PATHIAN PAWISAWI THENKHATTE THIHDAN
Hmanni chu tunlai a phone hmanga an inkawm khawmna lar tak pakhat Whatsapp ah hian ka thiannu pakhatin khawvel mi lar Lal Isua nuihsawh tute leh an thih dan a saptawngin an in thawn chhawn ang chi hian min rawn thawn ve a. Kei lah hi misual, a rin tlak hlawm em tih Google lam atangin kan check nghal vat a, a hmasaber ah Bernard Shaw thih dan an rawn dah chu a lo diklo tih kan hmu nghal pang mai a. Tichuan ka en thla zel a an rawn tarlan loh pawh sawi lan atana tha tih deuh deuh ka ngah ta mai a, tichuan he article hi ka rilru a a rawn thawh ve dan mil in ka rawn ziak chhuak ve ta phawng mai a ni.
Khawvel hi a mak tawh khawp mai a, keini hriat ve phak chinah pawh a lo danglam ve nasa ta hle mai a. Kan naupan lai a kan hriat ngai loh mumang ramah pawh kan suangtuah phak loh thil tamtak kan ramah ngei mai pawh a lo awm in a lo thleng ve ta reng mai. Kan naupan lai kha chuan sarthi, thihdan danglam deuh a thi an awm te khan sar thli kha a tleh thin a, a ram pum khan kan rap in kan sawi luih luih mai thin kha a ni a. Tunlai hunah chuan inthat, ruang chhar tuitla tih vel chu thil mak leh danglam rapthlak vakah pawh kan ngai tawh lo chu a ni ber mai a. Chanchinthar satliah a ni ve ringawt tawh mai a, sarthli pawhin tleh ngaihna a hre meuh tawh lo a ni ang.
Kan nu leh pa ten “An ni chu Pathian awm ring lochhung an nia,” tih an sawi te kha chuan keini chuan Pathian awm ringlo han awm tawp mai te kha chu thil ni theiah pawh kan ngai lova thil mak lutuk ah khan kan ngai thin kha a ni a. Mahse tunah chuan kan ramah ngei pawh Social Media lamah thlengin thalai zingah pawh ‘Pathian awm ka ring lo,’ mipui vantlang hma a ti sak sak ngam kan awm ta teuh mai a, thil mak tehchiamah pawh kan ngai tawh lova, kan khawvel in her danglam zel ina a rawn her chhuah puiah kan ngai satliah ve tawp tawh mai a ni a. Mahse heng ho hian an chhungril nun tak takah Pathian awm hi an ringlo tak tak chiah em tih erawh kan zuk hriatpui chiah lem hlei lova. Pathian hi a awm lo ti pang pang mah ila a awm chiang a, helai India ram hmarchhak kila State intodelh lo ber mai a veng kilkhawr a tuikhur bula vaihlenhlo nena inthenawm satliah chhungte chawmhlawm lehnghal ina ‘Pathian a awm ka ring lo…de de de…’ kan lo tih ve satliah mai avang hian awm ta lo tur a ni reng reng lo a. Kumkhua chatuan in a awm dawn chiang a, tin, a duh dan dan in ro a rel zel bawk dawn tlat.
Pathian awm inti ring lo vel a deusawh taka sawichhe ho hi an thihhnuah engtinge an thlarau chungah kan Pathian hian ro a la rel sak dawn tih lam chu thudangah dah ta ila. Heng sawichhetu ho te hi an damlai la la pawh hian kan Pathian engkim tithei hian an chungah ‘action’ a la ve thin tlat mai le. Chutianga Pathian awm ngaisang lova deusawh a sawichhe thin mi thenkhatte an chuanga Pathianin action a lak dan hi tlem in lo sawi lang lawk teh ang.
Titanic lawnglian an siam tuma an Naval Architect Thomas Andrews-a pawh kha Titanic an sak zawh hlim khan an confi ve mai mai khawp a. Reporter pakhat hian an lawnglian chu a him meuh ang maw tih an zawh chuan Thomas Andrews-a chuan “Pathian meuh pawh in a ti pil thei lovang,” ti in a lo chhang pek a. Pathian chuan a lo ti pil thei nameuh mai a ni ang chu an zinchhuah hmasak ber tum in ni 5 awrh tuipuiah an la zin hman chauh tih ah Atlantic tuipuiah vur tlang a su a, a pil der mai a nih kha. Hemi tum hian mi 1500 zet in nunna an chan a, chung zingah chuan chapo taka “Pathian meuh pawhin a ti pil thei lo ang,” titu Thomas Andrews-a ngei pawh chu a tel ve nghe nghe a nih kha.
Marilyn Monroe, Actress hmingthang hmel tha lutuk mai sexy bawk si ‘America’s Sex Symbol’ an lo tih hial thin pawh kha a show persentation a neih naah thusawitu hmingthang Billy Graham-a hian ava tlawh a. Pathianin amah chu Chanchintha va hrilh turin a tir a ni tih ava hrilh a, mahse Marilyn Monroe khan a lo ngaisang lo nasa mai, “ I Pathian ve kha engatan mah ka ti love….” ti in Billy Graham-a chu a lo chhang a nih kha. Ani pawh kha a tifuh tehchiam lo, hemi hnu kar khat lekah hian a inah thi in an chhar der mai a nih kha. Tun thlengin a thihdan tak hi chiangkuang tak pawhin ala sawi chian theih loh lehnghal. Drugs Overdose an han ti tak na a Kennedy te unau thah a ni mi tam zawk chuan an la ring ta reng tho a ni.
Bon Scott AC/DC Singer in a hla ‘Highway To Hell’ tih kha kan hre vek anga: Hey mumma Look at me I’m on the way to the promised land I’m on the highway to hell Highway to hell I’m on the highway to hell Highway to hell Don’t stop me …ti khan 1979 kuma an hla released ah khan pawr teng deuh deuh in a zai a ni lawmni kha? He hla hi an band in thui tak tak tour nei a an zin kualna thin an nin zia leh hrehawm an tih zia an phuahna ni in anmahni chuan an sawi na a mahse heihi mi tamtakin an zawh lai mek hremhmun lamtluang an zawh sawina a ni tih an sawi thin laka an in sawimawina mai a ni e an ti thung a, a enge dik zawk tih erawh kan hre lo. Mahse an hla thu hian Pathian pawi a sawi a ni maithei, an released hnu a kum leh lawk 19th February 1980 a rawn inher chhuah chuan Bon Scott chu thi a chhar a ni a, a rui lutuk chu ama luak in a lo hnawh hlum der mai a nih kha.
Kum 2005 khan Brazil rama Campinas ah chuan thianho rualkhat hian an thiannu pakhat chu lenchhuah pui turin rui deuh mai chungin car in av va sawm chhuak a. An chhuak tur chu chu nula nu chuan an rui hlawm si a, a ngaihtuah hlawm hle mai a, an tlanchhuak tur chu a fanu kut chu vuan chungin, “Ka fanu Pathian in awmpui che sela venghim che rawh se,” ti in a thlah a. A fanu chuan uangthuang tak chung hian, “Ka nu, Pathian chu a rawn chuang tel ve duh a nih chuan duhleh a bungraw dahna laiah te hian rawn chuang ve mai mai sela, chu lah chu thildang a awm a, a khat tawh bawk si…” te a lo ti vel a, an tlan lliam zui ta nghal a. Ani pawh hi a tawng chhuak fuh tehchiam ta bik lo. Darkar khat hnuaa nu in an chanchin an hriat leh chu an car chu a accident a a chhunga chuang zawng zawng an thi vek tih a ni ta mai reng a. An car lah chu a chhe hneh khawp a, eng ang chi nge a nih pawh hriat theih mang loh khawpin a chhe hneh a mahse mak tak mai in a bungraw phurhna lai chu a chhe tel ve lo tlat mai. Police ho pawh in chulai a bungraw dahna lai tak a chhe tel ve lo chu mak an ti hle mai a, a chhung an han en chuan artui hlir mai a bawm khat chuan a lo awm a, chutiang khawp a a car chhe nasa si chu pakhatmah zu han keh hauh lova. An bungraw bawmah chuan Pathian chu a lo chuang tel ve reng a ni lo maw?
Christine Hewitt (Jamaican Journalist and entertainer) pawh khan “Bible hi khawvela lehkhabu ziak tawh ah chuan a laktlakloh ber a ni…” a ti ve ngawt pek a, a hnu lawk June 200g khan a ruang chu a car chhungah amah tak pawh hriat theih mangloh khawp akang chhe nasa in hmuh a ni der mai a nih kha.
Cazuza (Bi-sexual Brazilian composer, singer leh poet ni bawk) pawh khan Canecio ( Rio de Janeiro ) show a neihna ah a cigarette zuk lai cu an hip vang vang a, a khu van lama pak chhuah pah chuan “Lalpa, ka i chanpual ve a nih kha…” a ti ngawt pek a, kum 32 mi lek a nih hi chuap cancer in hrehawm tak turin a thi daih asin le.
Tancredo Neves (Elected President of Brazil ) pawh kha a tawng fuh vak bik lo. “Inthlannaah kan party in vote 500,000 kan hmuh chuan Pathian meuh pawh in President atangin min paihthla thei lo ang,” an ti veleh mauh mai pek a. Pathian chuan a lo paihthla thei chiang khawp mai vote 500,000 chu a hmu tehmeuh mai President atana an nemngheh hma ni chiah in a damlova an nemngheh hman hma in ani pawh hian a chatuan ram tur a pan ve ta a ni.
Heng ang chi hi sawi tur tamtak awm mahse a tawp nan John Lennon (Singer) hi i han sawi ve leh hram teh ang. The Beatles vanglai chho tak tak kha chuan zaithiamah chuan anni aia lar kha khawvelah chuan an awm chuanglo ti ila ka ti sual tampui awm love. Anmahni pawh khan lar an inti ve tawk a ni ang American Magazine hovin an interview naah an zaitupa ber John Lennon pek khan, “Kristianna hi chu a la tawp anga he khawvela atang hian a la boral ang chu chu ka hre chiang, Lal Isua pawh a tha mahse a ho te hi mi mawl te te an ni tlat. Tunah hi chuan ani aiin kan lar tawh zawk,” an ti ve leh ngawt pek a nih kha. Lal Isua aiin kan lar zawk titu ber kha a hnu lawkah kah hlum a ni ta mai a nih kha.
Aw le, heng ho chanchin hi chu heti chinah hian duhtak phawt teh ang. Heng Pathian awm ring lo leh hmusit a deuhsawh zawnga tawng khum ho chanchin hi insawithaihna thil mai nilovin a tak ngei a thil thleng a ni tlat mai a. Heng thil thleng kan han sawi te hi thenkhat chuan ngaihruatna thil, ngaihbel chawp mai mai ‘Coincidence’ alawm te an han ti takna a kan Pathian engkim hria, engkim tithei leh khawi hmunah pawh awm, engkim siamtu hi chuti mai mai a deusawh a hmuhsit chi a ni lo tih leh misual sim te ngaidam thintu Pathian a nih rual hian Amah hawisan tute chungah chuan chawpleh chilh a action la thin a ni tih hi heng kan han sawi tak atang te hian a lang chiang viau awm e. Chuvangin Pathian awm kan ring lo anih pawhin kan thu kan duhthlanna a ni a tu intih luih theih mah a ni hauh lo a mahse deusawh tak leh hmusit taka tawng khum a sawichhiat hi chu chin loh atan a tha khawp mai. Kan hma lam hun minute kha pawh tidanglam theilo keini mihring te hian kan hmalamah enge lo thleng dawn a kan chuangah Pathianin engtinge ro a rel dawn kan hre si lo…..
BigDaddy Hmahmatea Kulikawn
Similar Posts:
- Pathian hian mi zawng zawng nun dan tur hi a hre lawk vek ang em?
- Eichhiat = Cancer?
- Ka ngaihtuah ve thin
- Lumettu Nen(Sunday pual)
- Enge in Ngaih ve dan ?
July 27th, 2014 at 7:51 pm
An ti fuhlo hlawm cha cha hle mai. A bikin hmeichhe car chuang leh politician hian an tu fuh lo zual a nih hi.
Report this comment