Zoram hmasâwnna sawi ve fo pawh hi eiru thei dinhmuna din vè châk vàng, midangte aia ṭha bîka inhriat vàng leh rawlthar tilpàwr thukhawcháng mai mai a ang tawh a. Ram vei nih a sâwt tawh lo, tumah kan inring zo tawh tak tak chuang lo a nih hi, tiin a ngaihtuah theih a. Mampui, tar alamah thu min ràwn duh i nei em? Engnge, kan ram veina thinlung púa sawi duh te i nei mial lo maw? Thla ëng lawm pahin i han titi mai mai teh ang!
Ram vei hi a sâwt tawh lo a ni lo va, tünhmáa ram vei nia kan inhriat dàn kha a dik lo tih kan vàrpawh chho ṭan mék niin ka lo ngái vè mai mai ṭhìn a. Rinawm taka mahni hna thawh bâk hi thil sawngsawhlawt a lo awm lo, tih hi kan hre chhuak ṭan mék a ni. Hei vàng hian a ni, rorèl khelh tuma i insan uaih lai khan ka khap che ni. Khawvêl hi ka hmu chiang em em a, thawhrimna bâk hlimna a awm lo tihah hian ka chiang a.
Thawkrim hlim lo chu chhúngril inpêkna tel lova thawkrim a ni a, a thlàwn mai a ni. Ṭhenawm nu hlimsáng saw i hmu em? A hlimsàn vàngin kei aiin a hlimin i ring em? Ani, sakhuana chhendena mîte diriam saw an hlimna pui ber a ni a, awi karei! An tuina lam, làm leh zàwl-pùan ilova an thawhrim ém avangin an hlim ve viau tho vang. Eng thilah pawh inpêkna tak tak nèna thawhrim chuan mihringte hi kan hlim ṭhìn asin. Rim taka ruihhlo zuarte pawh, lenghnawt-ár khuan hnû tâwkfanga mutmu tuah tùra an hlawhsum nèna an insiamsìal meuh chuan, “Vawiin chu ka va hmu hnem tak êm! Ka va läwm tak êm! Thawhrim hi chawlhna nuam a lo ni”, tiin dam takin an chhíng tawh ṭhìn asin. Thawhrim hi hlimna a ni a, hlimna awm chhun a ni.
An hlimna chu hlimna ṭha lo, hlimna tlùantling lo va ni.
Ṭha lo chu engtinnge i teh dáwn? An hlimna chu hlimsángnu hlimna aiin a ṭha lo tih engtinnge i rèl dáwn? Hlimna bùkna i nei em ni? Bùkna nei mah la, tehfung an zuar em ni? I tuk chawp dáwn ngê? I mimal ngaihdàn ringawt hi mîten an hlut tawh lo; tarvuai, tar-kiring i ni a, a der bâkin i thü an bengkhawn tawh lo. Ṭhangthar dàn tharah meizang i hlap thiang tawh lo.
A zawrh-thil leisaktute chhungkaw hlimna a thlenin ka ring lo va, amah hlim mah sé, midang lungngaihna leh ṭahna a thlen nèna chhûtin khawvêl pum hlimna belhkhâwm tikámtu a la ni tho. Ka chiang. Ngawlvei chhúngkua an hlim rei ngäiin ka hre lo.
A dik mai thei; anmahni thü liau liau a ni. Hlimna hi mahni thü liau liau a ni. Kan hmangaihte boral mah sé, kan ngui duh loh miau chuan tunge min chhuahchhàl thei awm? Min chhuahchhàl mah sé, kan pawisak chùan loh chúan engnge kan chhîatphahna tùr awm? Kan rilru chhúngah hian, ṭhatna leh sùalna piah khawvêl a awm asin! Chü khawvêla léngte chu an eng a tháwl e. Chü rama léng tùr chuan a ni, nítin kan beih ni. Vàrpawh lote chuan ṭapin khawvêl an hrút ṭhìn. Intipachang ṭhìn teh mah sela, atàwpah chuan ṭahna tho, ṭahna tho. Hë ram luah pha lote fûat chuan kin ní a nei ṭhìn. Famkim lote intihchakna thar reng chu intùai thar reng hi a ni. I intùaithar reng chuan i chàu ngäi lo vang.
Teh hluai che chuan zanin chu! Kei pawh, kan thupuiah han lût leh ta daih ila, kan ram hi ka beidawnpui lek lek ṭhìn a. Mahsé, hruaitu fel neih a ngái lo va, mahni fel hi a tâwk a ni tih ka hriat rúal rúalin beiseinain ka khat leh ṭhìn. Mitin intodelh tùrin thawk ta ṭheuh ila, hruaitute fel loh mai mai chu eng atan nge kan tih ang? Duh leh hruaitute chu lal hrawtin lo inteiral mai mai sela, kei ka intodelh tho chuan engnge a pawina? Mitin kan intodelh tho chuan engnge? Anni thu näwi mai mai chu barah kan khawn lo vang.
A dik, a dik! Mahsé, mahsé! Mahsé engtinnge intodelh tùra kan thawh ang?
Rim takin a ni mai alàwm!
Rim takin thawk ila, intodelh ngawt mah ila, hausak asin kan duh mihring te chuan!
Suma hausak ringawt châkte chu an chung a pik e! Hausa lovin räwp ral mawlh rawh se! Ani, ram intodelh ahmaa hausak tum hi hlemhlêtna râpthlâk a ni a, hei vàng hi a ni, kan bùai mék ni.
Sum awlsam hi kan duh lutuk a. Thawhrim rah (मेहनत की फल? 
) kan hlut hunah chauh kan ram hi a hausa ang.
Sum awlsam kan duh ta rau rau chu, kan hmeichhiate hian an dawrhsum hi hmang ṭangkai ta mai se a nia ka tih ni! Ha ha ha! Kan nulaho hian an dawrhsum hi han semzâi êm êm mai sela! kan ram chu a ṭha chho êm êm ang. ‘Dawrhsum’ kan hman ṭangkài thiam chuan, kan ram hi dawrhna pialralah kan chan ang a, a ni, hnamtin aṭanga laltin te an lo fuan khâwm ang a, tlâkchham rëng kan hläu lo vang. Ha ha ha! Dawrhsum hralh-tla lo hi a awm thei lo vasin! Chû bâkah kan hmeichhiate hi dawrhsum malsawmnaa vûr sâin an lo piang zui a! A va ropui êm!
I va fiamthü chho reuh e! Kan mipate pawh bungbutsum nèn in lo píang vè râng tho valäwm, chutia tih lëmah! Ha ha ha!
—————————————————————————————————————————————————————————————————————————-
Nupa zàn titi chu, tar alamah pawh, atàwpah mutah bawk kan tlâk leh ngê ngê ṭhìn a.
Kan nu pawm vawng vawng chung chuan, “Ram hmasâwnna sawi sawi ai chuan, mahni hnà ṭheuhvah hian rinawm ila a lo sâwtsawhlawt zâwk ,” tih te ka ngaihtuah chho neuh neuh va. A pár tlàn chung chuan mihring nih hautakzia, hlimna tlùantling far khat lek pawh nei tùra thawhrim a ngaihzia ka hrechhuak chho leh rum rum a.
Zínga,
”Aw Bethlehem, Judai rama mi, Judai khawpuite zingah i të ber tawp lo ve,
I chhúng aṭangin awptu a lo chhûak dáwn si a,”
tih hlä kan ṭhenawmte zàitír chuan ṭawngṭai inkhâwm kal a hun tih min hriat chhuahtír a. Tûkṭhùan chawhmeh tùr thlài leina sum ka päi a, biak in lam panin ka tei chhûak leh tâ a. Chumi tûk Vanglaini chanchinbuah chuan, “Vai pathian hmaah CM a inhlàn em?” tih vêl mai mai te an khel lehpek a. Khawvêl hi a kaw lo ṭhìn mang e!
May 11th, 2012 at 7:04 am
chhiar i1a. .
Report this comment
May 11th, 2012 at 7:10 am
ekhai.! Ti ti ik ik..
Report this comment
May 11th, 2012 at 7:14 am
Lawngtlai district a Mampui khaw chanchin emaw tia. .
Report this comment
May 11th, 2012 at 8:10 am
Nia, a thupui khian min hruaibo. Post tha khawp mai. ‘Mampui’ tih hi tet lai leh tunthleng hian chhungte min koh duat ve na a nia. Daih mai a…post nen chuan in relate lo khawp.
Report this comment
May 11th, 2012 at 8:45 am
#3,… Nia Mampui khaw chanchin emaw ka chhiar dawn ka lo tia… he he.. a sei phian lehnghal….
Report this comment
May 11th, 2012 at 9:30 am
Ti ti ik ik ve tho.
Report this comment
May 11th, 2012 at 9:59 am
Report this comment
May 11th, 2012 at 11:33 am
Report this comment
June 26th, 2012 at 1:22 am
Ha ha ha!
Report this comment