mi(sual).com

(Thlá hi a lo awm ngei mai. A tak ngeia ka tawn hi han chhiar ve teh. Thlarau sual erawh a ni lo hlauh a.)

Chu thla bial zan (a ni leh kum ka hre tawh lo. Nikir thla a ni tih erawh ka la hre thei.) chuan van boruak chu a thiang tha kak kak ngei mai. Chhunah nilenga ruah a sur avangin leih buak leh tur chuang nei tawh lo chhum tui pai lo ho chu thli chuan a len vuk vuk a. Thlipui na tak thawk tur in tham ang hrimin kan in te chu a rawn sawi sawk sawk mai a ni.

Veng mawng lam atang chuan ui hi a rawn u chho vawng vawng mai a. Hmuh thianglo hmu ang hrimin kan kawmthlangte ui chuan a lo zawm ve nghal zat a. Zanlai pelh tawh a nih avangin ka chhungte chu an mutui hle tawh tih ka hre mai a. Hriatthiam theih mang si loh hlauhna hian mi tuam a, ka hmulthi te chu a ding sung sung mai a ni. Ka zun lah chu a chhuak em em mai lehnghal a. Ka damchhunga ka theihnghilh tawhloh tur zan a nih dawn reng ka hre lawk lo.

Karen a awm lova, kan kawlphetha khawlna lah a chhe bawk si. Ka room chhung chu a thim muk tlat mai a ni. Ka zunchhuak insum thei tawh lo chu ka thawh angai ta si a. A hma ni lawka Pi. Thangburhi sar thi te chu ka hrechhuak uai uai a. Ka tho chhuak ngam lawk lo va. Mahse ka zun chu danzawh rual lohva a chhuah tak avangin ka tho ta them them a. Eng nge maw mi mawlh tehreng ni, tawhsual tawk tur ang zia zangin ka fimkhur a. Dingdihlip tehmeuhvin ka pen phei den den a ni.

Inpui lam chu thla en vangin a lo thim chhah em em lo va. Tichuan dingdihlip phei den den chung chuan inthiarna room chu ka va pan ta a. A kawngkhar zan danga kan kalh ziah thin kha a lo inhawng huai mai lehnghal a. Ka hlauh chu a zual ta kher mai.

Zung lo va let leh em chu ka hreh si. Kawmthlang te uipa lah chu a bauh ring zual sauh sauh mai lehnghal a, a chang leh hlauh nei ang hrimin a beleuh leh tuar tuar bawk thin a. Thli lah chu a thaw vuk vuk a. Tukverh puanzar chhan atang ngawt pawh chuan thla en zia chu hai rual a ni lo.

Inthiarna inah chuan ka va lut ta a. Thil danglam engmah phei chu ka va hmu ta lem lo. Thlamuang takin ka neih ang ang te chu ka in bunruak ta hiau hiau a. Tichuan ka kut ka sil a, ka hmai ka phih zo ka han dak chhuak leh chiah chu…

…Chutah le, mi ka atanga thu maia ka lo hriat thin leh ka tawn ve tura ka lo ruat ngai reng reng loh, an sawi ‘thlahrang’ ngei mai ni a ka hriat chuan feet hnih vela hnai atang hian dang deuh bau, phawk fahran tak mai hian mi lo en kawl mai a.

Ka thinphu chu a chawl dawt a, rang mangkheng hian a phu zawm leh nghal zawt zawt a. Khatiang em em a phut chian kha ka la nei ngai lo. Ka theihnghilh tawh ngai loh tur zan a ni.

Ka pa ve hle in ka lo inhre thin a. Rawlthar ti za rual, ropui bera in ngaih hunlai, hlauh reng reng neihloh hunlai ka nih vei nen. Inring lawk lo lutuk tak mai a thlá ka hmu ta thut mai chu hlauh namen lohvin ka hlau a ni. Thla eng tlemte chu ka eng neihchhun a nih mai avangin chu thlahrang chu ka hmuchiang thei chiah lo. Mahse Mipa la upa lo te, keimah rual vel tur, hmel fel ving veng, nulate star tur deuh a ni tih erawh ka hre thei nghal mai a.

Mahse thisen reng nei lo hmel a put vang leh a mitmeng te chuan ngaihno bei lo vek khawpa phawka mi lo en avangin a ngainatawmna tur ang zawng zawng te chu a bo vek hian a hriat theih a ni.
Chutah mahni leh mahni, darthlalang hma a in en ngai lo ang hrima in en reng thu awm ta lo chu ka khum lamah ka let phei leh ta a. Tui tak leh thlamuang takin, zunchhuak leh tawh lovin ka muhil zui ta a ni.

Similar Posts:

• Free Domain
• Guwahati ah Mizo hmeichhia!
• Krismas Card
• Lehkhathawn Hmasa Ber
• It’s Life…wateva

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, September 6th, 2010 at 9:30 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.