mi(sual).com

Mizorama thlakip chhuak chanchinbu-ah chuan senior citizen-te tihchhuah, MUP Tlangau hi a chhiar nahawm berte zinga mi niin ka hria. Thil lo tawng tam tawh leh khawvel hrechiang tawh tak takte thuziak bengvarthlak deuh deuh a awm thin a, December thla chhuaka ‘Zamanhmâwng a fam ta’ tih Kolasib-a MUP hruaitu pakhat, Pu C. Kaitluanga ziak phei hi chuan rilru a khawih khawp mai. Zamanhmâwng lo ropuizia leh a awm ta lo uiawmzia a ziak a, a sawi hi a dik leh dik loh lam chu ka hre lo nain kan ram thing leh maute kan tihchereu zel lohna atana awareness ropui tak nia ka hriat avangin ka han tuihnih ve a ni.

Pu C. Kaitluanga hian kum 1953 December thlaah Kolasib atangin Buhchangphai bul lawka Tuikuk khua, Banglabasa an tihah Krismas-a talh tur sial an lei tumin Zamanhmawng hi an en thu a sawi a, “Buhchang khaw bul lawka Zamanhmawng ropui zet mai chu kan va en ve a,” a ti a. Heti hian a sawi zawm a.
“A awmna hmun phaizawl nuam leh zau tak mai chu kan han lut a. Thingtuai lo thelh sung mai, a then chu tin tia vel te, a then uipum rual te, a then meilukham lian pawl rualte lo thelh sung mai karah chuan kan va lut a. Chunglam kan han hawi a, a chunglam chu a lo inzawm pût mai hi a lo ni a. Chu chu thing dang ni lovin Zamanhmâwng hlir chu a lo ni a. Chung lam a inzawm vek a, hnuai lam leiah a inphun vek bawk a. Sairual pawhin min umse thlamuang taka awm hle hle-na mai tur hi a ni. Sai han luh theihna zia zang a ni lo. Zamanhmawng hian a awhzau hle a, buh tin li hmun awhin an sawi thin,” a ti a, a ropuiin a awhzau awm ngei mai. A awhzau zawng hi mumal taka tehtu an awm lo a ni maithei a, buh tin li hmun vel a nih chuan thing pakhat awh atan chuan zau hem hem tak a ni.

Pu C. Kaitluanga sawi hi ngaithla chhunzawm zel ila. “A lerah te kan lawn a, a lawn lah chu a awl em em a, duh duhna lamah kan vak kual zung zung thei a, a chungah han dak ila field ang maiin a cham pût mai a, va tinrengte chu a rah tlanin an zi nuaih nuaih reng bawk a. He Zamanhmawng hi kumtluanin a rah zar leh rah lo ar tawk a awm reng a, chungleng sava-te’n an chenchilh reng thin a ni,” tiin a sawi. 

He Zamanhmawng ropui em em mai hi (hmu ve lo mah ila) phaizawl leilet atana tha tak hmuna awm a ni a, leilet atan kum 1955 khan thiah tan a nih thu leh, kum hnih kum thum hnua a lo ral tak thu lungchhiatthlak takin Pu C. Kaitluanga hian a sawi a, “A va pawiin a va uiawm tehlul em! Zafate’n roh nachang lo hria ni ila chuan khawvelah hetianga ropui hi a awm hmel lo hle a, kan ram tourist sum lakluhna tha ber a tlin ka ring hial a ni,” a ti.

Zamanhmawng enkawl dan tura a mitthla hi a ropui bawk. “A hual velin pangparte han ching ila, khualbuk nuam tak takte’n han hual vel ila, dil mawi takte nen, mahse kan rohlu kan chân ta si a,” tiin rilru khawih takin a sawi a ni.

Zamanhmâwng hian hmun zau em em awh tur leh ropui taka awm mup turin kum engzatnge a mamawh ang tih hi ka chhut thiam pha lo va, heti khawpa ropui tur hi kum za tam a mamawh ka ring. Khawvel ram dangah awm ve tak ang maw? A lo awm ve a nih pawhin an roh teh ang chu. Duhthu han sam ila, Zamanhmawng hi la dam nisela chuan khualzinte pawhin kan rama an hmuh duh ber turte zinga mi a ni ngei ang. Ram dang khualzinte hian khawpui te, in chhawng sang te, hotel changkangte an hmu chak lo; an neih ve zawng tak ai chuan an neih ve loh Zamanhmâwngte hi an hmu chak ngawt ang. Engpawhnise, awm tawh lo na na na chu neih leh dan a awm tawh lo va, kan thing leh mau bakah kan ram rohlu tam takte hi tichhe zawnga khawsa tawh loin, a awmsate duatin a dangte pawh neih belh dan ngaihtuah tawh ang u; a tlai hma hian.. Ramngawa nungchate lah dim lo tak tak kan la tam khawp niin a lang a, raltiang hi kan kai lo haih haih thin teh e.

Chakkhaiah leh tuah thingah kan mamawh avangin thing lian pui pui kan la kit dup dup reng a, lo atan ramngaw tha lai kan la vat zel bawk si a, engtia tihtur nge tih hi rilru sen tlan a ngai ta. Thing kih khap a hlawhtlin theihna turin thing kan mamawhna tihtlem dan tur hi ngaihtuah tlan a ngai tih a lang reng mai a, ramngaw tha lai kan vah chereu zel loh na’n lo leh huan nghet neih theih dan kan inzawnpuia kan inkawhhmuh a tul takmeuh a ni tih pawh a chiang reng mai. Mamawhna tihtlem (demand reduction) lama hmalak nasat a ngai a ni. Hnam puma kan harh chuan ramngaw kan la din teuh thei ang a, nungchate pawh kan la inthlahpuntir theiin a rinawm.   

Tourism kan thelh
Vawikhat chu Mumbai bul lawka tlang sang deuh mai kan tlawh a. Engmah vak an lo nei bik lo va. Tlang sang tak mai, kan neih ang hi a ni ve mai a, tlang chhip chu dah âwlin khualzinte tei hawi na’n uluk takin an buatsaih a, phaia cheng vaiho chuan an lawm ve em em zu nia. Tlang sang tak chhip atang khan a kham lamah tak kal thlakna tur an siam a, chuta kal thlak chu a nuam dangdai ve khawp mai. Vaiho chu an te ve teng tung mai a ni. Tlang sangah thing lianpui pui a ding thelh suau a, keini tlang mi ngei, an neih ang nei ve thei reng pawhin nuam hi kan ti ve viau ringawt mai a ni. A thlang deuhah khaw nuam tak, awmze nei taka din a awm a, chutah chuan dilte an siamchawp a, handicraft bazar a awm bawk a, anmahni kutchhuak deuh vek an zuar a, kha bazar, thil dang zawrh lem lohna kha vai changkang hovin nuam an ti bawk khawp mai. A vai khan kan tih ve theih vek a ni a, kan ti lem hlei lo va. Thawmhnaw leh bungrua (material) hi changkannaah kan ngai nghet bur niin a lang a, engmah nei si lo va inchei vur chu kan zah thin kha mawle.      

Tourism hi kan man fuh lo hrim hrimin ka hria. Tlang chhipa hotel lo sak leh tlang chhipa kalna tur step lo siamte chu tihchereuna lam a kawk tlat. Khaw hrang hranga tourist lodge han sak nghauh nghauh maite hi a tlawh tur lam a awm si loh chuan tunge maw thleng ang le? Kan tourist lodge-ahte hian sorkar officer leh Minister bial fangte hi a thleng ngun ber an ni awm asin. Tourist an ni der si lo. Tourist Lodge sakna sum hian khawi laiah emawte hi chuan handicraft bazar te, Mizo kutchhuak hrim hrim zawrhna bazar-te hi din zawk ila a tha zawk awm mange.  

‘Silai aiah Camera, lo tur hâl aiah terrace, thinga siam inchhung bungrua aiah plastic-te’ kan ti thei ang em? Sorkar tihtur pawh a tam. Tuahthing lak ngai lo turin sorkarin gas min pe thei hlawm ang em? Thinga in sak ngai loin RCC-a sakna tur khawpin chhungkua min dawmkang thei sela ramngaw humhalh sawi pawh a awlsam ang mawle.
– Laltlanzova Khiangte

Similar Posts:

• Midum-kham leh Hmuifang Tour Diary
• Mizoram tourism, MLTP act khawih telin!!
• Kan Zo Tlang Ramnuam
• Hmuifanga Tourist Lodge thar
• Hmuifang lamtluang

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, December 10th, 2008 at 5:58 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.