Hranghlui Chanchin Ropui/Biru Thenkhat Hailan Tumna !

February 24th, 2013 3:45 pm by lushai_er

Dr. Zokuma Vety. [L]

Kan Mizo hranghlui an sulhnu leh hriatreng tlak, mahse mi te hriat hlawh lutuk lo an tam awm e. Chutiang chanchin tawi tarlangin dik leh kimchang zawk hriate chona ni thei se.

I. Pu Lalhema Fanai : A hun laia pa lar ber pawl ni phak, a rorum leh huaisen thu pawh sawi hlawh tak thin a ni a. Khawvel Indopui I-na (1914-18) laia kum 1917-ah Mizo tlangval 2000 rual lai Labour Corps-ah an kal thu kan hre lar hle a.

Anni hma kum 1915 lam daih khan Mizo tlangval 30 rual chu India Army pengkhat, Army Bearer Corps-ah Stretcher-Bearer (Ruangla)-ah an lo tang tawh a. Rei vak lo Lucknow-ah training zovin Middle East (tuna Iraq leh Iran) lamah khuan an lo zuk thawk a ni.

Pu Lalhema chu heta an hotu chan changtu ber niin, hnamdang kara tlawm lo tura a fuih dan te an sawi nasa hle thin. Indona field ah te pawh zuk tel vein, an zing a zuk boral te hming pawh Aizawl War Memorial-ah hian a la chuang.

Pu.Lalhema hi Lance Havildar niin, huaisen leh hnathawhthat man ah chawimawina ropui tak “Mention-in-Despatch” a lo zuk hlawh phak tlat mai le. Hei hi Victoria Cross, Military Cross/ Military Medal te dawttu chawimawina chhuanawm tham ani.

Heta Pu Lalhema chawimawina dawn ropui zual danglamna leh zel chu a certificate a signtu chu SIR WINSTON CHURCHILL ngei kha a la ni leh ta nghal. Secretary of State for War anih lai ani. Chumai pawh ala nilo fo, Baghdad khawlai a Tigris lui ah tuitla thi tur a chhanchhuah vangin chawimawina ropui lutuk ROYAL HUMANE SOCIETY 0F LONDON-in an hlan bawk.

British min awp lai te khan an laka tlaktlum phah leh nihlawhna tur ani chung khan, chapo nih palh hlauvin, a lo up bo veng veng mai bawk. Amah Pu Lalhema leh a thlahte mai nilo, Mizote tan pawh a chhuanawm tham documents te hi a tu leh fa ten an la kawl tha reng.

II. Pu Sebelha : Ani hi Aizawl chhim kawtchhuah, Maubuang lam chhuak, Awithangpa te nen in laichin hnai tak anni. Tlangval chhuak anih in, rualawhna leh tumruhna nen Missionary te kianga intuaihriam tumin Silchar a thleng a.Chuta tangin Calcutta chu kum 1910 ah a thleng thla ani.

Hetah hian OXFORD Mission te chu zuk belin, anni chuan hna tul apiang thawh tirin lehkha te pawh an lo zirtir ta a. British leh Native te inthliarna a la nasat avangin, an Mission hming in an lo adopt ta a.

Chuta a Sap hming chu ‘Henry Syble Oxford’ tih alo ni ta. Indopui hmasa a kan Mizo tlangval sanghnih rual te France rama Labour Corp zuk kal te kan Missionary (Pu Saphluia) ten an zuk ho ang bawkin, Bengal atanga Labour corp te hotu atan an Mission Sap a kal ve ta a. Pu Sebelha pawh chu Missionary Orderly atan a kal ve ta zel a.

Heta France ralram a an awm lai hian British General (Lord Robert ?) chuan ralram rawn fangin, Missionary volunteer campah ngei chuan breakfast a rawn ei ta a. Chumi tum chuan puanin (Tent) ah Pu Sebelha chuan British Lord ngei mai chu dawhkan a lo kilpui ta ani. Ama sawi dan takin, “Orderly mah ni ila, pafa te chuan kan chu kan kil dun dan pangngai ani” a ti mauh mai. Mizo fa zingah British Lord dawhkan kilpui hmasa a ni chiang hle awm e.

Oxford Mission ten an adopt ang takin, an Mission ram te pawh chanve neiin, Mizo ngei nupuiah neiin Calcutta-ah hian a lo khawsa hlen ta zel ani. Nakin zel ah chuan Mission pawn lamah Tea Company leh Hotel Oberoi ah te pawh Choukider / Security Guard anga thawh lai pawh a nei.

Bengal hian Anglo ho anga seilian anni a, Calcutta Mizo te nen pawh an inpawh vak thin lova. Pu Sebelha a lo upat chakloh hnu phei kha chuan a khawhar hle thin a. Calcutta Mizo thenkhat ten an lo dawngsawng thiam a, Mizo service ah te a lo lang ve thin. Kum 90 lai mi niin 1980 chho khan a lo boral ta a ni.

(Awmzel tur……)