Engtikah nge ni ang, Lalpa?

September 16th, 2012 9:00 am by evergreen

Khuang pu chuan, “Ni ropui alo thleng dawn ta, Kan nghah Lal Imanuel..” tiin a han la dap dap a. Chutah mipui an phu suau a, Haleluiah Amen-in a chhunzawm nghal a. Lam lo reng kan awm lo. Vawi eng zat nge kan sak nawn ka hre ta mai lo. Kan sak chhung zawng chuan ka rilruah thil tam tak a lo lut a, mittui nen, hnukulh teuhvin ka sa chhuak ve hram a. Kan sa zo chiah chu han thlan nawn leh tak ka nap a, mahse, tunlai tawng takin ‘over’ min ti ang tih ka hlau si, ka insum ta zawk a.

Ringtu tam tak, chanchintha avanga hrehawm tinreng tuara, an hun pum lo hlan tawh te ka ngaih tuah let a. Kei zawng, Isua hnung zui turin ka inpe ve tan det det chauh a ni a, anni kawng lo zawh tawh chu khaihkhin phak rual a ni lo. Mahse, rei lote chhung pawh hian harsa ka va’n ti tak em! A eng-a-mah hmain ‘Engtikah nge ni ang Lalpa, hnehna ni kan hmuh hun tur..? tiin ka van ruai ta mai a nih hi!

Ni e, rei lote chhung ngawt pawh hian sualin min bei nasa hle mai. Ka tunhma nun ka chhut let a, keima pal buak ngeiah, inchhir leh zak ngawih ngawihin ka awm a; Lal Isua ka lo phatsan nasat tawhzia te, mite mit hmuha ka lo tihmualpho nasat tawhzia te, tun-a-taka ka beidawn veleha Amah ka pan leh si te hi…; ‘Min ngaidamin min lo pawm thei tak tak dawn em ni?’ tiin ka ngaihtuah a. Rinhlelhna chuan, sualin hmangin nitin min zui reng a.

Mite min ngaihdan turte ka chhui let a, min nuih zata min hmusit turte chu hmu tlang lo ka ni lo. “A ni reng mai dawn a sin, a inhmuchhuak har ngawt zawk a lawm” an ti tur te, “A mualphona thup mawi tumna mai mai leh thiam inchantir a tumna mai mai a ni” an ti turte chu ka ngaituah a. Chu chuan ka nun a tilungngai em em a, harsa ka ti thin!

Nitinin thlemnate’n min zui reng a, ka lo tih tawh thinte chu a hma aia nasain ban phak maiah a awm reng , a hmel ala danglam lova, a rim lah a tui ngaiin ala rimtui reng si! Insum a harsa ka ti thin! Chu mai a ni lo, tlangval ve na fam chu ‘Ngaih-varung-thawn’te kan lo nei ve a, hmun rem chang, fianrial leh mite hmuh phak loh chinah han thawn thut mai duhna thinlung neih changte hian Isua hnungzui hi a va’n harsa tak em!

He khawvela kan cham chhung hian hmangaihte nen hlimtakin leng thin mah ila, thinlung na taka inhliam chang a lo thleng a, rilru na ngawih ngawiha mittui nen inthen ni a thleng fo thin! Thihna kut vawtin kan thenrualte leh lainate min laksak changte hian Pathian remruat hi hriat thiam a va’n har tak em!

Nun tlawm tak mai neih reng ngai te hi a va’n har thin tak em! Chapona te, tha intihnate, mahni indahsanna te, thei ve nia inhriatna te a lo thleng fo thin. Mahse, chu nun chu hal ral vek a ngai si. “Awm zawng zawng an ral hunah Awma ka ta a ni” ti thei nun neih te hi a va’n har tak em!

A ni, khawvela kan cham chhung hian kan duh emaw duh lo emaw sualin min bei reng a, sual nen kan inngheng reng mai a nih hi. Pathian tan inhlan tawh mah ila sual tih chakna chuan min kiansan si lo. Kawng hrang hrangin min bei a, harsatna lehmanganna ten min chim a, khawhar takin thlaler ram ro leh tui kha hmun te ka thleng thin. Hawi kir duh mai a, Aigupta sa bel ka ngaih vawng vawng chang ava tam thin em!

Mahse, ‘Hnehna Ni’ kan hmuh hun chuan sual vanga ka rumna ram hi ka hnuchhawn tawh ang a, buaina chhumte’n chim phak lovin Lalnunnema kiangah chatuanin ka chawl hlen tawh ang. Chutih hunah chuan sualphuar behin a awm tawh ang a, setana leh a hote tih tlawmin an awm tawh ang. Inthen a awm tawh lovanga, thihna leh natna te’n hmun chang tawh lovin thihna ngei pawh hi a thi ve tawh ang. Ka lungngaih mittui lung zawng zawng te hi Isua’n min hruk hul sak tawh dawn a ni.

Mithianghlim Stephan-a chuan amah dengtute leh an denna lung en lovin van lam a thlir tlat a, Isua, Pa dinglama thu a han hmu ang khan, mite’n min selin, hmusit leh endawng tuar thin mah ila engtik niah emaw chuan ‘Hnehna ni’ ka la hmu ve ngei ang a, ka tan zalenna dar ala ri ve ang. Chu hun chu “ Eng tikah nge ni ang , Lapa?” tiin nitin ka thlir thin!