mi(sual).com

“ Thinlung a lamah hawn ila, Ro thil dang a ngai tawh lovang”

Krismas, a hming ngawt pawh hi a mawi a, lung a ti leng a, Mizo Kristiante nunah phei chuan a hming ringawt pawh hian hmun thuk ber a chang a, kan lunglenna ber pawh a ni awm e! Thlasik boruak a in tan hi chuan Krismas rim a nam kan ti a, kan rilru ngaihtuahna in Bethlehem dai a fang a, a hun lo thlen hun tur kan nghakhlel a, lo thleng thuai thuai se kan duh a, a hun lo thlen hma atangin kan lo hmang lawk a, Advance Christmas kan ti, a ropui danglam thin khawp mai. Amaherawh chu “Krismas tak tak kan hmang tawh em?” tih hi kan in zawhna tur fo chu a ni. Kan in nghahna tur atan chuan KHB No.94 na, chang 4 na, “Thinlung a lamah hawn ila, Ro thil dang a ngai tawh lovang,” tih hi a ni.

Pathian thu kan keu a kan chhiar chuan Chanchintha Bu 4 ah hian Lal Isua lo pian dan leh he khawvela mihring anga a lo pian chhan chu kan hmu a, Mizo Kristiante phei chuan kan hre chiang hle mai, amaherawhchu kan thil hriat hi kan chhut chiang lo fo thin, Lal Isua he khawvela mihring anga a lo pian dan leh a lo pianchhan ngei pawh hi kan chhut chiang lo fo thin. Genesis Bu ah mihring hmasa ber ten Pathian duh loh zawng an tih avanga Eden huan atanga Pathian in a hnawhchhuah thu leh Pathian lak atanga mihringte an hran tak thu kan hmu a. Mihring hmasa berte thil tihsual avangin Pathian lakah chuan mi hrang kan lo ni ta a ni.

Pathian leh mihringte in kar in zawm tawh lo leh chat tawh chu zawm leh thei tur mi pakhat chiah a awm, chu ngei  chu min Chhandamtu, Van Lal fapa, Lal Isua Krista hi a ni. Mihring suala tlu tawh tung dinga, kai tho a, Pathian leh mihring in kar chat tawh zawm leh tur chuan Van Lal fapa nimahse Lal Isua Krista chu  he khawvelah mihring anga a lo pian a ngai a. Chumi ti hlawhtling tur leh mihring suala tlu tawh chhandam tur chuan Pathian in a fapa duh tak, Lal Isua Krista chu he khawvelah hian a rawn tir ta a ni. Pathian in a fapa, mihringte suala tlu tawh chhandam leh tura he khawvela a rawn tirh piancham ngei hi a ni tunah pawh lawm tuma kan urlawk tlut tlut.

Lal Isua Krista he khawvela mihring anga lo piang piancham kan lawm dan leh kan hmuah dan erawh hi chu ngaihtuah chian a ngai hle mai. Mihring rilru chapona leh sualna a khat hian kan tana nau lo piang, min chhandamtu pianchhan dik tak chu ngaihtuah chiang duh lovin keimahni nawmchen nan he hun ropui tak hi hman kan tum a, kan hmang thin bawk reng a, a bik takin Mizo Kristian in ti tena kan hman dan hi chhut chian a ngai nasa leh zual. Krismas hla pakhatah chuan “Ruai ropui tak nen, intihhlimna chi hrang nen Krismas kan lawm a, mahse kan tana nausen lo piang, Lal Isua Krista ber kan theihnghilh leh si a”, tih a in ziak a ni. Krismas lawmnana kan hun hman leh kan la hman leh zel turah pawh hian Lal Isua lo pian nan hmun kan kian em?, tuna kan hlim lawmna hian Lal Isua piannan hmun a dal em?, keimahni theuh in zawt in chhan in tum dawn teh ang.

Krismas lo thlen dawn hnaih chuan Krismas chakkhai dap khawmin chhungtin kan hman hlel a, Nu leh Pa ten neih thinglung khawngin an faten Krismas an hmang nuam lo bik ang tih hlau reng reng in hun an hmang a, sum leh pai tam tak an seng ral thin. Krismas dawn hnaih ah chuan Bazar pangngai ni reng pawh Krismas Bazarah a chang zo a, mitin mai hi mahni nawmsakna tur zawngin kan phu suau suau thin.Ruihtheihthil ti mi in ruihna tur a ngaihtuah buai a, Nula Tlangvalten hman pui tur kan ngaihtuah buai bawk a, chutah chuan KTP member ngei pawh hi kan bang bik chuang lo, mitin reng hi he hun lo thleng tur avang hian kan helhhawlh a.

Pathian lehkhabu kan chhiar chuan Matthaia ziakah khan Heroda leh Jeusalem mipuiten Lal Isua lo pian tur thu an hriat khan an mangan thu leh an rilru buai thu kan hmu a, tuna keini ringtu inti te nen hian kan rilru put dan a in ang viau lo maw? Lal lo piang chibai buk nan hian kan rohlu ber kan thinlung kan hlan phal lova, rilru chapona nen kan neih sum leh pai hmachhuanin Lalber in ti ngat teh ang, chibai buk kan tum a, kan hmuak bawk a, mahse rilrua in ngaitlawmte hnenah Lal Krista chu a in lar zawk si a. Heng kan hmuah dan leh Lal lo piang chibai buk kan tum dan hi chu Heroda hmuah dan leh chibai buk dan dik tak a ni.

Van Lal fapa, mihringte thihna atanga min chhandamtu ni bawk he khawvela lo piang lo pian dan leh pian chhan hi a ropui a, ngaihtuah chian chuan a lawmawm rual rual in Lal Isua hi a lainatawm em em bawk a ni. Van Lal fapa, min chhandamtu ni bawk si lo pian nan hian  hmun kan kian duh lova, mahni nawmchenna leh nawmsakna tur zawngin kan rilru kan seng zawk thin. Tun hunah hian “ Ka upa tawlh tawlh a, Krismas hi a ho tawlh tawlh”, ti kan awm em?, han in ngaihtuah vang vang la nangmah  kha I ho a ni zawk lo maw?.

Eng hunah mah hian Krismas, Lal Isua Krista piancham hi a ho thei lo reng reng!  Lal Isua hi vawiinah nen, naktukah nen chatuan thleng pawh a danglam thei lo leh danglam ngai lo a nih avangin eng hunah mah Krismas hi a ho thei lo reng reng! Lal Isua min chhandamtu, thihna atanga nunna min petu, he khawvela a lo pianchhan diktak ngaihtuah chian chuan mahni nawmsaknan Krismas hi a hman theih lo reng reng, hman tum mah ila he khawvel nawmsakna leh Lal Isua lo pianchhan leh kan tan a tawrhna zawng zawng han khaikhin hian a in hlut hleih lutuk ringawt. Fakna hla ah chuan “Thinlung a lamah hawn ila, Ro thil dang a ngai tawh lovang”, tih a in ziak a ni.  Kan thinlung A lamah kan hawn phawt chuan engmahin min tibuai tawh lovang, engkim kan tih Lal Isua ropuinan leh A hming chawimawinan a lo ni tawh zawk dawn a ni.

Lal lo piang tur chibai buk tura in buatsaih mekte hi in ngaihtuah chiang ila, thinlung leh tih tak zetin nausen lo piang hi chibai buk in tum tlang teh ang.”Isu, vawiinah hian kan thinlung Bawng inah lo piang thar leh la nang kan chatuan Lal turin,” ti thei vek turin kan thinlung  siam thar leh ang u, Krismas tak tak hmang turin kan  thinlung Lal Isua Krista lamah hawi tir ila, chu chu Nausen lo piang chibai kan buk dan tur leh Pathian duh dan a ni.

Similar Posts:

• Krismas Thuchah
• Krismas Thuchah
• Krismas a lo hnai leh ta
• Kan sawi ve mai mai
• Lal Thar Lo Piang Chu!

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, November 18th, 2009 at 3:27 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.