Archive for March, 2013

Sanjay Dutt jail ah tang leh dawn

Thursday, March 21st, 2013

Tun mai khan Supreme Court of India chuan Sanjay Dutt chu jail a tang leh turin thu a pe.

Kan lo hriatloh takin, Sanjay Dutt hi 1993 a Bombay bomb tu te an man zingah a tel ve a ni. A ni hian thil bomb velah direct in in rawlh velo mahse khang bomb ti puaktute atang khan silai a lo lei vang khan an man ve ta a ni. He 1993 serial blast ah hian mi 257 in nunna an chan a, mi 713 an hliam bawk. Muslim extremist (Mumbai underworld/mafia) ho in Babri Masjid Hindu ten an tih chhiat avanga rawn bomb let an ni e (mahse bomb puak a thi leh hliam zinga tam zawk chu Muslim tho an ni e).

Sanjay Dutt-a te in (house) hi kan in atangin minute 5 vel lek a hla a nia, mipui pawh an tam hle mai. Kalkawngah an pung khawma, media lam ta pawh in an video camera hmangin Sanjay Dutt-a te penthouse an kawk fur mai, traffic pawh a jam nasa lutuk. Kum 2006 khan Supreme Court chuan jail a tang turin thu a pe a, thla 18 a tang hnu ah kum 2007 khan a sentence hi a appeal a, chuvangin bail in a chhuak leh ta a. Mahse vawiin Supreme Court in a thu a pek dan chuan a appeal na hi an lo ngaithla a, kum 6 chhung sentence kha kum 5 ah an ti hniam a, chuan vawiin atanga kar 4 chhungin Jail ah in surrender leh turin thu a pe ta a ni.

Office banah chuan ka va kal ve teh ang an in kawt velah te :D

Posted in News | 13 Comments »

Thereng

Thursday, March 21st, 2013

Awm-har hnemtu
Nipui lo thaw lawm a, lentupui hring-no nghulh mai chuan khawlum hrehawm tur chu a vawng dai thung. Chu hun nuam tak mai chu rannung hram thei tawh phawt te chuan an aw neih ang angin, ‘it’s my life’ ti ve ni awm fahranin hram tliar tliar bawk.

Heng rannung tam tak zinga pakhat: Thereng hi a dangdai riau. Patling kutzungpui tiat vel a ni awm e, a taksa a dum tial a. A thla erawh langtlang thei leh rawng dumin a tial thung. Eng atan mah kan hmang tangkai lo na’ngin kan hunawl min hnawhkhah saktu a ni ve tlat.

Mawngtawlh hla
Ka la theihnghilh ngai lo. Hunawl neih changin, dai hnaia thing kungah heng thereng hram lai kan tawn fuh tawh chuan kan kalsan mai ngai lo va. He ruahtham loh hla ngei hian thereng chu ka lem kual thin.

Thereng aw mawng tawlh mawng tawlh
A lu lamah ral awm e
Thereng aw mawng tawlh mawng tawlh

Tia kan han zai hlarh hlarh tawh chuan, Thereng chu thahnemngai taka hram reng chungin kan hla sak awmzia hrethiam ve niawm tak chuan a mawng tawlh sawt sawt a. Kan bul a rawn tawlh thleng ta maw tihah kan man mai thin. A chang chuan, a kar laklawhah a’n ding khawmuang vel thin a. Thian-za-hova man kan tum chang phei chuan; pakhatin Thereng fukna thingzarah a han lawn chilh te te a. Leia mi te chuan uar tak leh thahnemngai takin mawngtawlh hla kan sa thin.
(more…)

Posted in Mizoram, Nature, Pictures | 11 Comments »

HOSPITAL OPD CHHAWNG BO CHUNG CHANG KHA.

Thursday, March 21st, 2013

(Party In chirh theh nan kan hmang fo bawk a,Lam ang ka lo let leh lawmnan khawnge Politics zawng in rawn come back teh ang aw!!!!! )

OPD BUILDING A BO LO. Tin he ti hi a ni a, Hemi sak hunlai hi Pu F.Malsawma hunlai ani a, Tin, a Contractor pawh CONGRESS pachal Sapnel-a, First Class Contractor Association ah pawh President ani , chumi hnen ami chu Pu Sangchhunga Vaivakawn pa Congress thovin a lei chhawng a, He building sak zawh vek tawh hawngtu hi Pu R.Tlanghmingthanga ani chauh zawk.He OPD building sak dan tur hi Architecture in ruahmanna drawing a siam a, chumi rinchhan base chuan rough estimate plinth area rate in siam a ni a, chumi ang chuan A/A Administrative Approval sanction a ni a. Chumi hnu ah chuan Detailed Estimate siam ani leh a, detailed erawh hi chu Plinth area rate ni tawh lovin item hrang hrang rate, Schedule of Rate a mi anga siam a ni. Tichuan, Technical Sanction ang hian tender koh a contractor hnenah hna hi pek ani.

FLOOR KHAT 3rd FLOOR BO AN TIH CHU. Architect ruahmanna drawing a siamah hian Top Floor a bo anga sawi hi ziahlan tel ani a, amaherawh chu, rough estimate siam na ah he floor khat bo ta anga sawi hi telh a ni ve lo va, chuvangin a sakna tur pawisa pawh sanction tel ani lo hrim hrim zawk ani, Nakina la sak zawm tur ruahmanna awmsa anih avangin Architect hian Drawing siam ah hian a bo ta anga sawi hi a telh mai zawk ani. Chuvangin, sakzawm duh hun pawha dawl zo ngei turin a foundation te leh a ban te pawh ruahman nghal vek ani a, Floor khat bo anga sawi hi a chunga kan tarlan ang khian Future vision ani tih pawh chiang takin sanction na ah pawh ziah lan ani. OPD Building a tan hian Rs.371 lakhs November 2003 khan Sanctioned pek ani Heihi 90% DoNER Ministry in a tum tur a ni a, 10% hi State Sawrkar tum tur ani. DoNER Ministry hian 90% aia tam Rs.345.32 lakhs 93 an release thung. Sanction a tello leh hmuh lawkloh Damdawiin Chawmtu Transformer sawn nan leh Electric HT line Underground Cable a thlak nan P&E Department ah Rs.100,48 Lakhs transfer a ni, Transformer sawn a ngaih a vangin a hna hi reitak a khawtlai phah nghe nghe a ni. Mizoram sawrkarin a tum ve tur 10% or 7% DoNER in 3% an tum tur aia tam an release vangin a la release kimloh avangin OPD a tel tur Psychiatry leh Dental Department room la sak telloh ani a. Heng Room la sak loh nachhan hi a sakna hmun tur a tan Xray Block hlui thiah tur la thiah theih siloh vang kha ani. Sanction ah hian a total Plinth area chu 2789 Sq.m a nia tuna sak zawh tawh zawng hi total Plinth Area 2635.415 Sq.m ani a, la sak kimloh Plinth Area hi 153.58 Sq.M ani. Pawisa la release kim loh hian hemi la sak kim loh sakna tur hi a daih zan a, sak tura ruahman leh mek ani.Source PWD Gov’t of Mizoram.

Posted in Politics, Whatever | 11 Comments »

LENGZEM HLA LEH PATHIAN THU

Wednesday, March 20th, 2013

Hman kumah chuan ka nu (Ka patea nupui) a thih tumin chawlh kar khat lai ka patea inah ka khawsa a; amah ka patea phei chu he a nupui thih hma daih kum engemaw ti liam taah khan a boral tawh a ni. A fa upa berte hnenah ka patea nupui chu a awm a, chu inah chuan a boral ta a ni a.

Ka nu thih atanga chawlh kar khat velah chuan in leng pawh an awm mumal tawh lo a. Chutih hun velah chuah tuk thuan ei khamah hian kawmchar lama in riak puanthuah tian khawm ngheng hian ka thu a, tingtang perhin lengzem(love song) hla hi ka lo sa a. Chutih lai tak chuan ka patea( ka pate unau zinga a nuapang lam) hi a lo lut a. Ani hi Presbyterian Kohhran tualchhung upa niin Pathian thuah hian a tui ve hle a, mahse mahni tawka fing inti ve tawk leh Pathian thu inti hre tak hi a ni ve a. Ka zai chu a alo ngaithla vang vang a, ka hla sak a han hriat chian hnu chuan, ‘Pathian thu awih inti siin khati ang hla te han sak te chu a!’ tiin mi lo khak ta hlak mai a. Ani nen hi chuan kan inmil lo ngang a ni ang, khawi hmunah pawh ni se, kan inhmuh nikhua tawhah chuan inhnial loin kan lo inthen ngai lo reng reng a ni.

Kei pek chuan. ‘Love song’ hi Pathian mite tan sak a thiang lo a nih si chuan, mihring nupaa insiam pawh hi a thiang lo ang a! Nula leh tlangval inlemna hla hi sak a thiang lo ang maw?’ ka ti a. Ani ka patea chuan, ‘Inlem kher hi inneihna a ni hlei nem; inlem hi Pathian thu a ni kher lo,’ a han ti leh a. Kei lah diau duh bik loin, ‘A nih loh leh Lal Solomona khan a ngaihzawngnu kha a lem ve a, ‘Tho la, ka hmangaih, ka enchim loh, lo kal ta che,’ a tih te kha hla ani a, ‘Love song’ a ni ta lo em ni? Khang hlate kha Pathian thu a nih loh chuan engah kher nge Bible a an telh ni?’ ka han tih chuan tawng lehna tur a hre lo nge ni, min hnial zawm zel ta lo a.
(more…)

Posted in Advice | 8 Comments »

BEISEIBO BEISEITU (!?!?)

Wednesday, March 20th, 2013

Mipa naupang Sikul bâng tlan haw phe hlawp hlawp chu a lo hmu thin tan chuan thil mak a ni tawh hauh lo. Kawnga a tlan pah chuan a Form Kamis bâl tawh lam, a kilh pawh kim lo chu a kilh awm ang ang a phelh pah mawlh mawlh a. A tla dah êm vang pawh ni lovin a hmaa tih tur inchher chhuan nguah chuan a rilru a kap êm avangin a lehkhabu ip leh a thuamte chu a dahna hmun tur takah pawh a dah hman lo.

Hmanhmawh taka Tap lam a pan lâi chuan hriatchhuah thut nei niawm takin pawn lamah a tlan chhuak a, a rawn luh leh chuan thing hi a rawn pawm lut tûn tawh bawk a. Rap chu thing hâk sa a awm loh avangin a lo ruak dum ruap a. Bangrel chu thu chungin pha leh pha loin a dap rak rak a, chemtê leh nawhalh a hai thla hlawl a. A hmanhmawh em vang nge mawni êk chhuak tawh lutuk insum hmelte a pu lek lek. Khawnvartui bawm chu a letling theih tawpa a han thin vel pawha far tur a awm tâk loh avangin Dandawi bur hlui Saidâwi Ûm-a an siam Bati chu a phita hrengtu a chhin pawh phelh lovin a khai linglet thawk a, khawvartui chu a duh aia tam a buak tâk vang nimaw a hmelah chuan pawi tihna a lang lek lek mai. Mahse thulh chuang hauh lovin zei fahran chuan nawhalh chu a thai têk chhuai a, tap chu mei alhin a khuh nghal pup a, a thaw huai a.

A thing pawm luh thingfâka a ther chu hmanhmawh fê-in a thliak leh nghauh nghauh a, tap sira thing hawng inchhep chuan a mei chhem chu a vur nghal hluai bawk a. A chala thlan fim bawl chhuak tiam tiam chu a kut phah chunglam chuan a hui pap a. Chawlh mai a la hman lo tih hriat reng chuan pawnah a chhuak leh a. An thenawm ten Vaihlo pho nana an siam Leikapui-a a nu buh pho sa chu a rût leh mawlh mawlh a. Phurh mai a tum hnu chuan a ding leh hluai a, In chhung lamah chuan tâwk fang a va awm hnuah Têl tin pahnih chu tinkawh lehlam hmawra khai zawmin a rawn kawt chhuak a, a hmel en mai chuan Têl tin khat tui kawt zo awm hmel a la pu lo.

Têl tin chu fual fe hian a rawn kawt haw pâr pâr a, a hnungah chuan naupang bâl paw tha tak hian a rawn zui haw ta hnak hnak bawk a. Chu naupang chu an khaw VCP In hmun laihna vungah a lo cheng chawhnu leh tih a hmel leh a balh dân atang chuan hai rual a ni lo. (more…)

Posted in Fiction, Mizo Society & Culture | 18 Comments »

Kraws Thu

Tuesday, March 19th, 2013

KHB No. 209
Thu mak ka sawi nin theih loh chu,
Kalvari chanchin a ni;
Engtin nge Pathian Fa mal chu, Mi sual ka tan a lo thih.
Galatia 4:16
Kei erawh chuan kan Lalpa Isua Krista kraws lo chu ka chhuan loh turzia mai chu, chu mi zarah chuan khawvel hi ka tan khenbehin a awm ta, kei pawh khawvel tan khenbehin ka awm a ni.

Kraws hian ringtute nunah pawimawhna lian tak a nei a, Krista tuarna entirna leh a ni a, Pathian thuruk ataka tarlanna a ni (Kol 2:13-15). Boral mekte tan ‘atna’ a ni a, chhandam mekte tan erawh ‘Pathian thiltihtheihna’ thuruk a ni (I Kor 1:18).

Galatia 4:16 ah khan Tirhkoh Paula’n Kraws thu a chhuanzia leh a chhan a sawi kan hmu a, he Kraws chhuan theihna thuruk hi Paula khan a lo hmu chiang em em a ni tih a chiang hle. Keini chu Rinna te, Khawngaihna te, Chhandamna leh Pathian Hmangaihna hi ka chhuang em em zawk a. A tha lo ka ti a ni lo va, mahse Paula anga Rinna, khawngaihna, chhandamna leh hmangaihna tobul chu Krista kraws a ni tih hi kan hriat atan a tha em a, chu mi chungchang chu sawi kan tum dawn a ni. Engkim hi Pathian atanga lo intan vek a ni tih sawi bo ka tum lo va, Kraws thu, Tirhkoh Paula lo chhuan bik chhan chu sawi ka tum zawk a ni. Bible chuan Hmangaihna a ropui ber tih min hrilh a (I Kor 13:13); chu hmangaihna chu chhuan zawk awm tak a ni a, mahse engati nge Kraws thu kher a lo chhuan zawk le?
(more…)

Posted in Luangliam, Religion | 6 Comments »

Police hotu zurui man!

Tuesday, March 19th, 2013

Khawvel a Irish awmna tawh phawtah chuan March ni 17, 2013 kha an hawksak ni a tih theih ang! Hemi ni hi mithianghlim (Saint) Patricka’n Ireland chu ringlomi (paganism) aṭang a a chhanchhuahna ni a puan a ni a, an patron saint a nih ber chu. Mizoram a kan gospel centinary ang deuh te pawh ani mahna! Tichuan, Irish ho hi hawksak/hlimhlawp (party) nuam timi an nih takah chuan hemi ni (St. Patricks Day) ah hian ruih chiam an ching ta mai a, a ni chhawm nen erawh a inmil lo viau awm e.

Engpawh nise, kumdang ang bawkin USA lamah pawh Irish thisen kai ho chuan St.Patricks Day chu an lawm leh ta a. Zurui an tam dawn tih an hriat lawk vangin sawrkar lam pawhin zu rimnam hnu a motor khalh an tlem theih na’n tiin, a thlawnin taxi a hman theih thu radio leh TV lam thlengin khawpui hrang hrang ie., Washington D.C. ah te chuan an puang leh a ni.

St.Patricks Day chu alo thleng leh ta a, dan bawhchhia a zu rui pawh an awm leh ta nawk mai. Chutih karah chuan langsar tak mai pakhat a awm a, chanchinbu lamah an ṭial nasa teh e.

Baltimore county a an police Captain, Captain Matthew McElwee chu a thisenah phal chinbak alcohol a awm vangin an man der mai. Motor khalh chungin thisenah alcohol hi .08 chin chunglam chu khap tlat a ni. Chutiang, .08 tling tur chuan zu shot 3 lek a ngai reng bawk a! Captain an man tak hi kum 16 lai Baltimore county a police hna lo chelh tawh niin, chumi county a Franklin Precinct-ah kum engemaw zat commander nihna chelh tawh a ni bawk. A hna chelh mek chu chawlh lailawk tirin, chhui mek a ni a, chutih chhung chuan police hovin an nin em em mai ‘administrative duty’ thawh tir mek a ni. (more…)

Posted in Information, Lifestyle, News, Opinion | 13 Comments »

MIN HRETHIAM RAWH, KA CHAK TAWH A NI…

Tuesday, March 19th, 2013

Taxi chu a ding a, a chhung atang chuan tlangval sa tha lam, hang lampang hi a rawn chhuak a. A tarmit vuah lai chu a la thla a, a kawr nghawngah chuan a khai a. Thimhlim zanriah ei hun vel a ni tawh a, bazar dawr thenkhat chu an inkhar tan tawh a.

A awmna lai chu khawpui pawn deuh a ni a, mihring hmuh tur pawh an awm pheuh pheuh chauh a ni. A thlangah chuan chawhmeh leh second-hand dawr a awm, tih loh chu dawr dang hmuh tur a awm lo.

Ruah mal a tla sep sep a, sihen (tourch light) hman nan chuan ala eng mah mah a, hman loh erawh chuan thil a hmuh fiah hleih theih tawh loh thung. Thli fim a tleh heuh heuhva, boruak erawh a vawt lutuk lo thung

Tlangval chu an in lam panin in lianpui pahnih ding kara kawng te reuh te-ah chuan a kal thla a. Eng an la chhit loh avangin a kal kawng chu a phone eng chuan a en a. kawng lun lo tak anih avangin tumah tawh tur an awm lova, a reh thuap mai a ni. Chutia khaw nal taka fimkhur taka a kal lai chuan, a hnunglam atang chuan hmeichhe aw hian a rawn au ta a! Thianpa, lo ding lawk teh?” a rawn ti a. Tlangval chu rang takin a hawi let nghal a.

A awmna atanga hla vak lo, patling hlam nga vel leka hlaah chuan nula hmeltha tak mai alam pana lo kal chu a hmu a. A hleitlingin pian pawh a thiam kher mai. Kawr ban bul chhawhchhibuhpawlh rawn a ha a, pawnfen a khup khuh phalo chiah chiah a feng bawk a, a chawn var sar mai leh thimhlim-thimin a lan hneh zo loh, a ban, a nghawng leh a hmai var no sar maite chu a nalh kher mai. Kalkawng a chep em avangin a nihliap khum lai chu a zip tha a, tin, ruah hmi a tlak ssep sep avangin a kawr leh pawnfente chu an hnawm vek a. A fenhnuai leh naute chaw funna te chu an lang tlang thei a.
. (more…)

Posted in Whatever | 15 Comments »

Ka nu tan

Tuesday, March 19th, 2013

Sap hovin, ‘mother’ emaw a lamtawia ‘mom’ an tih thin leh, kan Bru unau teh ‘aw… amauh’ an tih te hi chu tawng mawilo nilo se, ava pawnlang bik teh em!!! ‘Ka Nu’ pawh ti phal lova, ‘A Nu…’ Mizo ten kan han ti deuh ngaih mai hi chu, ti ril hi a fanin, hâm hi a zen ngawih ngawih bik hian ka hrie thin.

Thla tlêm tê ka nih atangin a rim atangin ka chhinchhiah nghal thei a; kum pawh ka tlin hmain, pai chung chungin a hming ka ko ve thin. Nau a zawnga a tap belh pawl nih takah chuan, ka chaw ei duhlo tap riin ka ûte leh then leh rual zawng zawngte a um kian vek hnu pawhin, ka nu chuan zaidam leh zawldawh takin min thlem thin a, kei pawhin a aw ri chu ka hai ngai lo. Beramin a pu aw a hre thin ang leh, uipain a pu aw a hai ngailo ang hian ka beng hian ka nu aw chu, midangte aw aia a ri a mawi bik vang pawh ni chuang lovin, khawii hmunah pawh a hai ngai lo a ni.

Naupang dawih tak ka nih avangin, khua a rawn thim hlek tawh hi chuan khaw thim hrim hrim hi ramhuai emaw ka ti zel a, ka nu pawnfen vuan reng lo chuan ka awm ngam ngai lo. Kei aia la dawih leh chhawng, ka u (mama) nen khan a pawnfen kha engzah tak kai thler tawh i maw??? Nu dang pawnfen ang feng phak ve suh mahsela, kha pawnfen tluka pawnfen thlamuanthlak kha he khawvelah hian kan tan chuan a awm leh chuangin ka ring lo. A puanhmawr chauh dektu pawn damna an chang thin ang khan, keini pawhin kan deh ringawt pawh khan kan dam sawng sawng thin a ni.

(more…)

Posted in More than words | 5 Comments »

Ka pu Shakespeare-a love story

Monday, March 18th, 2013
KA PU SHAKESPEARE-A LOVE STORY :
Pu Shakespeare-a hi Thu leh Hla lam mai bakah, Hmangaihna lama ka ‘Pu’ ve ngawih ngawih a ni.

Kum 18 mi lek anih laiin, Anne Hathaway, amah aia kum 7/8 laia upa chu nupuiah a nei a, hei hi mi tam takte chuan mak ti hle mahse, a sonnet thenkhatah, hmangaihna awmzia chu khawvel mipuite hrilhfiahin a chhanglet ve sak mai.

Heti hian a sonnet pakhatah chuan kan hmu :

“…Love is not love
When it alters when it alteration finds,
Or bends with the remover to remove;’
(more…)

Posted in Luangliam | 5 Comments »

« Older Entries
Newer Entries »