mi(sual).com

Kristmas thlen nan ni tlem te ala awm a; Bazaar pui leh a chhehvel chu traffic a jam nileng zak a. Kalkawng hmel lang map lovin, mipuiin an hnawh khat mup mup a. Tar chak lo deuh leh naupang sawngnawi, tlema pian kim lo deuhte tan phei chuan thaw ipik thlak tak tur hi a ni.

Hawina lam apiang chu mihring lu hlirin a khat a. Chhungkua thenkhat hlim taka bazaar kal haw karah naupang an lo chiar nak nak bawk a. Hetiang a bazaar tawt zetah hian tarchhia leh naupang chilhlum sawi tur a awm mumal lo hi chhinchhiah tlak zet chu a ni.

Min tlawm thei deuh lo’m ni’, Mama/mami hei chu a to lutuk, pawisa kan nei tawh lo’ tih thawm karah khawthlang ho tawng ngat a sale…sale… sale ti a nutling/patling ring zet zeta au thawm karah sumdawng thenkhat hralh tur buaipui vanga mutmu tuah hman lo, dawrtu hmu tha leh si lo ngui hmel zet te, hralh that deuh avang a, sawhchiar hawp pah a, ‘kha kha atha ber chi anih kha, ka lakna ang chiahin ka lo pe ang che’ lo ti zuah zuah te’n he hmun hi an luahlum nitin a.

Nu leh pa thenkhat, fate’n an ngen hlek a pawisa bag hum chhuak nghal mai theite bazaar kal ni chiah hian khawsak harsa zawk, a man tlawm ber chi intlawm tir leh hram beisei te’n he bazaar bawk hi an rawn pan ve a. An sum rawn paipawn leh bazaar rate alo inmil loh phei chuan rilru hahna ngawih ngawih tur a ni. Hetianga mipui zik huai huaina karah hian kutkem nei thenkhat te’n remchang an lo melh ru ve ran bawk a. Lal thar kan hmuah dan hi pui niah niah tak hi a ni ringawt tawh mai.

Hetia an phusak mur mur lai hian vawilehkhatah aurinna atangin “Nu Pakhat pheikhawk la tu khan rang takin rawn dah let leh rawh, i rawn dah let leh vat a nih loh chuan, police hnenah pek i ni ang. Kan hrechiang hle che a, I thawmhnaw hak pawh a var, naupua i ni” tih chuan Bazaar pui chu a fan hneh kher mai. Sumdawng pakhat phei chuan, a bula inkhar chhawng bawk hnenah chuan fimkhur a ngaih zia a han hrilh nghal zat a.

A piah lawk a mi chuan, a thawmhnaw zawrh lai ngei, tu emaw in an ruksak daih thu a rawn sawi chhuak ve nghal bawk a. A piah leh deuh a mi chuan, a hma ni chiah a rawlthar pakhat retheih hmel tak rukruk avanga police’in an rawn chaih thu a sawi bawk a. Kutkem nei/ruk hmangte hi chu YMA emaw police’in emaw hlap hrep mai se tih a duh thu a han sawi zawm zat a. Mi fel thiau kalkhawm zingah chuan he nu dinhmun hi Uire nu dinhmun chiah kha a ni ta.

He nu hi tunge a nih tih te, khawi khawchhuak nge a nih a, eng hnathawk nge a nih tih te, a nau puak lai hming hi tunge a nih tih ka hre hauh lo. Ka suangtuahna ram erawh a fan hneh hle thung si. Ti hian zeldin thubawlin ka han ngaihtuah zawm ve ta mai mai a.

He nu naupua hi a rethei em avangin a fate thawmhnaw thar leina tur a intuak ngah hman hmain Kristmas’in a rawn nang ching dawn ta si a ni. A pasal dam lai nise heti em em a ni bik lo tur! A fate thawmhnaw lei nan a pawisa khawl tlemte tak meuh nen Bazar pui pan tumin hemi ni tak hian a insiam ve a.

A fa upa zawk chuan a nu hnena ni danga a lo ngen fo thin pheikhawk, a thiante neih ang, a awh ve ngawih ngawih chu lo hawn ngei turin a chah lawm lawm a. Hmanhmawh baklengin a fa naupang zawk paw chungin bazaar hi an rawn pan ve ta a ni. A fa te tan thawmhnaw thar awt hle mahse, a pawnfen chhung lama a pawisa pai nen a inmil loh em avangin second hand zawrna hmun a han pan ding nghal a. A man a han zawt hmasa te te a, a man tlawm ber chu tlawm a han dil leh hram hram a. A fa te’n thlasik chhunga an hak tur chu a lei ngah ve ta thuai a.

A kal chhan ber, a fapa upa zawk pheikhawk zawngin a kalsawn leh ta nghal a. A piah lawkah chuan, a fapa pheikhawk duh ang chi ngei chu an lo zuar tlar tuar a. Thenkhatin an lo bawrh laih a, ani pawh chuan a han thlek thuak thuak a, a man a han zawt nghal a. A duh aia to an chhiar ta tlat mai.

Lehlam hawiin a pawnfen chhunga pawisa neichhun chu a han bih ngial pawhin a daih ta hauh si lo. A fapa duat em em tan pheikhawk thar hawn ngei turin alo intiam tawh si! He pheikhawk tel lo hian a fapa hmel a hmu ngam dawn em ni? Inthlahrung leh zak tak chungin dawr neitu hnenah chuan tlawm a han dil ta rawih a. Dawr neitu chuan tlawm tum hmel a pu lo va.

Kristmas dawnah hi chuan thil hralh a kal em mai ti hmel a pu hliah hliah zawk a. Dawrtu dang tihbuai hlau bawk si, beidawng zetin a han kal kiang hlek a. A piah deuh atang chuan, a fapa pheikhawk awh em em chu a han melh leh vawng vawng a. A rilru a buai ta takzet. Haw mai tur em ni dawn le?

Hetia a inngaihtuah buai lai hian a fapa hnenah Kristmas pheikhawk thar hawn ngei a tiam laia a fapa hmel hlim em em kha a mitthlaah alo lang zui leh ta nghal a. Ama hriat tawk lek hian, ‘he pheikhawk hi ka hawn ngei tur a ni’ a han ti sap a. Pheikhawk zuartu chu muang changin a han pan leh ta a.

Tlawm leh zah pawh dawn lovin, ‘Ka pu ka fapa hian he pheikhawk hi a awt em a, pawisa ka neih daih ngang tawh si lo va, min tlawm thei hram lo em ni’ a han ti leh a. Dawr neitu chuan rang fahranin “kan lakna aia hniam chuan kan pe thei lo, i duh leh hmun dang ami va zawng mai rawh” a ti ta hmuk mai le.

Thu a tawp ta tak zet tih he nu hian a hrechiang ta hle. A vela mipui phu mur mur hnen atang chuan tanpuitu hmel a lang lo va, tanpuitu tur melh a tum hek lo. Beidawng taka a din reng lai chuan, a rilruah ngaihtuahna tha lo tak rawn lutin kawng awmchhun ni a lang ti tur chuan pheikhawk zawrna hmun chu a han hnaih leh ta zauh a. Dawrtu dangin an bawr buai laih laih karah chuan va inrawlhin pheikhawk chu a han ban ru zeuh a.

Rang takin a shawl bah hnuaiah chuan a han thukru ta nghal a. Thinphu dawt dawtin bazaar atang chuan inlam panin a kal nghal ta sawk sawk a. A thil tih dik lo tak avang leh hlauhthawn luat vang in a biangah chuan mittui a luang ta hial a. Hetia bazaar pui a kal chhuak tep ta tih ah hian aurinna chuan a rawn ko leh ta si a ni.

Mizoramah Krismas kan hman dan hi mi tam tak tan chuan phurrit ava ni teh lul em. Thenkhat te’n thawmhnaw tha lei an harsat hauh loh lai hian thenkhat tan phurrit a ni ngawih ngawih si. Mi te’n thawmhnaw thar an neih sup sup laia thawmhnaw thar nei zo ve lo naupang rilru tur hi sawi tam a ngai awm lo ve.

Kristmas thawmhnaw mawi leh tha kan lei tan tan lai hian kan velah Kristmas thawmhnaw nei zo lo mi tam tak an awm a sin! An tan enge kan tihsak tawh le? Christmas thawmhnaw kan lei thinna aiah hian midang thawmhnaw ka lei sak tawh em? Chhungkaw kim a hlim taka kan hman ringawt hi ka duh tawk em ni? Kristmas zinga chhungkaw kima sa hmeh thei kan nih avangin, lawmthu sawia tawngtai ringawt hi kan duh tawk mai dawn em ni?

Thawmhnaw thar bakah kan inchhungkhur leh a vel cheimawina zawng zawng te hi harsa zawkte tanpui nan kan pe phal zawk lo em ni? Midangte tan malsawmna tih pawh hi laina hnai leh duhsak zawngte hnenah bitliah neiin em ni kan tih thin? Remna Lal kan hmuh mek hian Kristmas kan lawm danah hian a lawm ang em?

Hetiang thil ringawt ka suahtuahna a awm lai hian Bazaar chhungril fe ka lo lut tawh a. Mi tamtak te’n Kristmas thawmhnaw chu sawi loh, mahni inthuamlumna tha pawh an neih loh lai a, mahni duh zawng thawmhnaw lei tura bazaar ka pan kha ka zak ta hle mai a, tunkum chu keima tan ni lo vin, midang tan thawmhnaw ka leisak ve tur a ni’ ka ti ta a.

Similar Posts:

• Krismas Bazaar
• Pheikhawk Tawt
• Krismas Bazar thu
• Nupui leh pheikhawk
• “Christmas Shoes” – New Song

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, December 11th, 2011 at 9:33 pm and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.