mi(sual).com

Indona hmunah hian pawimawh ber pakhat chu inbiakpawhna hi a ni awm e. WW1 hunlai khan thirhrui (telegraph) in thû inchah theih mahse, hmalâm chauh thawn theih anih thin avangin indona hmuna awmte tan hmunpui lamah chanchin thawnkir leh a buaithlak thei hle thin awm e. Chutiang anih vang chuan carrier pigeons an tih mai, chanchin inpekchhawn nana an hman parva engemawzat an keng tel thin a ni.

Parva te chuan hna chi hrang hrang an thawk ve thin. A then te chu camera an pai tirin hmelma awmna thla lak nan an chhawr thin bawk!
An hna pawimawh ber erawh chu thu pechhawngtu nih kha a ni. Sipai hotute chuan thu pawimawh tak tawite an ziah chu parva keah bawm te taktea khungin an chhuah ta thin a, chutiang chuan an hmunpui lam leh indona hmun ami te chuan chinchang an inhrilh tawn thin.

America pawhin France pui turin sipai engemaw zat a thawn a. Hetah hian United States piantirh atanga lo awm tawh, unit pawimawh tak mai, U.S. Army Signal Corps. pawh an tel ve a ni. Anni ho chuan parva 600 lai mai, British sava khawitu ten an pek, thu kenchhawn dân an zirtir tawh chu an keng tel a. WW1 indo tawpna ber, Meuse-Argonneah, Verdun bialah khan parva 442 lai hman anni nghe nghe.

Chutiang parva an chhawr zingah chuan lar fal bik nalh a awm a, ahming chu Cher Ami (French – Dear friend) chu a ni. Cher Ami hi 1918 kum tawp lamah khan vawi 12 lai hetiang thu paiwmawh hi pe kualin a buai ve a. Mahse, heng zawng zawngah hian a pawimawh ber chu October 4, 1918 ami kha a ni awm e.

Major Charles Whittlesey (lawyer hlui) leh a hote, 77th Infantry Division, an dâr a Statue of Liberty lem an bel vanga “The Liberty Division” an tih mai te chu German hoin an hualbet vek tawh a. October 3, 1918 ah phei chuan nikhatah mi 500 atangin mi hliam neilo 200 ah an tlahniam hman a ni. Major Whittlesey chuan parva engemaw zat thawn chhuak tawh mahse, German hoin an hriat ve kar avang chuan an lo kapthla hmiah hmiah zel mai si. An hotu te lahin an awmna chiah an hriat loh avang chuan an puih tumna lamah an mahni awmna chu laipuiin an rawn sai/kap ta chiam mai a.

A tuk alo thlen chuan parva pakhat Cher Ami chiah an nei ta. Chutah, Cher Ami ke veilamah chuan thu tawite pawimawh em em mai a ziah chu a bur te (canister) hmang chuan a vuah ta ran a. Chu thu tawite chu, “276.4. hrulah chiah kan awm, kan laipui ten min kap mek, tawp vat rawh se,”
“We are along the road parallel to 276.4.
“Our own artillery is dropping a barrage directly on us.
“For heaven’s sake, stop it.” tih a ni.

Cher Ami chu an thlawk chhuak tan ta tih chuan German ho chuan kahthlak an lo tum leh ngei a. Ani pawh chu an kapthla dawn emaw tih turin a awm thin nangin, a thla chu a zap leh vat vat a van lamah sang tak, an kah phak lovah a thlawk chho thei ta a ni. American sipai te beiseina neih chhun chu a him ta!

Cher Ami chuan mel 25 chu minute 25 lek chhungin a thlawk thleng ta a, an tirhna hmun a thlen chuan thlawk thei ani tawh lova, zangthalin a tlu lut a. A mit lehlam an lo kahdel sak a, a ke veilam chu a vun chete hian alo la khai ve ve chauh alo ni a, a lainat awm hle mai. Chutiang chuan Cher Ami chuan American 200 bawr vel nunna chu a chhanhim ta a ni.

Cher Ami chu French sawrkar chuan huaisen lawmman Croix de guerre palm hnah chuang ngei mai chu an hlan a, American General, John J. Pershing pawhin silver medal a hlan bawk a ni. A hliam te chu theih tawpin an enkawl saka, thingin kelem an siam sak ta bawk a. June 13, 1919 ah chuan a hliam nasa tak te tuar lovin Cher Ami chu a thi ta a ni. Tunah hian National Museum of American History, Smithsonian Institution, Washington, D.C. ah Cher Ami hi tlawhtu ngah tak niin hmuh theihin an la dah reng nghe nghe a ni.

NB: Cher Ami pual hian hla leh poem te pawh phuah a awm nual.

Chhiar belh duh tan:

https://www.homeofheroes.com/wings/part1/3b_cherami.html

Similar Posts:

• Dangdai!
• Pawl rilru (Denominationalism)
• Parva sa
• Sawmfang hmun mawi
• Thau leh chêr lutuk hriattheih dan

Recent Posts:

• Thalai ni si:
• Ruatfela Nu thu leh hla
• Thingkha Par Lai – Nghatun Mut Hun (Ka tawn hriat te) !
• Chiahpuam Part II
• FANCHUN

This entry was posted on Friday, April 8th, 2011 at 1:27 pm and is filed under Information, Luangliam, Pictures. You can follow any responses to this entry through the RSS 2.0 feed. You can leave a response, or trackback from your own site.