mi(sual).com

Tuk khat chu, Sikul tan dar a rik laiin, Ka tihdan pangaiin, ka office ah chumi ni atana Pathian hnena inhlanna leh, a hruaina dila ka lo tawngtai lai chuan, Kan Zirtirtu zinga Devotion incharge-a kan ruat hi a rawn lut a, “Sir, tukin hi I hun tih I hria em?” a rawn ti ta mai a, ka lo hre reng reng si lo. Naupang an zai tan tawh si a, bible ka chuh thuai a, Devotion hall-ah chuan ka va kal ta a.Naupang zai chhung chuan, eng thu ber nge ka sawi ang aw?” tih ka ngaihtuah nasa ta mai a ni. Zai a tawp a, an thu fel ta a. Tuk dang ang lo tak a, chutia sawi tur ka ngaihtuah chhung chuan, Naupang te lam ho chu an lo ninhleiin, an lo bengchheng tan ta hle mai a, chutah thinur takin ka han vin tuar mai chu, an hlau kher mai! Thehmeh ang maiin an reh nghal duak a, che ngam pawh an awm lo a, min en ta thap mai le. Chu thil chuan, Sermon(Naupang zinga sawi chi bik) min rawn pe ta tlat mai a ni.
An tia lawm:- Tumkhat chu, India History a Lal ropui ber tia sawi theih Ashoka the Great kha a khawnbawl upa thenkhat te leh a Sipai tha ho nen Sa pelin an ramchhuak a. A fapa pawh a hruai ve a ni. Ramhnuai ngaw pilril tak an thleng ta maw tihah chuan, Chhum alo inlet ta but but a, Khawpui ri rapthlak tak tak leh Rial rum ri chuan ngawpui chu a nghawr ta dur dur mai a. Thlipui namen lo tak mai chu a lo tleh ta hum hum mai a. Sakawr leh Sai te an phili zo a, tawmhulna rem chang an zawng ta ruai mai a, Thlipui bakah rial tla chu a tawrh hlelhawm kher mai.
Chutih hun laia Khawvela Lal ropui ber mai pakhat, tu Lal mahin an do ngam tawh loh, Ashoka the Great meuh pawh a buai phili ta kher mai. Chutih nak lai chuan, a fapa naupangte chuan, “Ka Pa, Lal ropui tak ini lawm ni, heng thlipui leh rial tla te hi I ti tawp thei lovem ni?” tiin a lo zawt ta khauh bawk si. Lal Ropui Ashoka meuh pawh a hrilh a hai ngei mai. “Ka Fapa, ipa hi Lal ropui tak nimahila, mihring pakhat ve mai tho ka ni a, hetiang Thlipui leh rial tla lakah hi chuan thu ka nei bik lova, ka thunun thei bik lo a ni. Pathian chauhin hetiang hi chu a thunun thei a ni” tiin a chhang e, an ti a ni.
Lal ropui ni pawha an hriat loh, Juda thingtlang khaw Mistiri fapa ve mai Lal Isua erawh kha chu, khatia Damlo chi hrang hrang amah rawn pantu te tihdam theih loh reng nei lova, Ramhuaite hnawtchhuak a, zeng te, mitdel te tidam a, phar te a tih thianghlim a, mitthi te hial a han kaihthawh takah khan, zuitu a lo ngah ta hle mai a ni. Ani lah chuan, an natna tihdam ringawt kha duhtawk lovin, an rilru leh Thlarau natna pawh tihdam a tum tlat si a, thahnem ngai takin a zirtir thin a ni. Mipuiin an chim hneh lutuk vang pawh ani mai thei, a zirtirte nen lawngah chuangin Dilah an awm hlauh a, Vaukamah mipui tam tak maiin Lawng chung atanga a thusawi chu an ngaithla thuap mai a ni.
A duhtawk a sawi hnuah chuan, a zirtirte hnenah chuan, “Dil ral lehlamah sawn I kai ang u” a ti a, a thu chu zawmin kai tumin an inkar phei ta a ni. Lal Isua erawhchu a chau rimtawng ngang aniang chu, a lo muhil nghal ta bawrh bawrh mai a. Chutihlai tak mai chuan, Thlipui na tak mai a lo tleh chhuk ta phut mai a, nasa takin Dil tui a tifawn a, an lawngah te chuan tui lutin an lawng chu pil mai hlauhawm takin a lo awm ta a, Lal Isua zirtirte an mang angin an thlaphang tak meuh ta mai le. An hotupa lah chu tui tak leh thlamuang takin a lo muhil bawrh bawrh mai si a, an va kaitho ta chuk chuk mai a, “Zirtirtu, Zirtirtu, kan boral dawn hi le, Kan boral hi pawi I ti lo vem ni?, min chhandam lul rawh” an ti ta ruai mai a ni. Chuti taka a zirtirte mangangin an han pun takah chuan, ani chu lo tho chhuakin, Thlipui tleh hum hum mai chu a han hau ta mai anih chu maw le!! Dil pawh chu mihring biak taka biain, “Ngawi la awm hle hle rawh!” tiin thu a han pe fiak thak ta mai a. Sikul naupang kan han vin that that a, hlau em em leh thuawih tak mai a, che lo chang lova an awm a, an reh thuap ang main, Thlipui tleh hum hum chu a lo bang ta a, Tuifawn pawh chu an lo awm hle hle ta mai a ni!!!
Lal Isua hi Pathian nung fapa, min hmangaih avanga Mihringte anga lo changin, kan dinhmun engkim a hrechiang a, amah ngeiin, mihringte tawrhna leh lungngaihna chi hrang hrang kha, a tak ngeiin, ama thinlung leh taksa ngeiin a rawn tuar chhuak dap a, mihringte hmelma tihbaiawm ber mai ‘Thihna’ ngei chu amah ngeiin, natuar rei thei ang ber chi lehnghalin a rawn tuar chhuak a, chu thihna ngei chu rawn hnehin, Ropui takin a tho leh a, Pa Pathian hnena min sawi sak turin, Pa dinglamah a han thu ta a ni. Pathian nung leh engkim tithei, Chatuan thihna leh nunna chunga thutawp neitu, Zuitlak Pathian a ni e.

Similar Posts:

• Thli hi in hlau ve em?
• Mizo thli chi hrang hrang te
• I hre thar ang u
• PEACE CHILD(Inremna Nau lo piang chu) – {Krismas }
• Pathian A Thi Elo!? {Sunday Pual}

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, May 19th, 2013 at 5:23 pm and is filed under Adventure, Event, Religion. You can follow any responses to this entry through the RSS 2.0 feed. You can leave a response, or trackback from your own site.