mi(sual).com

Suihlunglengin kur nguai reng ila a ni mai…

Kum 12 a liam ta…
Sikni eng mawi chuan Leitlangpui chu sawi thiam loh khawpa mawiin a chhun eng a. Van dumpawl thiang ruih bawma van rang chhum inphar dir diar te chuan engemawti tak hian lung an kuai nia. Phairuam bawma tiauchhum, tuipui lian anga cham put te chu, tlangkara ni eng zung chuan a chhun tle sur bawk.

Chumi tuk chuan hlim namenin ka hlim lo va. A chhan chu maw, zirna run bela anpai zaleng tawng hawh ngeia Hostel an tih ka chhuahsan dawn vang chu chhan pakhat a ni. Chu aia min tihlimtu chu a awm. Ka nu duh tak, Mampui/Bawihpui ti baka min ko phal ngai lo chuan, buh seng ram riahna atanga haw meuhin, a fapa hmangaih em em min hruai turin Leitlangpui a rawn kal tlat alawm.

Kan vangkhua
Ka sawi ta fo mai. Kan khua chu maw thingtlang mawngping, lirthei hmuh phak tawk belval leh thlangra ka tih tawh kha. Amarawchu e, boruak thiang tak hip tur min petu; kan khawtlang hualhimtu lentupui leh an zar bela sirva zai vawr ri te, U-a-ma a hnai e tih entirtu tlangsam par te chu kan tan an mawi em em a, nun an tihlim a sin. Chhungtin te’n kum tluana an thawhrah sengin, lal pian hun lawmawm lo thleng tur chu hmuakin, an hlim em em vek a. Krismas ruai tui tak ngaihtuah rauh rauh chungin phur takin buh an phur a. Lengi hnung dawlin vala’n, hei rawh, val hi, hei ha hui ha.. Hmmm , a’n ti thum dat dat te chu kan tan rimawi a ni a sin.

Heng zawng zawng ai hian, ka nu duh tak, Masi kawr min thuisak a, zochhangban ngat min hluitu leh sa tui tak min siamsaktu ka nei a, tudang reng ka ngai bik lo.

Tunah erawh…
India rama khawpui lian ber te zinga nuam pawla an sawiah ka cheng a. Mitin mai chu an hna leh an sahmim hnawh puar turin an hmanhlel a, tin kei ngei pawh ka bang chuang lo. Krismas a hnai e tia chhingmit titlai tur pangpar hmuh tur a awm lo va; dawra eng eng emaw mihring siam chawp an tar bawr luih tih mai loh chu. Ngaiteh chu’ng chu mihring siam chawp mah ni se, man to tak tak te an ni lehnghal.

Nunhlui par ang vullai tui ang liam hnu ka dawn kir a. Kan khuaa enghelh nei miah lo va hlim taka u-a-ma kan urlawk lai te chuan lunghlui an tileng a. A chang chuan nun hian awmzia a nei tlem tial tial ta em ni le tiin zawhna ka saim ta fo mai. Chhungte leh laina hnai te lah mual sang tam tak karah an leng a. Chu-a-chhapah, ka ngaih leh thlakhlelh em em ka nu lah, he lei hringnun kalsanin pialral min lawisan tawh a; min hmangaihna awka nem Mampui/Bawihpui tih tal lah hriat tur a awm tawh si lo. Kan nghah Krismas ni lawmawm chu a lo thleng leh dawn ta. Mahse, Krismas lawma, kan lawina run min hruai thleng a, a chhangban tui tak leh, zanriah min bawlsaktu ka chunnu erawh a awm tawh si lo.

Ka lawm e…
Lalpa, ka hringnun kawng chhuk-chhoah hian chatuan nun min pek avangin ka lawm e. Ka nunna hnar, ka beisei chhan leh ka rinna i ni e. Isua Krista lo piangin, khawvela remna leh muanna a lo thlen hian ka thinlungah nasa zawkin awmzia lo nei zel se. Krismas hriatrengtlak ka hman ngei theih nan ka nun i tan ka hlanin, mal min sawm ang che.

Remna Lal fapa pian niah hian, kan awmna apiangah, thilpek hlu ber REMNA siamtu ni zel turin kan rilru i inpuahchah theuh ang u.

Similar Posts:

• Krismas a lo hnai leh ta
• Krismas leh a vau tumbu
• Rem thu leng rawh se
• Krismas Thuchah
• Birthday tak tak lawm ang u

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, December 12th, 2012 at 4:52 pm and is filed under Advice, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.