mi(sual).com

Sunday inkhawm ban veleh a ruala chhuah hman loh hlauvin Lal Tawngtaina te chu ka nuai liam ta mai mai a. Amen rual chuan ka va melh zawk a, ani pawn min lo melh ralh a. Nuam ve mai mai tak chu a ni. Paula zin kualna chanchin vel kan zir lai ai mahin ‘Halelui’ ka chak zawk hialin ka hria. Inkhawm banah chuan tawite kan kal dun a. Chawhnu inkhawm laia High Sikul tlanga inhmuh kan tiam a. Rilru a phawk lek duh ngang mai.

Khatih laia kan sawi thin dan takin, hmeichhia hrim hrim kha ‘chance’ ka la neih pui ngai miah lova. Inkhawm bana kan thiante ina Card kan den lai te chuan ka phur lutuk chu awm ngaihna ka hre mang lo hial a. Thiante’n video en an rawt a. Phur vak lo chungin Bruce Lee-a channa ‘Enter the Dragon’ ngei mai kha kan en a. Rin ai takin ka en tui leh pek a,chawhnu inkhawm dar rik rual chuan ka harh zawk a, a rang a rangin kan in lam panin ka tlan hawng a.

Choka-ah lutin ka ha ka nawt nghal bawrh bawrh a. Hetiang hunah hian ka hriatrengna hi a tha tlat zel! Hmanah nula fawh dan vel an sawi laiin, nula lama kan ngaihsan em em khan ‘chance neih dawn chuan ha nawh ngei ngei tur’ a tih kha ka la hre tlat!

High Sikul tlang lam panin ka chhuak ta a. Tihtur nei lo ang deuhva kal ka duh a. Hei, tei kual vel mai mai ang hi. Mahse, ka phur em avang leh ka helhhawlh deuh avang chuan ka lo kal chak leh thin a. Sikul tlang, kan intiamna hmun ka va thlen chuan High Sikul kan rah ve hma daiha kan u ten an lo phun, thelret kung nghengin a lo ding vang vang a. Vai film ang deuhva han pan ruak ruak a, han tlan pelh deuh hleka hawi let leh vel tur emaw ni chu aw te ka ti a. Mahse, chutiang thil nikhua lo lutuk engmah ka tih ngai lovin, a awmna ka thlen ve hma deuh chuan min lo hmu a. Lung awi lo hmel pu lek lek chung hian, “I lo van thleng har ve”, a lo ti a. Engtin chiah nge ka insawi fihlim vel tak pawh ka hre mumal tawh chiah lo. Dawt ka sawi ang ka ring!

Thelret kung hnuaia thutna an siamah chuan kan thu a. Ral hla takah chuan Aizawl khua a lang pe thut a. Sikul chawlh a ral teuh tawh zia te, Saitual Tournament-a Keifang goalie(?) Sama man ban theihzia tih vel te kan sawi a. St.Peter’s-a kan Math zirtirtu, Mawngdepa chanchin te ka hrilh bawk a. Sawitur a vang tan; khua lah a tlai tan deuh der bawk si. Ka kut a rawn chelh a. Ka kuah ang nge kuah hrih lovang tih vel ka ngaihtuah nasa. Mipa hi, hetiang huna kan ngawih vang vang hian ‘next move’ tur bak kan rilruah a awm vak ngai lo ni ta berin ka hria! Mahse, ka kuah miah lo. Kut invawn ringawt pawh kha ka tan chuan kaisanna nasa tak a ni tlat.

Ni a hniam fe tawh hnu chuan haw turin kan ding a. Tlai ni tla tur eng dul raih hnuaiah chuan kut invuanin kan ding a. Thin phu dup dup chungin, ngam leh ngam lovin tlemin ka han pawt hnai a. Ka kuah ta! Ngawi rengin kan ding vang vang a. Ni lah chu a hniam chak nasa mai si. “Kan kal dawn mi?”, a han ti sap a. “Ngawi rawh, a nuam hrih”. Ni a tla dawn ta tak ngial tihah chuan ngam leh ngam lovin ka han kuai dak a, a hmui lum thar tharah chuan dimte hian ka’n fawp a. Kei ai khan a lo timi nasa. Min fawp ta deuh zawk mah mah a. A nuam pawh ka ti ta meuh lo.

Kan haw kawngah khan ka rilruah thil tam tak a awm. Ka thiante hrilh hlan ka nghakhlel a. Chutih rual chuan, ka ngaih kha a tha vak lo bawk. Ka first kiss atanga kar khat a tlin hma khan kan inthen ta daih nghe nghe a. Tun hnua ka ngaihtuah nawn leh hian, ka nuih a za deuh hlek thin.

Similar Posts:

• Hmeltha-i Kha
• Sunday Dress
• Iron maiden in Bangalore
• Sikul kan inkaltirna te hi an tha tawk em?
• TLEIRAWL HMANGAIHNA

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, January 19th, 2011 at 9:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.