mi(sual).com

Kum 2007 kha a ni ta in ka hria, ka train chuan pui pa (Mizo) in Kolkatta-a an inluah a thleng tur a nasa taka min sawm avang  leh Mizoram House khumfa (bed bugs) tamna hmun a ka thlen peih lo lutuk avangin, ka thianpa (ka train chuanpui pa) te inluah ah chuan zan khat ngawt mai riak tur in ka thleng a, a felin, min duat khawp mai, ka rin aiin nuam ka ti a, ka tlangnel hma khawp lehnghal.

Zan dar 11 velah kan mu a, mut pah chuan Mizoram sumdawng ho (thawmhnaw zuar ho) Kolkatta a thawmhnaw an lak vel dan  te, an hlep hnem theihziate leh Bangkok kal ni awm taka in sawi in Kolkatta-ah rei tak tak chamin thawmhnaw an lak thin zia thu te chu min hrilh a, ka rin aiin a hre chiang khawp mai lehnghal a, mak ka ti khawp mai. An mahni inluahah ngei pawh Bangkok  a thawmhnaw la ang a insawi thin, an thlen ve thin thu te leh Kolkatta-a a bazarpui thin thu te chu min hrilh a, a sawi ngaihnawm thiam  bawk a, mu ang phuau mengkar si in ka ngaithla ni ber in ka in hria.

Nikum ka puja chawlh hmang zo, Mizoram atangin ka lehkha zirna hmun lam panin thlawhna in ka kal a, Kolkatta-ah thil tih zawk tur ka neih a vangin zanhnih lai riah ka ngai si a, Mizoram House khumfa tamna hmun pan ai chuan tiin,  Kolkatta Airport atang chuan New Market bul vela Hotel lam pan a ka kal dawn thu Prepaid taxi counterah chuan ka hrilh a, chutih lai mek chuan Mizo sumdawng nu pakhat leh nula pakhat hian ka kalna lama kal tur an nih thu te min rawn hrilh a, tichuan taxi pakhat ah chuan kan chuang/kal ho ta a, hotelah te chuan kan thleng ho ta zel a, rin aiin kan in nel a, kan in kawm ngeih ang reng hle bawk .

Kolkata ka chhuahsan hma zan chuan rei tak kan titi nghe nghe a, chumi zan chuan remchangah la in Kolkatta-a thawmhnaw la si, Bangkok a thawmhnaw la anga in sawi (a thu chauh a Bangkok a kal a, thawmhnaw la anih ber chu) an awm thin leh awm thin loh thu ka zawt a. Rin aiin an sawi huai daih mai.

Anmahni pawh chutiang chiah chu an nih thu te, a nutling zawk chu Bangkok a thawmhnaw han la anga kal anih thu leh a nula zawk chu Hong Kong a kal an nih  thu te min han hrilh ta zel a, ka nuih chu a za ru ang reng khawp mai. Chutah Mizo ho in Bangkok leh Hong Kong thil an ngaihsan zia te, an thawmhnaw lak hralh a kal bik zia te leh hlep an hmuh thrat thin zia te chu min hrilh mawlh mawlh mai a.Ka rilru te te chuan Mizo Bengali thluak nei ka ti rilru deuh a, han hriat belh zel tlaka ka ngaih loh avang leh zingah train man hman ka ngaih avang in ka mut san ta a.

Hmani khan hetiang thil hi ka rilruah a awm thut avangin, ka thiannu Millennium Center a dawr nei ka han bia a, thil chi hrang hrang ka zawt a, Bangkok leh China (Hong Kong etc) vel ami thawmhnaw an lak thin thu min hrilh a.  Keilah ta pek chuan fiamthu titak deuhin, ‘Tu nge Bangkok, China tih velah chuan kal thin che u a? Kolkatta-a mi hi in zuk la anga, hralh thrat duh vang leh a man tih to duh vang ngawt hian Bangkok etc ami la angin in Customer te hnenah insawi in,  in zuar ve thin te hi a ni lo maw, ti a ka zawhna chu kan in chhanglo chiang khawp mai. Ka hriat ve a tullo a niang chu, ‘I hriat ve chi a ni lo, ka buai tlatz, bye bye photz’.. tih pahin a phone chu a dah ta daih a.

He thu tlem fahrah te hi ka mi(sual)pui te tan ka rawn chhawp chhuak ve e. Enge kan ngaihdan ni ve chiah le, i han sawi tlang dawn teh ang u khai.

Similar Posts:

• Bangkok?
• India Universities in World rankings
• Khawvela Awm Nan leh Hnathawh Nana Ṭha Ber Ram 10 (2012)
• Mizo Mipa Vs Hmeichhia
• NE’s first toy train in Arunachal

Recent Posts:

• Hringnun thim lam
• Mithianghlim-te Inpâwlkhawm {Sunday Pual}
• C.P. Road
• Thalai ni si:
• Ruatfela Nu thu leh hla

This entry was posted on Tuesday, April 27th, 2010 at 6:56 pm and is filed under Information, More than words. You can follow any responses to this entry through the RSS 2.0 feed. You can leave a response, or trackback from your own site.