mi(sual).com

Atheist ho tana pawm nuam deuh turin Isua thusawi thinlung pawimawhna kha chu sawi tel kher lo ta ila, kan hre tlang vek tho ang a, engati nge Mizote hian heti tak maia ZU kan han buaipui mai hi tih hi thla hmasa atang deuh khan ka rilruah a awm tawh a, exam neuh neuh nen, ka rawn ziak hman ta lawk lo mai chauh a, thlasik mau puah pui leh phawng phawng mai ila, a che che sih hlawkah, a ngui ngui banah aw..!!!!

Philosophical takin i han ngaihtuah teh ang aw!! Hlimna hi engtin nge mihringin kan neih theih ang? Hlimna tura kan thiltih chi hrang hrang hi han ngaihtuah ila, zu in, drugs ruih, dendrite hnim, party kal, lam, adt hian hlimna reilote chu min pe ngei mai ti rawh u. Ngaihtuahna a tih nut phut hnuah phei chuan ‘zauthauna/ tih zawk zawkna’ min pe a, rui lo hai lova kan tih duh loh pui pui kan tih nulh nulh fo thin hi ti rawh u.

Hlimna hi hetianga pawnlam thil atanga kan lakluh tum luatah hian a ni lawm ni, Mizote hian thil engkim kan hman thiam loh ni? Hlimna hi pawnlam atanga chawhnun vak theih pawh a ni chiah lo asin, ka unau..!!! Thinlungah, rilruah hian ‘feelings’ leh ‘emotions’(Mizo tawngin ka dah thiam tlat lo, tihpalh) hi a awm sa ve hrim hrim a, chu feelings awm sa chu miin a chawh thawh thiam dan hmang hian mihring zia pawh a lo danglam mai a ni.

Pathianin mihring a siam khan heng emotions leh feelings kan tihte pawh hi mihringah hian a siam tel vek a, chumi chawk phur thiam leh a hmang thiam apiang chu mi vannei an ni chauh zawk a ni. Chu feelings mihringa awm kan chawh thawh dan a zir chuan mihlim thei bik te, lungngai reng mai te, zak thei lo reng mai te, zakzum em em maite hi mihringah kan lo awm mai chauh a ni. Chu chu hrechiang ila, hlimna kan um dan hi i hrethiam teh ang u.

Heng feelings te hi mihring leh mihring kan in chawh thawh sak thei nasa ber a, tin kan mihringpuiin a chawh thawh tura kan feelings te hi Siamtu hian a duan a ni. I chhungte/ nupui pasal/ ngaihzawngte hmangaihna chuan nangmaha hlimna leh hmangaihna awm a chawk nung fo angin, nangmaha hurna leh inpawngnekna, itsik chapona pawh midang hmanga chawh nun fo a ni. Mi amaha a awmin tumah a itsik em em ngai lo, midang a tluk loh leh ei loh deuh a hmuh chiahin a ni a itsikna feeling kai tho thin ni.

Chuvangin, han ngaihtuah teh, zu/ruihtheih thil avanga i feelings chawh thawha a awm hi i phal em ni? Zu avanga i hlimna hi darkar engzat nge a daih?? I feelings chawh phur sak tur nei lo khawpa mihring chuangtlai i nih erawh chuan zu in la, drugs rui rawh, mihring lainattu nei lo, kawm hlimtu nei lo inih avangin tlukluhna tur dang i nei si lova, i khawngaihthlak hle a ni. Chutiang mihring i nih ngawt loh chuan engvangin nge hetiang pawnlam mihring siam chawp thil mai mai chawh phur tura i thinlung hlu tak chhunga siamtu duan sa feelings te kha i phal le??

Zu chungchang lo khel ta bik ila. Zu a Alchohol awm hian pumpui kaltlangin thisenah a lut a, thluak a han thleng a, hriatna thazamah hna a thawh chiah hian hmui a chhah tap a, kan ni chem chem a, khami nuam veng veng kha a ni lawm ni zu in mi hian kan tum ber fo. A in thiam lo zual an lo luak a, a nasa lehzual an chatthla a, tin, thihna khawpa nasa pawhin a in theih hial mai. Hlimna leh nawmna hi zu ah hian kan beisei a, a hrisel em a, taksa tana tha tih vanga in hi zu in tam zawk leh zu fakmawi tam zawk hi an ni lem tlat lo mai.!!!

Zu khap vangin drugs a pung a, ruih theih thil kan dap tam tulh tulh tih hi dawt mai mai a ni. Zu khap bur a ni chung pawhin lei tur a awm reng thova, drugs lah chu ruihna khawp chu zu aiin a to bawk si, chuti chung chuan zu khap anih avanga drugs hluar taah kan puh tlat lawi si a. Zu kan khap bur a, zu lei tur a awm reng tho si a, chuvangin khap hi a lo thlawn mai a ni, i khap tawh lo law law ang u kan la ti fan a, khawvel ram ropui leh an ne pawh kan eh phak loh tura ram ropui te pawhin ram dang dova a tluklehdingawn sum senga an do ruihhlo an khap rem theih loh avanga chawlhsan ta ka hre ngai hek lo..!!

Zu kan khap loh avangin zu chhia a tlem sawt ang maw?? Teuh lo mai. Hman deuh lawka West Bengal, Assam vela zu chhe in avanga mi 200 aia tam nikhata an thi puk puk te kha, zu khap lohna state vek a ni miau… Zu chhia chu a awm reng a, thih nghal theihna khawp tura zu chhia a rawn lang chhuak zeuh zeuh a ni mai zawk.

I tana lei a awlsam zawkna tur leh, zu tha leh hrisel i in theihna turin a khapna dan i sawisel a, i thenawmte kawtkaiah thihna dawrpui rawn hung rup mahse nang chuan pawi i ti lo maithei. Amaherawhchu, kawtkaia lei tur a awm loh avang leh khap anih avanga kan nu leh pa, kan unaute rui lo hai lova kan hmuh avanga lawm tak tak hi kan tam asin.!!!

A in duh chuan an in anga, a duh lo chuan an in lovang i ti maw? ZU/ Ruihhlo leh Bubble gum hi class khata dah chi a ni lo. Kan nu leh pa, u leh nau, in chak takte pawhin sawrkar khap anih avang leh duh duha ban mai tur a awm loh avanga an insum ve tang tang hi keini zu leh ruihtheihthilin a tihbuai chhungkaw tan chuan a hlu em asin..!!!

I duh chuan i duh hun hunah sap zu pawh i in thei a ni lawm ni, buh zu pawh engtik lai pawhin i ruihna khawp tur i hmu a ni lawm ni, engati nge midang tana kep i tum talh mai le..!!! Midangte pawhin zu tha in ve se i tih vang a ni chiah angem?? Zu leh ruihhlovin a tihbuai chhungkua te chuan banphaka a awm loh nan thaw dep depin kan lo tawngtai fo  reng asin!! Blade hriam takin amahin mi a zai ngai lova, a hmangtute zir a ni i tih tlat lai khan naupang bula dah mai mai chi a ni lo tih hrechiang bertu i ni tlat lawi si..!!!

Similar Posts:

• Khapna ni lovin Duhthlanna zawkin le….
• Chawh rualin…
• A sakhming kan sêl e
• Zu chungchang ka hmuh ve dan tlem:-)
• ‘Zu’ Zunzam

Recent Posts:

• C.P. Road
• Thalai ni si:
• Ruatfela Nu thu leh hla
• Thingkha Par Lai – Nghatun Mut Hun (Ka tawn hriat te) !
• Chiahpuam Part II

This entry was posted on Saturday, December 1st, 2012 at 6:19 am and is filed under Opinion, Zu. You can follow any responses to this entry through the RSS 2.0 feed. You can leave a response, or trackback from your own site.