mi(sual).com

- APJ Abdul Kalam
11th President of India

Kumin hi kum 2070 a ni a. Kei pawh kum 50 ka tlin kum chiah a ni; mahse ka lan danah chuan kum 85 hmel ang ka pu si. Tui in tam tawk loh avangin kal natna khirhkhan tak tuarin ka awm mek a. Dam nan hun tam ka neih ka ring tawh lo. Tunah hian kan khawtlangah chuan a upa ber zing a mi ka ni tawh a ni.

Naupang kum 5 mi lek ka nih lai kha ka hrereng thin. Tunlai hun nen chuan engkim mai hi a lo danglam zo ta. Chung hunlai chuan vantlang lenvahna Park-ah te chuan thing a awm khup mai a, in te chuan huan mawi tak a nei thin a, chungah te chuan tui herhhaw phingphisiau karah darkar chanve te hun hlimawm tak ka hmang thin a ni. Tunah lah chuan tui awm loh avangin inbual aiah inhrukpuan leh mineral hriak chu taksa tihfai nankan hmang ta mai mai a. Tunhma chuan hmeichhiate chuan sam sei mawi tak an nei thin a. Tunah chuan lu sukna tur tui a awm tawh loh avangin mi zawng zawngin kan lu ziah kawlh vek a lo tul ta a ni.

Khang hunlai khan ka pa chuan pipe atanga tui khawhchhuah tirin a car a phuhfai thin a, tunah chuan chutiang mai maia tuia car silfai chu ka fapa hian a ring thei thlawt lo a ni. Chung hun laia ka la hriat reng chuTui vawnghim rawh tih thuziak lian tak taka intar te, Radio leh T.V-ah te tui humhalh a tul thu an chhuah thin kha a ni, a tukhawkha khan kan bengkhawn chuang hlawh si lo. Tui hi ral thei lo; kumkhaw daih turah kan ngai tlat mai a ni. Tunah chuan Lui leh Dil te, Tuikhuah leh lei chhung tui zawng zawngte a kangchah loh pawhin tihbawlhhlawhin an awm zo ta si.

Thil siamna hmun te chu an chawl thuap a, eizawnna tur a vang ta em em a, thawh tur nei lo suangtuah phak bakin an pung ta vak mai a ni. Tui al thlitfim chu hna awmchhun leh hnathawhna hmun lian ber a ni mai a, heta thawkte hian an hlawh thenkhat atan tui al thlitfim chu an la mai thin.

Khawlaia tui tin khat lek avanga silai hmanga inbeihna chu thil thleng pangngai a ni tawh mai. Chaw pawh za zela sawmriat chu siamchawp a ni.
Hmanah kha chuan puitling pakhat tan nikhatah tui no 8 in a tawk an ti thin a, tunah chuan no chanve bak in phal a ni tawh lo. Tun hunah hian thawmhnaw sukna tur tui a awm tawh loh avangin hak zawha paih nghal zel chi thawmhnaw kan inbel ta a, hei hian khawlai bawlhhlawh a tipung nasa em em a. Kan inthiarna tleuh faina tur tui a awm tawk loh avangin tui hman ngai lo chi Ek In kan hmang ta vek mai a ni.

Mihring landan reng reng chu tihbaiawm tak a ni, taksain tui duhkhawp a hmuh loh avangin cher chhe tak leh sawngban tak a ni a, ni zung natna avangin kan pan tem tuam mai a ni. Nizung hlauhawm laka minvengtu Ozone tuamhimna tihchhiata a awm tawh avangin heng tawrhna tehi a nasa tual tual a. Vun Cancer te, Pumpui leh Ril lam natna te, zunkawng thalo te hi tunlaia mi thihchhan ber chu a ni.

Vun nasa taka a ro zual zel avang chuan thalai kum 20 mi pawh chu kum 40 hmel an pu ta vek mai. Scientist-te’n a chhan an zawn ngial pawhin he harsatna su kiang tur hian tih theih reng a awm si lo.Tui hi siamchawp theih a ni si lo, thing leh hnim hring a awmtawh loh avangin boruak thianghlim Oxygen duh khawp a awm tawh lo a. Hei avang hian thang leh thar chhuan lo kal zel finna leh theihna chu nasa takin a tlahniam zo ta bawk.

Mi tam tak chi inthlahchhawnna chu a danglam nasat tawh avangin tlakchham nei sain nau an lo piang a, fuke kim lo leh piangsual an pung nasa em em a ni.
Boruak kan hip man hi sawrkarah chawi a ngai a, puitling pakhat hian ni khatah Cubic Metre 137 hip lut anga chhut kan ni. Khawl chuap lian pui pui ni zung chakna ringa tihnun hmang chuan ‘boruak awmna hmun’(Ventilated Zone) an siam a, a man pe thei lo te chu he hmun atang hian an hnawtchhuak mai thin a ni. Heng hmuna boruak an siam pawh hi tha tawk lo hle mahse beisei tur dang a awm loh avangin a thawk ve tawk tawk theih chuan a tha a ni mai. Mihring damchhung kum hi chawhrualin kum 35 chauh a ni ta.

Ram thenkhatah chuan ram hring lui luanna hmun hmuh tur a la awm a, heng hmun te hi ralthuam rip tak nen sipai te’n an veng khup mai a. Tunah chuan tui chu rohlu, itawm em em, rangkachak leh lunghlu ai pawhin a hlu tawh zawk a ni.

Ka chenna hmunah chuan ruah a sur ngai tawh loh avangin thing pakhatmah hmuh tur a awm tawh lo a, ruahsur hriat chhun te pawh chu hmantlak loh ruah thur vek a ni. Nasa taka Atom test leh kum zabi 20 laia thil siamna khu leng leh ek chhia ten kan khawvel a tihchhiat nasat tawh avangin sik leh sa hunbi te chu a khawihchhe nasa tawh hle a. He kan chenna leilung leh boruak hi vawi duai lo tha tak leh duat taka enkawl tura zirtir kan ni chungin a tu a te mah khan kan bengkhawn der si lo.

Ka fapain kan naupan lai chanchin min zawh chuan hmun hringrai dup mai te, pangpar mawi thin zia te, ruah chanchin te, lui leh tuikhuaha nuam ti taka kan chen thin dan te, sangha man a nawm thin zia te, tui duhang tawk kan in thin thu te leh mihring hrisel thinzia chanchin te ka hrilh thin. “Kapa, engvangin nge tui chu a awm tawh loh?” tia min zawhna chu chhan har ka tiin ka hrawkah hian hnawh tlattu awm ang maiin ka hre thin. Tihsual ka hriatchhuahte hian min ti lungngai em em a ni, a chhan chu khawvel tichhetu chhuan zingah ka tel ve a, zirtirna thu tha reng reng bengkhawn loh hunlai ami ka nih vang a ni. Tunah chuan ka tu leh fate chuan a man sang tak an pek a lo ngai ta.

He khawvel hi siamthat theih tawh rualloh a tihchhiat a nih tawh avangin tun atanga hun reiloteah hian he leia nunna awm zawng zawng hi kan tawp vek dawn tih hi ka ring nghet tlat a ni. Eng tiang hian nge ka kir leh anga, mihring te chu hrethiam thei turin ka tih tak ang le….. He khawvel chhanhim tur hian hun kan la nei e…. tih hi.

Similar Posts:

• Hringnun(Chapter-I)
• Mapuia (Zephyr) rilru a na hle
• Minung Thi (Living Death)
• Hman leh Tun
• Damdawi In a damlote an khawngaihthlak

Recent Posts:

• REINCARNATION LEH DEJA-VU
• Mizoram State Day – Pu Laldenga duhthusam ber thlen famkimna ni a ni ang em?
• Atchilh atthlak
• REISISS!
• Hlawhtlinna kawng

This entry was posted on Sunday, October 14th, 2012 at 2:11 pm and is filed under Copy Paste, Education, Luangliam. You can follow any responses to this entry through the RSS 2.0 feed. You can leave a response, or trackback from your own site.