mi(sual).com

Khawvel Sunday School Day kan lo thleng leh ta. Mizorama Sunday School dintu ‘Father of Mizo Sunday School Union’ tia kan koh thin Pu Zalawra chanchin tlem azawng ka’n tarlang ange:

Hun Hmasa

Pu Zalawra hi kum 1895-ah hmarchhak Lungdai khuaa piang a ni a. He khua hi tunah chuan a awm tawh lova, Ruallung leh Lenchim inkarah a awm thin. A pa chu Zazipa a ni a. A naupan laiin a nu leh paten an boralsan avangin a pa nau hnenah a awm a. Pu Zalawra hi a naupan lai atangin mi tumruh tak a ni a. Kum 1903-ah kum 8 mi lek a nih laiin Khandaih khuaah lehkha zir turin a kal tan a. Kum 1912-ah Lower Primary a tling ve thei ta a ni.

Pu Zalawra chu hetih lai hun hian lehkhathiam tlangval chhuanawm tak a lo ni ta a. Lal leh Upate chuan khawchhiar atan an hmang zui a. Khawchhiar hi tunlai huna Village Council Secretary ang hi an ni ber a, an hnathawh ber chu khawtlang pawimawhah Aizawl-a kal leh, an lal khawi lo kal vel hnungzui a ni ber. Pu Zalawra chuan zirna sang zawk zir a duh a. Pathian rawng a bawl theihna tura ngaiin Aizawl-ah Middle English a zir zel a, kum 1918-ah Upper Primary a tling a, 1920-ah Middle English a tling leh a. Lehkha a zir theih nan sipai bel nawt hna a thawk thin a, kum 1921-ah Allahabad khuaa Jumna High School-ah a zir zawm leh , Hindi chu Vernacular atan a la a, Vai tawng a thiam phah hle a ni. Kum 1922-ah a lo chhuak a, kum 1923-26 chhungin Welsh Mission hnuaiah Sub-Inspector of Schools hna a thawk a. Aizawl khaw chhunga Gorkhali naupangte tan ni tin sikul hawn a lo ni a, Gorkhali sikul-ah hian kum 17 chhung a thawk a ni. Sikula thawk chung hian a hunawl zawng zawng chu Mizo Sunday School tan a hmang reng bawk.

Sande Sikul lamah

Pu Zalawra chu nitin hna (zirtirtu hna) bakah hlawh nei lovin Sande Sikul hna lamah a tul em em a, Zosap Missionary Pi Zaii nen Mizo Sunday School Union hi an enkawl a. Sande Sikul examna leh Result te, Certificate leh lehkha thawn chhuah tur ngaihtuah leh thawn chhuah hnate a thawk a. Hetih hun lai hian thingtlang hmun tlemte-ah chauh dak in a la awm avangin thingtlang lama lehkha thawn chhuah tur puar nawlhin a ak a,mikhual a tawh apiang chu, “Khawi khua nge i nih?” a ti zel a, a remchan angin lehkha a sem zel thin. Presbyterian Kohhran hnathawkah Pu Zalawra anga hna ngah leh buai hi an la awm lo hial awm e.

Kum 1944-ah Pu Zalawra chu a hun pumpuia Sande Sikul hna thawk turin Assistant Secretary atan dah nghal a ni a, kum 1960 thlengin kohhrana a rawngbawlna chu a thawk a ni.

Sorkar lama mawhphurhna dang

Pu Zalawra hi Kohhran lama a rawngbawlna bakah Mizo District Council-ah Nominated Seat-ah Member atan kum 1962-ah sawrkarin a dah a. Village Council hrang hrang inkara ramri en fel leh thubuai rem fel turte a awm thian avangin sawrkarin Boundary Commission a siam a, thu lai sawi thiam bik nihte a ngai a, chuta member pakhat atan Pu Zalawra hi ruat a ni leh ta bawk a. An hnathawh pawh a hlawhtling hle a ni.

“Ka thih hunah ka la mu ang chu…”

Pu Zalawra mizia-a sawi loh theih loh chu a taimakna a ni. Eng hna pawh thawh a hreh ngai lova. Mipa hna leh hmeichhe hna hi a tan chuan a danglam ve ngai lo. A lo upat hnuah pawh hnathawk lovin a awm thei lo va, a chhungten hahchawl a, awm mai mai tura an hrilh pawhin,“Ka thih hunah ka la mu ang chu,” a ti mai thin.

Hun hnuhnung

Kum 1969-ah Shillong-a Mizo kohhran Biak In hawnnaa tel turin Rev.Liangkhaia nen an kal a, an Programme zawng zawng an hman fel vek hnuah Pu L.T.. Zama IFS (Retd.) In-ah chawhlui an kilho a, in lam pana an haw kawngah Ambassador Car-in a su a, vanduaithlak takin September 1, 1969-ah Lalpa hnenah min hawsan ta a ni. A boral thu hi All India Radio, Gauhati atangin puan darh a ni a, a ruang chu Shillong thlanmualah ropui takin kohhran hovin an vui liam a, Shillong-a Mizo nula leh tlangvalin “Jerusalem, ka in ropui” tih hla sain an thlah liam a ni.

Mizo Sunday School Union-a a rawngbawlna ropui tak avangin All India Sunday School Union chuan chawimawina lawmman sang ber, “Bishop Mondol Award” kum 1961 khan a hlan nghe nghe a ni.

Mizo Sunday School Union, Mizoram Presbyterian Church khan Pu Zalawra hriatreng nan a hming chawiin “Zalawra Medal” a siam a. He medal hi Sande Sikul Exam-a a zawna kum 5 lawmman dawngte hnenah pek a ni a, tun thleng hian he Medal hi dawng an la awm zel a ni.

Ka lawm e. Ka lawm em em e.

Similar Posts:

• Enjoyed Sunday School?
• Khawvel Sunday School Nî
• MSU FIR thehluh chhan kimchang
• Pu H.Vanthuama, B.Sc. Agri. hmasa ber chanchin !
• Presbyterian Kohhran in Zoluti chanchin a ziah danah Serchhip mipui lung a awilo

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, November 3rd, 2012 at 9:33 pm and is filed under Information, Religion. You can follow any responses to this entry through the RSS 2.0 feed. You can leave a response, or trackback from your own site.