mi(sual).com

Engtik kuma an sak nge, tute sak nge, a sak nan tha engzat nge an sen, sum eng zat nge an hman ral chu ka hre ve hauh lo a, mahse a chungah rangva pawp deuh thut, a bangah dap, bawhtah ngei mai, awng deuh ser suar, skirting ah a lang deuh lai rangva tlem, kawm char leh kawm chhak lamah thing zai leh dap. A kangka puiah thing zai rinawm ve deuh pahnih door lock pawh awm lo, thir bial pahnih Tala kalh ve theih tho, ventilation pawh a awm hran lo, a chhuatah dap em chu kan hmang bik lo, thing phel awng tam tak awm, mite angina carpet phah ve pha hek lo thlasik zanah chuan thli a rawn thaw lut hum hum thin. A chhung ah room pakhat khum awmna a awm ve a, a pindan nan pawh plywood lei pha ve hek lo, puan kan zar mai a, bungbel pawh tlemte, chaw eina thleng, plate pali vel, bel pathum vel leh thirbel ung tawh tak a lian leh ate pakhat ve ve nen chi chhawpna pawh a awm lo, kan chaw ei dawhkan hniamte ah khan a rem lai lai ah kan chhawp ve tawp thin.

Furniture lam pawh kan turu lo ve khawp mai, thutthleng sei pahnih a awm ve a, a bak chu wardrobe pakhat zawng kha ani mai a, kan in kha a te viau nana a chhungah engdang mah dah tur kan neih miau loh avang khan kan thawl ve hle thung si. Electric connection te kha chu kan nei ve tlat, electric bulb pahnih khan min en hneh em em thin. Kawngkapui atang khan han lut ila inchhung zawng zawng chu a lang kim vek mai thin. Kawngkate pathum kan nei ve a, kawngpui kama awm kan ni bawk a, darthlalang chhana mi kawng kal kan hmu thin te kha ropui leh dangdai kan va ti thin teh reng em aw!

Khua a han thal chho a, kawtlai kha a khu vut vut hi a ni ber a, in chung pawp neng nung leh bang awng siar suar ah kha chuan vaivut tan luh a nuam hle ni tur a ni, in chhung hi a paw thuk zel a, bungbel te kha engtin nge fai taka kan lo neih reng thin le, ka nute ka u te khan hrehawm an lo va tuar nasa bik tak em, kei lah engmah ngaihtuah lek lo khan kawt kaiah thiante nen vut puah khan nuam tinreng kha kan lo tawl thin kha a ni si a.

Fur pui a han thlen kha chuan, Nu leh Pa tan khan a va hrehawm zual thin dawn tak em ve aw!! Ruah a han sur buan buan a, in chung phui tha hek lo in chhung kha a far tluk tluk mai a, tawm himna tur pawh vang tak a ni, bang kila ding chungin a farna lai kan thlir dauh dauh a, a far tamna laiah chawhtawlh kan dawh a, ruah a han meuh chuan kan bung bel neih zawng zawng kha inchung tuifar dawh nan kan hman vek avangin tui chawi chuan ngailo khan an khat vek zel a ni. Zan a han ni a, khawpui a han ri dur dur a, in kha an sa nghet lo emaw tih tur khan a sawi dawt dawt a, tek a han tlak a, kawl a han phet te khan kan bang dap kha a phui loh zia alang chiang thei ngei mai, inchhung kha a eng uarh uarh zel mai a, nu leh paten kan hlauh hlauin van atang thla an rawn la a nih kha min han ti a, keini lah chuan nu leh pa te khan thil engkim hre turah kan ngaih tlat avang khan kan awih ve em em thin.

Thlasik mawlh kha ni hrehawm thin ni, khang hun lai kha chuan ram kha ala ngaw tha bawk a, in leh a velah pawh thing ala tam, thlasik vanglai kha chuan in chhungah te khan kan plate neih ang ang khan vur kan dawh thin kha a nia, zing kan han tho a vur kan dawh kha kan hre reng a, alo khal vek tak tak thin!! Engtin nge kan lo muthilh theih thin zawk le, bang awng atang thlifim a rawn lut a, chhuat awng atang nen, in chung lam atang dai a rawn far tluk tluk bawk a, mut bu tha tawk nei ve hek lo, kha tih hunlai kha chuan mikhual nih chu chi loh rem rem viau ang mawle.

Mahse kha IN chhete anga lang kha kan tan malsawmna alova ni teh lul em, thlipui lak atang te, ruah leh rial, hmelma lak atang khan min lo veng him vek a, chhungkua lungrual takin min khawsak tir thin. Ei leh in tur tha nei lo mah ila a chhunga chengte chu lungrual takin min awm tlan tir dial dial a, kan ngai a, kan thla hlel ve ngawih ngawih thin, mi in tha zawk leh nuam zawkah leng lut ve thin mah ila kan in ai chuan kan tan a hlu lova, nuam pawh kan ti hek lo, mahni in a haw hlan kan nghakhlel ngawih ngawih thin.

Thian te zingah thawmhnaw tha tak tak nei leh mawi tak tak nei an awm a, awt ve viau mah ila kan in a chhe em mai neih ve kan tan a mawi lo kan ti a, chhungte rilru hahna thlen tu nilo khan kan phu ang tawk a nun dan kan thiam theih nan thil tha tak min lo zirtir reng hi a lo ni a, kan hriat phak loh rohlu amah ah khan alo in phum ru reng alo ni. Eiruk a in mawi nalh tak tha tak an sak kha kan awt vet ho, mahse air condition man tam taka lei ngai lo khan a chungah te a bangah te khan a chhawm vek a, khaw lum lutuk lakah khan min lo vawng dai ve tho thin.

Aw kan RUN RIANGTE KHA hmuh leh theih nise ka va ti em, ka tana thuro chhiah a neih zawng zawng kha hre kim lo mah ila, tun thleng a, nun dan mawi min zirtir dan ka hriat chhuah avang tal pawh hian lawm thu hrilh ka va chak tak em. IN MAWI LEH NUAM RINAWM THA TAKA LUNGRUAL LO LEH IN NGHIRNGHO RENG A LENG ZA AI CHUAN IN CHHETE A, LUNGRUAL LEH HLIM TAKA CHEN ZA HI AVA HLU IN AVA NUAM TEH RENG EM.

Similar Posts:

• Nang i ngawih tlat si chuan…!!
• Lunglenna
• Dear Brown.
• Kan lo thing ve ta..
• Chama – Dolma

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, August 3rd, 2012 at 7:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.