“Chanchin Tha” tih thumal(Term) hi kan hman dan a zau viau va, amaherawhchu Paula chuan 1Kor.15:1-4 ah khan awmze nei bik leh specifically-in a lo sawi a,
“Tin, unaute u, Chanchin Tha ka hrilh che u kha ka hriattir leh ang che u a, chu Chanchin Tha chu in lawm a, chu miah vek chuan in din a, ka thu hrilh che u kha in ring mai mai a nih loh va, in paw tlat a nih chuan chu miah bawk chuan chhandam mekin in awm a ni. A hmasa berin ka hmuh ve bawk chu ka hrilh chhawn che u kha, khatia Krista chu Pathian Lehkha Thu ang zela kan sualte avanga a thih a, an phum a, Pathian Lehkha Thu ang zela ni thum nia kaihthawha a awm a…”
Mak deuh mai chu a sawi lan tel miah loh lai chu a ni. A thilmak tih emaw a zirtirna emaw a entirna hnutchhiah emaw engmah a tarlang miah lo va, amaherawhchu chung zawng zawng chu a thihnaah chuan an inchhung lut vek mai a ni, phuma a awm a, a thawhlehnaah nen chuan! Paula khan “Pathian Lehkha Thu ang zela” a tih khan Thuthlung Hlui Lehkha Thute a sawi ber a, hei hian zawhna a rawn siam nghal a, Thuthlung Hlui khawi lai ziakah nge Krista chuan a thawhleh hmain Thlanah ni thum a hun a hmang ang tih min hrilh tih hi a ni.
A tlem berah pali vel awm turah ngai ta ila:
1). Jona Chhinchhiahna. Lal Isua ngei khan hei hi Matt.12:40-ah chuan chhinchhiahna a nih thu a sawi a(Jona 1:27).
2) Isaaka hlan thu(The Akedah). Uluk taka Gen.22 hi kan study chuan Abrahama chuan Prophecy angin a che chhuak a ni tih a inhria a, chuvangin a hmun hmingah pawh, “…Lalpa tlangah ngaihtuah a ni ang chu” a ti reng a ni(Gen.22:14). Abrahama hnena thupek a lo thlen atang kha chuan Isaaka kha chu “Thi” a ni sa tawh a. Ni thum hnuah chuan Abrahama hnenah pek kir leh a ni.
Mitthi pawh Pathian chuan a kai tho thei ang tih a ring a, thi hnu nung leh ang maiin a hmu kir leh ta reng a ni. Heb.11:19
Chu mi hmunah chuan Pa dangin a Fapa chu kum sanghnih liam hnuah a la hlan ve leh dawn a ni. Chumi kiang velah bawk chuan ni thum hnuah kaihthawin a awm leh dawn a ni.
3) Rahabi thupuan. Hei hi a kip a kawi lehzual maithei, Josua 2:1-14 chhunga Rahabiin enthlatute an hawn leh dawn hnaiha a lo humhim chungchang thu kha a ni a. Kal tura an han insiam chuan…
“Chutichuan tukverhah hruizenin a thlakthla ta a, a in chu khawpui kulh tlanga awm a ni si a, kulh chungah chuan a awm a ni.” Jos.2:15
Hruizen tia Hebrai tawnga lehlin hi chebel a ni a, chu chu Cord emaw Rope tia ngaih theih ve ve a ni a, chutih rualin Pain(Natna/na), Sorrow(Lungngaihna/lungngai) emaw Travail(Nau vei na) ti pawhin a ngaih theih bawk. An chunga a thatna avang chuan a rulh let nan an chhungkua chu zuahsak an intiam ta a ni.
“Ngai teh, he rama kan lo luh hian he la sen hi i mi thlakna tukverhah hian lo tawnbet ang che, tin, in chhungah i hnenah i pa te, i nu te, i nuta te leh i pa chhungte zawng zawng chu hruai lut vek ang che.” Jos.2:18
Behold, when we come into the land, thou shalt bind this line of scarlet thread in the window which thou didst let us down by: and thou shalt bring thy father, and thy mother, and thy brethren, and all thy father’s household, home unto thee.(A fiah theih nan English Version kan dah tel lawk a ni e).
“La sen” tih kha Cord emaw Thread tih a ni a, hetah hi chuan tawngkam dang an hmang thung a, Ti tiqvah a ni a, Hrui(Cord) tia hman theih a ni a, tin, Hope(Beiseina), Expectation(Thil nghahfak) emaw Thil beiseite tih nan pawha hman leh theih a ni bawk(Israelte National Anthem chu Ha Tiqvah an ti a, chu chu The Hope tihna a ni). Tichuan heng thil vel karah hian Rahabi chuan tihdan tur eng emaw a hrilh ta a..
Tin, an hnenah chuan, “Tlang lam panin kal tawh u khai, chutilo chuan a umtu che u khan an hmu hlauh dah ang che u, tin, chutah chuan ni thum va biru ang che u, a rawn umtu che u an kir leh hma loh chuan: chu mi zawhah erawh chuan in kal leh dawn nia,” a ti a. Jos.2:16
Engvangin nge ni thum kher kher? Engati nge ni hnih emaw ni li emaw ni nga emaw a nih loh le? He thil hi uluk taka ngaihtuah leh ruahman lawkna avang a ni ang em nge ni Thlarau Thianghlim chu he lai chungchangah hian a lo inrawlh ru daih tawh zawk? Lungngaihna/hrehawmna(Ti Tiqvah) leh Beiseina/Nghahfak(Ha Tiqvah) inkarah ni thum a awm a, Golgotha leh Thlan Ruak inkarah ni thum a awm bawk a, thenkhat chuan thilthleng inang palh(Co-incidence) a niang tiin an namnul mahna, mahse Coincidence tih hi Bible tawngkam(Kosher Word) a ni lo va, he thil hian Messia a kawk lo tiin rin harsatna nei an lo awm mahna, amaherawhchu a palina hi chuan min barakhaih ngei ang le, Isua ngeiin a sawi a,
4). Sam 22:6. Kraws chungah khan, “Kei erawh chu mihring reng reng ka ni lo va, changpat mai ka ni a…”
Heta Changpat(Worm) tih Term hi Tolah an ti a, chu chu Scarlet(Senduk) a tihna a ni a, Crimson tiin vawi 38-ah kan hmu.
Scarlet Dye an tih chu Worm chikhat Cermes Vermilio an tih atanga siam a ni a. Cermes Vermilio-te chuan thingkung zara a tang pil nem deuhte chu an verh a, a tuiril an dawt ta thin a, chung hmang chuan an taksa nem takte tuamna tur kawr ban deuh hi an siam chhuak thin a ni. Chung an kawrahte chuan Red Dye(La dumna rawng sen) an la chhuak thin. An inthlah dawn chuan a tlangpuiin Holm Oak an tih kungah hian a nu chu a lawn chho va, chutah chuan tui neiin an lungte(Worm) an lo piang thin a, an kawrte kha chawah an ring a, an lo nung zel ta thin a ni. Khang thing zarahte khan Crimson rawng te kha an kai ta a, ni thum hnuah Scarlet(Sen duk) chin zawng an lo reh hnuah chuan thil var thar sar mai hi a lo awm ta thin a ni.
Isaia khan eng nge a lo sawi? “Hawh teh u, i ngaihtuah tlang teh ang u! In sualte chu sen lar angin awm tawh mah sela, vur angin a var ang, senduk angin sen tawh mah sela, beram hmul angin a awm ang.” Is.1:18
Heng thil te hian kan Lalpa thawhlehna chuan hnehna ropui tak min chantir a, vur anga vara min silna leh siamtharna ropui tak an lo entir lawk vek mai nia, Macrocode kan ti mai dawn em ni angin Pathian Thu-ahte hian Pathian hnathawh inbilh tel vekin a lo awm a, Super Natural Work an ni tih kan hre thei a ni.
Similar Posts:
- RINNA CHHAWNG THUM TE
- Tui hmanga inenkawl dan
- Mi chhas chhuhsak dan!
- KTP Branch Pakhat chuan
- Engvang a Pathian ring ve ringawt nge i nih? (Palm Sunday Special)
June 10th, 2014 at 6:59 pm
A tha hle mai.
Report this comment
June 29th, 2014 at 9:30 pm
Kan bible ah hian, chhinchhiah na,
nithum tih leh, ni sawmli/zan sawmli hi a tam riau mai.
Post tha tak beng ti var sawngsawng tu a ni e.
Report this comment