Vawiin chu tlema khal tha deuh lam I han thlir ho teh ang u. Dan leh Khawngaihna hi Ringtuten kan thliarhran chian thiam loh chuan FB group hrang hranga zirtirna danglam leh mak tak takte kan chhiar thin hunah kan buai chhe palh hlauh dah ang e.
Dan leh Khawngaihna hi Pathian thuin a thliar hran, chawhpawlh loh tura a tihhran tlat a ni. Chuvangin an hun (Dispensation) pawh a dang ve ve a ni. Dan hi Mosia hmanga pek ani a, khawngaihna erawh chu Isua Krista avanga lo awm a ni.(Johana 1:17).
“Dan” tih hian Mosia dan Pathianin Sinai tlanga Mosia a pek kha a ni tih kan hrereng tur a ni. Tin, dan hi thuah thum a ni.
1. Rilru lam dan (Exodus 20:1-17 =Thusawm pekte)
2. Vantlang dan (Exodus 21:1-24
3. Serh leh sang dan (Exodus 25:1-40)
Amaherawhchu, Mosia hma hian ‘Dan’ awm lovin emaw, anih loh leh Krista hma hian ‘Khawngaihna’ awm lo angah kan ngai mai tur erawh chu a ni lo. “Sual hi Dan bawhchhiatna a ni si a” (I Johana 3:4). Tin, Adama sualna pawh kha Pathianin huana thei ei dan tur a lo siam tawh bawhchhiatna a ni. Tin, Evi leh Adama’n huana theirah an ei hnua an nunna zuaha an awmnaah khan ‘Khawngaihna’ chu a lo langin thil a ti ta a ni.
Dan thil tum chu:
Dan hi mihring thiam chantir nana pek a ni lo, Dan thiltih avangin tumah Pathian mithmuhin thiam changin an awm lovang (Rom 3:20 & Galatia 2:16). Dan chu miten sual an hriat nana pek a ni zawk. “Dan avangin Sual hriatna a lo awm si a” (Rom 3:20). Danin “Awt suh” ti lo sela Mihringin ‘awh’ hi sual a ni tih an hre dawn lo a ni. (Rom 7:7). “Ka tinreng a chip theih nan leh khawvela mi zawng zawng Pathianin rorela an awm theih nan” Dan hi pek a ni (Rom 3:19). Mite Krista hnena hruaitu tura zirtirtu atana pek a ni.(Rom 3:23-25).
Tin, Serh leh sang dan zawng zawng kutte leh thilhlante khan Krista a lo entir vek a ni. Tunah Krista chu a lo kal ta a, Judate leh Gentailte chu Mosia Dan hnuaiah an awm tawh lo, Amahah chuan Dan zawng zawng chu a famkim tak a vangin. Tichuan, “Krista chu a ring apiangte tan felna turin Dan tibangtu a ni” (Rom 10:4). Chuvangin ringtu chu Dan lakah chuan a thi tawh a ni(Rom 7:4, Galatia 2:19) chu chu Dan hnuaiah a awm tawh lo va, khawngaihna hnuaiah a awm ta tihna a nih chu.
Khawngaihna chu le:
“Rinna avanga Khawngaihnaa chhandam in ni si; nangmahni thawh chhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e”(Ephesi 2:8-9). Hemi Pathian thu atang hian Khawngaihna chu thilthlawnpek (Gift) a ni tih kan hmu a ni. Chuvangin miin chhandamna hi a hnathawh vanga hmu a nih chuan chhandamna hi “hlawh” tih tur a ni zawk ang. A nih loh leh chhandamna hi that mana pek a nih chuan, “Lawmman” tih tur a ni zawk bawk ang. Chutia miin chhandamna hi “hlawh” ang emaw “Lawmman” ang emawa a hmuh a nih chuan THIL THLAWN PEK ni lovin a phu reng vanga hmu a lo ni anga, “Khawngaihna” pawh a ni lo bawk ang. Khawngaihna hi Dan kan zawm theihna tura thil enge maw kan hnena pek a ni lo va, Khawngaihna chu PHULOH ZAHNGAIHNA a ni. Khawngaihna hnar chu ‘Pathian Hmangaihna’ a ni.
“Pathianin khawvel a hmangaih em em a, chutichuan a Fapa mal neihchhun a pe a, Amah chu tupawh a ring apiang an boral lohva, chatuana nunna an neih zawk nan”(Johana 3:16).
Khawngaihna luanchhuahna chu Krista a ni. “Khawngaihna leh Thutak Isua Krista avangin a lo awm” (Johana 1:17, Tita 2:11)
Khawngaihna hmanrua chu ‘Rinna’ a ni. “Rinna avanga khawngaihnaa chhandam in ni”(Ephesi 2:8) Thil mai mai rinna ni lo, mihring ngei Isua Krista rinna kha a ni-chhandamna chu.
Tunah Dan leh khawngaihna inpersan zia chu i lo en teh ang u.
1. Thisen leh Uain.
Dan aiawha Mosian thil mak a tih hmasak ber chu tui Thisena chantir a ni a, chu chu Thihna entirna a ni(Exodus 7:19-21). Khawngaihna aiawha Isuan thil mak a tih hmasak ber chu tui Uain-a chantir a ni, chu chu Nunna entirna a ni. (Johana 2:7-11)
2. Thimna leh Eng.
Danin a thiltih theih tawp chu Thimna a ni. Mosian Aigupta ram chu thim chhah mup main a khuhtir ang khan,(Exodus 10:22,23), nimahsela, Khawngaihna chuan Eng a pe, Isuan ‘Kei khawvel Eng(Light) ka ni” a ti(Johana 9:5). Isua hi taksa mitdel tivar tur chauh va lo kal a ni lo va, thlarau mitdel tivar tur pawhin a ni.
3. Thihna leh Nunna.
Aiguptaa hremna hnuhnung ber chu Thihna a ni. Fatir thihna chu (Exodus 12:29,30) Dan tawpna chu Thihna a ni (Rom 6:23). Krista thilmak tih hnuhnung ber pakhat chu Nunna pek a ni(Johana 11:41-44). Dan an puanchhuah tirh ni chuan mi 3000 tihhlumin an awm a(Exodus 32:26-28), Khawngaihna puanchhuah tirh ni chuan mi 3000 chhandamin an awm ve thung a ni. (Tirhkohte 2:41)
4. Hlihna leh Thuamna.
Kan pianpui sualnaah chuan, Samari mi tha tehkhin thua ‘hlihsak vek’ leh ‘Vuak nek’ thi tura kawng sira hnutchhiah ang kha kan ni a, Puithiam leh Levia chi chuan Dan ang maia engmah tanpuina nei lovin min relhruksan a, Khawngaihna erawh chuan Samari mi tha angin kan awm hmunah min rawn pan a, hriak leh Uain chu min leih a, ama chuanna tur chu min kianin a sa chungah chuan min chuantir zawk a, nakina kan mamawh tur thleng chuan min ngaihtuah sak ta a ni.
5. Zawnna leh Chhandamna.
Dan chuan, “Hmuh theiha a awm laiin Lalpa zawng rawh u” a ti a. Khawngaihna erawh chuan, “Boralte zawnga chhandam turin Mihring Fapa hi a lo kal a ni” a ti(Luka 19:10). Beram bo Tehkhin thu hian thil mak tak a tilang. Beram hlohtu mangang ang khan beram bo chu a mangang ve hauh lo mai.
Adama’n thil sual a tih a, a tlan bo lai khan Pathianin, “Adam ka tel lovin nang zawng I awm thei ani ang e, kei zawng I tel lovin ka awm thei lo ve” a ti a ni. Tichuan Khawngaihna chuan a zawng ta a ni.
6. “Thawk la nung rawh” leh “Nung la thawk rawh”.
Dan chuan, “Thawk la I nung ang” a ti a(Leveticus 18:5). Khawngaihna erawh chuan, “A kin ta” a ti. Tumah a thiltihin a chhandam lo vang, amaherawhchu, ringtu chuan a thawhman Lawmman a hmu ang. Kraws panin hna kan thawk tur a ni lo va, Kraws atangin kan thawk zawk tur a ni. Thiltha ti atana khawngaihnaa chhandam kan ni si a.
7. Chhiahhlawh leh Fapa dinhmun.
Dan chuan Thingbuk alhah khan Mosia hnenah “I pheikhawk phelh rawh” a ti a,(Exodus 3:3-5) Eng vang nge? “Chhiahhlawh a ni(Hebrai 3:5). Khawngaihna erawh chuan Fapa tlanbo in lam rawn pan leh hnenah chuan “Pheikhawk buntir rawh u” a ti a ni.(Luka 15:22), Eng vang nge? Fapa a nih avangin (v.24)
Dan chuan a hnawtchhuak a, Khawngaihna erawh chuan a lawm a.
Dan chuan khupte a thingthittir a, khawngaihna erawh chuan a fawp a.
Dan chuan a hrem a, khawngaihna erawh chuan a ngaidam a.
Dan chuan a hlip vek a, khawngaihna erawh chuan puan tha ber a sintir a.
Dan chuan a tihlum a, khawngaihna chuan a tinung zawk a.
Dan hnuaiah chuan Beramte chu Berampu tan talha hal ralin an awm thin a, khawngaihna hnuaiah erawh chuan BERAMPU chu Beramte tan a thi ta zawk a ni(Johana 10:14,15)
Dan chuan ‘Thianghlimna’ a phut a, khawngaihna chuan a pekin a pe zawk a ni.
Dan chuan “Dan bua tih tur ziak zawng zawngte zawm vek lo apiang chu ‘anchhedawng’ an ni” a ti a, khawngaihna erawh chuan, “a bawhchhiatna ngaihdama awm leh a sualte khuha awm chu a eng a thawl e, Lalpan khawlohna neia a ruat loh chu a eng a thawl e, a ti zawk a ni.
Dan chuan “Lalpa I Pathian chu, I thinlung zawng zawngin, I rilru zawng zawngin, I chakna zawng zawngin I hmangaih tur a ni” a ti a, khawngaihna erawh chuan “Hei hi hmangaihna a ni, keinin Pathian kan hmangaih ni lovin, Amahin min hmangaih zawk a, A Fapa kan sualte thupha chawi nan a rawn tir a ni” a ti.
Dan hnuaiah chuan Sual thawi sak ngai Puithiam ten Kumtinin Sual thawina an hlan a ngai a, Khawngaihnaah erawh chuan, chatuan atan Isua Krista inhlanna kha pawm a ni.
Dan chuan “Dana thil tisual apiang chu Dana rorel sakin a awm ang” a ti a, khawngaihna erawh chuan “Krista Isuaa awmte tan chuan thiam loh channa(Sual rorel sak na) reng reng a awm tawh lo, Thihna ata a chhuak a, Nunnaah a lut ta zawk a ni” tiin a puang ta a ni. (Johana 5:24)
Chutichuan, Chhandama awm turin Sual lutuk te, bawlhhlawh lutuk te, khawlo lutuk tein i inhria a ni thei e. Chutiang sual berte chu a ni, “Chanchin tha hi a ring a piangte tana chhandamna tura Pathian thiltihtheihna a nihzia entir tura a duh berte chu an ni”(Rom 1:16).
Misual chhandama an awm hian Pathian khawngaihna chu tihropuiin a awm thin a, Aw Pathian hmangaihna thukzia leh sanzia hi chatuan pawhin kan puang zo seng ngai lo vang.
Sunday hman nuam vek u le.
Similar Posts:
- Kraws Thu
- Thlarau Thianghlim (Pentecost Pual)
- Chhandamna (Sunday Pual)
- Ringtute chunga Pathian beisei leh duhzawng{Sunday Pual}
- Tunlai ka mutmawh hnarmawh.
(Y)
February 26th, 2012 at 6:03 am
Chhiar ang
Report this comment
February 26th, 2012 at 7:21 am
A va ropui em, chhiar nawn leh teh ang.
tren tren.
Report this comment
February 26th, 2012 at 7:43 am
Chhiar ila
Report this comment
February 26th, 2012 at 7:43 am
Sermon ropui, Pathian thu mitamtak hriat thiam loh inrem khawm a ni ber e. Dan chungchangte khi a va dik em. Tin, Kraws panin hna kan thawktur a ni lo va, Kraws atangin kan thawk zawk tur a ni, tih te hi a nihna tak hlir a ni. Belh leh paih tur a awm lo a ni e, ka tan chuan.
tren tren
Report this comment
February 26th, 2012 at 8:02 am
Report this comment
February 26th, 2012 at 8:39 am
A tha khawp mai. Sawi belh/sawi zui chakawm tak2 a awm tan dawn e.
Report this comment
February 26th, 2012 at 8:55 am
A van tha thin tehlul em! ‘A lanna tlang dang atangin’ tihte pawh hi pu Pk rawn ti teh, i sawi ngaihnawm thiam dawn em mai…
Report this comment
February 26th, 2012 at 9:08 am
Post tha tak a ni e …
‘Dan leh Khawngaihna’ hi Exodus 20-ah pawh a lo inphum vek tawh. Thil kal dun zel an ni. “khawngaihna lantir thintu…” tia ziak tel a nih kha. Dan lam ringawt buaipui Pharisaite hnenah khan ‘khawngaihna’ zir belh turin Nazareth Yeshua khan a hrilh kha. Mi thenkhatten KROSS atanga KHAWNGAIHNA awm tan chauhva an sawi fo hi thudik a ni lo.
Dan leh khawngaihna illustration mawi tak chu Uire nu denhlum an tum chungchangah khan a ni. Dan a nunzia chu TISUAL LEH TAWH SUH tia thlah a ni a; Khawngaihna hmanga chhuah zalen a nihzia kha KAL LA tih a ni.
KAL LA (khawngaihnaa Dan chunga thuneitu chhuah zalen) a ni pang a; TISUAL LEH TAWH SUH (Dan petu thuneihna dan riral lo) kan hmu zui. Thenkhatten Dan hi kross-ah NAILED a ni tawh tiin Thupek Sawm an bawrh. Eng dan nge NAILED an chhut chiang lo fo.
Kross-a nailed kha ‘ORDINANCES of handwriting on paper’ a ni a. Thupek Sawm khan hremna dan a keng tel lo. Tih tur leh tih loh tur inziak a ni tlawng a. Nazareth Yeshua khan precis takin, chhawp hnihin a rawn chhawp a. Hmangaihna huang hnih —Pathian leh thenawm-khawvengte hmangaihnain. I Korinth 13 pawh hian Hmangaihna a chawisang zui hle a. Thupek Sawm hi NAILED a nih lohzia a fiah hle. Thupek Sawm kha tihbo ahnekin TIHLEN (magnified) a ni zawk bawk. A lo berah mi pahnihin an va phawk kher loh pawhin, NGAIHMELH ringawt rilru duap pawh UIRE a nih theih tak kha le!
Thupek Sawm bawhchhiat khan dan (ordinances) dan, thil bat phut rulh ngai a awm. A sual thawi nan ran a rawn ken a ngai thin. Ran thisen kha Thupek Sawm khan a phut thleng lo. Mahse, Thupek Sawm zinga a engemaw ber BAWRH a nih khan, Thuthlung Hmasa huna ORDINANCE khan PHUT a nei thin tih hai lo ila. A tharah chuan Messia thisen hlu kan lo nei tawh a … Sawipuitu leh Puithiam Lalber rawng min bawlsaktu Tholeh Yeshua Messia neitu tan chuan Thupek Sawm la ding reng leh KHAWNGAIHNA-a kan tihsual PALH min ngaidamtu leh dilpuitu hi kan zahpah a ngai tawh zawk. Jakoba Lehkhathawnah khan, Dan zinga a pakhat BAWRH pawh kha THIAM LOH CHANNA a la nih zuizia a tarlang nawn leh kher kher bawk. Thupek Sawm zawm avanga CHHANDAM kan ni lo nachungin, Thupek Sawm bawrh lui chung reng chuan Chatuana Nunna hi sawi hlawrh hlawrh a ni ringawt lo.
Traffic Rule i bawhchhia a. Hrem i ni ngei dawn. I bawhchhiat dan azir leh i inphahhnuai azirin Traffic SP, Dan lekkawhtu chuan a chawitir thei chein, Dan chunga thupetu chuan a khawngaihnain a chhuah zalen thei che.
A chhuah zalen ta che a nih chuan, KHAWNGAIHNA a ni e. Khawngaihna chuan a chhuah zalen tak che avangin Dan bawhchhe zui lehchhen tur chein a chhuah hauh lo che. Ringtu dik nih rau rau chuan THUAWI BAWIH a ni tur a ni.
PKFanai thuziak tha lutuk ka rawn tuihnih ve leh ta ngawt!
Report this comment
February 26th, 2012 at 9:26 am
Ka beisei ruk ang takin Pu chawnghilha a rawn lang a, a lawmawm e. Pathian thu laipui pui tham leh ril lutuk tak mai hi post pakhata tarlan kim kilh kelh a harsa thin a, Inkhawm ban lamah ka la rawn review leh ang.
Report this comment
February 26th, 2012 at 12:07 pm
Mosian tui thisena a chantir kha “an pathiante a hrem” tih thuphunga ti a ni tih hriat a tha. Nile luipui kha Aigupta miten pathian biaka an biak, zing taka Pharaoa va inlanna thin a ni. Tin, thisen hi Aigupta mite trih zawng tak thil a ni bawk.
Hripui sawm lai kha Aigupta mite biak thin pathiante hremna vek a ni. Mosia aia ropui zawk Iesua Messia kan nei … Mosia hnawlna ni hauh chuang si lovin.
Report this comment
February 26th, 2012 at 3:00 pm
a tha ang, ka chhiar chhuak hrihlo lawks… tih law law chuan scofield’s dispensation 7 kha rawn pharh duai law law la… innocence, conscience, govt. & religion,promise, law, grace,theocracy te kha….
Report this comment
February 26th, 2012 at 3:21 pm
Kolossa 2:11 Kristâ serhtannaah chuan tisa taksa hlip vekin amah vekah chuan kuta serhtan ni lova serh tan in nih kha;
2:12 baptismaah chuan a hnena phum in lo ni ve tawh si a, chu mi vekah chuan mitthi zing ata amah kaithotu Pathian hnathawh rin avanga a hnena kaihthawh in nih ve kha.
2:13 Tin, nangni in bawhchhiatnate leh in tisaa serh tan lohna avangin thi in lo ni a, nangmahni ngei chu amah nen a tinung che u a nih kha; kan bawhchhiatna zawng zawngte min ngaidam a,
2:14 batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta a,
2:15 tin, lalna leh thuneihnate chu hlip thlain, chu kraws-ah chuan chungte chu hnehin, a langin hriattir nan a hmang ta a.
2:14 batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta a, (blotting out the handwriting of ordinances (Greek DOGMA) that was against us, which was contrary to us, and took it out of the way, nailing it to his cross …
HANDWRITING OF ORDINANCES (batna lehkha thupeka ziak) hi DECALOGUE nen thuhmun a ni ngai lo. Decalogue kha Ark of Covenant chhunga dah a ni a; handwriting of ordinances ve thung hi chu Ark of Covenant pawna dah a ni thin thung. Handwriting of Ordinances khan a lo dodal thin thilte chu engnge? RULH NGAI a awm thin. Decalogue bawhchhiat khan Handwriting of ordinances zawk khan RULH LET dan kawng a dapsak thin … beram hmel hem lo/thuro tuak te a ngai a, chhangphut leh hriat a ngiat a —sualthawina chi hrang hrang ngai tawh lovin, Amah Messia ngei kha inthawina famkim a lo nih tawh hnuah chuan “dan tibangtu” tia kan neih hi TIBANGTU tih hi hriatsual a hlauhawm. TIBANGTU tia kan neih hi BILHBAWLAWKNA (telos) a ni zawk e.
“Dan tibang tura rawn kal ka ni lo va, tifamkim tura lo kal ka ni zawk …” titu khan Genesis – Deuteronomy inkar thu hi tihbo a rawn tum lo va … inthawina neuh neuh zawk Ordinances lamin a lo ngiat thin zawka kha a thihna kross-a khenbeh tel a nih thu a ni zawk e.
DAN leh Khawngaihna PHUBA/khawngaih avanga THIL PHUT LET hautakte aiah khan DAN leh KHAWNGAIHNA pumpuhlum a ni chiang fel ta zawk bawk.
Report this comment
February 26th, 2012 at 3:34 pm
In khawngaih theuh u la,Isua a lawm ang!
Report this comment
February 26th, 2012 at 4:43 pm
Tha hle mai.
Ka chhiar ning thei lo. Ka hrethiam tawh huai mai. Ka lawm e.
Report this comment
February 26th, 2012 at 5:26 pm
Chawnghilh sawi ang khian, Thuthlung Hlui hian Kross a rawn thlir (target) vang vang a, Thuthlung Thar pawh hian Kros bawk hi target chungin, bul tan nan a hmang a ni.
Chuvangin, “Dan leh Khawngaihna” chungchang kan sawi hian, Lal Isua hian Dan hi a rawn titawp vek emaw tih-palh a awl hle, mahse, Lal Isua ngeiin, “Dan ti-bang tura lo kal ka ni lova, ti-famkim tura lo kal ka ni zawk” a ti a ni.
Tin, Chawnghilh sawi “Hripui sawm lai kha Aigupta mite biak thin pathiante hremna vek a ni” a tih khi a dik lutuk, Aigupta mite biak lai pathian 10-te kha Pathianin Mosia kaltlangin chiang lutuk-in a rawn tlawm (hneh) hlawm a ni.
PKfanai, rawn ti zel teh, ka hlawkpui takzet e.
Report this comment
February 26th, 2012 at 6:40 pm
Aw le Ku PK an ka tui zawng tak a rawn sawi ta. Dan leh khawngaihna a rawn sawi a, dan hmanga kan tlin lohna chu khawngaihna hmanga chin fel niin, khawngaihna in chhandam kan ni ta..a ropui e. Amaherawhchu khawngaihna avanga chhandamna hian mawhphurhna min pe tel ani tih erawh zoram kristian te hian kan hriat a hun. ‘Thil tha ti atan Krista Isua ah chuan siama awmin a ma kut chhuak kan ni si a; chu thil tha tih chu kan awmna turin Pathianin a buatsaih lawk a ni.( ephesi 2:10). He thil tha tih tura siam thar kan nihna tak hi kan hriat loh thin a vangin piangtharin a ei ru a, piangthar thalai hruaitu in nula a rai a, piangthar zoram kristian a za a za kristian inti ramah sualna a pun lun telh telh mai ani. Khawngaihna a chhandam kan nihna hian mawhphurhna sang lutuk a keng tel tih hi i hre thar zel ang u.
Report this comment
February 26th, 2012 at 6:55 pm
Ephesi 2:8, rinna a vanga khawngaihna a chhandam kan nih tih kan hriat rual hian, a chhun zawm tu 2:10 thu hi kan hmaih ta thin a. Hei tak hi a ni Zoram hi camping tam berna ram, total population aia piangthar zat tamna ram a lo nih takna chhan. Khawngaih thei, thinnel tak anih thu kan sawi rual a, thikthu chhia Pathian a nih zia hi kan hriat thin loh vang ani.
Report this comment
February 26th, 2012 at 7:05 pm
Dan leh khawngaihna kan sawi ta sa sa..Dan hmanga i tlinna ah chuan i tan mawhphurhna reng a awm tawh lo. Dan chuan thiam a chan tir tawh si che a. Nimahse la chu dan hmanga chhandam chu kan luah phak tak si loh a vangin khawngaih a vanga chhandam ngai kan ni ta. A kawng a awlsam sawt.Amaherawh chu dan hmanga thiamchang ten ( Isua Krista lo pian hma) mawhphurhna an ken tel ve a ngai loh laiin (Thusawm pek an zawm famkim tawh) Kei ni dan hmanga thiam chang ve zo lo ( thu 10 pek zawm famkim ve thei lo) te tan khawngaihna a chhandamna kawng chu hawnin a awm a. Nimahsela, chu khawngaina a vanga chhandamna chuan mawhphurh na sang tak,’ thil tha ti a tana chhandam’ nihna min pe tel a ni. Kan thiltha tih a vanga chhandam ( dan hmanga chhandam ) ni ve tawh lovin, kei misual, nang misual kha ‘thil tha ti a tan’ khawngaihna a vang liau liau in chhandam kan lo ni ta anih chu.
Report this comment
February 26th, 2012 at 7:19 pm
Khawnge kan tui ta sa sa..Ephesi 2:8 a khawngaihna a vanga chhandam nih hnu lam kha i chhui zel ang aw. 2:32 ah chuan, ‘ nang ni pawh amahah chuan Thlarauva, Pathian awmna tura rem khawm in ni’…4:25 ah, ‘Chuti chuan dawt sawi bansanin, mahni thenawm hnenah thudik sawi theuh rawh u;..Khawngaihna a chhandam te hian kan ti puitling meuh em aw?? 5:21 ah ‘Krista tih dekin in tulut tawn theuh rawh u’..kan in tulut emaw chiah chu..nge khawngaihna a chhandamna ah kan duh tawk leh mai dawn??..chuti chuan nupa awm dan tur te, nu leh pa leh fa te awm dan tur te chenin khawngaihna a chhandam te awm dan tur chu a rawn sawi ta zel ani..A tawp berah phei chuan Sual do tur a in thuam turin min fuih ta hian anih kha ( Ephesi 6:10 ). CHUVANG CHUAN KA RAWN SAWI TUM BER A CHU..KHAWNGAIHNA AVANGA CHHANDAM KAN NIHNA HIAN MAWHPHURHNA SANG LUTUK MIN KEN TEL TIR A…HE KAN MAWHPHURHNA MIN PEK HI HLEN ZO LOVA, KHAWNGAIHNA A VANGA CHHANDAM NIHNA RINGAWTA KAN CHIAN HIAN VANRAM MIN THLEN DAWN LO..ZORAM KRISTIAN, KHAWNGAIHNA A VANGA CHHANDAM TE HIAN, KHAWNGAIHNA A VANGA KAN CHANVO KAN CHAN A VANGA KAN MAWHPHURHNA HI I HRE NAWN LEH ANG U.
Report this comment
February 26th, 2012 at 7:29 pm
Thenkhat kalsual in ‘Chhandamna a bo theilo’ an tia, an duh dan dan a nung zui ta mai te pawh an awm ania, buaithlak hlawm
Report this comment
February 26th, 2012 at 8:07 pm
Tha lutk, pu pk
Next week ah kan veng nuho bible study coffee tih hunah kan lo discuss ve ang. Enge ka lo sawipui ang ka lo tih lai takin. Grt!
Report this comment
February 26th, 2012 at 9:14 pm
Pathian thu hi vawikhata sawi zawh vek theih ani lova, “Isuan a Hmangaih che” tih ringawt pawh atawk thei tho bawk. Doc-a leh Pu chawnghilha te Dr.John-a te thahnemngaihna khi a dik chiah; ka rawn hawl tel tho chuan ka hria. Thiltih avanga chhandam kanni lo va, Thiltha ti tura chhandam erawhchu kan ni. Tin, Comment no-4 a chhuaklinga Comment ang deuh khian, Kraws hmalam leh Kraws hnulam hi ngaihfin tur ani lo. Kraws hmalamah chuan, ‘Rinna avanga khawngaihnaa chhandam kanni a, Thiltih avang anih loh thu uar a ni a, Kraws hnu lamah erawh chuan “Rinna chu Thiltih tello chuan ‘THI’ a ni” tih alo ni daih tawh si.
Report this comment
February 27th, 2012 at 8:14 am
#22 and doc-lib : You gather most. God bless you all and yours.
Report this comment
February 27th, 2012 at 8:23 am
Sheldon170 : Chhandamna a bo thei lo. Chhandamte hi bo leh thei dinhmuna ding erawh chu a awm theih.
Rameses-a beram no thisena tlante kha chhiar ngun chi, admonition pui tak kan tana ziak an ni. Rameses atanga kalchhuak 2 chiahin Ram Tiam an thleng. Thisena tlanchhuah hlutna a bo chuang hauh si lo.
Hebrai Lehkhathawnah pawh ‘anni anga kawnglaka tluhlum lo” tura fuih nawn kan ni. Infuih a ngai … Pilgrim’s Progress kha allegory tha tak a ni. Boralna khua atanga Kross kha Chapter 4 vel lek a ni… Van Lalram kawng zawhna bumboh kha Chapter tam tawk a ni zui a. Kross piah lama riral an tamzia kha …
I rawn ziak tha hle.
Report this comment
March 4th, 2012 at 2:49 pm
Comment chu sei hlawm tiah tiah asinnn!!
Report this comment
March 4th, 2012 at 2:55 pm
@ Tsa Nia, He topic hi chu Bible thulaimu a tih theih deuh tlat a.
Report this comment
March 5th, 2012 at 3:30 am
bipolar symptoms in women…
[…]Dan leh Khawngaihna (Sunday Pual) | mi(sual).com[…]…
Report this comment
June 6th, 2015 at 10:06 am
[…] SOURCE : mi(sual) […]
Report this comment