Nei si nei silo, nei silo nei si!

December 14th, 2012 8:11 am by Henry Vangchhia

Nizan ka lenna lamah, kan zing a upa ber tur chuan ‘engemaw’ a sawi a. A engemaw sawi chu ka ngaihtuah zui riuh reuh a, awmzia nei thui hlein ka hria a, kan ṭawmpui ang che u!

“Skul naupang kan nih laiin, kan zirlaiah a chuang ṭhin a,” a tia lawm. “Tun hma chuan Burma leh China hi an insumdawn tawn ṭhin a, China ho (Mizo ten Chinese kan sawi dan) chu silk thuam ṭha tak tak inbel ten an lokal ṭhin. Burma Kawl vai ho chu thuam mawl mang ve angreng takin an inthuam mai a, an rilru erawh a inchhuang ve vah tho a, hnam changkang inti-in. Tichuan China ho chuan, “nei si nei silo, nei silo nei si” tih hi min hrilhfiah theih chuan hnam fingah kan ngai ang che u. Ram hi a len leh neihnunna ai mahin, a chhung a chengte finna hian a ti ropui zawk si a,” an ti ta a, an haw san ta a.

Kawl vai lal chuan a ṭhuihhruaite-ah chuan tumah hrikhfiah thiam a hmu zo ta lova, an mangang ṭan ta hle mai a. Nakinah phei chuan, khawtlang a puanzar an rawtthlu ta a ni. Tichuan, bawngtawlailir pu pakhat chuan a hrilfiah theih tur thu a sawi ta a. A ngenna angin lal chuan, mistiri leh lemziakthiam a pe ta bawk a. In lem mawi tak, pindan pahnih nei a sak tir a, lemziakthiamte chu a duh angin milem a ziah tir ta bawk a. An zawh hnu chuan, China sumdawng ho lokal chu an kawhhmuh ta a ni.

In chhung a pindan pakhatah chuan mi tam tak, inthuamna ṭha tak tak nei, hlim tak a an lam vel lai lem chu a awm a. An piah lam erawh chu a thim phei hmuk thung a, engmah a awm lo a ni. Pindan lehlam chu an kawhhmuh leh ta a. Chutah chuan, pitar leh putar te, mi rethei leh rilṭam hmel an lo awm hmur thung a. An piah lam erawh chu a eng phei ruih mai thung a. Tichuan, bawngtawlailir-pu chuan, “nei si nei silo leh, nei silo nei si” chu a hrilhfiah ta a. Khawvel dam chhung tawite a nawmsip bawl a, hausakna ngawt rilruk a, kan piah lam ram a engmah neih loh chuan awmzia a neih loh thu chu a sawi ta a ni. China ho chuan, “In ramah hian mi ropui inlo nei ngei a nih hi,” an ti ta e” a ti.

Hmanlai hun, tun a Kristianna luh hma daih pawh a hetiang, Kristiante inzirtirna nen inmil tak mai nia ka hriat, an thu fing zing a an lo nei reng mai kha ngaihthlak a nuam hi ka ti em em mai a ni.