Thil Tha Entawn ila a Thalo Chu Paih Ngam ila

October 20th, 2014 9:31 am by Henry Vangchhia

Indiana state, USA a Mizo hruaitu pakhat, pu Rodinga chuan kum hmasa lama Mizo Day-ah khan “Mizo tawng hmangte hi majority kan ni a, a hmang velo minority-te hi huikhawmtu kan nih a tul,” tia a sawi kha a dikin a tha ka ti em mai a tannan kan hmang ang e. A ni chiah lah taka, a majority chuan u zawk chan changin minority chu nau ang a an vuivana pawh ngaihthlak sakin huikhawmtu a nih a tul takzet.

Mizoram, Bangladesh, leh Burma a Zohnahthlak hrang hrangte hi han inchhiarfin pawh ni ila, hnamdang lakah chuan kan la tlem hle tih chu tu’n kan haiin ka ringlo. Ram hrang a kan awm nawk hlawm vangin kan identity hman pawh a dang nawk mai, mihrang kan nih loh erawh kan hai chuang lo. Chutih karah chuan hnambil hmasialna duhna-te kan nei niuh neuh a, a that viau theih laiin a zau zawk a han thlirin kan darh zualzelna siamtu a ni thei ang tih hlauhawm tak a ni. Zohnahthlakte hi ngaihsam tak, mahni hmasial tak, thuduh leh rilru inhawng neilo em em mai kan ni fo mai. Hetiang hi kan hnam damna aiin chhiatna lama min hruaittheitu a ni thei ngeiin a rinawm.

Mihring kan tam lovin hnam kan zahawm theilo tih Israel fate hian an hrechiang hle niin a lang. Keini zofate ngei pawh DNA inmil miahlo chung pawhin, sakhuana vangin an mahni hnambo anga chhalin min la senglut hram hram zawk a ni. Entawn tlak tak an niin ka hria. Hman kum lawk khan Gangte hnam chuan Mizoram lamah YMA an rawn zawm thar a, a ropui takzet a ni. Inkohnan a hman (identity) hrang kan vang emawin mihrang kan nih phahlo tih hriain, politic thil a hamthatna kan hmuh theih dawn vang pawh nise chutiang rilru chu paihthla phalin, keini Zohnahthlakte hian Israel ho, kan sakhaw vawnlai lo chhuahna ngei maite tih ang deuh hian, kan darh loh nan anni khu entawn i tum hram hram ang u khai.

Kan hnam kan lo pun chhoh zel theihnan mahni theuhah tih theih leh tih tur nei kan nih hi inhre ngam ila, hnam darh theihna tur chi reng reng chu hnawl ngam ang u. Ram khat a awm ho vek lam pawh a nilo, kan awmna theuhah lungrual taka kan awm theihna tura hmalak ngam a hun takzet thung. Tichuan, rampui hrang hrangah pawh awm mah ila hnam zahawm, zah tham a tam kan ni thei dawn nia.

14 Responses to “Thil Tha Entawn ila a Thalo Chu Paih Ngam ila”

1
TheHumanBot Says:
October 20th, 2014 at 9:40 am
Kohhran ah pawh a ni a sin, A tam zawk te hian dominate tum lovin Big Brother role play thiam a tha.

Report this comment
2
PKfanai Says:
October 20th, 2014 at 7:26 pm
A dik khawp mai.

Report this comment
3
Dr John Says:
October 21st, 2014 at 4:05 pm
Post tha tak a ni e

Report this comment
4
H.Vangchhia Says:
October 21st, 2014 at 5:39 pm
Ka lawm e. A pawimawh em a ni, hnam dam nan. hairehai

Report this comment
5
chhana Says:
October 21st, 2014 at 9:13 pm
A tha hle mai.

Report this comment
6
century child Says:
October 23rd, 2014 at 8:13 pm
Tha khawp mai

Report this comment
7
chhana hlawnchhing Says:
October 25th, 2014 at 6:18 am
Thangthar te hi chuan inpumkhatna kan tlangaupui tan niin ka hria, kan inpumkhat theihlohna muttan hi ngaihtuah chian chuan ho te a ni thin..Kan chibing bik hi Mizo ah hian ber ni se tih duhna thinlung kan nei thin hian harsatna tamtak a siam thin niin ka hria..

Report this comment
8
Bucko Says:
October 25th, 2014 at 3:00 pm
Tuna mizo ka ni inti ruh tak tak hian Mizo hnam zing a mi Lusei ka ni ti thei se, Lai Mara Paihte Hmar leh adt hian MIZO ah an lungawi tlang thei in ka ring. Chuti a nih loh a, Lusei awm lova Mizo chauh a nih chuan heng Lai Mara leh adt hian Mizo nih an hreh a ni. Hman lai ah mizo tih a ni lova, Lusei tih anni. Chu chu hre rengin Lai Mara leh adt hian mizo a chhun luh vek tumna hi an duh lo niin a lang ber mai e.

Report this comment
9
H.Vangchhia Says:
October 25th, 2014 at 10:41 pm
bucko #8, a ni chiahin ka hria. Chuvang a nia, “Mizo tawng” tih hmangtu, a majority nihna latute hian, eng identity pawh hmang mah ila hnamdang/midang anga inen hi kan bansan a tul nia ka hriat ni. Kan identity hman hian mintibuai em em mai a, kan tawngbil hman hi hmuh danglam nan a kan la hmang tlat maite hi a pawi takzet a ni. Midang, hnamdang tihdan hi a thalai lak a a thalo lai keimahni pawh paih ngai a awm thin.

Naga ho hi copyna tur ka hria: Naga ho hian an mahni hnam shawl bak an bat duh miahlo, an tawng bil an thiam vek ti ila an sawi sual kher lovang, Naga hi an identity mai a nih hriain tawng hrang an hman vang emawin midang-ah an inngaih phah ve miahlo. Kan rilru kan hawn a, hnam ropui theihna tur ngaihtuahna rilru nen kan ngaihtuah chuan kan ti thei ve ngei ang– tun generation a nih loh pawhin a dawtah tal chuan.

Report this comment
10
zualbonez Says:
October 26th, 2014 at 5:53 am
Hairehai

Report this comment
11
Sihtea Says:
October 26th, 2014 at 7:47 am
Post thatak a ni e.

Report this comment
12
H.Vangchhia Says:
October 26th, 2014 at 9:48 am
zualbon, i van ngaihawm ve

Sihte, dam thin maw? Hairehai

Report this comment
13
Bucko Says:
October 26th, 2014 at 2:03 pm
Pu HV, a dik a lawm. Naga ho hi kan entawn tur tha ber te anni tih hi. Naga anni vek a, mahse tunge naga bik riau an awm chuang lo, Ao, Angami,Sema, Lotha, An hnam chhe ve pawl Chakhesang te nen lam hian tumah naga bik an awm lo a ni. Keini chu Mizo hnam zingah mizo bik riau leh mizo lo deuh bik kan awm tlat hi a pawi lai chu a ni. Mizo ah Lusei ka ni, mizo ah Lai ka ni, Mizo ah Mara ka ni kan tih theih theuh chuan Mizo ah kan in lungrual thei ang. Tuna Lusei ho hian Lusei ka ni an tih duh lohva Mizo ka ni an tih tlat chuan Lai leh Mara (A bik takin) tan Lusei kan ni silova, Lusei ho kha Mizo an nih bik bawk si chuan Mizo nih ve chu a har hle ang.

Report this comment
14
H.Vangchhia Says:
October 27th, 2014 at 1:07 am
Bucko #13 a dik chiah. Rilru inhawn a, ngaihtuahna zau zawk hman hi kan common sense tal hian min zirtir a hun tawh a ni.

Report this comment