ATHEISM: PATHIAN AWM RINLOHNA HI
********************************************
Sunday Special
Mizoramah ngei pawh Pathian awm ring lo an lo awm ve ta teuh mai…
Tunlaiin a bik takin Sapram kan tih mai khawthlang ram lamah khuan Pathian awm ring lo Atheist an tih ho hi an pung nasa em em mai a. Kan ram ngeiah pawh hian a pawl ang chiah chuan an awm tawh em chu ka hre chiah lo na a, mahse Sapho tihdan a chhe lam apiang la chak em em, a tha lam lak nachang hremang si lo kan Zoram thalai te zingah pawh hei Facebook lamah te chuan Atheist Group te pawh a lo awm ve ta reng mai. Abik takin thalai te ziangah Pathian awm rinlohna hi a hluar zual hle mai a, tin intih engemaw nana lo hmang tawk pawh tamtak Mizo thalai te zingah ngei pawh kan lo awm ta tih a lang chiang hle mai a, chuvangin Atheist an tih chu enge ni a, Pathian awm hi an lo ringlo tak tak em, Pathian hi a lo awm tak tak nge tak tak lo tih lam hi tun tum atan chuan i lo sawi chho dawn ila a tha awm e.
ATHEIST CHU ENGE AN NIH CHIAH: Wikepedia, the free encyclopedia a a lan dan chuan Atheist chu mi, Pathian reng reng, eng sakhua pawh, a awm ringlo tute hi an ni a, Lal Isua emaw Kan Pathian hi ringlo ringawt ang chi hi Atheist an ni reng reng lo. Heng ho hi chu Kristian sakhua leh an Pathian awm ringlo an ni satliah ve ringawt mai a ni. Tin Isua pawh ring lo a, Sakhaw dang chi hrang hrang, heng Hindu, Muslim, Sikh, Buddhists tih vel te pawh hi ring chuang lo a, mahse Pathian hi chu engtin emaw tak chuan khawiah emawni a awm ring deuh si ang te hi Atheist a chhiar tak tak tlak an ni lo bawk. A nihna takah chuan Atheist te hian kan ngaihnep em em ‘Satanic/Setanist’ ho ang takngial pawh hi an ni pha lo a ni. Setanist ho te hi chuan Setana hi Pathian ang a pawmin an be tlat mai a chuvangin a nihna takah chuan Pathian awm an ring ve tho tihna daih a ni.
KHAWVEL SCIENTIST ROPUI TE HIAN PATHIAN AWM HI AN RING EM: Charles Darwin, Evolutionist ropui, mihringte hi zawng te nen thlahtu bul thuhmun kan ni titu kha Pathian awm ringloh tu leh Pathian thil siam rinloh thu tehkhin nan a hman ber thin a ni pakhat ve a. Darwin-a khan, “Sakhuana (religion) hi tawi fel takin sawi rawh min ti mahse, thui tak ziah tur ka hria ang, chu pawh chuan a la fun kim seng chuang lo ang. Mahse he kan Universe ropui leh mak tak mai hi, tihpalh thil thu chauha awm a ni in tih chuan inhnial tham tak a nih ka ring, mahse chu inhnialna chuan hlutna a nei em tih chu keia ngaihtuah phak a ni lo ve, a ti.” Siamtu hi chu a awm ve tho chu a lo ring ve tlat mai.
American Physics thiam chhuanvawr, Nobel Prize hial pawh lo dawng tawh Richard Feynman chuan, “Pathian hi thilmak chhui senloh te chhuichhuak turin a awm a, kan hriatfiah phakloh thilte ti fiah turin a awm a ni,” a lo ti ve thung a. British Physicist, Chemist leh Mathematician ni bawk, Nobel Prize pawh lo la tawh pakhat chuan, Sakhuana atang hian mihring awm chhan a lang a, science atang chuan a awm chhan hlawhtlin tir tura chakna leh theihna a neihte a lang bawk a ni. A chang chuan mi thenkhat te’n science leh Pathian hi an in-ep em, tiin zawhna an siam thin. Ka kutzungpui leh ka kutzungchal te hi, ka mamawhte ka lak mai theihna tura an in-ep ang hian heng thil pahnih te hi an in-ep a ni, a ti. Quantum Theory hmuchhuaktu, Max Planck pawh khan, “ hman atanga vawiin ni thlenga miril tak tak te hi an nun chhungrila sakhuana ngaipawimawh tak tak an ni, hei hi accident ang a thawk leh khata thil thleng thut a ni lo,” a lo ti ve bawk. Sir Isaac Newton-a pawh khan, “ Ni leh thla leh arsi te, an awmdan tur dik tak a, mawi takmai a an awm hian a Siamtu thiltihei tak a awm ngei ani tih an ti lang chiang a ni,” a lo ti ve hmiah mai bawk. Albert Einstein-a pawh khan, “Sakhuana tel lo science ringawt chu a khingbai a, chutih rualin sakhuana ringawt science tlelo chu a mit a del thung,” a lo ti ve leh bawk.
PATHIAN HI A LO AWM LO TAK TAK ANG MAW: Khawvelah hian hmanlai hun ata tawh, Kristianna lo din chhuah hma daih, mihring te lungpuk vela an la khawsak mai mai lai leh lung hriamhrei vel an la hman mai mai lai ‘Stone Age’ an tih hun lai daih tawh atang khan ‘Siamtu’ engemaw ni tak, an mahni aia thil tithei zawk, hmuh thei si loh, mahse anmahni chu hmu vek thei bawk si leh an awmdan zawng zawng thunun tu, sik leh sa engkim chunga thiltihtheihna nei tu engemawni chu awmin an lo ring raih tawh thin a, Chu chu an mahni thiam dan ang angin biak lungawi an lo tum tawh thin a ni. Hei hi sakhua lo chhuahna bul tak pawh a lo ni chho ta reng a. Kan pi leh pu te hun lai, Kristian kan nih hma daih pawh khan hetiang ngaihdan hi lo nei ve in, an mahni phak tawk angin an lo bia in Pu Vana tih te pawh in a hming an lo phuah a, Chung Pathian an tih engkim siamtu leh engkim chunga thunei tu kha awmin kan pi leh pu te pawh khan an lo ring ve tlat mai a ni. Hetiang hian khawvel hnam tin mai hian Siamtu Pathian hi a awm ngei an lo ring theuh zawk a lo ni a. Hnam a hran a chenna leh khawsak phung te a dang ang bawk leh kan sakhua te a dang ang hian Pathian chungchanga ngaihdan hi a inanglo mai mai zawk a lo ni.
TIHPALH THILTHU A NI THEI ANGEM? Atheist inti ho ten ‘Pathian hi a awm lo’ an han ti mawl tawp mai hi chu engemaw chenah chuan a hahthlak khawp mai. Anihleh Pathian hi awm lo in engkim mai hi a ruahmanna hnuaia awmlo nita se engtinge kan awm ang le. Kan Universe zau lutuk mai a arsi leh planet leh arsi tem te thil awm zawng zawng mai te hi thunun tu leh an awmdan tur ruahman tu awm loa mahni duh duh a leng kual vel mai mai ni ta se kan khawvel ngei te pawh hian su chhe tu tur a va ngah dawn tak em. Heng arsi te leh ni leh thla zawng zawng kawng nei theuh mai a an kal te hi tihpalh thilthu a ni thei ang em? Kan ni khi tuna a awmna hmun aia hla hret emaw, hnai hretah emaw hian han awm ta thut mai se, engtinge kan awm ang? Tuna a awmna tak mai a a awm ngar ngar mai te hi tihpalh thilthu a ni ngawt hauh lo. Khi hmunah tak khian awm tura ruahman tu, Atheist ho ten a a awm an rin loh Pathian in khitah khian a lo dah thlap mai a ni zawk.
Anih leh keimahni ngei mihring te hi siamtu leh duang chhuak tu awm hauh lo in tihpalh thilthu in kan lo awm ve tawp mai dawn em ni ang? Evolutionist ho rindan a thilnung reng reng hi thil tereuhte ‘Single cell’ atanga rawn in din chho zel a thilnung te hi rawn piang chuak lo ni ta ila, thilnung tinreng tobul ‘timur(cell)’ hi engtia lo awm nge ni ta anga, ti siam nge ni ta ang le? Van thengreng zau tak leh khawvel kan hriat te, khawvel dang kan tlawhpawh loh tam tak awm te, arsi leh thil thlawk leng vel tam tak buai hauh lo a an kawng in sial te, hna pawh thawk lo, ramsa leh nungcha tinreng eitur tlachham lo a an awm te hi, tihpalh thil thu mai a awmah vek em ni kan ngaih ang le? ‘Pathian a awm lo’ ti a i lo ngaihtuahna thuak bur a i thuak leh i thuak a thisenzam tereuhte te tam lutuk mai awmze nei vek a hna thawk a, Pathian awm leh awm loh thlenga ngaihtuah tir thei tu che kha tihpalh thilthu a khatianga lo awm a hna thawk thei kha a ni anga maw? A teuh lo mai, Siamtu Pathian in a an nihdan tur ang thlapa a siam te a ni daih zawk.
BIBLE IN A SAWI ALAWM: Beisei chhan tam tak khawvelah kan nei a, Sakhuana satliah mai ni lo, vanram kai phaka nunna leh rinna, Kristianna nasa takin a chiahpiahna ramah kan awm bawk a, nu leh pa leh chhungkua, u leh nau bang lova kan tana min tawngtaisak reng tu kan neih lai leh he thuziak chhiar tura i taksa khawl vawng nung reng tu Pathian i neih kiau lai hian, intihtheihna angreng emaw, inlak danglam nan emaw, intih changkanna emaw ti tlat a “KEI CHU ATHEIST KA NI, PATHIAN AWM KA RING VE LO” lo tih vel hi chuti tehchiam in a ropui hauh lo mai. Atheism hi changkanna nilo in VANDUAINA lian tak a ni daih zawk asin. Isua Krista kan pawm leh pawm loh chu thuhran ah pawh lo dah ta ila, PATHIAN, engkim dintu, siamtu leh reltu, engkim hmu a hre vek tu hi chu a awm ngei a, a awm ngei a ni tih kan Bible daw ve ngai lo hian chiang takin min hrilh tlat bawk a ni. Dante Gabriel Rossetti khan engtinge a lo tih kha- “Atheist te tana hun rapthlak ber mai chu hringnunah hlimna leh lawmna tak tak an tawn hunah pawh a lawthu sawina tur pakhatmah an nei ve lo hi a ni…” a lo tih kha.
BigDaddy Hmahmatea
(R.Lalhmangaiha)
Kulikawn
February 10th, 2013 at 7:29 pm
Ngaihnawm hle mai.
Universe zau zia vel han ngaihtuah chang hi chuan ka ringhlel ve thin tho mai. Mizote pawh hi kan pian tirhin kristian ni nghal lovin chhia leh tha kan hriat hnu ah kan sakhua rin ber tur thlan tur nita se kristianna hi kan thlang vekin ka ring lem lo. Mizo atheist ho pawh hi a engemaw ti zawk tak chuan an huaisen ka ti ve tlat, anni chuan Pathian an ring mawl tawp ve lova, Pathian a awm ngei ani tih proofna an hmuh loh vang zawkin athiest an ni ta mai niin ka hria.
Kei chu tuna mizote din hmun thlir chuan athiest nih hi ka ngam ve awzawng lo, chhiat tawk ila tunge min buaipui ang? Nupui nei duh ila tunge min nei duh ang, min nei duh awm ta pawh nise eng danin nge kan inneih ang? tih vel hi a lo lang nghal thin.
Engpawh nise khawvel changkang zelah hian kan kristianna hi chu a dal tial tial dawn tih chu kan hre vek awm e.
Tuna ka comment pawh hi thenkhat tan chuan a mak ngawt ang
Report this comment
February 10th, 2013 at 8:37 pm
Kristianna a dal telh telh a ni lova, Kristiante hi kan dal telh telh zawk niin a lang. Kristian nia inchhalte chuan atheism kan hmuhdan hi chu a inang tlang thum awm e, sawi vak vak pawh a ninawm. Rinawm takin chanchintha hi hril ila, a hrelote hrilhhriat hi kan bat ania, hrerenga tisual luite ni lovin. Chuan atheism chu sakhaw bik bitum nei lova Pathian awm ringlo/dodal tawp pawlte an ni ngei maia, mahse kristianna hi an helh ber. Kristian sakhua an dodal* nasa ber bawk niin a lang.
Report this comment
February 10th, 2013 at 8:44 pm
@Chhangteval, kan Mizo Athiest te hi i lo ngaisang ru deuh e lo? An in tih danglam duhna velah asin ka lo ngaih
PATHIAN hi a awm ngei e. Lo ring ve tawh se; a la ring lo te paw’n.
Report this comment
February 10th, 2013 at 8:59 pm
Pathian chu a awm.. mitin hian kan hriat thiam phak tawk leh kan ngaihtuahna tlin tawk theuh Pathian kan nei…….
Report this comment
February 10th, 2013 at 9:42 pm
#3 sheldon : Atheist an nih vanga ngaisang chu ni love, mizoram kristian sakhuana lak runna ram anga hetianga ngaihdan/rin dan thar an kal pui ngam hi alawm ka tih
Report this comment
February 10th, 2013 at 10:04 pm
@Chhangteval, i Atheist ve lo hi ka lawm tawk em em ania. Thatakin lehkha kha zir la aw
Report this comment
February 10th, 2013 at 10:21 pm
#6 sheldon : haha atheist teuh lo mai, nu pum chhung atanga Presbyterian Church alawm ka nih le
Report this comment
February 11th, 2013 at 8:11 am
A bengvar thlakin a ngaihnawm hle mai. Atheist ho hi mumal deuha han debate pui tak tak an har khawp mai, an group pakhatah ka lut ve chhin a, ‘ani nuai’ ringawt mai. Hmaichhana khun khan taka han sawiho chu a chakawm ang reng.
Report this comment
February 11th, 2013 at 9:08 am
Pathian hi ka ring thin a,Bible chhiar leh tawngtai hi ka thlah ngai lo.Mahse Pathian hi ka hriatthiam theih turin a inpuang lo nge kei hian ka lo hmuhhmaih/hriathmaih zawk le.. Naupang te ka nih lai khan zawhna ka ngah thin a,ka tleirawl chhoh vel khan zawhna ka nei tlem hle a,tunah hi chuan zawhna tam tak a chhanna ka hriat si loh ka nei ta! Descartes-a philosophy debito cogito ergo sum ang deuh khan ka rilru a bual a,ka bo tulh tulh mai.Zawhna pakhat chu hei hi a ni.Saptawnga exist tih hian space,time leh form a mamawh a,objective reality ah chuan matter,substance an exist thei.Pathian hi a exist a,a exist lo bawk em? Space leh time hi Pathian exist nan ngai se,space leh time a awm hmasak a tul si,nge space leh time hi subjective a ni zawk? Space leh time pawnah leh chhungah thlarauvin a awm tihna em ni? Ka va hre phak lovin sawi theih ka va nei lo em!
Report this comment
February 13th, 2013 at 1:23 pm
Mi A chuan a rilruin “Pathian reng a awm lo a ti a” a tia. Sam 14:1.
Report this comment
May 23rd, 2013 at 7:35 am
Atheist hi sap tih dan tha lo copy vang a kan tih ani bik lo e. Kan lehkhabu chhiar tam tak vang te ani ve e, a bik takin Bible hi. Genesis hi mythology tih kan chiang a, Prophet Muhammad-a van a sakawr thla nei a a thlawk chho tih tluk zetin kan awih lo. Christianity/Islam/Judaism/Hinduism etc2 hi mythology a base anih avangin rin na chhan tur kan hre lo. Religion is The Enemy of Reason. New Atheist Movement, Militant Atheist kan ni e. Ka lawm e.
Report this comment
May 23rd, 2013 at 9:53 am
Atheist ho hi chu Opposition party ang vel hi an nia. Ruling party awm lohna hmunah chuan opposition party an awm thei lo ang vel hian Pathian a awm avanga awm ve chauh an ni. HUn hnuhnunga thil lo thleng tur tidiktute mai an ni a, Kristiante tan kan vanram a hnaih tawhzia rawn tilangtute mai chauh an ni.
An tan hian kan Lalpa Isua Krista hmingin zahngaihna i dilsak mawlh mawlh ang u.
Report this comment
May 23rd, 2013 at 11:01 am
Atheist ho group ah kha zawng thlah ho chu in dam em? Keini Pathian kut chhuak mihring ho pawh kan dam e kan ti mai chu an group atangin min hnawtchhuak chiang ngei mai
Report this comment
May 23rd, 2013 at 2:23 pm
Hei chu doc_lib zarah ka’n lut ve nawlh a! 11@ MattMuanpuiax khian Genesis chu phuahchawp thawnthu mai niin a ngai tak tak ang em? Naupan tet lai atanga zirtirna kan dawnte hian, kan mimal nunah awmzia a nei thui em em theuh a ni. Kan kalna awm kawng hi kawhhmuh kan lo mamawh hlawm em a nih hi. Ka naupan lai chuan Pathian hi awm lo ta se, engtin nge thil reng reng hi a awm ang le!? A thim em em mai dawn ni hian ka’n ngaihtuah a! A! Thim tur pawh a awm nang. Ka ava’n buai thin tak em!
Nia, Genesis hi zir chian tul mai a ni reng a ni. Bung 1-11 thu hi chu mihringin a taka khawvel chanchin an hriat tak tak theih hma (pre-history) thu a ni miau mai a, myth ang leka ngaiha mythology satliah ang chauha pawm duh tan chuan a remchang viau reng a ni. A chhan chu bung 1-11 thu-ah hian khawvel chanchin nena hmehbel tak tak a harsat deuh vang leh, hmanlai thawnthu kalhmanga ziah a nih vang pawh a ni pakhat ang. Engpawh nise, a pawimawh ber chu a phena Pathian thu chah awm tlat hi a ni. Mihring suala kan tluk thu sawifiah tur chuan Genesis bung thum thu hi Keu ngei ngei a tul thin.
Pathian awm ring lo hi an awm tak tak miah lo an ti hehe.. A chhan chu Mihring hian ama duh dana zalen taka tal vel hi a thlahlel a, amah control a, kaihruaitu hi hnawk a ti em a, chuvang chuan PATHIAN hi awm lo se a duh a ni an ti. Mihringin Pathian a be (worship) duh lo a nih chuan, ama siamchawp pathian emaw, ama ngaihdan leh suangtuahna emaw tal pathian chawpin a be ngei ngei tho zu ti a!
Report this comment