mi(sual).com

KHB No. 209
Thu mak ka sawi nin theih loh chu,
Kalvari chanchin a ni;
Engtin nge Pathian Fa mal chu, Mi sual ka tan a lo thih.
Galatia 4:16
Kei erawh chuan kan Lalpa Isua Krista kraws lo chu ka chhuan loh turzia mai chu, chu mi zarah chuan khawvel hi ka tan khenbehin a awm ta, kei pawh khawvel tan khenbehin ka awm a ni.

Kraws hian ringtute nunah pawimawhna lian tak a nei a, Krista tuarna entirna leh a ni a, Pathian thuruk ataka tarlanna a ni (Kol 2:13-15). Boral mekte tan ‘atna’ a ni a, chhandam mekte tan erawh ‘Pathian thiltihtheihna’ thuruk a ni (I Kor 1:18).

Galatia 4:16 ah khan Tirhkoh Paula’n Kraws thu a chhuanzia leh a chhan a sawi kan hmu a, he Kraws chhuan theihna thuruk hi Paula khan a lo hmu chiang em em a ni tih a chiang hle. Keini chu Rinna te, Khawngaihna te, Chhandamna leh Pathian Hmangaihna hi ka chhuang em em zawk a. A tha lo ka ti a ni lo va, mahse Paula anga Rinna, khawngaihna, chhandamna leh hmangaihna tobul chu Krista kraws a ni tih hi kan hriat atan a tha em a, chu mi chungchang chu sawi kan tum dawn a ni. Engkim hi Pathian atanga lo intan vek a ni tih sawi bo ka tum lo va, Kraws thu, Tirhkoh Paula lo chhuan bik chhan chu sawi ka tum zawk a ni. Bible chuan Hmangaihna a ropui ber tih min hrilh a (I Kor 13:13); chu hmangaihna chu chhuan zawk awm tak a ni a, mahse engati nge Kraws thu kher a lo chhuan zawk le?

Kraws chu Pathian Hmangaihna, khawngaihna, chhandamna leh rinna a tak taka tarlana a awmna a nih vang zawk a ni. Kraws chhuangtu chuan chung zawng zawng pawh chu a lo chhuang reng tawh zawk a ni. Chu chu a ni Thu inthup, Tirhkoh Paula’n Kraws thu a lo chhuan em emna chhan chu.

Philippi 2:6-8 ah chuan, ‘Ani zawngin Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a. Tin, mihring anga lo awmin, a inngaitlawm a, thi khawp hiala thu zawmin a lo awm ta a, kraws-a thihna ngei chu.’

Isaia 53:5 en chhunzawm ila, ‘Nimahsela ani chu kan bawhchhiatnate avangin hliamin a awm a, kan khawlohnate avangin vuak thitlinin a awm a: kan thlamuanna tura thununna chu a chungah a tla a; a vuakna vualtea tihdamin kan awm ta.’

Isua Krista kha Kraws-a khenbeh a nih khan a taksa hmun 7 atangin Thisen a chhuak tiin an sawi thin a. A kut 2, a ke 2, a lu, a taksa vuakna atang leh a naka feia an chhunna atangte a ni. Aw le, heng thisen lo chhuahna hmun sarihte leh mihring hlui thihna, Kraws thuruk chu lo enho leh dawn teh ang.

1. A taksa: Isaia 53:5 a kan hmuh angin a vuakna vual/ thisen chhuak tea tihdam kan ni ta a. Bawhchhiatna avanga Pathian laka thena awm mihringte chu suala nung, sualna dana awmte kan lo ni ta a. Pathian lakah thi kan lo ni tawh a ni. Krista taksa atanga thisen lo luang chhuak chuan nang leh kei, kan bawhchhiatna leh kan khawlohnate avanga vuak thitlina awm tur, hrem hmabaka awm chu Krista Isua taksa vuak thitlina awmah chuan nang lei kei hi min lo bel zo ta a, hremin kan awm a, vuakin kan awm ta tih min hriattir ta a, chu hriattirna chu Kraws-ah a taka tarlangin Krista chu kan aiah a hmang ta a ni.

2. A lu atang: Johana 8:44 ah chuan Diabola chu kan pa a ni tih min hrilh a. I Kor 11:13 ah chuan, Mipa lu chu Krista a ni a, Hmeichhe lu chu mipa, Krista lu chu Pathian a ni tih min hrilh leh bawk a. Krista lo lan hma chuan Mipa lu chu Diabola a ni a (Joh 8:44), chu lu chu Krista Isua-ah chuan hling phiara phuar behin a lo awm ta a, thisen chhuaka tihthitlin a lo ni ta a. Kan mihring hlui innghahna, kan ‘lu’ chu krawsa khenbeh turin hlinga phuar a ni tih min hriattir ta a ni.

3. A kut leh ke: Isaia 59:3 ah chuan, “In kutte chu thisena tihbawlhhlawhin a awm,” tih kan hmu a. Rom 3:15 ah chuan, “An ke chu thisen chhuah turin a pen chak (Is 59:7)” tih kan hmu bawk. Gen 3:6 a bawhchhiatna kan hmuha an hmanraw hmasa ber leh vawiin thleng pawha sual khawihna hmanraw lian ber kan kut leh ke chu thisen chhuaka khenbehin a lo awm ta a. Sual tih nana kan hman fo thin chu Krista Kraws-ah chuan che tawh lo tura khenbehin a lo awm ta tih min hriattir a ni.

A tawp berah chuan a nak atanga thisen leh tui lo luang chhuak chuan kan mihring hlui zia leh sual pu taksa zawng zawng chu, Krista Isua-ah chuan khenbeh, chin ral, tihhlumin a lo awm ta a, chu mihring hlui chu a thi takzet a ni tih fiahnan a nakah feia chhun a ni a, chuta tang chuan thisen a lo chhuak ta a. Tin, kan sualna, khawlohna zawng zawngte chu a thisen Thianghlima silfai kan ni tih entirnan tui a lo chhuak ta bawk a ni. Chung zawng zawng chu Kraws-a Krista taksa atanga thisen lo chhuakin kan mihring hlui, kan sualna zawng zawng nen Pathianin a duh ang takin a chingral ta tih min hriattirna chu a ni. Thisen chhuak lova sual ngaihdamna awm lote chu Krista-ah chuan tleitlakin a lo awm ta a, sual ngaihdama kan awmna, Kraws chu kan tan thihna leh nun thar kan neihna a lo ni ta.

Similar Posts:

• THAWHLEHNAA TIHNUN KA LO NI TA
• Chutin Fak Che Thla-in A Nuam Lalpa! {Sunday Pual}
• Hlum Bêl chhûnga Ro
• Krista Kraws Thiltihtheihna !
• Kraws

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, March 19th, 2013 at 10:38 pm and is filed under Luangliam, Religion. You can follow any responses to this entry through the RSS 2.0 feed. You can leave a response, or trackback from your own site.