a ri tawh. Awle, thuhma ah ringawt pawh kan tui dawn tlat, thupui lamah zuang lut nghal ang aw. . .

(more…)