mi(sual).com

LAL ISUA THLAN NI A SAWI HRANG HRANG TE:

********************************************

Tun tum chu a la hre lo te kan awm takin kan Lal Isua thlan ni a an sawi hrang hrang te chanchin hi a tlangpui ka’n rawn sawi ve thung dawn anga. Lal Isua thlan hi hmun hrang hrangah ah ‘hei hi a ni e’ an tih hi a awm nual tlat mai a. Hun rei tak kal tawh ami anih avangin a ni ber pawh hriat a har tawh khawp mai a, hmun hrang hranga a ‘hei hi Lal Isua thlan a ni’ an tih te zingah hian khawvel ah panga lar zual deuh deuh an awm a chungte chu:

1.CHURCH OF THE HOLY SEPULCHRE: Hei hi Lal Isua thlan awmna ni a an sawi te zinga a lar ber chu a ni a, Jerusalem khawpui hlui Old City an tih  a Muristan an tih bul lawk a awm a ni. Church Of The Holy Sepulchre hi Basilica Of The Holy Sepulchre tih pawh in an sawi ve bawk thin a, Golgotha an tih, Kalvari tlang Lal Isua an khenbehna hmun a awm kha a ni in Lal Isua an phumna ‘Sepulchre’ chu he hmunah hian a awm ni in an sawi. He hmun hi Kristian te hmun pawimawh ber pakhat a ni a kum zabi 4 na atang phei kha chuan tlawh tu pawh kumtin mi nuaih tel fe an awm thin a ni. Tin helai hmun hi Lal Isua thlan ata a thawhlehna hmun ngei kha ni in an sawi. The Greek Orthodox Patriarch of Jerusalem an tih ho hmunpui a nih lai in a building thunehna tak hi chu Kristian kohhran hrang hrang in an intawm thung a. Heng Eastern Orthodoxy, Oriental Orthodoxy te Roman Catholicism, Anglican, Nontrinitarian leh  Protestant Christians te hian hmunpui ber a an neih a ni bawk.

2.THE GARDEN TOMB: He thlan ‘Gordon’s Calvary’ an tih bawk  thung hi chu Jerusalem kulh pawn lam, Damascus Gate an tih bula awm a ni a, lung a thlan tur an ker puk a ni a, mi tamtak chuan hei hi kan Lal Isua an phumna tak zawk chu ni in an ngai a, mahse mak angreng deuh mai chu kum zabi 19 na hmalam kha chuan he Garden Tomb hi Isua thlan anga sawi rikna a awm ngai miah lo tlat.

3.ROZA BAL/RAUZA BAL/ ROZABAL: Hei ve thung hi chu Kashmir khawpui Srinagar a Khanyaar ami a ni daih mai a, Muslim ho pathian biakna hmun pakhat ni in thlan pahnih a awm a. He than pahnih ah hian pakhat zawk ah chuan Yuzasaf(Isua) leh pakhat zawkah chuan Mir Sayyid Naseeruddin te an phum ni a sawi a ni. Thawnthu a an sawi dan pakhatah chuan Isua kha Kraws a an khenbeh khan a thi tak tak lo a, a na tuar nasa lutuk kha a thidang a, chu chu a thi emaw ti in thlanah khan an phum ta a, mahse a rawn harh chuak leh a, a zirtirte puihna in a tlanbo a, tichuan hmun hran hran a fan kual hnuah India ram rawn lut in Kashmir ah hian a thi ta a ni  an ti a. He thlan hi tunhma chuan hriat lar ani ngai lem lo a mahse kum 1899 khan Ahmadiyya Muslim Community hmuchhuak tu Mirza Ghulam Ahmad chuan Lal Isua phumna hmun a ni tih a puang a, hetatang hian  Ahmadi Muslim ho chuan hei hi an pawm nghet ta bur mai a ni….Ve tlat mai a.

THE TALPIOT TOMB: He thlan ve thung hi chu  East Talpiot khaw bul, East Jerusalem a Old City atanga KM 5 vel a hla a mi kum 1980 a an hmuhchhuah kha a ni a. Helai hmunah hian ossuaries an tih, mihring ruhro dahkhawmna ang chi 10 an hmuchhuak a, chungah chuan paruk ah te chuan epigraphs an tih thil chanchin inker na a lo awm a, chung zianga pakhatah chuan thu in ker “Yeshua bar Yehosef” (“Jesus, son of Joseph”), a lo awm ve tlat mai a, mahse he thil in ker hi a fiah vakloh avangin hei hi a nih chiah em tih hi hriat chian chiah a har rual in awmze dang pawh a nei thei tho ni a hriat a ni thung. He an thil hmuhchhuah hi kum 1994 khan “Catalogue of Jewish Ossuaries in the Collections of the State of Israel” tih ah tihchhuah tel a ni a, tin 1996 March/April  khan vantlang hma a sawihona neih a ni a, tin 1996 khan Israel Antiquities Authorities ho journal Atiqot vol 29 ah tih chuah ve leh a ni bawk. He an thil hmuhchhuah hi mi thenkhat chuan hman deuh a The Jesus Family Tomb an tih mai an hmuhchhuah te nen khan inzawmna nei in , Lal Isua leh Thuthlung Thar a lang mi thenkhat te phumna hmun ngei ni a an ngaih lai in Bible zir mi te leh hetiang lam a mithiam te erawh chuan an pawm vak lemlo thung.

5.TOMB OF JESUS IN SHINGO: Hei ve thung hi chu Japan ram a awm a ni ve leh daih thung mai le. Lal Isua thlan ni a sawi pawh a lo in per san hlawm khawp mai. Shingo khua hi Japan ram a Lake Towada an tih South Central Aomori Perfecture khawthlang lam a awm a ni a, tlang ram chhengchhe ve tak a ni a. Thawnthu a an sawi dan chuan Lal Isua kha Kraws ah khan amah kha an khengbet lo a, a unaupa Isukiri in a ai awh in a thi a. Tichuan Lal Isua chuan Jerusalem tlanchhiatsan in Siberia lamah a lut a, chutah Mutsu Province lamah lut in nupui fanau te a nei in fanu pathum a nei a, tuna Shingo khaw bulah hian leilet te siam in awmhmun a bengbel a, tichuan kum 106 mi ni in helai hmunah hian a thi ta a. Tichuan chung hun lai a an chin thin dan angin a ruang chu tlang chhipah kum 4 zet an phoro hnuah a ruh te chu la in helai hmunah hian an phum ta ni in an sawi ve thung a ni. Hemi chanchin hi Hebrai tawng a Lal Isua chanchin inziahna pakhatah a inziak a, mahse Indopui Pahnihna lai khan Japanese thuneitu te khan he thuziak hi man in Tokyo lamah an la ta daih mai a, tichuan tunah chuan hmuh tur a awm ta lo a ni an ti…Ve leh zel chuan…

TLIPNA: Heng ka’n rawn sawi tak te hi kan Lal Isua thlan ni a sawi lar zual panga te chu an ni a, heng bakah pawh hian a dang pawh a la awm nual a mahse heng ho hi chuan mi hriat a hlawh lutuk lemlo thung. Lal Isua thlan hi a chenna hmun leh a khawsakna ber Jerusalem ami ngei pawh hi a khawi nge tih hi chiang fak a hriatna a awm lemlo a. Tin khing Kashmir ami te, Japan ami te phei khi chu thil ni ve thei a ni tih lampang anga rawn sawi tel pawh ka ni lo a mahse Isua thlan ni a sawi leh a lar zual te zinga chhiar tel an nih ve avanga rawn zep tel ve mai ka ni zawk a. Keima mimal ngaihdanah chuan hetiang lam, a pian kum ni leh thla diktak te, a thih kum leh ni leh thla diktak te,  an phumna hmun diktak te hi kan van Pathian khian a ngai pawimawh vak lo a nih hmel a, ngai pawimawh ni se chuan kan Pathian engkim tithei hian min hriat tir tawh em em ang tih hi ka rin dan a ni a. Heng a pianni leh kum, a thihni leh thla, zirtawpni ah a thi tak tak em, chawlhni ah a tho leh tak tak em tih ve te leh a thlan awmna tih vel ai hi chuan Amah kan rin a chhandama kan awm theihna tur lam hi a ngai pawimawh daih zawk ang tih hi kei chuan ka ngaih ve dan a ni tlat, tin hei ngei hi he lei a a rawn kal nachhan pawh a ni reng bawk a. Chuvangin he Good Friday hun a lo then hian kan Lal Isua kha December ni 25 ah a piang tak tak em, Zirtawpni ah an khengbet tak tak em, Chawlhni ah a tho leh tak tak em em, khawi hi nge a thlan diktak ber tih vel bawr a buai kual buai kual lo hian mihring te Eden bawhchhiatna avanga chantuana boral tawh tur chhandam turin kan tan a rawn kal a. Kan tan kraws lerah thi in a tho leh a, AMAH chu tu pawh a ring apiang an boral lo anga chatuana nunna an nei zawk dawn a ni tih lam te, ringtu ka ni in tih satliah ringawt hian chatuan nunna Vanram min thlen dawn lo a, Lalpa Lalpa ti nazawng tu chu Vanram an lut dawn lo a, Lalpa Pathian duhzawng titu te chauh, an hming Nunna Bu a chuang  te chauh in chatuan a nunna nei in Vanram ah an lut dawn zawk a ni tih  lam te hi a thar in hre thar leh in Nunna Bu a kan hming chuan ve theih dan tur lampang te hi i ngai pawimawh  thar leh theuh zawk teh ang u khai.

*Source: The Tomb OF Jesus/Wikipedia

Similar Posts:

• Isua thlanah lungthu ka kim
• Jerusalem thlalak (Tumkau ni pual)
• Khenbeh
• Christmas hlathu diklo ka tih thenkhat
• Bethlehem Arsi leh Khawchhak Mifingte.

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, April 3rd, 2013 at 4:30 pm and is filed under Information, Religion. You can follow any responses to this entry through the RSS 2.0 feed. You can leave a response, or trackback from your own site.