February 2013, Mizo(ram) Diary

March 6th, 2013 8:39 am by chhana

1st. Friday: Mizoram University Vice Chancellor Prof. R.Lalthantluanga chuan MZU campus-ah Permanent Geogetic GPS station a hawng. Permanent Geogetic GPS station hi lirnghing leh lei hnuai chet dan zirna hmanraw chi khat a ni. Tuna an bun tak hian Mizoram leh Indo-Burmese Arc a huam dawn a; Prof. RP Tiwari chu Project Investigator a ni ang.

2nd. Saturday: Mizoram Hindi Prachar Sabha chuan Hindi pawl 10, 12 leh BA second session result an ti chhuak a; a pumpuiah 75.03% an pass.

3rd. Sunday: CADS duty-te chuan Armed Veng South-ah Laltinliana s/o Lalhmingsanga, Sihhmui atanga Armed Veng South-a in luah thar hnen atangin heroin cane 23 leh chhinsen 6 an man a; Lalherliana (22) s/o Ropuia, Tuikual South leh Lalthanpuia s/o Thangzuala [L] New Secretariat Complex-te hnen atangin parvon spas mûm 148 an man bawk.

4th. Monday: Mizoram pumah lirtheia fimkhurna hapta, Road Safety Week tum 24-na hman tan a ni a, thupui atan, ‘Zu in chungin motor khalh lo la, nung damin awm reng rawh’ tih hman a ni.Road Safety Week hawnna hi Aizawlah chuan Transport department conference hall-ah hman a ni a; Transport Director, Thlamuana chuan, lirthei khalhtute chu ruih theih thil laka fihlim tura ngenin, “Motor chu khawl a nih vangin a that tawk leh tawk loh enfiah reng a, fimkhur taka motor enkawl a tul,” a ti. Road Safety week-ah hawnnaah hian Zoram Drivers Union, Mizoram Maxicab Owners Asso¬ciation, Mizoram Road Transport Union, Aizawl City Bus Owners Association leh Mizoram Taxi Owners Association hruaitute an tel a ni.

5th. Tuesday: Sihthiang, Mamit district-a 4th IR duty, constable Lalhriatpuia, Mamit chuan a thianpa Lalramnunmawia (Tea) s/o Laizuala (L), Keitum chu a áwmah a kâp a, Lalramnunmawia hi ká chhawn lohin a thi. Lalhriatpuia leh Lalramnunmawia-te hian zu an in a; inhnialin an insual a, Lalhriatpuia hian a hneh loh avangin bahrik (barrack)-ah lutin, SLR silai a chuh a, bahrik kawngkhar atangin Lalramnunmawia chu a kâp ta a ni.

6th. Wednesday: Sorkar laipui hnuaia thingtlang hmasawnna programme/scheme-te mipui hnena hrilhhriatna, Bharat Nirman Public Information Campaign (PIC) chu Khaw¬bungah neih a ni a, Revenue Minister JH Rothuama’n a hawng. JH Rothuama chuan, Mizoram chu hmasawnna kai rualna hmun a nih thu sawiin, “Aizawl khawpuia awm angte hmun kilkhawr berah pawh a awm a, heng ang hmasawnna kai rual hi India ram hmun dangah hmuh tur a awm lo. Mizoram hi India ramah lehkhathiam awm tamna state a nih angin, ram chhungah state hmasawn ber kan ni thei a ni,” a ti. Bharat Nirman PIC-ah hian DAVP, BADP leh Field Publicity ten photo exhibition an buatsaih chu JH Rothuama’n a hawng nghal a; NRHM buatsaih, a thlawna inentirna pawh a tlawh bawk. PIC-ah hian mithiamte’n sorkar laipui programme hrang hrangte mipuite an hrilhfiah a ni.

7th. Thursday: Tunlaia thalai mu hlum leh damdawi hmang sual an awm fo chungchangah Education Minister Lalsawta hoin a office-ah Mizoram Kohhran Hruaitute Committee leh Central YMA hruaitute an inkâwm. Meeting-ah hian Core Committee thu ngaihtuah tur hrang hrangte an sawiho bakah, thalaite thih thut thutna thleng chung chang an hmuh dan leh a ven dan tur thaa an hriatte an sawiho a ni.

8th. Friday: Sihphir dáiah maxi-cab, AS-01 C-2069 chesualin, kawng thlangah metre 80 vel a lum a, mi chuang pali zinga pahnih – Lallawmkimi (35) Champhai Kahrawt Veng leh S Uddin (41), Delidwar, Karimganj district-te an thi. Mitthite hi nupa anga khawsa anniin Silchar lama sumdawnga vak vel anni. Motor-a chuang ve hmeichhe pakhat, kawngpuia vâk chhuak an hmuhin mipuiin an hria a, Sihphir mipuite’n mitthite ruang chu an la chhuak a ni. Motor khalhtu, hnam dang chu a tlanbo nghal. He chetsualnaa an bungruate kim taka hmuhlet a nih avangin Sihphir khawtlang mipuite mitthi chhungte hian an fak hle.

9th. Saturday: Thinglian, Serchhip district-a Lalhruaimawia in leh Thenzawl Vengthara Donghinga inte chu bungrua chuh hman lohin an kâng a; mihring thi leh hliam an awm lo. Lalhruaimawia in hi di in a ni a; Donghinga in hi Assam Type a ni thung.

10th. Sunday: Serampore College (University) convocation, February 7, 2012 atanga Aca¬demy of Integrated Christian Studies, Tanhrila neih chu a tiak ta; Serampore College convocation-ah hian degree hrang hrang late hnenah certificate hetiang hian hlan an ni: mi 16 hnenah Doctor of Theology degree hlan a ni a, mi 143 hnenah Master of Theology, mi 800 hnenah Bachelor of Divinity degree certificate hlan a ni. Mizorama theological college zingah, Aizawl Theological College atangin mi 13-in M.Th degree leh mi 39-in BD degree an dawng a; AICS atangin mi pahnihin BD degree an dawng bawk. Serampore College hi kum 1818-a din niin, South Asia-a theological degree pe chhuak thei university hmasa ber a ni a; kum 1827-ah Denmark lal, Frederick VI chuan degree pe chhuak thei university nihna hi a pe. Senate of Serampore College (University) hnuaiah Pathian thu zirna college inziak lût 50 a awm a ni.

11th. Monday: Kumina Chapchar Kût hman dan tur ngaihtuahin mi pawimawhte Art & Culture Minister, PC Zoram Sangliana hoin a pisa-ah an thukhawm a, Chapchar Kut chu mipui huapzo thei ang bera hman a nih theihna turin item hrang hrang thlanchhuah a nih bakah, inbuatsaihna kal mekte an sawiho.

12th. Tuesday: Zoram Nationalist Party (ZNP) chuan Aizawlah Zarkawt kawn atanga Tennis Court thleng ‘Zoram saltáng chhanchhuahna kawngzawh’ an huaihawt a; resolution pass in, “Kan ram leh hnam him nan Mizoram pumpui hi Autonomous District Council-ah kan awm leh tur a ni,” an ti. ZNP kawngzawh bul tanna, Zarkawt kawnah ZNP President, Lalduhoma’n thu a sawi a; Lalduhoma chuan, Mizorama kum 40 chhung sorkarna chelh tawhte’n hmasawnna lian tham an la thlen lo nia sawiin, tun thlengin Mizoram chu kawng hrang hrangin a la rethei hle niin a sawi a, Mizoram mipuite chu inthlan hunah ZNP enchhin a, sorkar tir turin a ngen a ni. ZNP kawngzawhnaah hian mi thahnem tak an tel a, ‘Zoram politics-ah Pathian ram thleng rawh se’ tih te, ‘Inthawina aiin rorelna fel hi a thlanawm zawk’ tihte leh, ‘Mizoramah sorkar kalphung thar thleng rawh se’ tihte an aupui a ni.

13th. Wednesday: Ram kang chungchanga inzirtirna hun Fire Prevention Awareness Campaign Vanapa Hall-ah Environment & Forests Department huaihawtin neih a ni a. He hun hi Pu Rosiama Vanchhong, Addl. PCCF-in kaihruaiin Prof. R. Lalthantluanga,Vice Chancellor, Mizoram University chu khuallian a ni. He hunah hian Dr. H. Lalruatsanga, Asst. Professor, Deptt. of Botany, PUC in ‘Health Hazards of Fire’ tih leh Dr. Lalnuntluanga, Associate Professor, Deptt. of Forestry, MZU in ‘Forest Fire’ tih paper a present a. Govt. Zirtiri Residential Science College, Hrangbana College, Pachhunga University College, Govt. Aizawl College, Aizawl West College, Aizawl Law College, T. Romana College, DIET, IASE, RIPANS, AICS leh ATC atangin zirlai thahnem tak bakah MUP leh CYMA aiawhte an tel a ni.

14th. Thursday: Lunglei LDSC Ground no. II-a Rs. 1,44,76,530/- sênga sak, Sport Training Centre cum SAI Extension Centre chu Sports Minister, Zodintluanga’n a hawng. Sports Minister chuan, Mizoramin Vision 2016 a neih thu sawiin, “Vision 2016 hi Olympic-a Mizo thalaite a tam thei ang berin India aiawha infiamna muala an tel ve theihna tur a ni,” a ti a; Vision 2016-a Mizoram a hlawhtlin phawt chuan, India Vision 2020-ah Mizoram chu hlâwkna lian ber ber hûi theitu tur a nih thu a sawi bawk. Sport Training Centre cum SAI Ex¬tension Centre-ah hian multi gymnasium hall, sports hostel, basketball court, tennis court leh volleyball court-te a awm a ni.

15th. Friday: Kolasib DC Conference Hall-ah Scientific Advisory Meeting, Director of Agriculture, Research & Education buatsaihin neih a ni a. He hun hi Pu C. Lalniliana, Director, Agriculture, R & E chuan a hmanpui a ni. SAC Meeting-ah hian Kolasib KVK , Farm Science Centre-a mithiam paruk ten subject hrang hrang hmanga buh leh thlai te ching tura hlawk zawka hma lak dan an lo en chhin tawh dan leh an hmachhawp te, leilung puahchah tura tihtur, damdawi leh hnim hmanga lei tih that dan te, lei thur enkawl dan te, Mizoram mipui te tana ran vulh uar tura hmalak dan tur leh taksa tana hrisel leh hlawk zawka ran vulh leh enkawl dan anlo zir chian tawhte tlangzarhin hmachhawp tamtak an neihte an sawi bawk a ni.

16th. Saturday: New Serchhip Baptist kohhran chuan an kum 25 tlin lawm nan JN Hospital, Serchhipah thisen unit 25 an pe a, a petute hi mipa 19 leh hmeichhia paruk an ni.

17th. Sunday: Phuaibuang khuaa Tlanghlua in, Assam type chu bungrua chuh hman lohin a kâng ral a, thi leh hliam an awm lo. Kângmei chhuah lai hian inah awm an awm lo a ni.

18th. Monday: D.C Conference Hall, Mamit-ah Mamit District Fire Prevention Week chu an Chairman Pu V. Lalremthanga, IAS Deputy Commissioner Mamit District, Mamit in a hawng a, hemi hnu hian District Bawrhsap kaihhruaina-in kangmei venna kawnga hmalak dan tur hrang hrang ngaihtuah zui nghal a ni. Mamit District hian kum 2001 leh 2002 khan Ramkang veng tha ber District lawmman an lo dawng zawn tawh a, Kuminah hian he lawmman hi lak leh ngei an tum a ni.

19th. Tuesday: Dampa Reserve Forests chhunga Departmental Work-a kawng laih hnathawktu panga, heng: Nelson Vanlalruatkima, (28), JCB Operator, Aizawl Hunthar venga K. Thanzama fapa, Lalrinmawia, Mawitea tia hriat bawk, (22), anmahni tanpuitu, Hunthar venga K. Thanzama fapa bawk, Vanlalfaka Riang, (30) mi, Damparengpuia Kimthanga fapa, Lalsangmawia, (32), West Phaileng, Bethlehem Venga H. Vanlalsanga fapa leh Lalliansanga, (42), Teirei Forest Khua, Zomuana fapate hi National Liberal Front of Tripura (NLFT) mi nia hriat-ten an ru bo.

20th. Wednesday: Mizoram, state puitlinga hlan kai kum 26 tlin ni a ni a, sorkarin he ni lawmna programme siam hran lo mah se, sorkar pisa leh zirna inte khar a ni. Kum 1987 vawiin angah khan Mizoram UT chu state puitlingah hlan kai a ni a, khami ni khan Aizawla Lammuala inkhawmah khatih laia Chief Secretary, Pu Lalkhama chuan sorkar laipuiin Mizoram UT, state puitlinga a hlan kaina thupek a chhiar chhuak a, khatih laia Prime Minister,Pu Rajiv Gandhi chuan mipui tam tak pung khawm hmaah Mizoram State thar chu a hawng a, Mizoram chu India rama state 23-na a ni ta a ni. Khatih laia Mizoram UT-a Lt. Governor, Pu Hiteshwar Saikia pawh Governor puitling atan dah nghal a ni. MNF Movement avanga kum 20 chhung, Mizoram buai chu hemi hma, kum 1986, June ni 30 khan remna thuthlung siama chin fel a ni a, remna thuthlung angin MNF sipai rammu zawng zawngte chu an ralthuam nen nunphung pangngaiah an lo let a ni.

21st. Thursday: ZONET buatsaihin Aijal Club-ah Power & Electricity Deptt.-a thawk tur, Mizoram Engineering Service Officer Grade V atana lak thar, mi 13 hualna programme hman a ni a, Pu Vanneihtluanga’n officer tharte hualna thuchah sawiin, ei rukna laka fihlim tum tur leh, ram leh mipuite tana theihtawp chhuah tur te, thil dik lo-ah chuan hotute thu pawh hnial ngam tur te, inti mi lian mai lo-a hnathawh thawmhnaw nena a hautak lai bera awm ngam turte-in a chah. He inkhawmah hian Manipur leh Mizoram Joint Electricity Regulatory Commission Chairman, Pu A.Chhawnmawia leh Power & Electricity Deptt. Engineer-in-Chief, Pu CL Thangliana te pawhin thu an sawi bawk. He inkhawmah hian zaipawl leh mimal zai thiamte pawh an zai a, ZONET Board Chairman, Pu K.Sapdanga’n officer tharte hi lawmpuina leh hualna thuziak, ZONET buatsaih chu a hlan a ni.

22nd. Friday: KTP kum 59 tlin ni a ni a. He ni hi Branch thenkhat chuan vantlang tana hna tangkai thawh nan te, thisen pek te, mi dangte tana thil tha tih nante leh Branch huapa intihhlimna te nen an hmang a ni. KTP hi kum 1953 November 27-ah Teacher’s Training School, Aijal-ah khawpui chhung mi pawimawh deuh deuhte leh thingtlang Middle School zirtirtute inhmuh khawm atanga din chhoh a ni a, Provisional Committee din phawt a ni. Hei hi Synod Standing Committee-in a pawmpui hnuah mumal deuh zawka kalpui chhoh a ni ta a, February 22 hi KTP Day atan hman zui a ni ta bawk. KTP dinnaa hnar kaitute chu:- Chairman – Rev. O.W. Owen (Pu Awna), Vice Chairman – Pu Lalthankima, Organising Secretary – Nl Zokhumi, Asst. Secretary – Tv Luka, Treasurer – Mrs. Owen (Pi Awni) leh Committee Member – Pu Vanlalkunga leh Pu Thanhnuna an ni. Kum 2004 khan KTP kum 50 tlinna (Golden Jubilee) chu Vaivakawn YMA Field-ah General Conference neih pahin lawm a ni tawh nghe nghe.

23rd. Saturday: Bialtu MLA Pu Chawngtinthanga a boral avangin Chalfilh Constitiuency-ah by-election neih a ni a; voter 17,054 ah vote 13,703 tlain a parcentage chu 80.35% a ni. Bial chhunga Lamherh-ah vote tla percentage a tha ber a, 92.68%-in vote thlak in vote tlak chhiatna ber NE Tlangnuam-ah 64.47%-in vote an thlak bawk.

24th. Sunday: Purim kut a ni a; Mizorama Judaism ho chuan hlim takin ruai nen an lawm. Purim kut hi Lal Ahasuer-a cabinet zinga pakhat, Haman-a’n amah chibai buk duhlotu Mordekai-a Juda hnam ami a nih avanga Juda zawng zawng thah chimih vek a tum chungchanga Lalnu Esther-I’n lalnu a nihna hmanga lalpa hnena a ngenna hmanga chhanchhuaha an awmna champha a niin hemi tum hian midangte thi tura duhtu Haman-a chu Mordekai-a khaihlum na tura a buatsaihah khaihlum a ni nghe nghe a nih kha. Biak Inah Esther-I bu chhiar chhuah a niin Haman-a hming chhiar a nih dawn veleh a hming chhiar lai an hriat theihloh nan bengchhang an siam bawk thin. Hetiang a nih avang hian ruih chhum hmawk pawh phal a ni a; mi tam takin zu peg khat tal in an tum thin. Hei vang hian ‘Zu in kut’ anga ngai mi engemaw zat an awm nghe nghe.

25th. Monday: Excise & narcotics te chuan Greenwood Hospital bul, Bawngkawn-ah Vairengte atanga lokal Sumo (Maxi Cab) chu lo check in Parvon Spas capsules 1293, Zothachhinga (20) s/o Lalthangvela, Vairengte State Veng; Lalmuankima (18) s/o Hrangneihkhama (L), Vairengte State Veng leh Lalramenga s/o Zawlneihkhuma, Vairengte State Veng te ta an man a NDPS Act 1985 hnuaiah case an siam sak a ni.

26th. Tuesday: Ramchhung hmundanga zirna in 54 te rualin Mizoram University Campus-ah Windows 8 Operating System leh Windows Phone-a hman theih tur software siam chhuah dan zirho a ni. He zirhonaah hian Hyderabad-a Microsoft India-a mithiam, Pu Kranthi Kiran-a’n thil pawimawh a zirtir a, hetah hian zirna in hrang hrang 92 atangin zirlai thahnem tak an tel a ni. He programme-in a tum ber chu zirna atana tangkai tur software siam chhuah te, games chi hrang hrang siam chhuah te, mipuite tana tangkai tur software siam chhuah te a ni. He Programme hi Mizoram University-a Department of Information Technology buatsaih a ni.

27th. Wednesday: TB Conference Hall Lunglei ah District Level Training of Trainer for Operationalization of weekly Iron Acid Suplememtation (WIFS) Programme chu Pu Joseph H. Lalramsanga Addl DC Lunglei chuan a hawng. He hun hi Dr VLMS Dawngliana, CMO Lunglei in a kaihruai a, khuallian chuan thu sawiin ‘Tleirawl rawlthar kum 10 -19 inkar thisen tlakchhamna avanga harsatna hrang hrang awm thei lak atanga chhanchhuahna hnathawh hi he programme hian a tum ber chu a ni,’ tiin ‘he programme hmang hian tleirawl/rawlthar-te hnen ah Iron & Folic Acid (Vitamin) leh rulhut damdawi pek an ni dawn a, chu chuan tleirawl/rawlthar te hriselna a thlen mai bakah, naute thi leh nu nau chung a thi thleng pawh in he programme hian hmasawnna min thlen ngei dawn a ni’ a ti bawk. He hunah hian Dr. Lalremmawii Sailo, SMO Lunglei leh Pi Vanlalpianpuii PO pawh in report an pe bawk a ni.

28th. Thursday: 23rd. Saturday-a Chalfilh constituency-a by-election result chu puan a ni ta a; hetiang hi candidate ho vote hmuh dan a ni:
Dr. Ngurdingliana 7005 IND
Lalvenhima Hmar 4171 MNF
Lalhmangaiha Sailo 1274 MPC
C.Lalchhandama 976 ZNP
Lalrohlua 205 Ind.
C.Ramkinlova 58 BJP
DK Thanga 14 LJP