mi(sual).com

– David M. Thangliana

Kan zaithiam leh hlaphuahthiam hmingthang, mual min liam san ta Pi Lalsangzuali Sailo khan zu hi sual tinreng bula a chhuah hma atang daih tawhin Kristian kan nih hnu-a Mizo society-ah chuan zu hian hmun tha a chang lo hrim hrim a. Pi Zualte-i khan “sual tinreng bul” ti-a zu alo sawi pawh kha a mawh lem lo. Bible kan en erawh chuan Pathianin sual tinreng bul a tih chu sum ngainatna a ni zawk a; zu chungchangah chuan zu ruih leh zu ruih chingte a dem thu kan hmu a ni.

Zu hi Mizo-te chuan Mizoramah mai ni lo, kan awmna hmun apiangah buaipui bera kan neih emaw tih mai turin a inmi leh inlo mi in kan buaipui em em a. A inmi ai mahin a inlo mi ho hian Mizoram chhungah ngat phei chuan kan buaipui emaw tih tur hial khawpin kohhran thleng thlengin zu chungchang hi kan ngaihtuah luih luih reng mai chu a ni ta ber a. Chuvangin ngaihtuahna kan sen ngai nia lang ta chu “Zu hi nge kan buaipui tur zawk ni a, a inmi zawkte” tih hi a ni.

Ruihtheih thil hmansual hi Saptawng chuan “Abuse” ti a sawi a ni a. Chumi awmzia chu “Hmang khawlo” tihna pawh a ni thei ang. Tunlai hian kan thalai zingah damdawi hmang khawlo an tam em em a, chung ho chu Saptawng chuan “Drugs Abusers” tih an ni a. Damdawi an hmansual avang khan damdawi hi a sual ta hle a ni lo. Natna avanga mamawhtu tan chuan khawvela thil hlu ber a ni zawk. Damdawi hmansual atana lar em em, “Heroin” kan tih te pawh hi natna khirh tak vei, nachhawkna pangngaiin a chhawk zawh tawh loh te tan chuan malsawmna a ni ringawt a ni. Chutihlai chuan dam tha pangngaiin ruih nana an lo hman erawh chuan a ngawl vei theih a ni a. Drugs ngawl miin an vei chuan an taksa tan a that loh mai bakah tul lova sum leh pai tam tak khawhralna a nih avangin khawvela sorkar zawng zawng tih theihin heroin leh a ngawl vei theih drugs dangte chu an khap ta zawk a ni. Chutih rual chuan khawthlang ram hovin drugs an tih ve tho, ganja kan tih mai, marijuana te chu ram changkang thenkhat chuan khuahkhirhna dan tha tak siamin zawrh an phal leh thung a ni. Chutiang deuh chuan zu te pawh khuahkhirhna dan neiin khawvel ram tam zawkah chuan sorkarin zawrh chhuah a phal a, India-ah ngei pawh Mizoram, Gujarat, Nagaland leh Manipur tih lohah chuan zu zawrh chu sorkar sum lakluhna tha tak a ni.

Ka hmuh ve dan chuan zu chungchangah hian a zu-a aiin zu inmi-te hi buaipui tur zawk an ni a. “A inmi” han tih pawh hian zu inmi engemawzat hi buaipui ngai hauh lo, an in tih pawh hriat mang lova zu in an awm a. Heng ho hian khawtlang leh an inchhungkhur an tih buai loh avangin kohhran leh khawtlang pawhin an ngaimawh lo ni te pawhin a lang. Buaipui ngai zawk tak chu zu in avanga ruih tum tlat te, zu ruih avanga buaina siam chhuah tum tlat-te hi an ni zawk a. Heng ho avang hian zu khap duh tam zawk pawh hian zu khap hi an duh phah niin a lang bawk. A nihna takah chuan zu inmi tam tak hian an ruih ve loh chuan zu rui hi an ngaithei bik miah lo a. Chuti a nih chuan tu pawh hian zu rui chu kan ngaithei lo tihna a ni mai awm e. Chu chu thil awm dan a nih si chuan a do loh tur zu hi do char charin a do zawk tur zu ruih hi kan lo do lo a ang ta hle mai.

Mi tam tak sawi ka hre thin a: “Zu hi amahin sual a ni lo; a awm ve mai mai a ni,” an ti thin. Hei hi tuma phat rual loh thudik a ni a, hmang khawlo kan awm thin avangin zu chu (thil sual ni lovin) thil sual tih nana hman mai chauh a ni. Tehkhin fo thin chem te pawh an tangkainaah chuan an tangkai em em a. A hmang khawlo duhtuin a hman khawloh avangin thil sual tih nana hman a ni ve thin.

Engpawh hi thilsual tih nan hman theih a ni a, Pathian thu te hlei hlei hi hmansual theih leh hmansual awlsam em em a ni. Mahse miin an hmansual avangin Pathian thu chu “sual” kan ti lem lova, “Kalsual” tiin a hmangsualtute kan dem zawk thin a ni. “Zu chu ruih theih a ni a, mi an ruih tawh chuan rilru fim an pu lova, kan do tlat hi a ngai a lawm,” tiin mi thenkhat chu an tang tlat mai thei. Han ngaihtuah thuak chuan he tanhmun hi a awm khawp mai. Mahse Pathian thu pawh a rui duh tan chuan ruih theih a ni teh meuh mai. Pathian thu rui tawh lah hi an buaipui awm em em lehnghal a, Pathian thu ruih avanga chhungkaw kehchhia leh tluchhe ta tam tak sawi tur an awm a ni. Ruih theih rau rauah do duh leh do duh loh kan neih chuan a dikin a rinawm lo. Pathian thu rui/Pathian thua kalsual kan tih te kan do ang hian zu ni lovin zurui, zu hmangsualte hi do ve ila kan ti fuh zawk ngeiin a rinawm.

“Kristian ram kan ni a, zu hi a ngampa tur a ni lo,” tih te hi kan sawi duhdan zawng a ni a. Hei hi ngaihtuahna kalsual atanga rawn piang ni ngeiin a lang. Kristian ramah zu hi a awm lo tur a ni tih hi kan sakhaw innghahna Bible-ah a awm a nih chuan kei chuan ka la hmu lova. Alo awm a nih chuan Kristian ramah chuan zu chu a awm lo tur chu a ni ngei ang. Mahse chutiang inziak a awm si loh chuan mahni duhthawhna avanga sawi mai kan nih a rinawm a, mahni duhthawhna avanga Pathian thu a nih tur ang bak bak a kalpui chu “Kalsual” an ni ve mai thei lovang maw? “Kristian ram kan ni a, zurui hi an ngampa tur a ni lo,” tih hi kan sawi dan tur ni zawk awm tak a ni a, kan inzirtirna pawh ni zawk awm tak a ni.

Zu hi thil nung, tawng ve thei ni ta se Mizo society hi court-ah min khing zing viau in ka ring. “Kei chu ti hian ka awm ve mai mai a, ruih theih ka ni tih hre rengin an taksa tana thalo chin thleng thlengin miin min in a, min ruih thlenga min in avangin min in tu khan naupang ava pawngsual a, rukte ava ru a, inchhungkhur a va chawk buai a; ‘zu vang a ni,’ tiin min puh leh daih si a, Pu Court, ka lungawi thei lo a ni,” tiin court-ah min khing ta se defamation case awrh tur hi kan tam ngawtin a rinawm. Mizoram khawchhak lamah sorkar hmalaknain kut hnathawka eizawngte’n grape an ching a. An thawhrah an seng theihna tura thi leh thau pawlh a tan an lak hnu-ah Mizoram sorkar chuan grape wine siam chhuah a phalsak a. An han hralh chhuak dawn chauh a, kan kohhran lian ber lah chuan, “Zu a ni,” tiin anchhia an lawh nghal ringawt a. Chhimlamah lah “Zu a ni,” tiin an grape wine siamchhuah, chhuang taka “Zawlaidi” tia an koh chu hralh an han phal lo ve leh bawk a. Zu pawh lo ni sek sek se enge a pawina? Kan sakhaw bu-ah lah zu do tur a nih thu kan hmu bawk si lo. Zu pawi bak tu pawi mah kan sawi lovang.

Pu Zu-a bawk hi rawn tawng chhuak leh ta se ti hian a tiin ka ring: “Mi lem changah min chhuah leh ta der mai. Kum sang tam tak zu leh wine lo nei tawh ram te’n wine leh liquor (zu) an then hran laiin Mizoram mipui chuan wine te pawh zu-ah chantirin kei Pu Zu-a hi wine min nih tir a, lem min chan tir a ni. Lal Isua’n tui wine-a a chan tir nen khan thil inang a nih miau loh avangin defamation case file mai loh chu tih tur ka nei ta lo,” a ti ngei ang.

Zu heti taka kan diriam a kan do lai hian a hmangsualtute hi a nih leh engtinnge kan tih ve? Kohhran hian a kawmserh tak tunlai hunah chuan hriat tur an vang hle. Zu rui mi kan tam teh lul nen zu inmi aiin nupui/pasal inru kohhranin a kawmserh hi an tam zawk fe awm asin. Sorkar lahin zan khat Police Lockup-a a dah chuan a duh tawk der emaw tih tur a ni bawk. A zuartute hi a hmangsualtute an ni lo; Prohibition Danin a khap avangin Dan bawhchhia an ni mai chauh a ni. Zu hmangsualtute chu ruih nana hmangtute hi an ni a, ruih vanga khawtlang leh chhungkuaa buaina siamtute hi an ni. Zu hian buaina a siam lo, mihring, zu intute hian buaina kan siam zawk a ni tih hi kan chian thar a ngai.

Zu hi thilchhe lailet dera Mizo society-in kan puh hi chu a khawngaihthlak khawp mai. Ruih theih a nih vang ngawta heti taka kan do hi chu kan tifuh lo hle a ni. Zu ni lovin zu ruite hi engtia tih tur nge tih hian kan rilru luah tam zawk tawh se kawng dik zawh tanna a ni ang. Ka han ti nawn leh sak ang e – Kristian ram kan ni a, zurui hi an ngampa tur a ni lo tih hi kan sawi dan tur ni zawk awm tak a ni a, kan inzirtirna pawh ni zawk awm tak a ni. Zu nge kan do dawn zu hmang khawlo a zu ruih chingmi tih hi beng sikin i ngaihtuah tlang teh ang u.

Similar Posts:

• Missionary hmuhchhuah zu!
• Zawlaidi-a ka ngaihdan leh a hriate ngaihdan
• Wine (zu) hi Kristiante hian kan in duh ang em?
• Bible a zu(wine/uain) lanna te..
• ZU HI SUAL A NI LO, A IN A TE PAWH AN SUAL HEK LO

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, January 10th, 2011 at 10:00 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.