(Kan thianpa Rela haw tum, Tatkal ticket chang hlawhchham, phar buai leh khawngaihthlak tak pual in he thu hi kan vawm bei ve leh ang e)
Kolkata khawpui hi Kumpinu (Bristish ho) hovin India ram khawpui ber an hman lai khan Mizo lal tlemte in an lo tlawh pawh tawh a. Chung lai chuan Calcutta a nih laia ni a, kan Mizo Lalte khan Calcutta chu awlsam tak a lam in ‘Kulkut’ an ti thin a. Fiamthu ah an sawi dan chuan Mizo Lalte khan Tuibur an keng a, Mizo te chuan tuibur in pek chu in duhsakna leh inthianna ah an ngaiin, Sap pakhat (An sawi dan in Bawrhsap an ti) an pe a, ani lah khan lo hre ve ngai hek lo, Zu emaw a ti a lo lem mai pek a. A rui ta a, a ek chhuak a, mahse, e thei lo nen an buai pha nasa khawp a ni awm a. Mizo Lal ten Sap turin an hrai an ti e tih te pawh a awm kha. Kum 1912 khan Delhi lakah India ram khawpui ber nihna a lo hloh tawh a, mahse khawpui ber nihna a lo chan tawh avangin Kumpinu ho hmun hlui leh hmun pawimawh tak tak cham bang tawk a la tam hle a ni. India ram mahnia inawp ram (Independent country) a nih khan West Bengal state khawpui ber (state capital) nihna a chang zui a. India ram khawpui lian lawr lak (Metropolitan Cities) zingah tel in khawpui pawimawh an sawi reng reng in Kulkut hi hmaih a ni ngai ta bik lo a ni.
Harsatna in tan dan chu:
A nihna takah chuan Kulkut hi zin pawh kan tum a ni lova. Ka thianpa Bacteria scientist (life science a PhD ti lai ) nen kan khua (lehkha zirna) Delhi kan panna lamah kal tlang puat mai tum kan ni zawk mah a. Thlawhna a thlawh tlang chu khualzin tam lai a nih avangin ticket man a to thin tiin sum remchem thu ah thlawhna in Kulkut kal a, chu mi zawh a rel man thlawm a zin chhunzawm tum kan ni a. Tum dan leh ruahman ang chuan tlai lam rel chhuak Kalka Mail in Kulkut kan thlen ni la la a liam nghal tum kan ni a.
Thlawhna tum hmun atangin kan han chhuak chiah chu buaina leh harsatna in min lo hmuak nghal tuk tuk a. Kutkut Taxi pu ho an nuar an ti a, rel station panna turin taxi in to fe maiin Lucknow-a ha doctor zir (PG ti lai) leh Pune a Nurse hnathawk te nen kan han in ek chhe beng phawt a. Station chu tluang tak chuan kan han thleng a. Kuli ho in an in chhiar to em avangin keimahni in kan in pu phei tawk tawk a, rel station mipui zi hut hut chu kan lut a…kan rel chuanna tur rel chu tiau chhum (fog) tam lutuk avangin an lo cancelled daih mai chu lo niin.
Pek lai a duh silo, pek loh dawn a ban ziu ziau
Scientist pa hi India ram sorkarin lehkha thiam avang pawisa an pek thin (CSIR JRF) a ni a. Pawisa lah hi a hmanna a hre hlawl lova. Naupang inawmlemna tur an an siam khelh chi play station te a lei vel mai mai a. Zu leh ruitheih thil dang chu sawi loh Kuhva tak ngial pawh ei lo khawp a tlangval thianghlim a ni a. A ni hian speed post (thlawhna) into deuh mahse i kal mai ang a ti a. Kei lah kha Mizoram lama kan chawlh chhung khan thingtlang kamding chet a lo che tawh, in hmang da lam ka ni na chungin aw tih loh theih a ni ta lo. Rel station atang chuan thlawhna tum hmun bawkah chuan kan let leh ta a. Kan naupang lai a “Pek laia duh silo, pek lo dawn a ban ziu ziau” kan tih ang maiin ticket lak theih lai a la duh hlei lo khan ticket kan va ngaihtuah thar leh ta rum rum a.
Thlawhna neitu lam lah khan kan harsatna an lo hre ru kiau emaw tih turin ticket chu a a let thum dawn in an lo ti to tlat mai. Aizawl atang Delhi cheng 80000 emaw 9000 emaw a thlawh tlang pirh perh theih lai kha a ngaihawm ta rum rum mai a. Ticket man pawh Kolkata atang Delhi tana awihawm loh khawpa to cheng 12000 tih te, ticket awm tawh lo tih leh a tuk thlenga ticket awm tawh lo tih te kha a nih avangin kan tum ngam ta ngang lova. Kulkut khawpui darkar tam pawh hmang lova vai liam mai kam tum chuan min ui bet ta tlat a, zan riah ngei a ngai dawn ta, kan tih theih a ni ta silo. Mizoram House a let a, a tuk a Rajdhani ticket black a lei bak option a awm ta lo, to deuh mahse lei thawr ka tum ta a.
Chhura te unau:
Mizoram house kan lut a, inrinni zan a ni a, Aizawl a inrinni inkhawm ban ka ngaih ta ram ram mai. Ka thiante inkhawm bang nula rim meilum bul a an ti ti sar sar mittla in a hmu nia mawle. Mizoram house-ah chuan ro kan han rel a, Scientist-a khan zing kara chhuak Poorva express risk a rawt a, mahse Rajdhani a kal ka rawt a, ka rawtna thlu ta zawk a. Rilru leh taksa a chau bawk a, kan mu tui phian a. Zingah hmanhnawh vak lovin tlai lam Rajdhani a mu thla der der tur in beiseina nen Mizoram House-ah chaw kan han ei puar ta peng pawng a. Rel station lamah chuan kan in zui phei leh ta hnek hnek a.
Rel station-ah chuan ticket kan han ngaihven a, Rajdhani ticket ikhaw a lo awm ta hauh lo mai. A nihna takah chuan zan lam a Poorva express a kal a rawt lai khan “lungphang suh Rajdhani ngei in kan kal dawn nia, ticket a awm hrim hrim” tiin chhe confi deuh in ka tawng thlamuan ve ngawt a, kan in thlamuan rei lo teh e. Sum sen deuh pawh kan in huam teh lul nen ticket a awm tawh bau silova.
Thlan tur dang a awm miau silova, kan kal theih lohna kan hnuchhawn san hnu (kan anchhe lawh hnu) Kalka mail bawk chu kan bel leh a. Kan chan a chau lutuk a, ticket pawh awm lo mahse Delhi kal a nih hrim hrim chuan ek in bulah pawh kan chuan a ngai tawh tlat. Zan dar sarih a chhuah tur rel nghak chuan kan chen ve na ngai loh Kulkut Howrah rel station ah chuan za lo fe fe in kan nui kan nui ta mai a, kan beidawng nuih a ni ber e. A tu a mah inmawhchhe tur kan awmlo, Chhurbura te unau kan inkawp lak lawh tawh miau a.
Rel station a mut te mai mai.
Tun hma rel kan zin ngun lai chuan rel chhuata mut hi ka thil hlau ber pawl a ni thin a. Ticket confirm nei lovin vawi hnih ka haw ve tawh a. Mahse, a chhuat emah chuan ka lo mu lova. Nikhua a lo rei a, rel chhuata mut te chu ka hlau ta bik lem lo. Tin, mut phei chu ka la mu ta bik lem hlei lova. Rel station-ah pawh hian ka la mu lem lo, mu turah pawh ka lo in dah lem hlei lova, tun tum chu a dan a dang tlat mai le.
Rel station-ah chuan thutna te chu awm ve bawk mahse kum thar lawm vuak vet atanga mut kham lo in pawt chuarin min thing leh a. Rel a zin tur zi nuk nuk karah chuan hahchawlhna tur awm chhun chhuat charah chuan puanthan man tlawm ber Newspaper phah in zak map lovin kan mut ve tak siak kha. A muthilh phei zawng ka muhil thei lem hlei lova.
Ka mu chu chanchin thar ka siam a ni tih hria in kan scientist-a chuan a lawm khawp a, ropui taka ka thiante hnena puanzar turin a phone camera chuan a lo la a. Khua a lo tlai a zan a lo nih chuan kan rel chhuah hun a lo ni ta reng a. Kan chhuah hma hian kan ticket leina ten ticket min comfirm pui a, scientist-a’n bungrua a lo veng a, engtikah tak ka tlawh chhunzawm leh ang maw tih tur Rel ofis-ah chuan ka han in lan zak zak hnu chuan kan anchhe lawh hnu Kalka mail chuan zan lam dar sarih leh a chanve chuan khawpui ngaihawm lo zet Kulkut chu kan kal liam san ve ta vut vut a.
Ka thlalak chungchang pawh kha scientist zawng zawng an fing bik kher lo tih lan tir nan rel a kan chuan laiin a phone atang chuan a hriat loh hlanin hmuh let leh tawh lo turin ka delete hmaks a. Delhi-ah ropui taka show a tum chu a hawihai ve chiang khawp mai. Kan pan khawpui Delhi lah chuan harsatna tawk teuh chung amah chu kan pan tih a hre lo nge ni thlasik vin tak mai nen min lo hmuak a. Autorickshow man tlawm a hman kan duh a leiah khawvawt kan han in ‘boksik’ leh hlak a. Zan khawtairek a bun fel hnu, zing lam a in tan mekah Aizawl a Lal fapa ang mai khan chhungkaw nu leh pa, chhiahhlawh hna zawng zawng thawk leh turin ka room riangte chu kan lut leh ta poh a. Ka in tih fel a, tui lum sa ver vawr a kan in bual fai meuh chuan dar pawh a lo kal dawrh a. Kan vahvaihna ram Kulkut reng reng ngai lovin ka mu ta siau siau a.
Similar Posts:
- Zin Kawng Part-I
- Kingfisher ah ka thlawk ve a
- India Ram Hmasawnna Ruhrel Chhuanawm
- Bareilly Road Trip (Part I)
- MITIN TA TUR CHANCHINTHA!
June 5th, 2012 at 10:04 pm
Kulkut?! “Kulkhut”
1st
Khawnge scientist-in engkim an hre veklo cc chu kan chhiar ang e hairehai
Report this comment
June 5th, 2012 at 10:04 pm
Chhiar ila… sei tha khawp mai.
Report this comment
June 5th, 2012 at 10:15 pm
Kolkata ah hian keini pawh chhiat tenau kan tawk tawh. Flight cancel vangin Rs 800 chiah neih tawh lamah rilru hah lutuk, chaw pawh ei mumal lovin ni nga zet kan han vakvai anih kha, Mizoram house kan chang silo, lum si, van hrehawm tak e aw!
PS: I ziak ngaihnawm hle mai, scientist pa chu min lo biak dawn nia
Report this comment
June 5th, 2012 at 10:23 pm
A title ka en a ka chhiar tum ang (rin ang) zu ni hauhlo a
A ngaihnawm khawp mai
Report this comment
June 5th, 2012 at 10:46 pm
I ziak thiam e. A ngaihnawm khawp mai
Report this comment
June 5th, 2012 at 11:32 pm
Ngaihnawm hle mai
Report this comment
June 5th, 2012 at 11:44 pm
Ngaihnawm khawp mai…
Report this comment
June 6th, 2012 at 12:21 am
Kulkhut leh flight rate a zero tam belh tih loh chu post tha tak a ni.
Report this comment
June 6th, 2012 at 1:41 am
Ti daih ila naktuk (vawiin) hian venus a transit dawna thla lak thiam ho kha lo in ring ru heihi tun century a hnuhnung ber ani tawh dawn, hman deuh kan college kal lai vel khan a transit tawh a, tun tum bak hi chu kum 105 hnu ah a thleng leh daih tawh ang. Lo lak fuh han tum teh u.
Report this comment
June 6th, 2012 at 1:47 am
#9 funny, nalh tawkin thla lo la la, ilo post dawn zu nia, kan la ve thiam silo keini’n
, a transit leh hun meuh chuan kan tute fate lehchhawng emaw kha an lo misual ve ngei tawh awm sia 
Report this comment
June 6th, 2012 at 2:27 am
Ngaihnawm khawp mai
Report this comment
June 6th, 2012 at 2:27 am
Sori lutuk KULKUT emaw ka ti a, a lo KHUT zawk a ni awm e. KULKHUT tur a ni zawk a ni e. Pu Hv, min rawn correct ka lawm e. A hnu lehah chuan hman dik ka lo tum tawh ang e…..
Ngaihnawm in rawn ti liam liam a, ka lawm e. A sei delh dawlh hle mai a, mahse khi pawh khi ka tan bun tawh hnu a nih khi….Kei te hi thu hla nei tha mang lo hian ka tlak duah zel thin a, ka sim thei lo a nih ber hi maw…
Report this comment
June 6th, 2012 at 2:36 am
Kulkhut chu anih zawk hmel, mahse kan hrethiam vek tho ania
Report this comment
June 6th, 2012 at 3:15 am
I adventure lampang hlir ila ziak,a ngaihnawm zel.
Bo te,buai chuk chuk te hi keipawh ka nuam tih chi. 
Report this comment
June 6th, 2012 at 4:15 am
Report this comment
June 6th, 2012 at 5:05 am
A ngaihnawm e.
Report this comment
June 6th, 2012 at 6:47 am
A ngaihnawm zek. Thuziak dan kalphung(style) hran inei hi atha ka ti bawk.
Report this comment
June 6th, 2012 at 10:22 am
Hmmm, Vaivawm ngawt ai chuan in lawm zawk a ni maw…. He Scientist pa nen a kan chet tlatna hi ziah felsa diam ka nei a, ka mood that dan a zirin ka la rawn phawrh leh dawn nia. Hahahahha
Report this comment
June 6th, 2012 at 3:00 pm
tiang hi chu ahnu leha ngaihtuah let hian lungte pawh ati leng duh in nuihna ati tam duh sin
Report this comment
June 6th, 2012 at 3:15 pm
A ngaihnawm hle mai…
Natnahrik Scientist-in, uluk taka i thla a laksak che chu han post tel la, a HOT leh zual tur a nia aw..
Report this comment
June 6th, 2012 at 3:17 pm
Thu hi ka lo ziak thui thei viau emaw ni le, Kan Scientist pa hi ka thuziak lo chhiar ve ta che ka va ti a, a sei leh awm si a lo nghal mawle…..Anyway, ngaihnawm in lo ti ve hlawm niawm tak a ni a,lawmawm e.
Report this comment
June 6th, 2012 at 3:58 pm
Find your answer of National paralegal college…
[…]KULKUT ZIN | mi(sual).com[…]…
Report this comment
June 6th, 2012 at 8:00 pm
Pu chhing, a va tha ve. Kulkhut tih zawk tur tih chu sr member-ten an rawn ti chiang tawh a ka sawi nawn lo mai ang! A lam dan mawlh hi a nalh- ren run tiha run thluka ‘kul’lam phawta ,tlawk phut tih thluka ‘khut’ tih leh tur Ka pu(b.1916)-in a ti!
Nimin lamah Mizo Dr leh Er te min hmusit tha duh lo hlawm em a(member thenkhatin) ka line lo lam ka’n thai ve zuai a ni. MBBS pass chu sawi loh zir tura tlin ringawt har ziate lah chu an hre ve si lova….Kan senior Central Service Officer za a 95 tekha dr nih tum tling si lo an ni an ti(hei hi IAS pension tawh min hrilh). Ka tha a na deuha ka’n zep hram a ni. Ngaihdam ka ngai ngei ang..
Report this comment
June 6th, 2012 at 11:36 pm
Ekhai a va lawmawm em. A lam dan dik thlengin min zirtir a. A lawmawm hle mai
Report this comment