Zan Thla Eng, Mizo Hla leh Kei

October 1st, 2007 3:05 pm by rka_49er

‘Thla-a lo tla rawh, matea’n a awrh nel nel ang che’ tia awm thlei chhoh hian Thla eng hi ka la lawm ta reng a, thla (photo) pawh hi ka lak sak fo. A changin lung a ti leng a, a changin min ti ngui a, a changin min ti hlim thin. Thla an bial phei hi chuan arsi tan hmun a awm lo a Thla ropui zia a lang chiang bik. Roliana Ralte chuan hla hialah lo chawiin, “Zan Lalnu” tihah chuan –

Chhak lenkawlah chhawrthla hai ang thovin,
Khuavel zan thim eng mawi rawn hawnin,
A her sang zel, aw, a eng mawi zel,
Hringfa leng tan thlir nin a har ngei.

Chhawrthlapui, aw, zan lalnu,
Malsawm tin phurtu ni la,
Hringfa leng tan ruahpui ang sur tir rawh.

tiin a phuah a. Zan Lalnu nihna he Thla hi a lo pe tawh a ni (Lalthakima album tharah a awm). Thla malzia hi kan zaithiamte hian an hmuchiang a niang. Zirsangzela’n a hla pakhat “Run Zau” tihah chuan ti hian a tarlang –

Thangvan si-ar zawngte lungruala leng ka thlirin
Rianghlei chung chhawrthlapui khian lung min len

tiin, arsite chu kawppui neia a hmuh laiin Thla erawh kawppui nei lovin a hmu a, a hmu khawhar hle a ni. Hei vang hian Thla nen hian in anna riau kan nei. Kawppui kan nei lovin mahni-in kan tei ruk ruk thin. Hla phuahtu pakhat (OPA?) pawn –

Chhawrthlapui pawh van zawlah
Mahriakte’n a eng riai e

tiin a lo au a, a mal thu a ti lang chiang khawpin ka hria. Roliana Ralte hian a hla dangah thung chuan –

Lungrun chhawrthlapui a lo eng leh ta,
Nau ang ka tah nan mai maw, a lo en

a ti leh lawi si. Mak erawh ka ti lem lo. He Thla eng hian lunglen khawhar hi a rawn keng tel ve tlatah ka ngai hmak.

Kan tleirawl chhoh khan tingtang ak chhuak a zai hi kan ching a. Kan lo lian deuh a nula in kan han chuangkai ngam ve a, an leikapui leh bathlar velah te kan zai chho ta zel a. Lunglen chhan em em la nei lo pawh kha Thla en zan hi chuan kan zai tui zual a, a khamawm loh hle thin.

Hman deuh khan ka thiante’n Bachelors’ Nite an siam a, leikapuiah em zai tawh lo mah ila, sap hovin ‘lawn’ an tihah hian mei kan chhem a kan zai a, Thla det tirh lam a nia a nuam khawp mai. Hetiang zan hi a tawn vang a ni ngei ang Zirsangzela chuan a hla “Hlim Zan” tihah chuan mawi takin a rawn tarlang –

Ningzu dawn chhuihthangval lenthiama
Perhkhuang tingtang leh chawmkhuang remin
A lam diai e selrun laichhuatah
Muvanlai tlang hrutin phar der der

A chang tawpah phei chuan a theihnghilh dawn lo tih a lang chiang hle –

Lampui changah tawn ni her le’ng a
Chutin kan chen zanin ngaih thute
Kan la hrilh leh dawn nia khaureian

A lunglen chi tan emaw lunglenna tur nei tan chuan khua a lo tlai lam deuh hi chuan lunglen hi a rawn in tan a, Thla an rawn chhuah phei hi chuan a zual thin. B. Malsawmtluangi (Spi) hla sak “Ka tuar thiam lo” tihah hian a lang chiang khawpin ka hria, hetiangin –

Zankhua a lo tlaiin suihlung a leng
Chhawrthlapui van zawl a kaiin a zual thin

Rebecca-i hla sak “Nghilh bik lawng che” tihah pawh hetiang hian kan hmu bawk –

Zan tlaiin kan run kai zawl a chhuak chhawrthla
A eng no riai suihlung min len si thinlaiah
Nang tawn loh vang hianin maw

Mahni chauhva awm hian lung a leng duh em em a, thianzahova awm hian a leng duh zual. Thiante inkawp han hmuh a hlim taka an nui hmuhte hian an thik awm. C. Zonunmawia’n a hla “Ka tan a tawk e” tih tan nan khan ti hian a rawn hmang a –

Zaleng dang zawngte chu hlimten an leng siau e
Kei erawh nang ngaiin tlai ni ka leng thin a

Rebecca-i pawn a hla sak “Ka phu lo che” tihah chuan –

Ka thlir ka Di lenna tlang, tah sawn an leng nui hiauvin
Min dawn ve maw a riangte hi, thinlaiah min vei ve maw

a lo ti ve bawk a. Thla en zan emaw bial zan emaw a duhberte nen a eng eng emaw lo ti dun tawh, biahthu di thleng pawha lo inhlan tawhte tan ngawt phei chuan a lunglen thlak ngei ang. Jenny hla sak “Her chhuak ve se” (Nono leh Remmuana) tihah chuan hetiang hian a rawn tarlang a –

Hmanah chhawrthla vankaiin kumtluangin aw kan tiam kha
Biahthu Di tinkim hril a lenlaipar kan tlan kha

Thla en zana thil thleng theihnghilh har ber a ni awm e. Spi hla sak “Ka dem lo che” tihah chuan heti hian a rawn sa a –

Thangvan zaua siar zawng leh chhawrthla a en chhung chuan
Nang nghilh zai reng hi banzai ka rel lawng e
Khuandim min chhawn thlengin ka nghilh mawlh lawng che
Tawrhhar mi u ka van ngai thin che em

A chang tawpna-ah phei chuan –

Van hnuai khuavelah hian nang ang lungdumtu
Tawng leh hian ka in ring thei mawlh si lo

a ti ta hial a. Thla a en chhunga a theihnghilh dawn si loh avangin midang tawn leh a inrin loh phah hial a ni.

Thla en zan (a bik takin arkaiden zan) hian kei hian Mizo Hlate ka hre chhuak a, chung hlate chuan ka nunhlui min hriatchhuah tir a, ka ngai a ni. Kumte a liam ang kan vanglai nun hi kan la ngai dawn chauh. I ni ve em?

Daduhi hlain i titawp mai teh ang –

Zankhua a lo tlai leh ang a
Engtin tuar ang i maw lunglen hi
Bawihte i zun ngai reng hian e
Tlai khua ka var leh dawn a sin

12 Responses to “Zan Thla Eng, Mizo Hla leh Kei”

1
Muui-sleh_thruat Says:
October 1st, 2007 at 3:43 pm
‘Thla lah chu eng em em a, lung lah chu leng der mai si lova’

Thianpa R.Ka chuan,’Lunglen te chu riltam vang mai mai alawm, chaw ei puar al mai ila lung a leng thei lo’ a ti thin. Fiamthu mai mah nise, hetiang anga mi vannei nge kan tih dawn mi vanduai hi awm ve theih ania.

Tin chu lovah, kan tunlai Aizawl angah te hi chuan, eng hi a tam lutuk tawh a, thla a bial leh bial loh, a en leh en loh pawh kan hre meuh tawh lo. Buaithlak khawp mai. Thangthar te nunah phei chuan ‘Chhawrthlapui’ han tih hian awmzia a nei meuh tawh love a.

Report this comment
2
myself Says:
October 1st, 2007 at 3:51 pm
The moon, the stars, and me -Dolly Parton (english)

Min hriatpui ve asin -zosangliani (mizo)
………………………
You lied to the moon
The stars and me (english)

A ngaihna ka va
Han hre lo em (mizo)

Report this comment
3
H.Vangchhia Says:
October 1st, 2007 at 4:03 pm
myself: you lied to the moon the stars and me tih Mizo a an leh chu a va mak ve hahahaha.

Mi lungleng thei em em mi hi ka ni ve hran pa ani tih ka chiang khawp in ka hria. Ka hmangaih te leh min hmangaih tu te bul a ka awm pawh hian…khawtlang lunglen an tih ang chi hi zuk nei fo tho i a. Khaw chhung a ka awm in lui kal te hi ka thlahlel em em thin, lui ah thla en lai ngei in kan kal a….zan ah mahni mei chhem kiang ah sangha fahrah te te man ve chhun kan ur rep a…thla eng kulh mai bawk si, mahni te hian kan zai vawng vawng a …thiam lo viau mah ila…enge mi mawlh pawh hriat loh hian ka kal chak na ber a awm e tilo chuan…ka lung hi a leng veng veng tho mai thin. Hla thu thiam leh tawngkam tlak thiam tak Zorun ang te chu ni ilang chuan, hla lawilo lem lo chu ka thai kawi nial nual ve tawh ngei tur hi a nia…leng hle mahse…a thu lam ah phaktawk a hniam em lawi si nen…phuah ve neilo hian ka lung ka ti leng veng veng reng mai a ni. A nawm chang a awm a, tawrh hreawm chang pawh a tam….:)

Report this comment
4
myself Says:
October 1st, 2007 at 4:15 pm
@H.vangchhia … ‘kar a hla’ tih zosangliani album ah khan a awm kha!

The moon is my witness
The stars will agree
They all heard you promise
You’d always love me
I know that it’s true
But it’s hard to believe
You lied to the moon
The stars and me
………………….
chung chhawrthlapui leh
siar leng zawng te khian
i tiam thu zawng kha
min hriat pui ve asin
Aw tunah thenna biahthu min hlan ta si
Angaihna ka va han hre lo em

a lin tin te hi khai khin ve chhin la

Report this comment
5
keimah Says:
October 1st, 2007 at 5:36 pm
@rka_49er, i ziak ngaihnawm e. Ni e tiraw, Pu H Vangchhia, Lunglen hi zawng….mak ve khawp mai. Tham riaiin rilru mitthlaah tuemaw or engemaw hi kan han ngai em em a, a hming hmerhin han sawi dawn ila sawi tur awm der si lo… thla hleinga zan chiah phei hi chuan tih tur tul tak nei, tih ber tur hre si lo hian kan phi ruai a….sawi thui lo mai teh ang..lung a leng dawn tlat!

Report this comment
6
H.Vangchhia Says:
October 1st, 2007 at 6:09 pm
Tunah hian ka lung in ti leng chem chem mai:(

Report this comment
7
Zorun Says:
October 2nd, 2007 at 1:09 am
A ril ngaih ngaih hle mai. Ni e, lunglen hi a buaithlak a nih hi.

Kei ka tan: Lunglen hi natna chikhat ni ta se, kei hian dam tihni ka nei dawnlo..:)

Report this comment
8
burbura Says:
October 2nd, 2007 at 2:02 am
Lung a han leng chem chem mai hi chu nuam dangdai ve tak a ni, mihring nihman a awm bik riau hian ka hre ve tlat a nih chu.
Pu Roliana Ralte hla “Zan Lalnu” tih khi ka duh ve viau va, mahse a hla thu ka hre chhuak tawh lova please takin rka-49er or any one min rawn ziah chhuah sak thei ula lawmawm viau ang.

Report this comment
9
H.Vangchhia Says:
October 2nd, 2007 at 2:23 am
huiham lunglen lung mai hi zawng awwwwww…a mak vawng vawng teh zawng a nih hi:()

Report this comment
10
chabetkaia Says:
October 2nd, 2007 at 10:07 am
ani ngawt mai… Khuangchawi thla thla hlei nga zan meuh hi chuan lunglen in kan kiu leh vawng vawng mai zawng anih hi..

kan khaw hall kawta thla eng lawma kan thrian ho tringtrang nen thiam tawk te in lunglen hnem an hla kan hal hril ve thrin kha ania.. tunah chuan khawvel nunzia kalphung rengin.. hmun hrang leh tlang hrangah te kan lo tla hrang ta sia..

Chung thlapui a han en meuh hi chuan “Chhuithangvala lunglen nan reng maw..” kan ti ta vawng2 mai anih hi..

“Zan in chung chhawrthlapui eng riai khi
Awmkhawhar ti zualtu maw lo ni
Mualzapui dan a leng ka ngai nunhlui te nen..

Riahrun ka bel ngam lo hmatiang an
Chhawrhthlapui a lo eng leh ta e
Enve rawh raui thla tal tah khian leng hmun se..”

Thla eng zan a ka sak nin theih loh.. hla

Report this comment
11
rka_49er Says:
October 3rd, 2007 at 10:39 am
‘Zan Lalnu’ tih hi kan naupan laia ka hriat a nia, tun hnuah Lalthakima’n a album tharah a rawn sa e an tih ka hre leh chauh a, a thu ka hre kim bik lo tlat. Tk-a cd hi neih ka lo tum ang e.

‘Hlim zan’ tih khi Mimi’n a rawn sa leh a, a music track a mawiin ngaihthlak a nuam a, amaherawhchu lungleng a kai tho lo deuh em aw ka ti mai mai.

‘Thla hleinga zan’ han tih hi chuan Pu James Dokhuma te pawh min ti hre chhuak, tawngtai a thiam zia te kha aw. Rade-a’n a tih dan a zir a, a chhak lok ah lo awm rengin!

Hla lehlin hi a har a, ‘The moon, the stars n me’ phei hi chu an letling thiam ka ti phian a sin. a tlar/line tin chu a in ang chat chat lo mai thei a mahse, a tum chu a phawk chhuak ve thovin ka hria.

Silent night \ Zan thiang reh
Holy night \ Lai takin

tih te pawhih kan KHB-ah ngei pawh a chuang a lawm le

A nihna ang taka lehlin hi a har a, a thluk a lo awmsa tawh nen. A nihna chiah chiah ang a lehlin a dang ta daih te pawh a awm

‘It is well’ tih te pawh ‘A pawi lo’ tia letling an awm laiin ‘A tha e’ tia letling pawl an awm a. A nihna takah chuan ‘a tha e’ tih hi a dik ang a, a sap leh mizo tawngin tluk kawngah chuan mahse hla thu a han ni chiah chuan a sak te a lo rem lo leh zel a, ‘A pawi lo’ tih hian a nalh leh tlat si.

A tlar te te zawng a sawi dawn chuan ‘Like a rose trampled on the ground’ tih pawh ‘anchhedawng krossah i lo tuar’ tiin an letling ve tho a ni lawm.

Report this comment
12
punova Says:
February 19th, 2008 at 2:29 am
mihring lungleng ve thei tak i nih ka ring (Valzotea i iang e..), chuan kei hian ka iang che..

Report this comment