Dt. 5/9/2010 (Sunday chawhnu inkhawm ban)
Ka duhtak chu a lo mu tui hlè a. Mangtha a mâng tih hriat takin, a mawi tawk chauh hian a hmelah hlimna a rawn pár chhuak a. Chu chuan a duhawmna belhchhahin, thlir a ti nuam lehzual a. A lû atanga a kè/ a taksa pûm mai chu uluk takin ka en diat diat a, “Hmmm… Bawihte, i va duhawm tehlul em! Ka va hmangaih tak che em!” Ka thinlunga hmangaihna luangliam chu ka hmuiah infàwkkhawm-in, a biang chu dimté-in ka zu chúk a.
Siamthat chawp ni si lo a– a hnar-ngúl mawi zia te; hnawihsen chawp ni si lo a– a heh tài tâk mai te; cheimawi lehchuan ngai miah lo a– a mít leh a vel nalh zia te; tih danglam ni miah lo a– a sam bûang-tlè siau mai te; vun mawina chulh si lo a– a vun nó, nél-thep mai te chuan ka lùng a dùm hluah hluah e!
Mahse, thil chiang tak mai chu– he ka fanu duhtak hi min han hmuhpui ve mah u, a mawina ka sawi ták ang khian inhmu mawi ve tawp lo ang! A that zia ka sawi tàk te pawh inpawh phàk ve tawp na’ng! Hmangaihna thinlungin a chhilh hnan mit ngeia thlirtu ka ni miau a! A thatna leh duhawmna ka sawi tàk zozaite khi mite mit-ah dik vek kher lo mahse, keia mit-ah erawh a dik tlat si. Ka thinlungah a chiang hlèi hlèi!
Ti chuan, heti khawp hian mitin-in kan fate kan hmu tha vek a, he khawvelah hian ‘hmelchhia’ rèng kan lo awm nèm le! A thlirtu thinlung, a hmutu mit a zir mai a lo ni. Ngaihtuah teh, ‘Hmelchhia’ ti a kan nuihzat hial te mahin, ‘tha’ ti a thlèk ngawih ngawihtu, thlir ning thei lotu leh engkim chàn huama hmangaih tlattu an vài bìl lo anih si chuan, mitin mai hian mawina leh duhawmna kan nei vek tih a chiang a, mi hnàisài lo ber paw’n thlahlel ngawih ngawihtu a nei thei a lo ni.
Hmangngaihna, lainatna leh khawngaihna thinlung atang chuan thil engkim mai hian mawina leh duhawmna an nei vek a, mihring tenawm ber, pawnchhe hnangkhai pawh tluk lo, pán-hnaila, vuak duk chùr tluk zeta tenawm pawh thisen a zawnga thisen hlu ber/ fapa màl thisena lei kan lo ni si. Chù thinlung atang chuan mite’n khawvel hi mawi an ti a, thil siam tinrengte pawh an hlû a, mi tawp ber pawh an kuah bawrh bawrh thei a lo ni. Sahrâng hlauawm ber chenin an ngainâ a, rulngân meuh pawh an humhalh duh hial thin. Meihawl zuar tan meihawl chu thil mawi a ni a, Pheikhawk chhe siam tan pheikhawk chhia chu thil hlû a ni. Thir chhe zawng tan thir chhia chu a duhawm si.
Similar Posts:
- Lehkhathawn
- Thinlung nuihza
- Saruakna hi sual a ni em?
- Hmangaihna hi enge a awm zia aw?
- Ka pu Shakespeare-a love story
September 7th, 2010 at 9:02 am
Va tha ve! Dik ve tho mai.. hmeltha kan awmna chhante hi chu hmelchhia te in awm vang a ni ve chiang alawm..
Nula hmeltha leh piannalh zeih zawih hi chu hmuh chu an lo hahdam deuh e..
Report this comment
September 7th, 2010 at 9:15 am
A thlawp zawngin ka comment e.
Report this comment
September 7th, 2010 at 9:31 am
Keipwh ka thlwp e.
Report this comment
September 7th, 2010 at 9:48 am
Fa te hi chu nu leh pa te tan chuan an hlu ngawt mai. Khawimaw titi naah pawh hian nu leh pa te chuan an fate chanchin sawi nuam an tiin an ngaih ven ber zel si.
Mihring hian kan ngainatzawng leh duh zawng, hmel chung changah pawh tha tih zawng hi in ang ta thup thup se a buaithlak duh awm mang e…
Report this comment
September 7th, 2010 at 10:18 am
Mizotawng i hmang mawi thiam khawp mai.
Report this comment
September 7th, 2010 at 11:10 am
Mi fate hi chuan….
Report this comment
September 7th, 2010 at 11:15 am
Mahni fate hi chu hmuh hmelthat an awl a ni. ‘Hmangaihna mit atang chuan engkim hi a lo mawi a vek mai a’ tih hi ka pawm zawng tak a ni. Thianpa, i post tha e.
I post hi a sei poh leh mak tiin ka khat thar zel mai tawh dawn a ang khawp mai :lol:
Report this comment
September 7th, 2010 at 11:51 am
Post tha tak niin ka hria.
Report this comment
September 7th, 2010 at 11:53 am
“khawvel ah hian hmelchhia reng kanlo awm nem le” Mr.TSA pawh hi a hmeltha…… :lol:
Report this comment
September 7th, 2010 at 12:01 pm
Kei pawn ka thlawp e. Ka pu pawh in ka tetlai chuan ” ka tupa hi khawvelah a hmeltha ber” min ti thin…
Report this comment
September 7th, 2010 at 12:48 pm
Hmangngaihna, lainatna leh khawngaihna thinlung atang chuan thil engkim mai hian mawina leh duhawmna an nei vek a, mihring tenawm ber, pawnchhe hnangkhai pawh tluk lo, pán-hnaila, vuak duk chùr tluk zeta tenawm pawh thisen a zawnga thisen hlu ber/ fapa màl thisena lei kan lo ni si. Chù thinlung atang chuan mite’n khawvel hi mawi an ti a, thil siam tinrengte pawh an hlû a, mi tawp ber pawh an kuah bawrh bawrh thei a lo ni
Lal Isua chuan in hmangaih tawn rawh u a tih kha i sawifiah thiam hle mai. Hetiang mite’n an entleu lo hmangaih theitute hi an ni Lal Isua chuan Ka mite a lo tih chu. Kei misual hi ka va tlawm chai chai ve selfish takin mahni fate erawh ka hmangaih
Report this comment
September 7th, 2010 at 1:00 pm
Hmangaihna mit atanga en chuan mitin mai hian hlutna an lo nei a.
Kan Pathian hian min hmangaih vek si a. Chuvangin mihring zawng zawngte hian hlutna kan nei vek a, inhmusit tur kan awm lo…. tih lampang deuh ka zir chhuak. Ka sawi thiam lo. Hehe. Good post’
Report this comment
September 7th, 2010 at 3:06 pm
Ava tha em! tih bak sawizui tur ka hre lo
Ku Kawlhawka thu hi chu chhiar a kal zaih zel anih hi.
Report this comment
September 7th, 2010 at 6:13 pm
I thuziak hi a that duh hmel (HO HUANG) ti lo in, Pu Kawlhawk thuziak chu a tha hle mai. A chhiar a nuam si, thumal a phuahkhawm thiam si, a chhungmu a phum tha si, Tawi fel, tha leh fing, chipchiar leh fawmkim tak a nih hi. Chhiar a manhla hle mai.
Comment: Nia, an sawi fo angin HMING leh HMEL ni loin HNA (enge kan thawhchhuah ve) tih hi nitin nunah hian thil pawimawh tak a ni.
Ka lawm e.
…khrum
Report this comment
September 7th, 2010 at 6:39 pm
#14 kcht, phù loh fakna min hlan maw, ka lawm e. He paws, ka paws a zawnga komens hmu tlem ber hi– ka paws a zawnga ka duh ber zu ni ve tlat ì’a mawle! Engkim mai hi keimâ hmuh ang ngawt alo ni lo, ka hmuh loh dan deuhin mite’n an lo hmu thei. Mi incheina te; inthuamna te thleng hian sèl mai mai tur ka lo ni nèm le! Miin, mawi leh nalh, tha a tih ang zàna a inchei/thuam hian chù tluka hlu chu a awm chuang dawn em ni? Amah mawi a intih mai bakah, tu emaw mit-ah chuan angle ianga nalh alo ni thei si a. Hriatthiamna leh thlirzauna mit atang chuan engkim mai hi alo mawi vek e!
Report this comment
September 7th, 2010 at 6:46 pm
Pu kawlhawk, thudang alai chuan Hmuifang MI kha sawi hot tan tawh teh u a!
Kan awmna lamah chuan hei kan MI ta zeuh zeuh mai. kan rawn report hran lo nang in. Nuam thei khawp mai.
…khrum
Report this comment
September 7th, 2010 at 6:55 pm
Khumchikthei, Khua hi han hûl phawt se kan ti…a ni awm e. Ni e, kan rawn ‘VAW HOT’ tep tawh e. I tel ve loh nâ chuan ka vúi ang! :lol:
Report this comment
September 7th, 2010 at 6:57 pm
Nia, khua hi a hul phawt loh chuan a buaithlak viau ang. A reng reng thuah, Hmuifang phei chu chhumin a bawh duh sia, a buaianthlak phian lawng maw! Nawm zawng a nuam viau ang. TIN ka tel ve thei dawn tlat lo, helamah kan lo MI ve mai ang chu.
…khrum
Report this comment
September 7th, 2010 at 7:13 pm
@khum… khawnge maw in lo MI deuh reng bik le? Kumin chu ruahtui hi a hnam rei ta lua eeee.ninawm dawn a lawm maw le… nizan phei chu leilet buh hmun tuilianin a hrut a, sangha veng in an vei zan khua zak mai…
khua han hul thuai thuai teh se. Hmuifang MI mai bakah . Buannel programme a tibuai thei dawn tlat mai.
kan OT tak zuah zuah chu a. kawlhawk in lo hre thiam em ang chu…
Report this comment
September 7th, 2010 at 8:44 pm
Ka comment miah lohva liam mai atan chuan ka ui tlat. Hmangaihna avangin mite sel thin pawh an lang mawi a, miten a an hmuh ve loh duhawmna chu hmangaihtu mitah a lang chhuak thin. Hmeltha te hian hmangaihtu leh duhtu an ngah bik maw? Bumtu, itsiktu leh tihchhiat tumtu an tam zawk lo maw? Ka fa te hi mi te tan chuan engmah anni lo, ka tan erawh nun tihlim tu, rangkachak leh lunghlu aia hlu zawk an ni.
Report this comment
September 7th, 2010 at 9:01 pm
Pu Kawlhawk: Mizo tawngah i hausa a, i thiam a, i thuziakah pawh a hriat theih a, chhiar a nuam takzet. Ka thawlp tak zet. Kei paw’n hmelchhia hi an awm lo tih hi tunhma atanga ka lo ngaihdan a ni a. Mi tam zawkten hmeltha min ti mah se, khawi maw laia mi pakhat, mit lampang sawiselna nei chuan hmelchhia min lo ti ve thei tlat…keimah hi!
Ka ngaihdân ka’n sawi ve leh ang a. Thlûkna hi i hmang taima hle a, a tha ka ti. Mahse, thlûkna kan dahna hi a inang lo thei hle. Thenkhat chuan, (nang pawh) thlûkna lèm lo, thu lamrîk sángah thlûkna sáng an dah thîn. A hniamah thlûkna hniam. Kei chuan hei hi ka pawm lo!! Thlûkna chu thlûkna a nih ang ngeiin thlûkna tur chi-ah chauh dah turah ka ngai…lamrîk sáng leh hniam chhinchiahna atana hmang lovin. Lamrîk chhinchhiahna atana hman dâwn chuan thumal tin deuhthaw-ah dah a ngai dâwn. A hrim hrimin thlûkna chu thlûkna dah tur a ni tawp mai!
I thuziak hi a tha ka tih khawp mai. Vote 100 ka pe e.
Ka lâwm em em e.
Report this comment
September 7th, 2010 at 9:04 pm
Tin, he post hming hmasa hi Sunday Diary tih a ni e!
Ka lawm em em e.
Report this comment
September 7th, 2010 at 9:17 pm
#21 TS, A dik lutuk! Thlùkna chu thlùkna a ni. A sâng a hniàm– thlùk chi-ah chuan hman mai tur. A chhiartu tan chhiar a ti nuam a, hriatthiam a awl zawk ngai e. Kan thatchhiàt lúatah a thiamte paw’n an hmang tha peih lo thin mai pawh a. Hemi-ah chuan ka fak tawp che!
Report this comment
September 8th, 2010 at 1:35 pm
… Chutichuan hêng pathum, rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni.
~ IKorinth 13:13
Sir kawlhawk, post tha leh ropui tak a ni.
Report this comment