mi(sual).com

(Part hmasa lamah te Pathian hmangaihnaa rin thiam ti harsa tu ni a lang te ka han tar lang nual tawha, a duh chuan in chhiar nawn leh mai dawnia)

Vawikhat chu chaw ei turin khawsa thei ve tak chhungkaw in ah kan leng a. An chenna chu Mumbai ah chuan a sang ber ni lo mahse a sang ve pawl tak chu a ni ngei ang. Chaw ei hun hma chuan bathlar lamah chuan ka han dak kuala, khawpui mawina zawng zawng hi a lang kim vek emawtih tur hial khawpin a thlirna (view) a a tha bawka mit pawh a tlai ngei mai. Thli a thaw nuam bawka Building sang tak tak te, Bridge mawi tak tak te, tuipui cham dulh mai te chu thlir nuam ka ti ngei mai. Building sak lai mek a engeneer thiam tak tak ten Tower Crane an han chelek vel lai te pawh chu ka thlir reng bawk a, mihring tluak that zia te ka ngaihtuahzuia. Chung lam atanga han thlir chuan khawvel hi alo mawi a ni, a thilsiam te leh mihring te hnena nna a lo dah avang hian Pathian hi ka fak thlawt a ni! Ka hmuh aia ropui tam tak pawh a awm ngei tih ka chiang bawk a.

Ka awmna a san em avangchuan building sang tak tak te innghahna lei lam chu thlir turin ka ring ka han fan ta uak uak a, chuta ka thil hmuh ve thung chuan ka ngaihtuahna a thlak danglam zui nghal ta vek mai! Building sang tak tak karah chuan bawlhlawh paihna ni awm tak area zau tak mai hi alo in pharh ve duai maia, chu chu mi rethei/chhumchhia te chenna hmun (slum area) a ni a. A tawp in a bawlhhlawh tih chunglam atang pawhin a hriat ngawih ngawih a ni, chu khawpui ropui ka tihna chu kar lohah a chuai ta duai duai maia, Pathian ka fakna pawh chu a kimlo ta hu hian ka hre zui nghal bawk a.

Mihringte dinhmun inthlau lutuk hi ka ngaihtuahzuia, kan zavai deuhthaw mai hian Pathian in min hmangaih awm si a Pathian hmangaih theuh theuh chu kan va in anglo tak em. Khulaia piang tur khuan duh an thlang a ni bik si lo a, an ram neih chhun te chu Company lamin lei sak tumin an bum/thlem (cheat) reng bawk a, politician lahin an lal na tura vote duhin inthlan(election) chhung chauhin an hmangaiha, mi hausa tak karah chuan chep takin an nung ve a. Thenkhatin in leh lo an channa rel kawngah te riakin ui ang maiin mi ei bang nawi an zawnga, mi khawngaihna chhete chu an eizawn ve na a ni a.

He khawvela an damlai ni te lo tla in an chatuan hmun tur mei-dil(Hell ) in a hmuak leh ngawt a nih si chuan Lalpa hmaah hian ka va vui pui tehlul em! Mahse Pathian rorel ah hian ka tel lo a, ka pianna tur thlang dawn ila ka thlanloh tur zia ka hre reng, anni pawhin thlang dawn se an thlangchuang in ka ring lo. Kan thlan loh theuhah kan pianga an va vanduai bik em tiin ka han mihring khawngaih ve a.

Pathian niila tuma retheih hi ka phal lo ang Pathian pawhin a phal bik in ka ring chuang si lo, enginnge a hmangaihna (retheih phal lohna) chu kar min dang ta ni ang le? Mihringte bawhchhiatna chu Pa thinlungah chuan a na hle ni ngei ang a? Pa thinlung ka va hmu thiam si lo ka tan chuan zawhna a nilo thei lo a ni. Joba meuh pawh harsatna in a han tlakbuak tak tak chuan a mangang ve hle a, Lalpan a han chhan(hrilhah) tak ah chuan “Engkim i tithei tih ka hria, I tum chu dal rual a nilo. Eng mah hre si lo hian engtizia nge I remruat hi ka lo sawisel mai le! Ka hriatthiam lohte chu ka sawi a ni, Ka hriat phak loh, ka tana mak lutukte chu. I sawi ngaithla tur leh I zawhna chhang turinmin ti a, Mi sawi atang chauhvin ka lo hria che a, Mahse, tunah zawng ka mit ngeiin ka hmu ta che a ni. Chuvang tak chuan ka inten a, Vut leh vaivuta thuin ka sim ta e” a ti a (Joba 42:2-6). Joba thil hriatah thiam tak chu hmuhchhuah ve te pawh a chakawm ngei mai.

Hei chu kan hria:- Isua Krista kha he leiah lo piang ta lo se heng zawhna te hi ka zawhna a ni reng awm e! Vana Lal ber ranthlenga lo zal a Kross kawng rawn pan ding char char mai hi tu in nge hrilhah thei ang? Ani zawng a duhthlanna ngei in alo pianga, sal(slave) chhungkua ah pawh hmusit chhungkua mistiri fapa Burma khua kan ngaihnep ang maia a hunlaia ngaihnep Nazarerh khuaah seiliana; Billionaire chhungkua atang slum family a zuanluh chu tu in nge duh ang? Kan nihloh vang chauhin thlan ngaihna kan hre lo mai a ni. Isua duhthlanna hi chu ai pawh chuan a thuk zawk a ni.

Pathian chuan Joba angin tawngka in mi chhang lo mahse Isuan a tuarna hian a tul hle a nih hi tih min hriattir a, engang takin nge na ang? Tirhkoh Paula pawhin a hre thiam chak a “Ka thil duh chu Krista hriat te, a thawhlehna thiltihtheihna chan te, a tuar anga tuar te, a thihna tawmpui tehi a ni…..Krista mi man chhan chu ka man thei dah law maw,” tiin a umin ka um zawk a ni(Filipi3:10-12).

Min hmangaih tih chu Isua atang hian hai rual a ni lo, engang takin nge tih erawh chu vanah kan la hria ang chu. Min hmangaihna hi Paula ang hian hriat chakin i rum ve ang u. Ka lawm e…

Similar Posts:

• Ka ngaihtuah ve thin
• Kristian chhungkua leh kan tehdan diktawk lo te
• Synod Building Thar hi…
• Nun thubuai
• Pathian hian mihringte hi a hmangaih tak tak em? PART-I

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, November 26th, 2010 at 9:25 am and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.