Zofate hi kan duhtlanna leh biak rawn na awm hauh loin ram pathum India, Burma leh Bangladesh ah te thendarh a awpbeh kan ni a. Hei vang hian kan nunphung leh tawng, chindan hrang hrangte pawh awmna boruak in min chiahdan ang zelin alo danglam deuh pawh a ni thei. Mahse, hei hi kan Inpumkhatna tichhe tu ah hmang lo in, Unau kan nihna min hriat chian tir tu leh kan inthlakhlelhna tizual tu ah hmang zawk ang u.
MIZO TIH HMING HI KHAWI HMUN AH LEH ENGTIK ATANGA LO CHHUAK NGE :
Mizo tih lo chhuahna hi eng hun atangin nge tih leh Khawi hmun atangin nge tih hi bulfuk taka sawi leh ziak thei kan awm lo a. Mizo chu Mongolian an tih, hnam hlawm lian pui atanga lo chhuak, tawngah chuan Tibeto-Burman an tih zinga mi kan ni tih hi Historian te leh mipui nawlpui in kan pawmdan tlang lawn ber chu a ni. Mizo tih hi eng tik atang chiaha lo chhuak nge tih hriat a harsa hle a. Kum 1880 chho vêla Saikuti zaiah khan: ‘In zuah sual e chhuahtlang thing lenbuang, Par a chhuang e, Mizo lû ngenin,’ a tih hla thu a awm a, kha kha Mizo tih lo rik chhuahna hmasa pawl ah chuan ngaih a ni a. Kan ziaktu hmasa Pu K. Zawla khan Than Tlang vel a Pi Pu te lo khawsak dan chungchang a ziah ah khan, ‘Tlâng sâng taka awm an nih avângin an vêla mite chuan Zomi an ti a. Ni khat chu pa pakhat hian sanghal muhil lai mau feiin a vit hlum a, “Keimah Mizopa, phulraw chawia sa tin kâpa,” tiin hla a phuah a. Heta tang hian Mizo tih hi a lo chhuak ta niin upate’n an ring,’ tiin a ziak a. Hetah pawh hian an ring ti baka chiang chuan a ni pawh hian a sawi ngam chuang lo a ni.
Hla thu leh Ziak kan neih hmasak ah hian Mizo tih hi a awm har khawp mai a, Mizo tih ziaka kan hmuh hmasak ber nia hriat chu Kum 1895-a chhuak ‘Mizo Zir Tir Bu’ kha a ni. Hla ah ziaka Mizo tih kan hriatna hmasa ber chu Kum 1903-a Zosapthara hla phuah, “Mizo kan nih lâwm ila,” tih kha ani leh bawk a ni. India Constitution ah hian Mizo tia ziah luh kan nihna hmasa ber chu kum 1954-a Lushai Hills, Mizo District Council tia thlak kan nih ah khan a ni a, Political Party a Mizo tih hmang hmasa ber pawh Kum 1946 a din Mizo Union kha an ni bawk.
Eng pawh nise, Zofate tan chuan MIZO tih hi tu ta bik mah a nih loh avang leh Zofa hnam zawng zawng sawikhawm na hlawm khat atana MIZO tih hi kan hman tawh avangin kan Inpumkhatna atana Siamtu min ruatsak ah pawm tlangzel ang u.
TUTE NGE MIZO :
Mizo tih hi chu Tlangmi tihna mai a ni a. Saptawng chuan Mi(People) Zo (Hills) tiin dah a ni thin. Keini Zofate hi Chhinlung chhuak kan inti a, amaherawhchu vawiin thlengin Chhinlung chu khawia awm nge tih pawh kan la hre chiang thei chuanglo a. Thenkhat chuan China ramah ani an tia, amaherawhchu hei pawh hi chiang taka finfiahna a awm thei chuang lo. Amaherawh chu Zofa te hi kan tawng leh chindan hrang hrangah vawiin thlengin ram hran daih a kum za tam awm tawh te nen pawh in an na tam tak kan la neih avangin, Kum sangtam tak kal tawh ah khan chhungkaw khat niin, kan lo cheng khawm tawh tih a hriat theih a ni.
Pi Pute, Kawl ram atanga tlang an rawn tlak khan a rualin an rawn chhuk vek lo a, a rawn chhuk thla hmasa te chu Bengali (Kawl-vai tia koh thin) te chuan KUKI tiin hming an lo vuah a, a hnuah midang an rawn kalzel tak avangin a chhuk hmasa ho chu an hmingah Old Kuki tih vuah leh in, Thlang rawn tla hnuhnung te chu New Kuki tih an lo phuah leh a. He hming hi tamtak chuan vawiin thlengin an la pu a ni. Hetihlai hian Kawl ram a chambang kan Unau thenkhat chu vawiin thlengin CHIN tia koh an la ni bawk. Heng hming kan putna chhan pawh hi keimahni inphuah nilo in Hnamdang in hming min phuahsak vek a ni a. Chuvangin Ram hrang hrang pathum Bangladesh, Myanmar leh India ram a cheng Zofa CHIN-MIZO-KUKI hming avang hian inla hrang tur bik kan awm lo tih hre nawn leh ang u.
Kan Historian tam zawk hian AD 800 atanga 850 inkâr vêlah kan Pipu te khan Kâwl phai ‘Kabaw Valley’ an lo thleng niin an ngai a. Tiau lui hi a hlawm a an kan tawp hun pawh AD 1700 velah an ngai a ni. Hemi hnu lamah pawh hian tuna Mizoram kan tih a rawn lut chu an la awm reng awm e.
Thlang tla hmasa ho ten Mizoram an kalpelh hnuin thlangtla hnuhnung deuh ho chu Mizoram ah hian an chambang ta a. An rawn chhuk thlakna Kawl phai aia ral a lo muan tak avangin tuna Mizoram ah hian hmun hrang hrangah awmhmun khuarin an in bengbel ta a. Heng hun chho hi Hnam hming inphuah uar hunlai ni pawhin a ngaih theih. Tam tak chuan an Pa te hming leh Khaw hmingte chu an Hnam hming ah chhawm in vawiin thlengin an la pu hlen ta zel a ni.
Vawiin ah chuan Mizoram chhung ah Hnam hrang hrang kan lo awm ta teuh a. Hei vang hian kan rawn chhuahna hi thuhmun, chhulkhat hrin kan nihna hi kan hriat chian a pawimawh lehzual ta em em a ni. India ram chhung a cheng Zofa hnam hrang hrang Hmar, Lakher, Lusei, Paite, Pawi, Bawm, Ralte, Thahdo, Vaiphei, Kawm, Ranglong (Kan tam mai sawisen a nilo) heng hnam te hian lungrual taka kan awm theihnan hming in tawm pakhat kan neih angai, chu chu hnam hming nilo MIZO tih hi lungrual takin pawm tlang ang u. Mak ve deuh mai chu, kum 1901 chhiarpui ah khan Mizo inti pakhat mah an la awm lo va, mahni hnam hming theuh khan la inziah ani a. Amaherawhchu, Kum 1961 chhiarpui ah chuan hmun thuma thena hmun hnihin Mizo an inti tawh a, mahni Hnam bil hming ang a inziak lut an tlem pharh tawh a ni. Hei hian Inpumkhatna atan awmkhawmna pakhat kan duhzia ati lang chiang viau in ka hria.
MIZO tih hi thenkhat chuan pawm harsa kan la ti deuh niin a lang a, hei hi harsatna ah ngaihloh hram tum a va tha em. Van hnuaiah hnam chi tinreng kan awm ang hian, Zofa hnam hrang hrangte hi India ram chhungah chuan Mizo tih hming hian min uap khawm se. Hei hi kan inpumkhatna leh kan chakna atana pawimawh a ni si a. Thuziak tu ropui Shakesphere-a pawhin, “Hming hian eng nge kawngro a sut”, alo tih tawh kha.
MIZO TAWNG BIK A AWM LO :
Mizo tih hian Lusei hnam chauh a kawk lo ang bawkin, Mizo Tawng hi Duhlian tawng bik chauh a nilo. Tunlaiin thangthar naupang deuh zingah tawng tualleng a kan hman Duhlian tawng chuah hi Mizo tawng a ngai an awm ta fo mai hi a pawi a. In hrilhfiahna tha zawk kan neih tam a ngai khawp mai. Zofate’n tawng hrang hrang kan neih hi Mizo tawng vek ani a, Mizo tawng bik a awmlo tih hi kan hriat chian a ngai. Duhlian tawng bul thut a hmang hian Mizo tawng hi a piang mek a, a la piang dawn chauh bawk a ni.
Kan hnam tawng hrang hrangte hi a bo mai lohnan kan inhumhalhsak tawn a tul khawp mai. Tawng zirtu thenkhat chuan Mizo tawng hi chi 47 awmin an ngai a, heng zinga atam zawk chu hriat chhuah harsa khawpin a riral tawh a ni. Tunah hian Mizoram chhungah Mizo tawng kan hriat lar, heng : Hmar tawng, Paite tawng, Mara tawng, Lai tawng, Bawm tawng, Pang tawng leh Duhlian tawng te bak hi hria thangthar naupang zawkah phei chuan an vang ta ngawt mai. Mizoram chhunga cheng hnam hlawm lian tak pakhat Ralte tawng phei chu chhem nun leh harsa khawpin a thi tawh a. Mizoram hmar lam, Darlawn khua atanga Km 60 bawr vel a awm Thingsat khua ah bak chuan Ralte tawng hmanna hi a awm tawhlo mai thei. Mizo tawng hrang hrangte hi kan hnam rohlu leh kan hnam nun ti ropui tu an ni a. Heng kan hnam tawng hrang hrangte hi a boral lohnan a venhimna kawngah mitin in tan kan lak a pawimawh takzet a ni.
Kan hnam chanchin ziaktu tam berin, tawng hrang hrang chungchang a an in nghahna ber pakhat chu Kum 1904 a chhut G.A Grierson-a ziah Linguistic Survey of India kha a ni a. Kha tih hunlai khan tuna Myanmar leh Bangladesh pawh Indian Sub-Continent ala nih vek avangin sawrkar pakhat hnuaia Zofate kan chen ho lai pawh a tih theih ang. He lehkhabu ah hian tawng chi 32 a dah ve thung a, chungte chu Northern Group, Central Group, Southern Group leh Old Kuki Group tiin a then hrang ve leh thung a ni.
Hnam leh Tawng hi chu a piangthar zel a, a la piangthar zel bawk ang. Chuvangin, Mizo mipui zawng zawng hian Duhlian tawng chauh hi Mizo tawng a nilo tih kan pawmtlan theih hunah leh, kan hnam tawng hrang hrangte hi mahni ta ang a kan entlan theih hunah kan nghahhlelh Zofate Inpumkhatna hi chakzawkin ala her ang tih ka ring tlat a ni. Chutihrual chuan Hnam hrang hrang, tlang hrang hrang a chengte’n in unauna tha lehzual kan neih theihnan kan tawng tualleng neihsa Duhlian tawng hi thiam tum vek bawk ang u.
KAN HNAM NUNPHUNG LEH KHAWSAK ZIA KAN INHRIATCHIAN A NGAI :
Kan sawi tak angin Mizo tih hi Hnam hrang hrangin kan siam a ni a. Chuvangin Mizo nunphung leh zia rang hrang hrangte hi kan inhriat tlan tawn a pawimawh hle a ni. Zofate hi kan darh sarh viau e tilo chuan kan nunphung leh khawsak dan atangin Unau kan nihzia a lang chiang hle a. Nula leh Tlangval inrim dan, Inneih dan phung, chawhlui kilho dan, chhiatni thatni a kan intawiawm dan, ramsa kah ni khua a hlado chham mi, mitthi inral, inphum leh inthlaichhiah thin mi kan ni a. Kan lo neih te thleng a a in an bakah, dawhkang a In sa mi kan ni a. Khawtin ah Puithiam kan neih bakah Zawlbuk kan nei bawk a. Pipu hun tanga kan hnam ti mawitu Tlawmngaihna phei hi chu Kristian kan nih hnu hian a pungzual ta sauh emaw tih tur a ni.
Tin, hei bakah hian kan thawnthu tam tak hi in ang tlang taktak vek a la ni hlawm a. Liandova te Unau thawnthu te, Chhura thawnthu te, Thlanrawkpa khuangchawi te kan nei ve a. Chhura hi Tedim chuan Penglam an ti a, Haka leh Falam ho chuan Tenglam an ti leh a, Thahdo ho chuan Benglam an ti leh mai a. A hming hi a dang hret hret na a, a nunchang leh a chezia chu Chhura tak tak vek zawng a ni. Kut kan hman thin hrang hrangte pawh hi inhnaih tak tak vek a ni. Hmar leh Lusei in Favang Kut an tih chu, Thahdo in Chavang Kut an ti ve leh mai a. Kan lo chhuahna chungchang ah pawh Lusei in Chhinlung chhuak kan ni an ti a, Hmar leh Hualngo in Sinlung chhuak an inti a, Kom ho in Khur, Tedim ho in Khula chhuak niin an in an insawi bawk a. Hmun pakhat sawidan dang mai tih a hriat theih a ni. Kum 1991 daih tawh khan ZORO chuan India, Bangladesh leh khatih laia Burma a cheng Zofa zawng zawngte hi belhkhawmin Maktaduai 5 chuang ni turah an lo chhut tawh a. A hnu kum 22 na, Kum 2014 ah phei chuan Zofa khawvel ram hrang hrang a awmte hi Maktaduai 7 chuang kan nih a rinawm tawh a. Chuvang in Zofate hi hnam tlemte nilo in Hnam ropui leh lian tak kan ni tih hi hre thar leh ang u. Tlang hran leh Mual hran a kum za (100) tamtak kan lo awm darh tawh vangin kan hnam nunphung leh khawsak dan kalhmang te pawh alo danglam deuh pawh a ni thei a, hei hi in en hran nan hmang lo ila, Inpumkhat kan tul zia tilang tu ah hmang zel ang u.
INPUMKHATNA ATANA HMABAK KAN LA NEIH TE :
India Constitution (SCHEDULED TRIBES) Order, 1950, 5th Schedule-a Mizoram ST list inziak hi kan siamthat ran a ngai bawk niin a lang. 5th Scheduled a Mizoram Tribe list inziak ah hian Hmar, Lakher, Pawi te bakah hian Any Mizo (Lushai) tribes tia ziah lan a ni a. Hetah hian Mizo hnam zawng zawng kan lan loh avangin felfai taka siamthat a nih theihnan sawrkar hian hma a lak a ngai a ni.
Eng pawh nise Zofate hi sawrkar pathum India, Bangladesh leh Myanmar bakah, State leh District hrang hrangah thendarh in kan awm a. Kan luah chin ram hi Km. 145,600 a ni a, mihring pawh maktaduai 7 chuang zet kan ni ang kan tih tawh kha.
Sawrkar hrang, tawng hrang leh duhdan hrang ang a kan awm tak avang hian hnam ang a Inpumkhat hi thil tih theihloh a ngaite pawh kan awm mai thei. Tawng te, Sakhua te leh hnam zia te hian bial hi an nei ve tak taklo a ni tih hi kan hriat a pawimawh. Tunlai khawvel Technological Development leh Communication Explosion avang hian khawvel pumpui hi Global Village tih lek a nih tawh chuan, keini leh kan ram luahchin ve pawh hi Zo Khua ang lek fang ala ni dawn a ni.
Hnam nihna ah hian tawng hi pawimawh ber mahse a ber a ni chuanglo. Kan thenawm lawk Nagaland ah tawng inhre pawh miahlo, hnam hrang thiau a in ngai chi 19 ten lungrual taka Naga ang a inchhal a an khawsak theih chuan, keini Zofa, tawng engkim in hre pawh te hi chuan kan thei ve dawn lawm ni.
Kan duh vang nilo a Hnam dangin ramri min thensakna hian kan thinlung ram hi then ve lo se la, “Ram hian Ri nei mahse, Hnam hian Ri a nei ve lo a’’. “Tui aiin Thisen a rit zawk”, tih hi hi Zofa hmun hrang hrang a chengte’n i vawng reng ang u.
Similar Posts:
- Tute hi nge Mizo? Mizotawng hi enge?
- Mizo hi hnam hming a ni lo
- Eng hi nge Mizo Tawng chu?
- Mahni hnam tawng thiamloh a zahthlak
- Mizo tawng hi!
January 30th, 2014 at 9:25 pm
Hnam dawhzep tih takah kan ngamloh hnam miten ram tha tha, phaizawl chhak leh tlhang lamah an chang a, kan pi leh pute kha tlangram kham veng vung karah an tlanchhia a, chuta awm hlen kan ang riau. Kei chu ka zak rilru deuh.
Report this comment
January 31st, 2014 at 4:03 am
“Mizo chu Mongolian an tih, hnam hlawm lian pui atanga lo chhuak”
Mizo te hi Mongoloid kan ni a, Mongolian thlah kan ni tihna a ni kher lo.
“India ram chhung a cheng Zofa hnam hrang hrang Hmar, Lakher, Lusei, Paite, Pawi, Bawm, Ralte, Thahdo, Vaiphei, Kawm, Ranglong (Kan tam mai sawisen a nilo) heng hnam te hian lungrual taka kan awm theihnan hming in tawm pakhat kan neih angai, chu chu hnam hming nilo MIZO tih hi lungrual takin pawm tlang ang u.”
A dik
“Thado” tih hi an ni chuan Thadou tiin an sipel deuh kher hmel.
Zohnahthlakte hian kan awmna ram leh mual a danglamin IDENTITY kan nei hrang fur. IDENTITY nei hrang fur e tilo chuan Mizo inti te, Chin inti te etc. hual chhung a hnam awm vek kan ni thung. Identity a danglam vangin hnamdang/chi dang kan nih phah lo a nia. Hairehai
Report this comment
January 31st, 2014 at 1:12 pm
Mizo te hi homo sapiens thlah kan nni, ti ila kan thurual tlang phian lawng maw?
Report this comment
January 31st, 2014 at 10:05 pm
Tuna mizo tih a lungawi thei chiah lo tam tak, Mizo ka nilo Lai, Mara etc ka ni ti ho lungawi loh chhan nia ka hriat tak chu.. (Ka ngaihtuah a ka chhui hle hnu hian) Mizoram hmar lama awm kan unau Lusei ho hian Lusei ka ni an inti duhlova, ‘Kei chu Mizo ka ni mai, Lusei emaw paite emaw hmar emaw(etc)ka nilo’ an ti mai thin hi a ni ber in ka hre ta.
Lusei te Lai te Mara te paihte te…. a atam mai, hi MIZO tih hian inkhung vek ila, Mizoram hmar lama cheng te pawh in Mizo hnuai ah Lusei ka ni tih hi an in sawi dan nise. Mara leh Lai ho tuna mizo ka ni inti thei lo ho pawh hian, Mizo ka ni an ti thei tawh in ka ring/beisei.
Ka ngaihdan mai a ni e….
Good Post
Report this comment
February 1st, 2014 at 12:24 am
“Mizo kan ni kan hmel a chhia, kan tum a hniam bawk si” phuahtu in hriat chuan Cheng 100 ka tiam
Report this comment
February 1st, 2014 at 2:41 am
Hnam inpumkhatna hi ka buaipui ve viau thin. A theory hi chuan kan pawm viau tawhin ka hria. A tak ramah erawh hma kan sawn chak viau lo. T. Lunkima ziak hnam inpumkhatna chungchang booklet ka kawl a, Mizo tih hi nomenclature atana hmang turin Mizo tih hminga in identify chiah lo thinte pawh an rilru a inhawng tan viau niin ka hria.
Report this comment
February 1st, 2014 at 12:46 pm
Bucko #4
Mizo tawng hlawm lian chi 8 emaw laiah hian hmangtu ngahber chu Lusei tawng, “Mizo tawng” kan tih tak ber hi a ni tih chu kan chiang tlang ang. A awmzia chu, “Lusei tawng hmangten majority kan la,” tihna a ni. Majority nihna changtu chuan u chan chang thiamin minority-te chu a huikhawmtu kan nih a ngai…hrelo hriat tir a, darh mek hual-khawmtu kan nih a pawimawh. Tun a kan khawsak danah hi chuan majority hian mahni chipui tho nisi, Lusei tawng hmanglote hi kan en hniam fo a, Mizo chiah lo ang a kan en fonate, minority lak a u zawk chan chang ngam a huikhawmtu nih kan tum loh vang a niin ka hria.
Report this comment
February 1st, 2014 at 4:57 pm
Tawng hi inpumkhatna atana pawimawh ber nilo mahse pawimawh hmasa chu a ni. Mahse inhriatthiam tawnna thui tak erawh chu kan neih a ngai. Tun a tawng tualleng a kan hman Duhlian tawng hi Mizo tawng a ni biklo a, Zo hnam tawng zawng zawng hi Mizo tawng ah pawm vek ila kan inthlirdan a danglam deuh chuan ka ring.
Report this comment
February 2nd, 2014 at 9:48 am
A bik tak in ka’n ti teh ang;
kan ZO hnah thlak pui ten MIZO nih an duh loh na chhan leh MIZO nih har sa an tih na chhan pa khat a ka hriat chu, MIZO in ti bik riau LUSEI tawng hmang, Tiaului leh Langkaih in kar a cheng, Darlawn leh Hrangchal kawn in kar a cheng , mi za ah sawm riat te hian, kan MIZO pui te MIZO na kan pawm sak duh lo. Chin Hills a tang a lo rawn kal te leh, Hmar/Mara/Lai heng mi te hian, Lusei(mizo)tawng an pai deuh thin a vang in, MIZO ni ve ta lo riau va hriat na, en hran na kan nei thin a. MIZO diktak a ni lo reng reng kan ti thin. Thil sual an tih chang a lo awm a man an nih phei chuan, MIZO diktak a ni lo reng a ni,
kan ti thin a ni lawm ni?
MIZO diktak hi an/kan awm teh reng e maw ni.
Report this comment
February 3rd, 2014 at 8:09 pm
Ka chhiarchhuak dap. A thain a ropui ka ti ngei mai. Dahthat hmak chi a ni. MSU president thuziak nge nge.
Report this comment
February 4th, 2014 at 7:16 pm
MZP President in han ziak ve sela aw!!!
Mizo chu hnahthlak nih thu sawi kher ngai loa chiang ho hi kan nia, Mizotawng chu tuna kan chhiar mek hawrawp hi a ni e.
Hetianga chipeng dang ho vengthawng lutuk thu chhiar hi ka ning. Ka mawl vang pawh a ni mahna.
Report this comment
February 5th, 2014 at 10:42 am
Zohnahthlak zawng zawngte inpumkhat nana thawkte thawh zatve tal i thawh hunah i hrethiam ve mai ang, k’u Chhan.
Report this comment
February 5th, 2014 at 11:32 am
Report this comment