Archive for August, 2013

Chiahpuam Part II (Sawrkar hian hmalakna a nei tawh em?)

Sunday, August 11th, 2013

Kumin March ni 11 ah khan Mizoram Direct Marketing Limited chu Companies Act 1956 hmangin Mizoram sawrkar hnuaia Industries Dept Principal Secretary, Pu PC Lallawmsanga IPS chuan a hawng a. Website ah a lem a kan hmuh ang in www.mizodirect.mizoram.gov.in/ ah sawrkar official website angin tlangzarh a ni bawk a.

He company hian Chennai-based RMP Infotec Pvt Ltd leh Mizorm sawrkar inremna nikum December ni 12, 2012 khan MoU signed puiin Mizoram Direct Marketing Ltd leh Mizo Lifestyle Marketing Pvt Ltd leh Mizoram sawrkar chu March 13, 2O13 khan licence agreement signed pui angin a thang a. Kan hriatthiam dan ber chuan chiahpuam an tih ang kha a ni.

Mizoram Direct Marketing Limited chu formal takin July ni 16, 2013 ah Kolkata a Science City Auditorium ah launched a ni a. Hetah hian Pu Lallawmsanga pawh hi a tel nghe nghe a. Pi L Tochhawng, Chief Secretary sawi dan chuan kal lo tur a tih a nih hnuah thuawih lo in a kal lui ta a ni.

Mizoramah kan hriat lar hmain vairam lamah an lo chhui nghal a. Sawrkar website a ni bawk si a. Corporate Fraud Watch phei chuan Mizoram sawrkar hnenah a nihna diktak July ni 12 khan zawhna an pe nghe nghe a. Kerala lam phei chuan TV ah Governor hming meuh a chuan avangin an chhuah ta chuai chuai a. Tichuan August ni 2 khan sawrkar chuan official in Mizoram sawrkar siam company a nih loh thu leh thil tisualtu te chungah na tak a action lak a nih tur thu puan a ni ta a. An company website pawh chu lakthlak a ni ta a ni.
(more…)

Posted in Corruption, Internet, Mizoram, News | 17 Comments »

Lal Isua Leh Nikodema {Sunday Pual}

Sunday, August 11th, 2013

Nikodema Hi Tunge?
Lal Isua’n Nikodema a Interview-na hi mimal inbiakna a ni satliah mai lova. He inkawmna hian ‘Mihringin Pathian a hmuh/hriat dan leh Pathianin mihring a hmuh/hriat dan’ chiang takin a hailang a ni. Nikodema chungchang hi Bible-ah a inziak tlêm hle a, a inziak chhun erawh a pawimawh ngang thung. Nikodema hming hi Bible-ah vawi 5 a chuang a, a chanchin leh thiltih hrang hrang lanna erawh vawi 3 chiah a ni thung (cf. John 3:1,4,9,7:50,19:39). Nikodema tih hi Grk.nik-od’-ay-mos (eng.nicodemus) aţanga lâk a ni a, “mipuite ngamtu” (conqueror of the people or victorious among his people) tihna a ni. Bible-a a chanchin kan hmuh leh history aţanga alan danin Pharisai, Sanhedrin member, thiltithei leh hausa tak a ni (cf. John 3:1,10, 19:39). Nikodema chanchin hian ‘Pharisai zawng zawng hi adera nung an ni vek kher lo’ tih a tarlang nghal awm e (pharisees were not as a whole so hypocritical as people think).

Zanah Kher Kher Isua Hmu Turin A Kal?!
Nikodema’n zanah kher kher Lal Isua hmu tura a kal hi thil mak a ni a, zawhna a ti tam hle. A chhan ber chu, Judate ngaihdanah chuan Setana’n zanah nasa takin hna a thawk ţhin niin an ngai a, hemi avang hian Juda Rabbi-te hi zanah an chhuak-vak thiang lo tluk a ni. Hetichung si a, a zan zan-a Isua hmu tura Nikodema a kal tlat hian, thu sawi pui a tum hi a pawimawh tawk tih a tarlang nghal a ni. (1). Scholar ţhenkhat chuan, Nikodeman zan kher kher a chuhna chhan hi Judate leh a Pharisai ţhiante hriat a hlauh vang niin an ngai a, (2). Ţhenkhat thung chuan, a thil hriat duh-te hi hun duh rei chi a ni a, chhunah hun a nei lova, Lal Isua pawhin chhunah chuan mimal kawmna hun a nei lo tih a hria a, zan reh hi a rawn chuh niin alang, an ti ve thung. A dik ber kan hre lova, mahse, a pawmawm ve ve khawp mai! (more…)

Posted in Religion | 11 Comments »

Thihthiap

Saturday, August 10th, 2013

by Biakchhunga (MUP Tlangau, June 2013)

Hmanlai chuan pasaltha te an thih (Sakei aitu tih zawk tur niawm tak a ni. l_e) hian Thihthiapin an ei hlauvin naupang hovin hmawlhin thawmawl an vaw ri tluar tluar thin a. Thihthiap hi awm tak tak a ni a, Baktawng khaw Pasaltha Pu Rianga’n a kap tawh a, hetiang hian a sawi. ‘Kan ramchhuahnaah luidung ka zawh a, thim deuh lek lekah hian engemaw hian min lo ngur a. Ka rin kah ta a. A beng chu a lo inthuah tup mai a, thianglo emaw chu aw ka ti a, ka hawn ta a. Ka pa chuan Thihthiap anih hi, Thihthiap kap hi an vang hle a sin a ti a.Thihthiap chuan beng pasarih a nei an ti asin a ti a. ‘ Pu Rianga chuan ka thih hunah ka thlanlungah Thihthiap beng pasarih nei a kap rawn ti ang che u tiin a chah a.

Posted in Copy Paste, Mizo Society & Culture | 7 Comments »

KAINA’N MI THAH A HLAUH THU LEH THLAH INANG LO

Saturday, August 10th, 2013

https://hnamsakhua.blogspot.in/2013/04/kainan-mi-thah-hlauh-thu-leh-thlah.html

1. Kaina’n mi dang thah a hlau: Genesia 4:1,2,8,14, 
    Adama fa hmasa ber chu Kaina a  chhang chu Abela a ni tih kan hmu a.
    Tin, chang 8-ah chuan, Kaina chuan a nau Abela chu a that ta tih kan hmu leh
    a. Chang 14-ah chuan, Kaina chuan, mi dang thah a hlau tih kan hmu leh a.
2. Thlah inang lo:  Adama thlahte:
      Genesia 4:17-24                            Genesia 5:1-32
1.     Adama                                      1.  Adama
2.     Kaina                                      2.  Setha
3.     Enoka                                      3.  Enosa
4.     Irada                                      4.  Kenana
5.     Mehujaela                                  5.  Mahalalela
6.     Methusaela                                 6.  Jareda
7.     Lameka                                     7.  Enoka
8. Jabala, Tubal-Kaina.                 8.  Methusela
9.     Jubala                                   9.  Lameka
                                                  10.  Nova
     Sema,   Hama,   Japhetha

1.     Gennesis 4:1,2,8,  Kan chhiar chuan, Adama fa hmasa ber chu Kaina a ni a, a chhang chu Abela a ni a. Abela chu Kaina’n a thah tak mai thu kan hmu a.  Chang 14 kan chhiar leh chuan,  Kaina chuan mi dangin an thah ve a hlauh thu kan hmu leh a. A mah hi Adama fa hmasa ber a ni a, a chhang chu Abela a ni leh mai a. Hetih lai hian Bible-a a lan dan hi chuan ,khawvelah mihring pali an awm a, Abela a thih leh takah phei chuan, pathum chauh an awm tawh niin a langa.  Chuti a nih chuan Kaina hian tu thah nge a hluh ang a nu leh a pate thah em ni a hlauh? tih hi zawhna awm thei chu a ni. Hei hi, mi thenkhat chuan, Bible hian Thuthlung innghahna leh an thlahte hi a chhui chu an ni, an ti a . Chuti a nih chuan, Evi leh Adama chu mihring hmasa ber an ni lem lo tihna em ni ang? tih hi zawhna awm leh chu a ni.
2.     Genesia 4:17-24 & 5:1-32 kan chhiar chuan, Adama thlah sawina ve ve kan hmu a. 4:17-24-ah chuan, Adama atanga Lameka chu 7 thleng a ni a. 5:1-32-ah chuan Adama atanga Lameka chu 9 thleng a ni thunga. Hei hi zir mite chuan, 4:17-24 hi J thuziak a ni a, 5:1-32 hi P thuziak a nih vang a ni an ti a. A dik mai thei. Chuti lo ni se, he thlah chhui dan hi a inang lo viau mai si a; a dik zawk leh diklo zawk chu awm ngei tur a ni. Chuti a nih loh vek chuan, a dik lo ve ve, tihna a ni  ang.
Ngaihtuah zui atan leh sawi ho atan:
1. Kaina chu Adama fa hmasa a ni a. A chhang Abela a thah hnu hian, mi thah a hlau tlat hi, tu thah nge a hlauh ang?

(more…)

Posted in Religion | 6 Comments »

Dai hel !

Friday, August 9th, 2013

by H.Chalzama (MUP Tlangau May 2013)

Kan khua kha Bawng vulh uar deuh mai kan nia, ka pa-in kan khaw Bawngah chuan kan Bawngpa chal a huai lawr lak a, chuvangin I hmingah pawh CHAL kan kan telh e a tia lawm. Aw le, kan Bawngte kha Chinghnia khan a she nasa em em a, Pa-hovin naupang dai hel tur an ti a, chung kan dai helna hmanrua te chu :-

  1. Biak In Khuangpui leh te : Khuangpui hi a rit deuhva kan inzawn chhawk laih laih thin.
  2. Dar Tlangau : Biak In leh Sikul-a kan hman thin ft. 1 bial vel, intiat lo te pawh a awm. Khang hunlai khan Kohhranin lakchhuah a khap ve lem lova, dai kan hel dawn khan kan la mai thin.
  3. Darkhuang : Kan hre mai awm e, a rit deuh va kan inzawn chhawk thin. Vawi 1 kan tum hian vawi 10 vel a tuvu kan ti thin.
  4. Darmang : Keini Lal Darmang kha chu chhihri te deuh tiat vel, dar hiu heu, a ri pawn mang…..mang tia chherdeuh, ral khatah a ring vak lo.
  5. Darbu : Darkhuang pian anga piang te reuh te.
  6. Pawngmawng : Darbu anga piang, mahse te deuh chhah bil bel, a rik dan pawh vawi 1 vuak a, mawng…………mawng…….mawng vawi 3 vel ri a zawi tial tial, mak reuh tak a ni.
  7. Darsumsel : He dar hi pahnih a ni a, Felt hat lukhum tiat vel leh a pian zia ang, a lai pawng erawh te deuh, dar eng tle sut mai, a pawng lai a reh pawp, parachute hruia thil zawm, a pawn leh chhunga suih bawk, a thal leh a khup zawnga tum rik chhuai chhuai chi, a hmuna bengchheng ri teng tak, ral atanga ring lo tak a ni. Tum kan inchuh nak nak thin.
  8. Darbeleu : He dar hi a mak danglam khawp mai, kil li a nei a, a sei lam 10” vel, a hlai lam 6”vel, a chhah lam inch a tling lo deuh ang. A sir lu lam ve ve seki anga han filawr, mahse tangrual tho si, a khaina verh pawh, a rik dan pawh dartlangau anga ri vul vul lo, tuai aw ang deuh Bleu ……bleu anga ri. Ralkhat atanga ri langsar deuh a ni.

 Dai kan hel dawn hian tlangval 2/1 in min hova, naupang chu kan tam thei khawp mai a, kan khaw bawng tlatna ram chin zelah dai kal hualin kan ri le lu mai a, thil tha kan tih ai pawh khan kan nuam tihna kha kan rilru phak tawk ni berin ka hria. Hetia dai kan hel hi chuan Chinghne ho pawh kha engemaw chen chu an tit phah viau a, an rawn inlar leh chuan Pahovin Bawng a awn e an ti a, naupang ho kha Dai hel ru an ti a, kan hel leh mai thin

Posted in Copy Paste, Mizo Society & Culture | 7 Comments »

CYMA LEH RAM LEH HNAM HUMHALH

Friday, August 9th, 2013

Ni 7, August zana Local news leh ni 8, August 2013-a Vanglaini chanchinbu chuan Pu F.Vanlalenga leh a thuihhruaiten thuthar therdarhtute an kawmna an rawn tichhuak a, An thusawi hian rilru a khawih hle a ni.

An inkawmna tlangpuiah chuan, tunhnaia Central YMA hmalaknaa Phunchawng leh Rangvamual-a zu zuar leh ramdangmi senghawi hna thawh meka mimal inhuatna leh inpuhchhiatna avanga an veng chhungah harsatna a thlen mek thu a ni a. Tin, he hmalakna denchhena din Mizo Insuihkhawm Pawl (MIP) thiltihdana an lungawi lohna leh dan loa awmte leh thilsual titute inlungrual taka beih tlan a, thuneitute hnena pek zel an duh thu te a ni a. CYMA-in section YMA leh Local Council aia MIP thu a lak zawk avanga zu zuar emaw, ramdangmi emawa puh chu sawisel ngaihna a awm loh thu leh thu hre ril nih pawh a ngamawm loh thute a ni ber. A tawi zawngin Phunchawng-a ralmuanna thlen tura Sawrkar leh CYMA ngenna a ni ber e.

Amah Pu F. Vanlalenga hian Phunchawng Local Council a nih mek thu leh Chaltlang Branch YMA hnuaia awm Phunchawng section YMA-ah leh khawtlang huap pawl dangahte nihna a lo chelh tawh thin thute a sawi a. Tuntum thuthar thehdarhtute a kawm dan erawh a nihna lam telloa a mimal thahnemngaihna a ti a nih thu a sawi thung.

He inkawmna atang hian CYMA-in ram leh hnam humhalh a kalpui mekah hian zawhna/ngaihdan awm thei ta chu han tarlang ila.

(1) Engvanga mipuite thlanchhuah Local Council leh section YMA hian rin an hlawh zawh loh a, he MIP hi din ngai ta nge a nih? Tin, an harsatna hi sawrkar chinfel tur nge CYMA chinfel tur zawk?

(2) YMA kumpuan ram leh hnam humhalh CYMA in a kalpui dan hi hriatthiam a har deuh chu a ni. Eng chin hi nge ram leh hnam nia CYMA hian a ngaih le? Ram leh hnam humhalh a tum danah chhim lam ADC pathum te leh CYMA chu an inkalh phawt a, chutah hmar lam hel pawlte nen inmil lo lehin YMA branch leh group engemawzat thiah hial a ngaih phah a. Chumi hnuah khawchhak unaute hnawhchhuah beihpui a thlak leh ta daih a. A tactic leh strategy hi mipui mimir tana man phak loh khawp a ni ta em ni?

(3) Tihluihna leh pawl chakna hmachhuana ram leh hnam humhalh hi thangtharte rilrua tuh atana thil tha a ni angem? Tuna kan kalpui dan hi tun atanga kum 20 hnu velah ram leh hnam humhalh an tum dan ni dawn ta ang se, an survive zo tak tak angem?

(4) Tharum hmangin kan pi leh pu te khan ram leh hnam humhalh tumin Sap an do a, tharum hmang vekin min awp ta hlauh thung. Ram leh hnam tan tia silai chelekin MNF-in India sorkar an kap a, tharum hmanga thungrulha, laklet kan ni. CYMA-in ama chakna hmanga tihluihnaa hnawhchhuah hmanga ram leh hnam humhalh a tum hian eng ang chiaha ram nuam leh hnam him nge min thlenpui dawn?

(5) Ramdangmi awmte a hnawhchhuah zawh hnuah CYMA hian hnamdang dan loa sumdawngte leh awmte hi a hnawhchhuah leh tur ‘target’ chu an ni mai angem?

(6) CYMA in zu do beihpui a thlakah hian zu in thin leh zu zuar hi YMA member deuh vek an ni mai lo’ng maw? Zu hi lo do rem vek ta pawh ni se zu intu in duhna rilru leh ruih chakna thinlung hi tihluihna hmang hian a do rem a ngem? Moral reformation ngai thil a ni zawk lo maw?

(7) Inhnawhchhuah theihna power hi CYMA kuta pek a ni ta em ni? Nge dan loa awm ramdangmi leh zu zuarte senghawi tur hian sawrkar hian chakna leh pawisa a nei leh tawh lo zawk?

(8) Kan telna pawl hmalaknaa kan rilrem loh thil bawhzui a ngaihin leh dan kalh hiala chetna a thlen chang hian siamthat tuma pen chhuak ngam nge kan nih a, mahni chhia leh tha hriatna pawh hmang ngam lo a, engmah sawi ngam lo nih?

Posted in Ask | Help | Suggest, Mizoram, Opinion | 19 Comments »

PHENGPHEHLEP

Thursday, August 8th, 2013

PHENGPHEHLEP

Vawikhat chu Hrangbana College a 1989 kum a PU 1st year kan nih kum (morning ala nia), Chaltlang lam atang hian a rawn var khat thla mup mup mai a, phengphehlep var pawdal riai mai inches khat vel a lian rual pem tur hi an lo nia, nileng in Aizawl hi an dap chhuak vek a ni ber mai. An tam mep mep in a ropui ngei mai. Hmunawm tak a ni.

 

Kan en liam mai mai PHENGPHEHLEP te hi chanchin an lo ngah ve khawp mai. Insects zing ami ni in Lepidopetra an tih zing ami an ni a; Greek tawng atanga lak ni in ‘Scaly wings’ tihna a ni. An thla te hi scales an tih, thil sin te te inphan atanga insiam a ni a, chu chuan an tial dan ze mawi tak hi a siam ta a ni. A rawng thim lam tel te hian nisa hip in, an taksa vawng lum tu a ni bawk. Phengphehlep te hi an thisen a daih avangin an taksa lumna amahin a insiam thei lo va; tin, an taksa lumna hi 86 degrees Fahrenheit ai a a hniam chuan an thlawk kang thei miah lo bawk.

(more…)

Posted in Whatever | 12 Comments »

Mizoramah CSC a hlawhchham mek? A nih anga CSC kalpui turin an ngen

Thursday, August 8th, 2013

Source: Vanglaini

Mizoram CSC-Village Level Entrepreneurs Association (MCSC-VLEA) chuan, prime minister flagship programme pakhat, Common Service Centre (CSC) Mizorama kalpuinaah a nih tur angin thil kalpui a ni lo a, a hlawhchham chho mek nia a lan thu an sawi a; programme duan a nih ang taka kalpui a nih theih nana hma la turin sorkar an ngen.

CSC-VLE Association hruaitute chuan nimin khan Aizawl Press Club-ah thuthar thehdarhtute an kâwm a; CSC chu National e-Governance Plan (NeGP) hnuaia mi, thingtlang mipuite’n awlsam zawka sorkar an dâwr theih nana ruahman a nih thu an sawi a; Mizoramah chuan state designated agency chu Mizoram State e-Governance Society (MSeGS) niin, a buaipuitu ber service centre agency chu ZENICS a ni a, a enkawltu nodal department chu Information & Communication Technology a ni.

MCSC-VLEA hruaitute sawi danin, MSeGS leh ZENICS-in CSC kalphung tur, master service agreement (MSA) chu April 1, 2011-ah an siam a; MSA-a an ziah danin, project atan ZENICS-in CSC project aṭanga a dawn pawisate chu thla tin CSC pakhat zel chhawmdawl nan Rs. 7,500 a hmang tur a ni,’ tih a ni.

CSC kalpui tur hian mi 136 thlan an ni a, chung mite tan chuan thla tin Rs. 7,500 sên tur a nih chuan, mi 136 tan thla khatah Rs. 10,20,000 a hmang dawn tihna a ni a; MSA ziah (sign) hun, April 1, 2011 aṭanga April 1, 2013 thlenga sen tura ngaih chu Rs. 2,44,80,000 a ni.

Hetih lai hian, MCSC-VLEA hruaitute chuan, ZENICS aṭangin signboard pahnih leh online software hman tlak loh pakhat bak an la dawng lo a, an dawn tawhte chu a vaiin Rs. 10,000 vel hû a nih thu an sawi.

MCSC-VLEA hruaitute chuan, anmahni enkawlna tur sum chu MSeGS-in sorkar laipui aṭangin a dawng ngei nia an hriat thu sawiin, pawisate chu a nihna tur taka hmang a, CSC project tihhlawhtlin nan hmang tura an phut thu an sawi a; CSC-VLE member-te chuan CSC kalpui turin an khuaah mi in/dawrte luahin, hmanruate an lo lei lawk tawh a, mahse ZENICS aṭangin chhawmdawlna an hmuh loh avangin harsatna an tawk mek tih an sawi a ni.

CSC hmang hian thingtlang mite tan Aizawl leh district headquarters-a kal kher ngai loin PAN card, SBI Kiosk banking, passport, tui bill, electric bill, telephobe bill, income certificate, residential certificate, tribal certificate leh thil dangte tih theih tur a ni a; mahse tunah chuan service pek chhuah theih a awm mumal lo a, Aizawl district bika mite chuan income certificate, residential certificate leh tribal certificate-te e-District kaltlangin an pe chhuak theih niin an sawi.

MCSC-VLEA hruaitute chuan, CSC project ang deuh chiah, Rural Information Kiosk (RIK) project pawh ZENICS enkawl turin sorkarin a dah leh nia sawiin, mak an tih thu an sawi a; ICT department, MSeGS leh ZENICS-a hotu ber chu mi pakhat – Lalthlamuana vek a nih thu leh sorkar laipui lamah chuan CSC chu a nih tur ang taka kalpui (fully function) angin an report nia an hriat thu an sawi bawk.

Posted in Mizoram, News | 5 Comments »

MIZORAM MITE AIA MIZORAM HMANGAIHTU MYANMAR-AH

Tuesday, August 6th, 2013

(Kan mithiam, ziak mi, journalist, prominent citizen etc ten Myanmar rama Zo hnahthlak awmte an hmuh dan leh hmalam an thlir dan hi kan ngaihven a, kan hriat tlan a tul ta takzet a ni. Chung zinga pakhat Prof JV Hluna thukhawchang, The Aizawl Post 6th August 2013 a mi hi a ngai ngaiin ka rawn post e)

Zo hnahthlak hi hnam khat ni mah se khawvel politics-in an ram chu India, Bangladesh leh Myanmar-ah a then darh a, chu chuan unaute laka an rilru puthmang thlengin a nghawng. India rama an dah tak Mizoram chu hmun danga Zofate’n an “Jerusalem”-ah ngai mah se chu state-a chengte hmuhsit leh endawng an hlawh fo.

Tun hnaia Myanmar-a Zofate tlawha zin Prof JV Hluna chuan Myanmar-a Zofate khian Mizoram hi Mizorama Zofate ai paw’n an hmangaih niin a sawi a, hmuhsit an hlawh thin vanga an rilru nat thu te pawh a sawi.

“Mizoram an ngaisang em em a, Aizawl hi an Jerusalem-ah an ngai. Hmuhsit an hlawh hi hrehawm an ti. ‘Nghapih’ han tih te, ‘Burma mi’ han tih te, hmusit taka a phek ena kan en hi na an ti,” a ti a,” Hmuh hniamna kan lo nei nasa lutuk hi na an ti em em a. Mizo hnahthlak zawng zawngin Mizorama zin an chak a, Aizawl hmuh an chak a. An rawn zin chang hian hlim takin awm thei turin ka duhsak a ni,” a ti bawk.

Burma ram insingsak dan enin hma a sawn chak hle tih a sawi a, “Nakinah chuan keini aia hausa, keini aia ram hausa tur niin ka hria a. Tam tak hi chu an pem chho duhin ka ring,” a ti.

Chin National Front (CNF) te’n Zo hnahthlakte insuihkhawm nana an beihnaa an sawm anga han tela khaw hrang hranga zin kual Prof JV Hluna hian Myanmar-a Zo hnahthlakte hian an hmakhua tur an ngaihtuahnaah theihtawp chhuahpui an ngai hle tih a sawi a, an ngaihsan em em Mizoram hian hmusit lo se a duh thu pawh a sawi.

Chin Hills leh chumi pawna Zofate awmna ram suihkhawma state hran neih an tum a, chuta an tawng hman tur chungchang chu an hna hmasa pakhat a ni. Paite khua, Duhlian tawng hmang chhungkaw khat chauh awmna Tiddim-ah chuan Prof Hluna te hian mipui ngaihdan an la a, 75%-in Duhlian tawng hman an duh. Committee dinin hmun dangah mipui ngaihdan lak zel an tum.
(more…)

Posted in Copy Paste, Mizoram | 8 Comments »

KAMLIAM

Tuesday, August 6th, 2013

Thu pathum vel lek, inkarkik deuh deuh, tawite te in kan sawi mai mai teh ang. Kan ngaihdan a ni hlawm ngut ang e maw chu!

1. ‘Mipa in a nupui ni turin hmeichhia Rs 420 in a lei a’

Isua Krista in kros a min tlan/lei chungchang sawifiah nan he thu hi an hmang ziah. Mahse Class XII Mizo (core) kan zirlaiah kha chuaninneihna a man inhlan hi inleina a nilo. Mipa leh hmeichhia inneihna inremna nemngheh nan a man hi inhlan a ni tiin kan zir thin.

Inlei nita ila, thaibawih, nupui ngamlo tunge awm ang?

2. Tunge zu ngawl vei?

Tamtakin kan pawm duhlo maithei. Mahse zu ngawl vei huang hi ka ngaihdanin kan zauh ang e.
Kan thianpa pakhat chu zu a in thin a, “In lo in i awm thei em?” katia. “Ka duh duh hunah ka nghei thei” a tia. “Anih chuan inlo mai la,a thatna awm silo” ka tia. “In a chakawm em alawm” tiin a in leh zel tho a ni.
Hman deuh kha chuan tlem a patling deuh kha zu ngawlvei ah kan ngai. Tunlai chuan kan thalai te, Pathianni tlai apiang emaw, a aia zing a in thinte hi zu ngawlvei huangah ka khung ta. A chhan chu zu inloh a tha tih hrereng chung a an in tlat chuan chu bak angawlvei an awm dawn a mi? ‘Ti ziah’ te hi ngawlvei kan tih te an nih avangin zu in ziah hi chu anmahniin ‘ngawlvei’ ah inngai lo mahse a sim hma chu a ngawl a vei a ni.

3. Kuhva

Zuk leh hmuam huangah kuhva kan dah hi a pamhmai lua em? Kan zu lova, kan hmuam lova, tobacco content awm silova. Wai Wai te nen hian huang khatah dah ta mai ila, ‘kamram’ ah ngai ve ta zawk ila, a fuh ang em?

Posted in HAHAHA, Lifestyle, Mizo Society & Culture, Mizoram | 10 Comments »

« Older Entries
Newer Entries »