mi(sual).com

Kan fahmingkoh Lalramhluni (Nupuii),

Vawiin in ni 24/11/2012 (Inrinni) pianchamphaphak vawi 14-na a lo thlen hian i Nu leh Pa ngaihtuahnaah thil tam tak a lo lut a. I pian ni a ipa phur lutukin I len hun ai hak tura innuin kawr a dah that zawng zawng nen a damdawiin a rawn kal tum kan chhungte nui nasat zia te mitthlaah a lang uai uai mai ka ti. ( kum 1 i tlin ni leh i pa hna chelh mek appoinmment order chhuah ni in nang chiah te kha a ropui dangdai mang tak e)

Kum 13-18 Sakramen leh Senior Department te Questionnaire siam an chhanna 70% ten ngaihzawng an neih tawh thu te, Sex hman chakna neih tirtu TV, Video, Blue Film (Mobile telin) a nih thu te,Thalai zingah Sex hman a hluar titu mi 100% an awm te, Zu leh Drugs a ruka nasa taka an tih mek chi hrang hrang an hmuh leh hriatna hmasa chu School leh Hostel anih thu han hriat te hian ngaihtuahna a vak thui em em a.

Nangmah ang a High School ka mek hmeichhe zirlai tam tak damdawi rim nei silo (ngona pill an ti em ni – an var puak a, tleirawl tisen leh nung erawh hmuhtur awm hauh si lo) ching an tam em em tih han hriat te hian thlunglu a hai thin mang e. Chutih rualin lawmna hlirin kan khat, i ti mai teh ang, a chhan chu khing thalai tamtak saltanna khian a la tibuai lo chein tha leh thianghlim taka i hun vawiin ni kum 14 i tlin ni kan thleng hi kan lawm em a tin ni!!

Ruihtheih thil engmah tilo (I nu kuhva ei zeuh zeuh chu I hriat kha) nu leh pa I nei te hi Lalpa zara kan fanau ro chante kawng dik in zawh theih nan leh Ringtu awm dan tur reng a ni tih hriain min han entawn zel dawn nia. Zing tawngtai kal thin that zia zia chu I nuin I pa a hriat tan tirhna a niin NUN a vawng em em a nia.

Eizawnna avangin I pa hi 900 km danah awmin I nu hovin in awm mek ani a, Fa u ber I nih avangin i nu tha chhang dawltu ber i ni tih hriain I nu kha I thian tha berah siamin thu chhia a tha engmah zep lovin hrilh thin ang che aw. Thian te ngaih leh thlakhlelh hun a nih rualin thiante hi sual kan tih tanna bul an nih bawk si avangin thian kawm tam loh a him ber a nia aw. Khawvel thiamna hi a pawimawh em em rualin Van nun neih hi a pawimawh hmasa ber a ni tih hriain Pathian tihna tak tak nen I hun hmang thin la, ngaihtuah chiang lova thutlukna siam zung zung hi nun chhiatna awlsam leh siam that har em em si a ni tih vawng tlat ang che. I nu leh pa thu i pawm loh hun hun chu Pathian leh kawng dik pensan a sual kawng I zawh tanna a ni dawn tih hriain i thin rim ber lai pawhin kan chenhona in aia insiam thatna tur hmun dang him leh tha zawk a awm chuanglo a nia aw.

Rilru no, duap, tihnat leh tihchhiat awllai hun i paltlang mek tih kan hriat avang leh mahni ngei a thil tih duh hun, hel leh thuawih loh chin hun lai – a tawi zawngin hring nuna hun khirh ber i pal tlang mek tih hriain i lungngawi loh chang pawhin lehkha leh ziakfung lain I lungawilohna chu vawi hnih vawi thum ziak chhuak miah miah zel thin la; chu I thu ziah chu midang chhiar ve hmain ngun takin vawi 5 chhiar chhuak mah teh; chhungte/ midang i chhiar tir ve hmain nangmah ngei kha insiam remin i pawtchhe duh thin ngei ang.

Tunah chuan Kohhran ah pawh full member ni ve tawhin kawng tin renga puitlin lam I pan mekna kawng hi a awllai lovin mahnia zawh chhuah rual a nihloh avangin Kohhran hmasa ber chhungkua, nu leh pate – thurawn ngaicham thiam zel tur chein kan duh che ani. I kum rualpui leh aia naupang mai pawh ni lo in u rualte tiamin, an nu leh paten hmangaihna lantirna emaw ti a Mobile phone an leisak sup sup mai te hian kan inchhung ngei pawh rawn nghawng vein i thiante’n an neih vek avanga neih ve I duh thu i sawi khan ngaihtuahna a kal thui em em thin a, vawiin ni thleng a kan thu awiha awt ve em em chunga nangma thatna tur a ni tih hriaa lungawi taka i neilo ngam te hian min ti lawm em em a sin.

Tun lai tleirawl, a bikin hmeichhia mobile handset nei tam tak top up thunna duh avanga an hmeichhiatna hlu tak tibawrhbana a awm mek hi a pawi tak zetin TUNLAI ZORAM NATNA VEI PAWI BER te zing ami a ni a. Chhungkua hi engkim bul a niin chuta mawhphurtu ber nu leh pate kan fail nasain chhungkua ber atanga tan dik loh rah chu mimal, chhungkua, Kohhran, khawthlang leh ramin a tuar mek a nih hi.

Chuvangin, i hmeichhiat thianghlimna kha Kohhran duhdan a pasal I neih hma chuan vawng him tlat la; chu mi ber mi’n a hlauh tawh chuan NUN hi changpat cheh chhum ang maiin dinhmun a phetin hlimna chu sawiloh inchhirna leh nih tur nih phakloh tirtu a niin I thianghlimna diltu che chu I HMELMA lian ber ani tih hriain I tlansan zel dawn nia.

Hlim leh tha tak a he I piancham hi lawm a hun duhawm tak in hman theih nan tlai ngai lo leh rin tlak kan Pathian NUNG chuan vengin malsawmin hruai zel che u rawh se.

With lots of LOVE,
I pa, Arunachal Pradesh

Similar Posts:

• Mizo leh sakung phun
• Khawtlang nun siam thatnan inkhawm
• Rawngbawlna- ruihhlo ngaite ah
• Kristian chhungkua leh kan tehdan diktawk lo te
• Khatla East Local Council din thar chungchang

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Saturday, November 24th, 2012 at 12:33 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.