mi(sual).com

NSEM an tih kha maw? Lo fimkhur rawh u! Part I

– James Ramdinmawia

Lily_Parmawia te hovin an zirchhuahna atangin ni hmiang ka ti mai a, Investment chungchang bengvar thlak tak maiin min rawn hrilh thin a, a lawm awm hle mai. Amaherawhchu a article-a comment thenkhat zinga zawhna rawn inzep tel, “NSEM hi eng nge?” tih Lily_Parmawia’n a chhan theih tak si lovah chuan keima’n ka han sawi mai ang e. Management Degree emaw, Commerce Degree emaw ka nei lo, kei chuan chipchiar takin investment kalphung hi ka hre ve lo, a chhan chu ka zirna subject nen a inpersan em vang a ni. Tin, investment leh chain marketing reng rengah hian ka interest ngai lo, ram leh hnam hmangaihna avangin nasa takin TV leh Chanchinbu lamah kan lo bengchheng ve tawh thin a, chuvangin mi tam tak tan pawh an beiseina tisangtu kan nih ve theih avang leh mahni tawka fimkhur ve ngang leh reputation neih duh em em ka nih vang te pawh a ni ang e.

Amaherawhchu tun hnai te khan National Self Employment Mission (NSEM) a lo chhuak a, nasa taka ka study hnu-ah leh Mizorama bu lo khuar tawh company hrang hrang te nena ka han khaikhin hian hei ngei hi a nih dawn hi hetiang lama lo tisual tawhte kan chhanchhuahna kawng tur chu tiin Mizorama a bul tantute zingah ka tel ve ta a ni. A hmasa berah chuan a reliability kan en a ngai. Dan ang thlapin Registration leh a business kaihhnawih thil dang dang, IRDA License te, Income Tax PAN te, TAN te leh a tul dang dang te hi a nei vek a. India rama Company rintlak leh ngelnghet ber ber te pawhin an tih ngam loh he company hian tih a nei a; chu chu a SBI A/c No. 30445156889 ualau taka a brochure-a a pho lang hi a ni. A duh apiang tan en theih a ni. Hetiang em ema a transparent na chhan pakhat chu he company hi nikum 2008 July thla chauha business tan a ni a, a business chu Insurance-cum-investment through networking a ni a, hetiang business-a tlachhe ta leh hmingchhe ta tam tak te hmingchhiat chhan leh tlakchhiat chhan zirchiang hmasa-in chungho ang lo taka he company thar a survive theih dan tur a ngaihtuah chhuak ta a. Company tam zawkah chuan company leh an client te inkarah collector emaw, agent emaw an awm thin. Mahse NSEM ah chuan a client (Shareholder) hian NSEM company hi a direct tawp a ni. A chhan chu tumah agent leh collector an awm lova, tumahin a cash-in pawisa an collect tur a ni lo, chutianga collect an lo awm a nih chuan in rawn report dawn nia. A share neitu turin amah ngei SBI khawi branch ah pawh kalin company bank A/c ah a deposit ang a, chumi deposit receipt hmang chauh chuan a joining kan update thei a ni. Chuvangin agent te avanga company hmingchhiatna te, agent rinawm lo te avanga mi tam takin an pawisa an hlohna ang kha a awm ve thei lo a ni.

NSEM-in a tum ber te zinga pakhat chu Insurance Policy mi tam thei ang ber hnen thlentir a ni. India ram mipui zingah 60% aia tam daihin Life Insurance Policy an la nei lova, thihna tawh chang pawha lukhawng nei miah lova kan arte thih leh tawp mai thin hi he company hian a vei em em a ni. Chutichuan a chhan a han chhui chianna ah chuan heng zinga engemaw zat hi chu Insurance Company awmsa te hian an thleng pha lo a ni tih leh a tam zawk hi chu Insurance Policy leina nei zo lo an ni tih te a hmuchhuak ta a, tichuan chumi problem solve-na atan chuan Insurance Policy thar amaha siamchhuah ve ai chuan Insurance Company awmsa te tha tihchaka puihbawm chu tha berin a hre ta a ni. Tichuan Birla leh Reliance Insurance Company-ah te Corporate Agent niin IRDA pawhin License a pe ta nghe nghe a. Heng company te nen hian ULIP bikah an thawk ho a, ULIP-ah chuan Annual Premium Rs. 35,100/- leh Rs. 12,000/- man te a awm a. Amaherawhchu Rs. 35,100/- nei zo lo mi tam tak an awm avangin chung mi te tan chuan a chanve Rs. 17,550/- NSEM ah a invest tir ang a, kum khat chhung share neiin thlatin monthly income a nei ang, a company growth rate azirin. Kum thum chhung valid tur Insurance Coupon a nei ang a, he company-a a invest pun hunah Insurance policy chu awlsam takin a nei ve thei dawn a ni. Chutih rual chuan a Annual Premium tlem zawk, Rs. 12,000/- tak ngial pawh la nei zo lo mi tam tak an awm leh ta a, chung mi te chuan Rs. 5,850/- an neih theih hlauh chuan NSEM ah kan invest pun tir ve leh ang a, a hmaa mi te ang bawkin kum khat chhung share an nei ve leh dawn a ni.

Rs. 17,550/- hmanga share neite hian kum khat chhung thla tin Rs. 800, Rs. 1,600, Rs. 3,200, chutianga a let zela tam chuan income an nei ang a, kum khat chhunga an lakluh tlingkhawm chu Rs. 32,76,000/- a tling thei a ni. Amaherawhchu hei hi 100% Growth Rate a nihin tih a ni. He laia kan rate sawi leh Stock Market Rate te hian inkungkaihna an nei lo, a chhan chu kan company hian hmun dangah a invest chhawng ve tlat lo, ama grow-na ah a innghat tawp rih. Rs. 5,850/- hmanga share neitute’n thla tin Rs. 200, Rs. 400, Rs. 800 … chutiang zelin an la chho ang a, kum khat chhunga an thlatin lakluh belhkhawm chu Rs. 8,19,000/- a tling thei a ni. Hei pawhin 100% growth rate a nihin tih zel a ni. Thlatin a pun belhna tur leh mi rawn join tharna tur growth target a nei a, chu chu thlatin a bin thawk thawkin a tisang thin a ni. Khawi lai thla-ah pawh a target a phak chuan chumi thlaa a growth rate chu 100% a ti mai a, entirnan tun thla target chu Unit 5000 ni se, Unit 2500 chauh lo hmuchhuak ta se, a growth rate chu 50% a ni a, hemi thlaa all over India-a share nei zawng zawngte chuan an hlawh tur zat atanga 50% chauh an la theuh ang. Khawi thla-ah pawh hian a growth rate hi 0% ni se, tu hnehah mah pawisa a pe chhuak dawn lova, chuvangin company-in loss a nei lo.

Nikum July thlaa he business an tan atang khan tun thlengin a growth rate hi 100% aiin a la hniam lo hrim hrim a ni, tin hun lo kal zel turah pawh engemaw ti chhung chu 100% aia hniam lo tura ngaih a ni. Growth Rate-ah hian 100% a la huphurhawm lo em em leh nghal a, a chhan chu tun thla target hi thla hmasa target letchiah a nih avangin thla hmasa-a company rawn join thar zawng zawngte khan a tlem berah downline pahnih theuh rawh nei ta se, anmahni zat let chiah an rawn hruai luh dawn avangin 100% growth rate chu a ni der a ni, amaherawhchu downline benefit a that em avang leh reward te a lo awm bawk si avangin mi pakhatin downline pahnih mai neih chu an duh tawk lova, tam tak an rawn nei a, tin a hma daiha lo lut tawh ho zawng zawng khan downline neih an la duh tawk bawk si lova, chuvangin 100% aia hniam lo hian kum engemaw zat chu a kal ngei dawn a, chumi chhung chuan Mizo mipuite hian a hlawkna kan lo tel ve hman beiseiin leh economic development kan neih theih nan tiin tunah hian phur takin kan buaipui mek a ni. Company hi 100% char charin grow ta se, thlatin a sum lakluh dan chu hetiang hi a ni; entir nan thla hmasa khan Rs. 2,000 Crore lalut ta se, tun thla-ah hian Rs. 4,000 Crore a lalut ang a, chu ai pawhin a la sang fe thei, thla lehah phei chuan Rs. 8,000 Crore a lalut leh daih ang a, a lehpekah phei chuan Rs. 16,000 Crore a lalut ang. Hetiang hi a kalphung a nih avangin he company dintute hian pawisa neihsa insem a, a company tihtawp daih tum ta se, entirnan tun thla ah hian Rs. 2000 Crore lo nei ta se, he company dintute hi mi pahnih an ni a, Rs. 1,000 Crore ve ve-in insem ta daih se, thla leh maia Rs. 4,000 Crore chuang lo lut leh mai tur te, a thle leh peka Rs. 8,000 Crore lo lut leh mai tura beisei zawng zawng te hi an chan phal ang em? Keini aia selfish zawk leh sum duh zawk an ni turah ngai ta ila, company tihtawp thut aiin tih tawp miah loh hi an tan a tha zawk tih hi hrilhfiah hran an ngai lo.

NSEM hrechiang lovin miin an join tur lo sawithaih ve vak suh. Mizote hi kan mawl khawp nia, engmah mahnia zirchianna nei miah si lo hian tlangkam titi atanga kan hriat chhawn ve hmanga midang advice pek ve chiam kan ching a, Chiahpuam-a pawisa dah a that thu sawi sawi leh dah ve tura midang advice pe thintute khan Chiahpuam kha eng nge a nih an hrechiang chuang miah lo. Chutih laiin System felfai tak leh bankrupt mai mai lo tur leh grow tawp mai mai lo tura inveng lawk nasa berte zinga mi leh transparent berte zinga mi NSEM a lo chhuak a, engmah hrechiang mang si lovin midangin an join tur kan lo sawi thaih ve leh chiam chiam a, hetianga NSEM join a hlauhawmna i hriaa join lo tura midang i advice dawn a nih chuan advice i pek hma-in NSEM bel chiang turin min rawn pan hmasa phawt ang che.

Information Office of NSEM

City Bus Stand, Chanmari Kawn

Aizawl – 796007

Ph. 9862340622/9612160054

******************

Similar Posts:

• NSEM an tih kha maw? Lo fimkhur rawh u! Part II
• Motor Insurance leh Mizo-te
• NSEM Bawk!
• NLUP atan rawtna chhete!
• Crorepati i ni duh em?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, June 1st, 2009 at 8:07 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.